Europa

Como cada añu dende 2001, un Centru Asturianu acueye los actos d’esta celebración. Nesta ocasión, los eventos van compartise ente los llares de los asturianos nes ciudaes suices de Lausanne y Berna. La decisión tomóse ayeri na Conseyería de Cultura, onde aconceyaron el Presidente del Conseyu de Comunidaes Asturianes, Manuel Fernández de la Cera, la Directora Xeneral de Política Llingüística, Consuelo Vega Díaz y Pablo Xuan Manzano, representante de l’Academia de la Llingua Asturiana.

El Conseyu Asturianu de Comunidaes Asturianes celebra esti Día de les Lletres nel Esterior dende 2001, y los actos pasaron yá pelos centros asturianos de Les Palmes, Logroño, Madrid, Montevidéu, Bonos Aires, París, Liexa y Chile, na última edición.

Les actividaes van tener llugar el 23 y 24 de mayu teniendo por tema central la poesía asturiana d’anguaño, como na cabera edición. El críticu y profesor titular de Lliteratura de la Universidá d’Uviéu, José Luis García Martín, va dar una conferencia y va preparar la esbilla de testos de poetes asturianos, que va asoleyase n’edición trillingüe (asturianu, francés y alemán) pa la ocasión.

Amás, la Conseyería va llevar a dambos centros la esposición “Miraes: Un añu d’Asturies en semeyes. IV esposición de l’Asociación Profesional de Fotoperiodistes Asturianos”.

El Gobiernu d’Asturies participa, un añu más, na Ferien Messe Wien, una prestixosa feria de turismu que tuvo llugar en Viena del 15 al 18 de xineru y qu’esti añu celebraba la so VI edición. Asturies acudió en representación de les cuatro comunidaes qu’integren la marca “España Verde” (Asturies, Galicia, Cantabria y País Vascu).

Esta feria constitúi un alcuentru abiertu tanto a profesionales como a consumidores finales, empobináu a un público maduru y esixente que cada añu, según declaren los responsables de Turismu d’Asturies, “va familiarizándose más con Asturies como destín turísticu, daqué que se traduz nun aumentu del interés y de la demanda pa con esta comunidá autónoma”.

Asina mesmo, la Sociedá Rexonal de Turismu del Principáu d’Asturies acudios estos díes a la primer edición de la Journeys of de Spirit Festival (JOSP), una feria creada pol Tour Operador del Vaticanu “Opera Romana Pellegrinaggi” dedicada a les Rutes del Turismu Relixosu. Asturies acude en representación de la marca “Camín de Santiago” que se va posicionar nel Festival como ún de los grandes itinerarios relixosos xunto al de Xerusalén y Roma, formando parte, xunto a éstos, d’una de les trés “Grandes Rutas de la Fe”.

La Asociación Cultural Dante Alighieri abre’l plazu pa inscribise a nuevos grupos del cursu d’iniciación al Italianu. Un grupu ta empobináu a principiantes dafechu y va dase los martes y viernes d’11 a 12:30 hores en sesiones de 90 minutos, dos vegaes per selmana. Otru grupu va tar dirixíu a quien tenga dellos conocimientos básicos de la llingua italiana, con horariu de 18:30 a 20:00 los llunes y miércoles, o de mañana, martes y vienres de 12 a 13:30.

Los cursos van escompencipiar en febreru y van rematase pa finales de xunu.

Pa más información pue visitase la sede de l’asociación, asitiada na cai Foncalada 34, 1uB, d’Uviéu, llamar per teléfonu al 985 21 12 35 o mandar un corréu lletrónicu a danteasturias@gmail.es

El plenu del Parlamentu Européu aprobó esti miércoles un testu pidiendo más fondos comunitarios y planes específicos pa promover les llingües minoritaries na UE. El testu aprobose con 401 votos a favor, 220 a la escontra, y 67 astenciones y recuerda que “el derechu a falar y a educase na llingua materna ye ún de los derechos fundamentales más básicos”.

