Europa

Según da anuncia’l Gobiernu d’Asturies, un total de 7.725 persones descubrieron más d’Asturies gracies a la promoción en centros comerciales fecha pola Sociedá Rexonal de Turismu del Principáu. En namás trés meses, el puestu de “Asturies, dizlo tol mundu” visitó grandes superficies de Castiella, Lleón, País Vascu, Galicia y Madrid, onde non solo dieron puxu a la nueva campaña sinón que dieron información de destín de la comunidá autónoma a tol públicu asistente pente medies d’aiciones interactives, emplegando como reclamu xuegos y sorteos.

La clave del ésitu del puestu de “Asturies, dizlo tol mundu” nos centros comerciales foi la forma de presentar la comunidá autónoma. Los visitantes participaron nun xuegu con premiu aseguráu. Llueu d’unes curties entrugues sobre datos básicos del cliente (si yá conoz Asturies y con qué lo identifica), dábase pasu a un “minitrivial asturianu” con un concursu sobre los recursos naturales, culturales, gastronómicos o hasta cinematográficos d’Asturies.

Namás por participar, el veceru convertíase automáticamente en protagonista de la campaña y llevaba como obsequiu una semeya col fondu de les gráfiques de la campaña “Asturies, dizlo tol mundu”. Si amás acertaba’l 75% de les entrugues, consiguía un regalu promocional. Y si acertaba toes, entraba nun sortéu d’una fin de selmana pa dos persones nun agospiu con encantu.

Anque l’usu del galés per parte de les alministraciones llocales yá yera ampliu, nun foi hasta esti 7 d’avientu pasáu, cuando la Xunta de Gales, parllamentu autonómicu d’esi país británicu, declaró al galés llingua cooficial, xuntu col inglés. La midida más importante ye la creación d’un Comisionáu de la Llingua Galesa que va garantizar que los ciudadanos que quieran puedan rellacionase en galés cola alministración pública.

Según declaró a los medios Alun Jones Ffred, miembru del partíu nacionalista galés, el pasáu martes foi “un día históricu pal idioma galés”. Y ye que la nueva midida va fortalecer la posición del galés, idioma que ye minoritariu nel País de Gales, garantizanzo l’usu de la llingua galesa ensin imposiciones pal que quiera utilizar l’inglés. La mayoría de los cartelos ya indicaciones nel País de Gales tán nos dos idiomes, entá cuando’l galés nun yera oficial.

Un congresu celebráu estos díes en Barcelona sirvió pa que los espertos en llingües aconceyaos nel mesmu pidiera al Gobiernu d’Asturies, encabezáu por Vicente Alvarez Areces una riestra de midíes pa responder a “la voluntá d’una gran mayoría d’asturianos que, dempués d’años, reclama’l respetu a los sos drechos como falantes d’asturianu”.

La reinvindicación fecha nesti congresu inclúi la declaración d’oficialidá na próxima reforma de l’Estatutu, yá que consideraron que “ye la única forma de la que la llingua asturiana pueda sobrevivir”, amás pidióse garantíes pa que se pueda deprender l’asturianu en tolos niveles educativos “dende primaria a la Universidá”.

L’Ayuntamientu d’Uviéu aprovecha la fecha máxica del 23 de xunu, la nueche de San Xuan, pa, na Plaza de la Catedral y a partir de les once la nueche, facer un conxuru máxicu ya invocar el llogru del títulu de Capital Europea de la Cultura 2016. Ta programáu un espectáculu mitolóxicu, prender la foguera y baillar la Danza Prima alredor.

L’espectáculu va entamar coles muyeres de la Banda de Gaites Ciudá d’Uviéu. Depués va facese una escenificación que va contar cola collaboración del músicu llaniscu Xuacu Amieva y na que van participar bardos, magues, xanes, trasgos y el cuélebre. A medianueche va prendese la foguera y depués Xuacu Amieva y los sos acompañantes van entamar el ritual interpretando la pieza «El ríu Les Cabres». Soníos de la naturaleza, fumu y xuegos de lluces van dar pasu a cuatro magues, que van presentase contando lo que caúna va aportar a la ceremonia. Depués del conxuru, va baillase la Danza Prima, dirixida pol grupu La Hedra, de San Isteban (Uviéu), y va acabar l’actu con un conciertu de Xuacu Amieva y la so banda.

