Festival de Lorient

Jesús Fernández intentó ganar otra vuelta esti sábadu’l Troféu McCrimmon de gaita solista nel Festival de Lorient, dedicáu a les gaites asturianes y gallegues, como ficiera l’añu pasáu, pero tuvo duros competidores ente los gaiteros asturianos que conformaben la delegación d’esti 2014 y nun pudo pa cola perfecha actuación d’Alvaro Álvarez, brillante ganador del McCrimmon 2014. Los asturianos tenien toos ellos muncha más esperiencia que la delegación gallega y por mor d’ello favoritos pa traer pa contra Asturies el Troféu. Nel vídiu, el ganador d’esti XXIX Troféu McCrimmon na so interpretación.

El concursu allargose como tolos años asocede nel marcu del Festival de Lorient a lo llargo de más de tres hores a les que se vieno a xuntar l’aconceyamientu de los seis xuraos (dos asturianos, dos gallegos y dos bretones) que deciden el ganador de 2013.

L’entamu del troféu d’esti añu correspondió a ún de los novatos nel concursu, l’asturianu Fabián Fernández, qu’entamó dalgó nerviosu pero aposentó bien ceo pa terminar faciendo un perbona actuación. Con 20 años y tocando dende los siete, a esti perbon gaiteru queden-y años abondos pa ufrir lo meyor al instrumentu calterísticu d’Asturies.

Tres d’elli Marcos Tella, un llucense de 22 años tamién nuevu nesta esperiencia paso per momentos brillantes nuna bona actuación que tuvo dellos altibaxos pero amosó’l bon nivel instrumental que siempres se pue sentir nesti concursu. el segundu de los gallegos yera Lois Prado, que ya viniere dende Vigo l’añu pasáu y que se presentó más seguru y col repertoriu enforma trabayáu, sobremanera la parte bretona, que munches vegaes, por nun decir cásique siempre, ye la que decide’l concursu.

Los favoritos

Pa finar la primer parte del concursu llegó’l momentu del ganador del añu pasáu, Jesús Fernández, que dexó dende’l primer momentu que venía a ganar y que los seis años que lleva al llombu de participación nel McCrimmon son más que abondos pa dexar lloñe a la mayoría de los concursantes. Con una perguapa suite bretona que-y prestó al xuráu al tiempu qu’al públicu nun-y faltó más que facer como l’añu pasáu una interpretación asturiana perfecha pa dexar ya fináu esti concursu.

Tres de Jesús, toco-y salir al escenariu al gallegu Xexús Rodríguez, que se caltuvo a un bon nivel con una curtia pero interesante actuación anque alloñáu de la qu’acababemos de sentir.

Y entós xubió al escenariu el más mozu del concursu, l’Asturianu Álvaro Álvarez, que perfizo una suite bretona que dexó bien a les clares les sos posibilidaes esti añu en Lorient. La so pieza asturiana foi llarga yaperfecha amosando por qué lleva tres años ganando n’Asturies tolos concursos, cola esceición del Remis Ovalle que se-y bien resistiendo. La so interpretación asturiana colocolu nel disparaderu d’un Troféu y una participación na que paecía qu’a la tercera diba ser la vencida.

El gallegu Bruno Villamayor fizo los posibles, como enantes Xesús pa tapecer el fechu de dir detrás d’una actuación sobresaliente y fízolo con bon aquel enantes de dar pasu a Javier Menéndez. El director de la Banda de Gaites d’Avilés persabía que tres de les actuaciones de Jesús y Álvaro tenía qu’ufrir un daqué diferente y fízolo entamando cola pieza asturiana, interpretada col so conocíu dominiu, y dexando palo postrero la pieza bretona qu’encaxó perfeutamente dando-y un aquel que-y prestó al xuráu bretón, lo que dexó’l concursu nun reñíu momentu final. Como siempres a la espera d’una llarga suma de les puntuaciones enforma complexa que siempres acaba dexando insatisfechos a unos y a otros.

El xuráu

El xuráu d’esti añu formábenlu los maestros asturianos Jorge Fernández Areces, profesor de gaita del conservatoriu mierense, y Balbino Menéndez Suárez, direutor de la Banda Camín de Fierro, xunta los gallegos Alberto Coya, bien conocíu n’Asturies y veteran nos xuraos del McCrimmon, y Jesús Sánchez, que formaba parte del xuráu per primera vegada. El xuráu completábelu los bretones Magali Le Sciellour y Yann Fabilon.

Los ocho participantes que representen cada añu a les gaites asturianes y gallegues, dexaron bien a les clares otra vuelta el pergrande nivel instrumental que tien la mocedá asturiano y gallego dende va unos años.

Les bandes de gaites irlandeses, escoceses, bretones, asturianes y gallegues, entamen a enllenar les cais de Lorient del son de les sos pieces, entamando los ensayos de la primer Nueche Máxica que va arrancar esta fin de selmana nel Estadiu Moustoir de la villa bretona. Tres de la Nuit Interceltique Bretagne que se desenvuelve na nueche del sábadu y na que namái participen los anfitriones, el sábadu entamarán les clásiques Nueches Máxiques del Festival qu’axunten a toles delegaciones nun programa indescriptible.

