Europa

La Sociedá Rexonal de Turismu (SRT) d’Asturies acude cola marca Camín de Santiago a dos presentaciones de destín en Dinamarca y Finlandia. Estes acciones promocionales, que tienen como oxetu esparder los valores turístico-culturales de la Ruta Xacobea, tán dirixíes a periodistes y axentes turísticos de dambos países. Les presentaciones foron organizaes poles comunidaes autónomes qu’integren el Camín de Santiago cola collaboración de Turespaña, qu’amás cede les sos instalaciones pa los eventos.

La primer presentación de destín, tuvo llugar en Copenhague (Dinamarca) el 10 de payares, cola asistencia de 25 profesionales, de los que 17 yeren periodistes especializaos. Nel actu, esplicóse a los asistentes los valores y significaos de la Ruta Xacobea y la so proyección actual como productu turístico-cultural de dimensión europea y mundial. Amás, va proyectase un audiovisual colos Caminos Francés y del Norte.

La presentación en Helsinki (Finlandia) va tener llugar güei, xueves 12 de payares. Yá confirmaron la so asistencia 20 profesionales, de los que 15 son periodistes turísticos. L’actu va completase con una preba de productos gastronómicos del Camín.

La Xunta pola Defensa de la Llingua Asturiana celebró una rueda de prensa esti miércoles, na que Carlos Pulgar informó del pidimientu espresáu Alexei Kozhemyakov, representante del Secretariáu de la Carta Europa de les Llingües Minoritaries del Conseyu d’Europa, nun conceyu celebráu nel mes d’ochobre na población de Ljouwert, en Frisia (Países Baxos).

Nuna grabación d’audiu, amosáronse les pallabres testuales del representate européu, qu’espresó la “recomendación inequívoca del Comité de Ministros, del Comité d’Espertos y del Conseyu d’Euroopa de la declaración del asturianu como llingua oficial”.

Según la Xunta, “Kozhemyakov demostró’l so conocimientu y preocupación pola situación d’esti idioma, faciendo una esposición de les aiciones y actividaes que va desarrollar el Conseyu pa favorecer elcumplimientu de la Carta polos estaos firmantes”, 23 en total, ente ellos España.

Pulgar aseguró que Kozhemyakov comentó-yos que nel Conseyu “resulta inesplicable que n’España haya unos territorios onde diches recomendaciones se cumplen y otros onde non”, en comparanza de les comunidaes que tienen llingua propia oficializada cola situación d’Asturies.

La poeta asturiana, Premiu Nacional de Poesía 2007 por “Y todos estábamos vivos”, lleerá una escoyeta de los sos poema y va aldericar col públicu sobre les particularidaes de la so obra. L’asociación ASBRU (Asturianos en Bruseles) entamará’l próximo 13 de payares na Casa d’Asturies de Bruseles (asitiada na rue Saint Laurent, 36-38) esta llectura cola autora de Santianes de Pravia.

Traducida al suecu, francés, inglés, alemán y portugués, la voz d’Olvido García Valdés figura ente les más sólides y singulares de la poesía actual en castellán. Con esta actividá, financiada pola Axencia Asturiana d’Emigración, ASBRU reafírmase nel so proyectu, empecipiáu va yá cuasi cinco años, de trayer a Bruseles les voces actuales de la cultura asturiana “nes sos diferente manifestaciones”. L’últimu escritor convidáu por ASBRU foi Antonio Gamoneda, Premiu Cervantes de Lliteratura 2006.

Los rapacinos lloren n’asturianu, polo menos los que tienen padres asturfalantes. Y ye qu’un esperimentu de la universidá de Wrzburg, n’Alemaña, afita que’l lloru de los rapacíos recién ñacíos reproduz les pautes sonores típiques del idioma que sintieron na so vida fetal.

Los rapacinos siente la musicalidá de la llingua materna, nesti casu l’asturianu, dientro del banduyu de la madre. L’estudiu, espublizáu na revista ‘Current Biology’ por Kathleen Wermke, demuestra la importancia del lloru pal futuru desenvolvimientu del llinguaxe del neñu.

Pal estudiu trabayóse con 60 neños recién ñacíos y sanos, 30 de families francófones y 30 de families xermanofalantes, ente los díes 3 y 5 dempués del allumamientu.

El boletín Llengües Vives, centráu na actualidá de les llingües minorizaes del suroeste d’Europa, empieza una etapa nueva na rede en formatu blog, utilizando pa eso l’espaciu del portal catalán Vilaweb, depués de trece años espublizándose en papel.

El boletín espublízase alternativamente en gallego-portugués, asturianu, eusquera, catalán y occitanu. L’aragonés y el sardu, presentes nel boletín impresu, queden de momentu fuera del proyectu inicial por falta de corresponsales, anque nun se descarta incluílos más p’alantre, pa cubrir tola actualidá de les llingües minorizaes de la zona.

Nel casu del dominiu asturlleonés, los nuevos corresponsales son Iván Cuevas y María Cueto. La so primer collaboración ye “Tira un airín de Llión”, na que los corresponsales pal asturlleonés reivindiquen la importancia de los territorios de Lleón y Zamora na reivindicación común de la llingua, y destaquen los avances que nestes zones se dieron no que se refier al asturllionés.

La Fundación Mário Soares, asitiada na Rua de Sâo Bento, cabo l’edificiu del Parallamentu portugués, va acoyer la presentación de los llibros en mirandés, “Mirandés. Stória dua Lhéngua i dun Pobo” y “Os Lusíadas”. L’actu va celebrase’l xueves dos de xunetu a partir de les 18:30 hores.