Amás, los establecimientos que formen parte de l’Asociación de Bares de Copes d’Uviéu van collaborar na iniciativa preparando una bébora máxico, de fórmula secreta, p’apoyar el conxuru, y que van sirvir esa nueche nel cascu vieyu a precios populares.

Cuatro asociaciones zamoranes y lleoneses dedicaes al estudiu y defensa de la llingua acaben de presentar un informe énte la Secretaría pa la Carta Europea de les Llingües Rexonal y Minoritaries, dependiente del Conseyu d’Europa, informando de la falta d’iniciatives de l’alministración autonómica de Castiella y Lleón pa la so protección y promoción.

Nesti informe les asociaciones Furmientu, El Teixu, Facendera pola Llengua y La Caleya faen especial fincapié na ausencia d’un desenvolvimientu normativu del artículu 5.2 del Estatutu d’Autonomía, qu’otorga reconocencia llegal a esta llingua romance y nel que s’establez que “El lleonés va ser oxetu de protección específica pol so particular valor dientro del patrimoniu llingüísticu de la Comunidá. La so protección, usu y promoción van ser oxetu de regulación”.

A pesar d’esti mandatu de la norma autonómica, y de los distintos pidimientos que pa desenvolvelo realizaron el Procurador del Común, organizaciones culturales y partíos políticos, l’informe recueye cómo la respuesta de l’alministración castellana y lleonesa foi la inactividá, ensin realizar nenguna de les midíes encamentaes poles instituciones europees pa salvaguardar la esistencia de les llingües minorizaes.

Nesti sentíu, el recién sofitu unánime de les Cortes de Castiella y Lleón a la regulación de la protección y l’usu de la llingua asturlleonesa puede significar una meyora na situación d’esti idioma consideráu pola Unesco en peligru d’estinción, anque l’informe unviáu al Conseyu d’Europa recueye tamién cómo otres declaraciones de sofitu acabaron quedando en simple retórica.

Les asociaciones recuerden que namás “la comunidá autónoma de Castiella y Lleón escarez d’un desenvolvimientu llegal y de les polítiques necesaries empuestes a la promoción y defensa del idioma”.

Xuan Xosé Sánchez Vicente, presidente del Partíu Asturianista (PAS), sofitó ayeri la candidatura d’Uviéu a Capital de la Cultura Europea, anque amuesa’l so maltar cola mala xestión de los partíos gobernantes “que dexa mui poques posibilidaes d’ésitu”.

El políticu y escritor decláse partidariu d’esta candidatura porque, diz “nun tengo más patria nin más compromisu qu’Asturies”. Asinamesmo anima “a tolos asturianos que lo faigan porque nada que sea en beneficiu y honra d’Asturies tien que senos ayeno”.

Sicasí, espresa que nesti procesu nun-y paecieron bien munhces coses y que tien “munches duldes sobre la candidatura”, anque reconoz “si hai posibilidaes de que suene la chifla, que nun dexe de facelo pol mio xiplíu”.

Dientro del área de programe europeos del Conseyu de la Mocedá del Principáu d’Asturies y como parte de la so collaboración col Gobiernu de la Rexón de Campania, úfrese la posibilidá d’esti cursu a miembros d’Asociaciones Moces d’Asturies. Va celebrase en Nápoles ente’l 6 y el 24 de setiembre de 2010 y el plazu de presentación de solicitúes remata’l xueves 13 de mayu, confirmando la disponibilidá de plaza’l 17 de mayu.

Bases completes

La Universidá Carolina (en chechu, Univerzita Karlova), de la República Checa, va ufrir un cursu que va xirar alredor de les llingües romániques minorizaes de la península ibérica. El cursu va impartilu a lo llargo de tola xornada del próximu 26 de marzu Xavier Frías Conde, filólogu y escritor con bien d’obres espublizaes en llingua asturiana. En declaraciones a Asturnews, Frías Conde recordó que nun ye la primer vegada que “fala del asturianu en Praga”.

