Fiestes

El próximu día 6 d’ochobre celebrará la quinta edición del Día del Senderismo n’Ayer”, entamada pol Conceyu d’Ayer, cola collaboración del Grupu de Monte Ultra. La iniciativa cunta col patrociniu de Caxa Rural, Agua de Cueves, Asturiasdecerca.es, Grupu Miravalles, Supermercaos Donata, Spa La Minería, Diseño Área Norte, Joluvi, Cuadonga Sport y Gráfiques Rigel.

La presentación del eventu tuvo llugar esta mañana nel Centru Cultural de Moreda y foi llevada a cabu pol Alcalde del Conceyu d’Ayer, David Moreno Bobela, pol presidente del Grupu de Monte Ultra de Moreda, Jorge Faes y pol Director de la oficina de Caxa Rural de Moreda, Roberto Carlos López Seixas.

La conmemoración d’esti día tien l’oxetivu de promocionar el senderismo ente tou tipu de públicos y fomentar la iniciación na práctica del mesmu. Coles mesmes, escuerre dar a conocer la rede de senderos d’Ayer, unu de los principales activos turísticos del conceyu.

Tratase d’una xornada na que los asistentes van tener la oportunidá d’esfrutar del monte acompañaos por espertos montañeros y d’afayar la naturaleza y los paisaxes qu’ufierta l’itinerariu. Anguaño la ruta escoyida pa celebrar el Día del Senderismo foi la de Megalitos d’El Padrún, homologada como senderu de pequenu percorríu (PR-AS 266). El percorríu, que parte y remata na localidá de Bo, ta catalogáu con una dificultá media y tien 15 kilómetros 353 metros de llargor. Prevese que los participantes percuerran esta distancia en cinco hores y media aprosimao.

Unu de los curiosos más importantes qu’ufierta la ruta, amás de les pimpanes vistes y del paisaxe, ye la posibilidá de visitar los Megalitos del Padrún, una necrópolis de dómina Neolítica asitiada n’El Padrún, a 1.195 metros d’altitú. Coles mesmes, los participantes van poder percorrer un tramu de la Vía Romana de La Carisa (GR 100.1), nel que parte del itinerariu escurre per esti senderu de gran percorríu.

Pa participar ye necesario realizar inscripción previa, que va tar abierta dende’l 20 de setiembre hasta’l 2 d’ochobre. L’importe de la inscripción ye de 2 euros ya inclúi los tresllaos n’autobús día y vuelta ente Moreda y Bo, según el avituallamiento. Ésta podráse formalizar a cualquier hora per teléfonu (627 383 972) o n’horariu de 20:00 a 22:00 hores presencialmente na see del Grupu de Monte Ultra (Avda. Tartiere, 12. Moreda).

El programa de la xornada preve que la salida de los autobuses dende la Plaza de la Ilesia de Moreda tenga llugar a les 10:00 h. La ruta va empezar dende la localidá de Bo a les 10:30 h y a les 13:00 hores realizará un reagrupamientu y van apurrise les bolses de avituallamiento a los participantes nos Megalitos d’El Padrún. Los autobuses de regresu van salir dende Bo a les 17:00 hores. Amás, van sortease dos accesos dobles pal Spa La Minería de Felechosa ente toles persones inscrites.

Un añu más va facese la fiesta de la bicicleta de les fiestes de San Mateo, pesllando con ella esti añu la Selmana de la Movilidá qu’entamara’l llunes n’Uvéu y Xixón.

En Xixón, les xornaes de la Selmana de la Movilidá incluyeron visites escolares a les cocheres de Emtusa y actividaes d’educación vial nel Parchís. Y Amás, y de manera esperimental, los ciclistes van tener a la so disposición un carril bici nel Muriu, dende la ponte del Piles al Conceyu, pa testar una nueva fórmula de convivencia.

Esti sábadu hay tamién cursos de nivel 0 y nivel 1 pa adreprender a andar en bici, tanto n’Uviéu a partir de les 12, na Esquina de Toreno cola Cai Uría, como en Xixón, alrodiu la Plaza’l Parchis.