A lo llargo d’estos díes, los ensayos de les bandes que participen nestos conciertos nocherniegos nel Estadiu del FC Lorient, son ún de los tópicos del festival qu’animen los paseos de visitantes y músicos en cuantes qu’aporta la tarde.

Asturnews fai un seguimientu en direutu, como tolos años, del desendolcu del XXIX Troféu McCrimmon de Gaita solista gallega y asturiana dendel Palaciu de Congresos de Lorient. El concursu pue siguise nel Twitter d’Asturnews, onde se tuitea la participación de caún de los 4 representates asturianos, asina como de los gallegos colos que tamién compiten tocando un set de tres pieces: una gallega, otra asturiana y una tercera bretona.

Twitter d’Asturnews

La ciudá francesa de Lorient acueye dende esti día’l Festival Intercélticu 2014, que cada añu axunta a distintes naciones celtes partíes por tol mundu y que nesta 44 edición va rindir homenaxe a Irlanda y va conmemorar el centenariu del entamu de la Primer Guerra Mundial, al tiempu que se dedica a Irlanda y va cuntar cola participación dafechu del gobiernu irlandés, col so presidente Michael D. Higgins, abriendo’l sábadu la programación especial d’esti país en Lorient.

Irlanda, según destaca la organización del festival celta más importante d’Europa, apurrió dende la Edá Media les lleendes y relatos más importantes de la mitoloxía celta, ya inda güei la riqueza de les fontes documentales irlandeses dexen aprender de los sos oríxenes y tradiciones culturales: “La ciudá va vistir de los colores d’Irlanda”, declaró nel entamar d el director del festival, l’easturianu Lisardo Lombardía, que lleva yá ocho años al mandu de esti proyectu.

El presidente irlandés, Michael D. Higgins, va allegse al actu oficial d’inauguración el sábadu, onde se va tocar música tradicional irlandesa y van recitase poemes del Premiu Nobel Seamus Heaney, y mientres tola selmana va haber diariamente conciertos d’artistes como Mary Black o The Strypes. Esposiciones sobre’l país, proyecciones de películes y conferencies sobre les tradiciones celtes de la isla van completar l’homenaxe, qu’asocede a los que tamién se -y fixeron en 1996 y 2005.

La delegación asturiana que va participar dende esti vienres hasta’l domingu 10 d’agostu nel Festival Intercélticu de Lorient entama viaxe a les 10 de la nueche d’esti xueves 31 de xunetu con bandes como Dixebra, Viendren, Breith Asturies Project, l’Asturiana Mining Company, el Grupu de Baille Fitoria y la Banda de Gaites Camin de Fierro como representantes. La delegación sal de la Plaza la Xesta d’Uviéu como ye vezu dende va una montonera d’años y va aportar a Lorient pa xintar y disfrutar de les primeres actuaciones del festival.

El primer día del Festival Intercélticu de Lorient arranca’l primer vienres d’agostu, anque nun va ser hasta’l sábadu que la delegación asturiana entama a vese nel programa.

Como tolos años, Asturnews va facer un seguimientu diariu del Festival y de la participación de la delegación asturiana con semeyes y vídeos enforma de la so participación al traviés de un blog especial y d’esta mesma web.

Blog d’Asturnews dedicáu al Festival de Lorient

Lisardo Lombardía amosóse satisfechu de la edición de l’Añu d’Asturies del Festival Intercélticu de Lorient que nesti 2013 va camudando la cadarma tradicional pasando d’un festival más familiar a un festival más mozu onde los grandes espectáculos puxen más que los tradicionales. 2013 fina en Lorient con un balance perpositivu pala presencia asturiana y un xorrecimientu de les entraes a les grandes actuaciones del Espace Marine.

Na rueda de prensa que pon puntu final al Festival nel segundu domingu d’agostu, el Director Xeneral de la organización del mesmu, dexó bien a les clares que’l balance ye positivu tanto nel ámbitu artísticu como nel económicu, a la espera de les cifres finales.

Sigún dixo Lombardía la calidá artísitica de les actuaciones asturianes nel Festival quedó amosada na Nueche del llunes nel gran espectáculu qu’axuntó a Tuenda, Hevia Trío y la Banda de Gaites Llariegu, pala que vuto pallabres mui especiales, asina como pal espectáculu que llevó por títulu “la voz de la tierra” y que s’estrenó nel Gran Teatru de Lorient . Pero tamién destacó pela parte más tradicional gracies la trabayu de la Banda Llacín y de Xeitu.

No que cinca al aspectu económicu les cifres son buenes con un xorrecimientu de les entraes vendíes pa los espectáculos del Espace Marine del 35% con respeutu a l’añu anterior y l’exitu de la comercialización de los badges a 3 euros que permitíen los accesos a los espectáculos qu’hasta esti añu yeren dafechu gratuitos: un total de 37.135 badges vendíos que dan idea de l’aceptación de la propuesta.