El profesor de la UNED comentó que’l cursu ta pensáu “en parte pa estudiantes de doctoráu, en parte pa estudiantes de la propia universidá o d’otres”, yá que a los doctorandos “val-yos como creitos”. Frías diz tar tentando tamién que pal futuru “la UNED tamién dea un diploma a los d’equí”.

Nel cursu va falase de lo que tien l’asturianu “específicu de so, sobretoo al nivel gramatical: plurales en -es, neutru de materia, etc.”. Anque na primer parte del cursu, el profesor Frías Conde tien previsto falar de de sociollingüística, “a partir d’una clasificación que tengo fecha sobre les categoríes legales de les llengües n’España, en cuatro graos”, comenta. Dientro d’esta clasificación propuesta pol autor, “l’asturianu taría nel terceru. Con llei, pero ensin cooficialidá”. Amás va falase de la situación de les llingües nos estaos español y portugués, ensin entrar nes dos llingües mayoritaries na península, el castellán y el portugués.

Al cursu tán apuntaos yá alumnos de la universidá de Praga y d’otres como la de Berlín, anque’l plazu pa facelo sigue abiertu na páxina de la Universidá de Praga y de baldre.

La Universidá Carolina fundada en Praga en 1348 ye la universidá más antigua y una de les universidaes más prestixoses na Europa Central y del Este. El so sellu amuesa a Carlos IV, Emperador (colos sos escudos d’armes como’l Santu Emperador romanu Xermánicu y Conde de Luxemburgu) arrodiyándose delantre de San Wenceslao (al llau del Bohemiu) y arrodiáu pola inscripción, “Sigillum Universitatis Scolarium Studii Pragensis”, que podría tornase como “Sellu de l’academia de Praga”.

Páxina de la Universidá Carolina (en chechu ya inglés)

Un alcuerdu ente la Universidá d’Uviéu y la Universidá Masaryk de Brno va permitir que l’asturianu s’estudie dientro d’esta institución checa. Van dase clases de llingua y lliteratura asturianes nun cursu pilotu que cunta col sofitu de la Unión Europea. Los promotores de la iniciativa son los profesores Ivo Buzek de Brno y Alvaro Arias-Cachero Cabal, de la Universidá d’Uviéu.

El Departamentu de Filoloxía Española de la Universidá d’Uviéu l’Institutu de Llingües y Lliteratures Romances de Brno vienen collaborando académicamente dende va años, intercambiando investigadores y alumnos gracies al programa Erasmus.

Les asignatures d’asturianu van impartise esti cursu ente febreru y xunu a cargu del profesor Buzek que cuntará coles clases d’apoyu d’un llector d’asturianu, que nesti casu va ser el doctorandu en filoloxía Cesáreo García Fernández, Especialista en Filoloxía Asturiana y traductor de delles obres del rusu y l’eslovacu al asturianu.

Páxina de la Universidá checa

Un grupu d’ocho turoperadores y axentes de viaxes alemanes ficieron estos díes un viaxe de conocimientu de cuatro díes per Asturies, organizáu pola Sociedá Rexonal de Turismu (SRT) en collaboración cola Oficina Española de Turismu (OET) de Dusseldorf.

La temática d’esti viaxe xira al rodiu del Patrimoniu de la Humanidá, pos tanto la OET como los propios operadores quieren conocer el patrimoniu que forma parte de la llista de distinciones de la UNESCO. El programa inclúi visites a dellos monumentos del Prerrománicu Asturianu (Santa María del Naranco y San Miguel de Lliñu), al Parque de la Prehestoria de Teberga, al Muséu Xurásicu o a la Reserva de la Biosfera de Picos d’Europa.

Amás, los axentes de viaxe van descubrir pueblos marineros, recursos de turismu de salú y del turismu gastronómicu asturianu.