Unidá Nacionalista Asturiana dio conocencia d’esti posiconamientu al traviés d’un comunicáu nel qu’Ignaciu Llope afirma que contemplar les llingües oficiales nel sistema de financiación “supón una nueva mocada a la dignidá d’Asturies y una perda inxustificada de recursos y propón l’aplicación del conceptu de ‘llingua estatutaria’ pa tornar discriminaciones”.

Unidá Nacionalista Asturiana (UNA) amosó esta esmolición énte l’anuncia del presidente Zapatero nel sentíu de que’l sistema de financiación autonómicu nuevu va empobinar recursos pa financiar los gastos que lleven les llingües oficiales.

Llope afirmó que “mos atopamos énte una nueva consecuencia del provincianismu del gobiernu asturianu que se niega a reconocer con toles consecuencies la realidá llingüística d’Asturies y por ello nun acaba da dar el pasu necesariu pa la supervivencia de la llingua asturiana y pa que finen los agravios comparativos d’Asturies con respecto a otras comunidae, ye dicir, la declaración d’oficialidá”.

Según el voceru de cultura d’UNA “ye evidente qu’hasta que nun hebia una reforma estatutaria l’asturianu nun va poder ser oficial, poro proponemos que s’enample’el criteriu de financiación de ‘llingua oficial’ al de ‘llingua estatutaria’, una categoría que ya foi usada delles veces nel Parllamentu del estáu para incluyir l’asturianu y l’aragonés”. Amás, siguió Llope, la mesma Carta Europea de les Llingües Minoritaries, ratificada pol estáu español y que ye polo tanto de cumplimientu obligáu, inclúi l’asturianu ente les llingües que tienen de ser curiaes, a traviés d’esa fórmula: la mención llegal a la protección de la misma nel estatutu d’autonomía, independientemente del so calter d’oficialidá ”.

Llope indicó amás que, “el limbu llegal nel que s’afaya anguaño l’asturianu ta suponiendo, otra vuelta, una situación de discriminación con respecto a les otres llingües, que nesti casu va suponer amás una perda importante de recursos económicos; ye dicir, los asturianos y asturianes vamos tener que financiar les llingües de los demás mentres vemos como muerre la nuesa”.

Dende UNA desíxese polo tanto al gobiernu asturianu “que s’actúe darréu y que, amparándose nesta fórmula, se pidan los recursos necesarios pa la normalización del asturianu n’ámbitos como la enseñanza, los medios de comunicación, y les rellaciones cola alministración”.

L’asociación d’Asturianos en Bruseles (ASBRU), celebró’l xueves pasáu una xornada dedicada a esparder el conocimientu del nuevu monólogu asturianu, conocíu como “monólogu modernu”, de la mano de Lluis Antón González, Inaciu Galán y Benxa Pérez. La xornada entamó cola presentación de l’antoloxía “¡Pa echar unes rises” asoleyada por Trabe. Na presentación participaron, Inaciu Galán; antologador, Benxa Perez; autor de la mesma, y Ángela Iglesias, presidenta d’ASBRU.

A lo llargo d’esta presentación Galán fizo un breve averamientu a la hestoria del monólogu asturianu, dende’l so ñacimientu hasta la creación del monólogu modernu y Benxa Pérez comentó delles cuestiones sobre’l procesu a la hora d’escribir un monólogu.

Dempués d’una breve pausa, Galán, Pérez y Lluis Antón González presentaron un espectáculu de monólogu modernu que según declaró Ángela Iglesias “foi tou un ésitu”.

Ente’l públicu qu’enllenaba cuasi la totalidá de les llocalidaes del salón d’actos de la Casa d’Asturies, edificiu oficial del Gobiernu d’Asturies en Bruseles, asturianos y xente d’otres nacionalidaes que disfrutó de monólogos como “Asturianos al volante”, “La hestoria, más o menos” o “L’home y la gochería”.

A la fin del actu fízose un alderique nel que los asistentes y los monologuistes, moderaos por Eduardo Fernández, d’ASBRU, pudieron comentar el pasáu, presente y futuru del monólogu asturianu y les posibilidaes d’un xéneru como’l monólogu modernu. L’actu remato con un pequeñu pinchéu nel que l’alderique continuo na Casa d’Asturies de Bruseles.