El balance tamién foi posiitivu pales Nueches Intercéltiques que apaecíen remozaes con delles novedaes y pala comercialización de los stands pales empreses de de los países célticos, con una presencia bultable.

Si a ello venimos a sumar l’audiencia de dos millones cien mil persones que tuviere la tresmisión de la Gran Parade pela televisión France3, y la participación de 1300 voluntartios na parte social del festival, el balance nun pue ser sinon enforma positivu.

Amás de saludar l’Añu d’Irlanda pa 2014, que Lisardo Lombardía dixo qu’entamará a organizase nel mesmu mes de Setiembre, tamién se entamará a pensar qué país o países serán homenaxeaos nel 2015. Los candidatos son Australia o un aconceyamientu de Cornualles y la Isla de Man, por ser los dos países más pequenos del Arcu Atlánticu y, poro, con dificultaes pa facer una aportación importante per ellos sólos al Festival.

El momentu en que Tejedor invitó al escenariu del Grande Theatre de Lorient a la Banda de Gaites La Villa foi el momentu cimeru del conciertu midíu y acompasáu qu’ufrió nel Festival de Lorient d’esti 2012, amosando la profesionalidá del grupu y la so capacidá pa dexar ver nel escenariu lo que tien tres de sí munches hores de llabor y ensayu. Nun foi esi’l momentu postreru, sinon l’entamar d’una segunda parte del conciertu que llogró entá superar la primer aplaudida hora de música sincera y sentida.

El conciertu de Tejedor na nueche del martes nel Grande Thjeatre de Lorient tenía ya’l preámbulu de la so presencia nel Espace Marine na nueche del Domingu pa dir abriendo boca al públicu bretón qu’esperaba pol Buena Vista Club Social y el so danzón cubanu. Ya nesa apaición colmara les espectatives del públicu, pero la so apaición n’escena nun yera sinon un aperitivu, como amosó nidiamente esti martes.

Ensin la presencia de la so hermana nes voces, perbien sostituida por Silvia Quesada, los hermanos Tejedor dexaron como siempre’l pabellón onde s’espera. Acompasaron un conciertu afayadizu pal so interés, más musical qu’espectácular, aunque meyorando añu tres d’añu no escénico.

El Principáu dió esti lluanes pela tardi so preste definitivu al Añu d’Asturies nel Festival de Lorient 2013. Diez años depués, Asturies sedrá otra vuelta’l protagonista del Intercélticu de la cuidá bretona, tres del aplazamiento esti añu pola indecisión del gobierno anterior, amparáu nos problemas presupuestarios. Asturies ta teniendo esti añu otra granible y exitosa participación nel FIL.

Asturies vien recoyendo sobradamente’l frutu de la pequena inversión fecha na so participación durante les caberes tres décades nel Festival de Lorient. El nome del país ye enforma nomáu dende que pelos años 80 se ficiera una delegación estable nel Festival intercélticu de la mano del esfuerzu de Lisardo Lombardía y dellos collaboradores que treslladaron la vitalidá de la cultura asturiana y de la música con raigañu a la ciudá bretona.

L’únicu esfuerzu económicu importante que tien de facer el Principáu d’Asturies afitase cada 10 años, cuando-y correspuende al país asturianu ser l’invitáu homenaxeáu pel Festival y Asturies siempre fizo una inversión muncho más pequeña que los nuesos vecinos gallegos, algamando, por embargu, una repercusión muncho mayor.

Asturies pasó de ser una desconocida en Bretaña a ponese nel mapa de les nueves xeneraciones, lo que fai alitar la presencia que nun apara de xorrecer de veraneantes d’aquelles tierres.

El compromisu del Principáu pa cola escasa financiación necesaria pa cubrir la celebración del Añu d’Asturies nel 2013 llevaba dellos meses trabayándose na solombra ente la presidencia del Principáu y la direición téunica del Festival y cuayó xustamente esti llunes, cola confirmación dende Asturies de que había lluz verde: 2013 sedrá un añu de color azul y amariellu, nel mundu celta y nesta ciuda de Morbihan, al tiempu qu’en tola rodiada.

Marcos Garía Alonso, el representante asturianu nel Concursu d’Acordión de Lorient, traxo esti día otra alegría a la delegación asturiana al algamar el Troféu Intercélticu d’Acordión diatónicu nuna reñida competición. Marcos xúnióse con una interpretación al meyor nivel al llogru d’Andrea Joglar y convierte esti añu en un Lorient mui especial pala delegación asturiana.

Marcos García lleva abondo tiempu na escena folk asturiana a les percusiones y l’acordión y forma parte de Blima, onde collabora con Fernando Oyagüez, al bouzouki y los coros; Xurde Fernández, cola flauta travesera, el whistle ya’l violín y Silvia Quesada que ye la encargada de pone-y voz al proyectu.

Como vien asocediendo davezu nel Festival de Lorient, la carpa asturiana acueye y abelluga les caberes dances de la xornada, hasta que la policía precinta’l recintu del Festival, cuando dan les 3 de la madrugada. Les dances bretones entemecense coles asturianes nun llugar qu’amuesa dafechu l’hermanamientu de pueblos que carauteriza esti Festival Intercélticu.