La fiesta de la bicicleta n’Uviéu entamará’l domingu a les 11 de la mañana, con una concentración de bicis qu’apartir de les 13,30 fadrán el siguiente percorríu: Plaza de los Ferroviarios(La Losa), Avenida Príncipe de Asturias, Cl. Samuel Sánchez, Cl. Marcelino Suárez, Cl. Vázquez de Mella, Plaza de Gabino Díaz Merchán, Paseo de la Florida, Paseo de la Florida, Cl. Manuel del Fresno, Cl. Vázquez de Mella,. Cl. Marcelino Suárez, Avenida de Colón, Cl. Real Oviedo, Avda. de Galicia, Cl. Santa Susana, Cl. Marqués de Santa Cruz, Cl. Uría, Cl. Argüelles, Cl. Jovellanos, Cl. Azcárraga, Cl. Tenderina, Cl. Siero, Cl. Noreña, Cl Rio Sella, Cl. Rio Eo, Avenida de Atenas, Avenida del Cantábrico, Cl Jesús Sáenz de Miera, Cl Pepe Cosmen, Avenida de Santander, Cl. Independencia, Avenida Príncipe de Asturias, Plaza de los Ferroviarios(La Losa).

Hora de salida: 11:00h (concentracion) 11:30h (salida)

Más de 2.500 persones desfilaben esta tarde de xueves peles cais d’uviéu pa poer adornar unu de los eventos más tradicionales de les fiestes de San mateo: El Día d’América n’Asturies. Un pasacais teatralizáucon más de cuarenta actores que fain emulaciones de la emigración asturiana a América de los años de la fame.

Per primer vegada en 63 ediciones, el públicu puede ver esta vegada desfilar dos autobuses asemeyaos a los que s’emplegaren nes celebraciones futbolístiques, decoraos n’homenaxe a Brasil y a Tampa, la ciudá de Florida hermanada con Uviéu.

La cantante de tonada que ñaciere n’Arxentina y fía d’emigrantes asturianos pero casina dafechu, Anabel Santiago, desfilaba amás cantando, mentantu Tina Gutiérrez ponía voz a los grandes clásicos cubanos acompañada pela banda Cubanacán.

Y un grupu nuevu de rock, Queen Bitch, diba xubíu a un xarré pa poner el contrapuntu al restu del espectáculu, nuna estampa bien nidia de l’Asturies del pasáu que, visto lo visto, bien se parez a la d’anguaño

Dende esti vienres 13 al domingu 22 de setiembre, la Xunta pola Defensa de la Llingua Asturiana, Xega, SOS Racismu y La Madreña ponen nes Fiestes de San Mateo, n’Uviéu, el yá míticu chiringuitu EL TOPU FARTÓN.

Y como en tolos años pasaos, la llingua asturiana va ser la llingua vehicular de la mayoría de les actividaes culturales y musicales que van desenvolvese nel chiringuitu a lo llargo de toos estos díes de folixa.

Páxina en Fachebook d’El Topu Fartón

La Coleutividá Asturiana de São Paulo, celebró’l pasáu domingu’l Día d’Asturies, cola so tradicional Romería, qu’anguaño llegó a la so 55ª edición. Aprovechando’l soleyeru dia, los asturianos residentes en São Paulo axuntar pa homenaxar a Ntra. Sra. de Cuadonga, patrona de la rexón, nes instalaciones del Llar Santa María, onde ta la cancha polideportiva Cuadonga, construída va años con ayuda del Principáu.

La Santa Misa empecipió los actos de la Romeria, onde son recordaos socios y amigos de la coleutividá que finaron nel últimu añu. La homilía, ufiertada pol Padre Flávio, tuvo la presencia de pocu más d’un centenar y mediu de persones, y foi celebrada con un emocionáu y devotu interés pola coleutividá presente.

Al términu de la misa, la imaxen de “La Santina” salió en procesión, al son de gaita y tambor, llegando al so altar d’onde presidió los festexos. El “bollu-preñau” y el vinu nun faltaron al alcuentru siendo distribuído mientres el día pa los amigos y socios.

Tuvo presente en los festexos el Presidente del Conseyu de Residentes Españoles en São Paulo, Arturo Chao Maceiras, y esposa. La presidente de la Coleutividá Asturiana de São Paulo, Charo Concepción Fernández, estimó la presencia de toos y l’esfuerzu del equipu del Llar Santa María pol trabayu na preparación de la Romería.

La Feria de los Quesos Artesanos d’Asturies, qu’esti añu cumple’l primer cuartu de sieglu, celebrase en Morcín el domingu 15 de setiembre con un programa d’actividaes que tendrál so momentu cimeru a les 13:30 hores cuando se faiga entrega del premiu al “Meyor Quesu 2013 d’Asturies” que premia y reconoz el llabor del queseru más destacáu a lo llargu del añu.