Benxa Pérez y Lluis Antón González comenten el resultáu de la xornada alredor del monólogu modernu en Bruseles

Los monologuistes Bénxa Pérez y Lluis Antón González, comentaron p’Asturnews, dende la Casa d’Asturies en Bruseles, les sos sensaciones dempués de la xornada dedicada al monólogu modernu celebrada por ASBRU estos selmana pasada en Bélxica.

Lluis Antón González:

Benxa Pérez:

Bruseles vivió una nueche de rises col espectáculu de monólogu modernu de Xareos!

Inaciu Galán, antologador de la obra, va presentar güei, a partir de les siete la tarde en Bruseles, la primer antoloxía de monólogu modernu, onde apaecen testos de Cristina Muñiz Martín, Azucena Álvarez García, Isaac G. de L’Arada, Benxa Pérez y Chechu García, amás del propiu autor del prólogu y la esbilla.

Amás la presentación va tar acompañada por una conferencia sobre’l “Monólogu modernu” a cargu d’Inaciu Galán y pola presencia d’ún de los autores, Benxa Pérez.

El llibru presentase dientro d’una xornada organizada por ASBRU na que la Casa d’Asturies de Bruseles va tresformase pa la ocasión nun café teatru, onde va tener llugar un espectáculu de monólogu modernu colos intérpretes y autores Benxa Pérez, Lluis Antón González ya Inaciu Galán, que pa rematar la xornada van aldericar col públicu asistente sobre’l futuru del monologuismu asturianu.

Según anunció estos díes l’asociación ASBRU (Asturianos en Bruseles), y d’alcuerdu “col so oxetivu de promocionar la cultura asturiana nes sos distintes manifestaciones y vertientes”, presenta na capital belga una actividá venceyada al mundu de la escena: una representación de monólogos al cargu de Xareos! Xestión Cultural, que trabaya dende va dellos años na creación de lo que se conoz como “Monólogu Modernu”. Los invitaos a esti actu son Lluis Antón González, Inaciu Galán y Benxa Pérez.

ASBRU presenta’l xueves 4 d’avientu na Casa d’Asturies de Bruseles, tresformada pa la ocasión nun café teatru, el trabayu d’estos autores ya intérpretes que, baxo la coordinación d’Inaciu Galán nel llibru “Pa echar unes rises”, de recién publicación, revitalicen el monólogu asturianu y faen que seya atractivu pal públicu de güei.

L’actu, que se cunta col apoyu de l’Axencia Asturiana d’Emigración, va entamar a les siete la tarde cola presentación del llibru “Pa echar unes rises, antoloxía de monólogu modernu”, d’Ediciones Trabe. La presentación va combinase con una breve conferencia sobre’l “Monólogu modernu” a cargu d’Inaciu Galán.

Darréu, va tener llugar l’espectáculu con una esbilla de monólogos colos intérpretes y autores Benxa Pérez, Lluis Antón González ya Inaciu Galán, que pa rematar la xornada van aldericar col públicu asistente sobre’l futuru del monologuismu asturianu.

Con “El Monólogu Modernu” ASBRU pieslla la so intensa axenda d’actividaes de 2008, qu’incluyeron tamién les III Xornaes Gastronómiques ASBRU en xunetu, la esposición Winnersloosers n’ochobre y el III Ciclu de Curtios y Documentales Asturianos en payares, que supunxo l’esitosu estrenu en Bélxica de la película documental “El Astillero”, d’Alejandro Zapico.

Páxina d’ASBRU

Xosé Lluis García Arias, profesor titular de Filoloxía de la Universidá d’Uviéu, dio n’asturianu la conferencia “El Diccionariu Etimolóxicu de la Llingua Asturiana y el so interés hispánicu” nel Linacre College de la Universidá d’Oxford (Reinu Xuníu). La conferencia celebróse nel marcu d’un programa dedicáu les llingües romance de la Península Ibérica.

Nel trescursu de la conferencia, l’ex presidente de l’Academia de la Llingua Asturiana solliñó que los datos recoyíos de la tradición oral puen proporcionar referencies “que permitan afondar na investigación d’aspeutos tovía mal conocíos de los nuesos romances”.