Les obres asoléyales Âncora ediciones y nel actu van participar representantes políticos de l’Asamblea de la República, l’alcalde de Mirande del Douro y Amadeu Ferreira, de l’asociación de Llingua Mirandesa.

Thomsen, xefe del Partíu Naci n’España, dexó dos álbumes al fuxir del país en 1945. Un, entós rapaz, de Ponga, Manuel Sánchez Bretón, conocíolu cuando estudiaba en Madrid y guardó en secretu les más de 450 semeyes inédites d’altos cargos nacis de l’Alemaña de Hitler.

La so vilda, Rosa López, xubió apocayá a llimpiar el desván y nuna caxa atopó un gran llibru encuadernáu en cueru col escudu del Tercer Reich. Ablucada vio que na primer páxina apaez la robla de Himmler, el comandante en xefe de les SS, executor del Holocausto, fechada en 1940.

Ente les semeyes, dalgunes nes que pue vese la cai Alcala de Madrid enllena d’esvástiques, la plaza toros d’esta mesma ciudá con una concentración naci nel so interior y una montonera de semeyes inédites del alcuentru ente Franco y Hitler n’Hendaya.

Pese a la derrota del PSOE nel estáu español, con cuasi 600.000 votos y dos eurodiputaos menos que’l PP, n’Asturies, los socialistes siguen calteniéndose como la primer fuercia, con 179.943 votos y el 43,12% de votos, frente a los 177.329, el 42’5%, del Partíu Popular. Izquierda Xunida-Bloque por Asturies consigue 23.956 votos, el 5’74% del total; y UPyD consolídase como la cuarta fuercia n’Asturies con 17.617 votos, el 4’22%. En quintu y sestu llugar apaecen Los Verdes-Grupu Verde Européu y el Partíu Antitaurinu contra’l Maltratu Animal, con 1.966 y 1.310 votos respectivamente.

La dixebra de los escasos votos nacionalistes n’Asturies lleva a que tenga de dise hasta’l sétimu puestu pa conocer los resultaos del primer partíu asturianu en votos, Unidá Nacionalista Asturiana, que consigue namás 846 votos, el 0’20% de los votos asturianos. Darréu Iniciativa Internacionalista-La Solidaridá ente los Pueblos algama venti votos menos, 826, y el 0’20% de los votos. El PCPE fízose con 779 votos, el 0’19% de los votos; y Andecha Astur, 765 votos, el 0’18%.

Los resultaos de los partíos asturianos amuesen un descensu perimportante con respectu a les elecciones europees de 2004, onde’l PAS, que nesta ocasión nun se presentó, recibiere 2.098 votos, el 0’48% de los emitíos entós, y la coalición Europa de los Pueblos, onde entós diba Andecha Astur, 1.677 votos, el 0’38%, más que la suma actual ente esti últimu partíu y Unidá Nacionalista Asturiana (UNA).

Los eurodiputaos asturianos presentaos nes llistes de los grandes partíos estatales, Antonio Masip, pol PSOE y Salvador Garriga, pol PP, van tar nel Parllamentu Européu. Sicasí, la candidata asturiana d’Izquierda Xunida-Bloque por Asturies, que diba nel tercer puestu de la llista, Marta Pulgar, nun consiguió facese col acta d’eurodiputada.

Asturies quédase nesta ocasión ensin representación de partíos d’ámbitu asturianu nel Parllamentu Européu, dempués d’unes elecciones marcaes pol enfrentamientu abiertu ente les mesmes.

Consulta los resultaos oficiales

Les formaciones asturianes Unidá Nacionalista Asturiana (UNA) y Andecha Astur (AA) algamaron nestes elecciones europees más votos nel restu del estáu español que dientro del territoriu asturianu.

UNA consigue 2450 votos nel restu del estáu, frente a los 846 algamaos n’Asturies; y Andecha Astur 1433 nel estáu español, frente a los 765 acollechaos nel país. UNA y AA son respectivamente antepenúltima y penúltima fuercia d’ente les formaciones de tol estáu, col 0’02 y el 0’01% de los votos totales n’España.

Consulta los resultaos oficiales nel estáu español

El comisariu de Multillingüismu de la Unión Europea, Leonard Orban, dixo en Pamplona que los europeos “deben adeprender idiomes diferentes” y “non sólo l’inglés”, pola “riqueza enorme” de llingües que “debíen deprendese” qu’hai na UE. Orban fizo estes declaraciones nuna rueda prensa qu’ufrió en Pamplona, con motivu de la la xira que ta faciendo pel norte d’España pa presentar les prioridaes de la nueva estratexa de multillingüismu de la UE y conocer la realidá llingüística de les diferentes rexones.

El comisariu va aconceyase con delles autoridaes de Navarra demientres los dos díes que van siguir na Comunidá. Amás, va visitar dellos centros escolares, como la Ikastola de San Fermín, a la que foi esta mañana, y el colexu públicu Cardenal Ilundain. Tamién va visitar les dos universidaes del Reinu de Navarra, la Universidá Pública de Navarra y la Universidá de Navarra.

El Comisariu dixo tamién en Pamplona qu’España alcuentrase “a la cola” del ranking en capacidá llingüística en comparanza col restu de países europeos, por mor “non sólo del sistema educativu”, sinón tamién pol vezu de doblar películes, en llugar d’usar subtitulos, que “ayuden al desarrollu de la capacidá de deprendimientu de los distintos idiomes”.