Esti 2013, la Feria de los Quesos Artesanos d’Asturies va acoyer l’hermanamientu ente’l Pueblu exemplar de Bueño y La Foz de Morcín y la tradicional exposición y venta de toles variedaes queseres que se producen n’Asturies. Pero les actividaes van entamar amás, precisamente, cola recepción pola Banda de Gaites Soto de Rei a la delegación del pueblu de Bueñu entantes de qu’entame la demostración pública d’ellaboración de quesu Casín, a cargu de l’artesana Marigel Álvarez, y del Afuega’l Pitu, al cargu de Margarita Mier.

A les 11:45 celebrarase la tradicional cata ciega de quesos na que puen participar tolos mayores de 16 años a los que-yos pete y al mediudía fadráse la procesión y misa a la Virxen de la Probe. Al mesmu tiempu va desendolcase una exhibición de bolos y media hora depués la degustación pública del primer xeláu de quesu d’Afuega’l Pitu y de los primeros buñuelos de quesos artesanos d’Asturies.

El pregón que dará esti añu Kike Ojanguren fadrase a les 13,15 hores y a les 13:30 hores fadráse la entrega del premiu al “Meyor Quesu 2013 d’Asturies” que premia y reconoz el llabor del queseru más destacáu a lo llargu del añu.

Tres de la “comida de hermandad” en tolos chigres de La Foz axuntaráse’l xuráu que tien de fallar el premiu de “Queseru Mayor d’Asturies” y a les 1º7 hores entamara la preparación de la mayor tosta de quesos artesanos del mundu que se fai esti añu cola colllaboración de les sidreríes Tierra Astur y el pan d’escanda Speltastur, con degustación gratuita palos asistentes.

La Xunta pola Defensa de la Llingua Asturiana forma parte del Llar Solidariu xunto con SOS Racismu Asturies y Xega. El Llar Solidariu ye un espaciu abiertu tol mundu, plural, democráticu y autogestionáu dende’l que defendemos valores de igualdá, de solidaridá, de llibertá, de xusticia y de paz, que son tresversales a les tres organizaciones.

Como cada añu los colectivos citaos monten a lo llargo de toles Fiestes de San Mateo, n’Uviéu, el yá míticu chiringuitu El Topu Fartón y nun ta de máas facer alcordanza de la importancia que tien la presencia de la XDLA nuna de las fiestes asturianes que más xente atropa como exerciciu de visibilidá y normalización. Amás de los oxetivos de sensibilización social sobre la situación de la llingua asturiana y la necesidá d’algamar l’estatus d’oficialidá y unes polítiques normalizadores series que aseguren el fururu del idioma; El Topu Fartón tien tamién otra función, más prosaica si se quier, pero bien importante nestos tiempos pal ddesendolcu de les campañes de les asociaciones, esto ye, la financiación de munches actividaes y infraestructures que d’otra manera diba ser bien difícil mantener.

Por mor d¡ello pídese la participación de tol mundu: sti añu les fiestes entamen el vienres 13 de setiembre y acaben el sábadu 21. El Topu Fartón va abrir dende’l viernes 13 (depués del pregón, sobre les 20.00 hores), hasta’l sábadu 21 sucediéndose seis turnos diarios.

Fueya pa solicitar turnos de collaboración

La fiesta más nomada de l’asturianía nel occidente va volver a

Cadavedo esti domingu con La Regalina, un festexu qu’entamará’l sábadu pela mañana con xuegos pa los pequeños de la casa, pasacais, quedada motera y verbena, pero que tien so día grande’l domingu. Como cada añu, el campu de La Regalina o La Riegla volverá a tener un programa enforma atractivu con muchu folklor y música de nueso.

El tradicional desfile folclóricu de les alfiladas saldrá a les once de la mañana (dende’l barriu de Tosquila) y cuntará cola participación de les bandes de gaites «La Reina del Truébano», de Navia, «El Enxambre» y «Aires de Valdés». En La Regalina van dase cita los grupos de baile «Brisa d’Aguilar» (Murios del Nalón), «Xovellanos» (Xixón), «Fonta la Faya» (Valdés), «La Regalina» (Valdés) y «Ruxidera» (Mieres).

El campu de La Garita va ser escenariu de la llectura del pregón, prevista a los dolce y cuartu de la mañana del domingu al cargu de Xosé Manuel Fernández. Tres esta llectura, va tocar baillar la danza prima en presencia de la Virxe de la Riegla que recibe la ufrienda de alfiladas. La procesión pel campu y la misa van poner fin a los actos más sobrios. De siguío, van actuar los grupos de coros y dances, que van poner color a la fiesta tamién mientres la tarde. van facer nel campu, un escenariu cerca d’un horru con espectaculares vistes al mar Cantábricu.

ç

La Regalina va acoyer amás la entrega a Xurde Fernández del XX Premiu de Poesía ‘Fernán Coronas’ Padre Galo qu’algamó pol so poemariu ‘Difícil’.

El premiu tien abondu prestixu n’Asturies y lleva’l nome d’un de los escritores de referencia de la historia de la llingua asturiana. Según indica l’acta del xuráu, Xiurde Fernández algamó’l premiu nesti 2013 por “las potentes imáxenes, la unidad temática ya formal del poemariu, ya´l dominiu ḷḷingüisticu del autor” que foi lo que llevó al xuráu a escoyer por mayoría’l trabayu ‘Difícil’ como’l ganador.

La empresa asturiana Les Camisetes ta acabante asoleyar un cartelu pal Descensu Internacional del Seya n’asturianu. Dempués de ganar el concursu popular pal diseñu del cartelu, que de forma obligada tenía de dir en castellán, la empresa tomó la iniciativa y asoleyó tamién una versión n’asturianu del mesmu, corriendo colos gastos d’impresión. Iniciativa pol Asturianu felicitó a la empresa pol so compromisu llingüísticu, pol que tamién ta venceyada a la campaña d’esta organización “La empresa asturiana muévese” y anima a la organización del Descensu a usar l’asturianu nos cartelos de les vinientes ediciones, implicándose más, yá que nesta ocasión autorizó la so realización, pero usen davezu la versión en castellán.

El cartelu ye de 60×40 cm y puen recoyese de baldre (dos cartelos por persona) nes tiendes Les Camisetes de Xixón, Uviéu, Ribeseya y Cangues d’Onis . Ye la primer vegada que s’emplega l’asturianu nun cartelu oficial nos 77 años de vida del Descensu.

Les Camisetes ye una empresa familiar fundada nel 2003 en Cangues d’Onís por Miguel Cayarga, a la que posteriormente sumáronse los sos hermanos. Faen moda testil, coses pal llar, bisutería y personalización de productos gastronónicos too ello con un diseñu propiu y venceyáu al productu de souvenir, nos que tienen por vezu l’usu del asturianu. Nel mes de xunu participaron na presentación de la campaña “La empresa asturiana muévese” d’Iniciativa pol Asturianu, celebrada na sede de la FADE n’Uviéu cola asitencia d’una docena d’empreses que yá usen l’asturianu.

El Conceyu de Xixón quier potenciar la cultura atlántica común, entamando un gran festival que sirva de nexu d’unión y plataforma d’intercambiu ente los pueblos que configuren l’Arcu Atlánticu Européu. El Mar, ye un elementu sustancial de la hestoria de la ciudá y tamién del d’otres munches ciudaes atlántiques europees. Les rutes marítimes y los espacios portuarios texen redes culturales y comerciales que xunen estrechamente l’espaciu xeográficu onde s’asientan. Esti proyectu pretende contribuyir d’una manera práctica a l’articulación d’una rede de collaboración cultural y económica ente les ciudaes d’esti ámbitu xeográficu y yá tien programa pa esti branu, con actividaes a lo llargo de xunetu y agostu.

Cada añu, un país o una ciudá ye oxetu d’especial atención nel festival. En 2013 va ser Francia al traviés de la ciudá de Nantes, cola que xune un venceyu especial a Xixón, al traviés de l’autopista de la mar.

El Festival Arcu Atlánticu 2013 crez y ábrese a la participación d’otros conceyos d’Asturies. Amás de Xixón, Carreño, Ribeseya, Siero, Valdés y Villaviciosa darán-y una nueva dimensión arriqueciendo la programación. Cada conceyu va presentar un stan en Xixón y en caún d’ellos celebraránse diverses actividaes del programa del festival.

El mar, la lliteratura, les artes escéniques, les artes plástiques, la música y la gastronomía van tener nuevos escenarios y van ocupar les cais y places de Xixón y de los cinco conceyos asturianos que s’entornen con entusiasmu nesti festival.

Anguaño l’escenariu principal del Festival va ser la zona d’El Muelle, dende los Xardinos de La Reina hasta la punta de Liquerique , pasando pela Plaza’l Marqués, la Plaza Mayor y otros escenarios como’l Teatru Xovellanos, el Centru de Cultura Vieyu Institutu, los museos Municipal y La Llaboral Centru d’Arte y Creación Industrial.

Programa completu del Festival