Escéniques

El ballet arxentín de Julio Bocca llega mañana al Teatru Xovellanos de Xixón, a partir de les ocho y media la tarde, con un espectáculu nel que’l baillarín fai despidida de los escenarios depues de que’l pasáu 6 de marzu cumpliere 39 años. El montaxe ta compuestu por un pasu a dos de Don Quixote y otru de Mahler, la pieza Nueve Canciones de Sinatra y el famosu Tango brujo.

El baillarín arxentín Julio Bocca despídese esti añu de los escenarios anque non de la dirección artística con un espectáculu especial col que vien trunfando pelos meyores teatros mundiales. Don Quijote, cola coreografía de A. Lojo según M. Petipa, con música de L. Minkus; Adagietto, con coreografía d’Oscar Araiz y música de Mahler; Nueve Canciones de Sinatra, con coreografía de Twyla Tharp y música del propiu Sinatra; y el Tango Brujo, con coreografía d’Ana Mª Stekelman y música de Manuel de Falla orquestáu ya interpretáu por L. Sujatovich, son el repertoriu de l’actuación del ballet de Julio Bocca, ún de los meyores baillarines de la hestoria de la danza.

Esti miercoles 23 d’agostu, a les nueche y media la nueche, la compañía asturiana Teatro Margen va presentar el so alegatu contra la guerra y l’interesáu papel de los medios de comunicación nuna obra que lleva por títulu ‘War!’. La pieza consta d’un espectáculu mistu de cai, con un empiezu itinerante, a mou de pasacais, y un desarrollu más estensu que tendrá llugar na Plaza l’Ayuntamientu de La Villa.

En War!, l’usu d’elementos de gran espectacularidá, aporten fuerza visual a una obra que yá lleva más de cien funciones nacionales ya internacionales.

Dientro del marcu del XVI Salón de Teatru Costumista Asturianu de Candás 2006, el Taller d’Iniciación al Monologuismu Cómicu Asturianu, baxo la dirección de Carlos Alba, va celebrar la so tercer edición ente los prósimos díes 21 y 25 d’agostu, cola intención de formar interpretes de monólogos cómicos con recursos propios pa interpretar mesmo los grandes testos clásicos como pa facer hestories modernes, fomentando amás la recuperación de la tradición oral y la so adaptación escenica.

Baxo la dirección de Carlos Alba, el III Taller d’Iniciación al Monologuismu Cómicu Asturianu que se va celebrar ente los díes 21 y 25 d’agostu en Candás, va trabayar sobre hestories creaes polos propios participantes asina como que les que recueyan nel so entornu, valorando los materiales del monologuista: un corpus que va dende’l monólogu teatral hasta’l chiste. Cola escucha de grabaciones de monologuistes tradicionales como Arsenio Díaz Pachín, Antonio Medio, Xose La Guardada, Martín Prado, Pandiella o Pin de la Cotolla, va trabayase tamien la respiración y la impostación, asina como la improvisación, la interpretación y les formes de preparar un testu o d’atopar un personaxe.

El director del cursu, Carlos Alba (Cellero), ye monologuista, actor, cuentacuentos y periodista. Como monologuista tien tres espectáculos unipersonales: Por falar vencí la güestia, basáu en cancios y testos clásicos de finales del sieglu XIX y primeros del XX (Baldomero Fernández, Flórez y González, Pepín Quevedo, Marcos del Torniello). ¡Del chigre!, de monólogos propios y actuales nos que mos fala dende les marees negres de galipote hasta les carreres de Fernando Alonso; y Cellero, el monologuista, un amiestu de testos descritores del sieglu XX (Delestal, Sarandeses, Sánchez Vicente, García Oliveros), con hestories propies y socedíos populares. Davezu actúa en teatros, cases de cultura, festivales y fiestes.

El Teatru Xovellanos trai pa los díes 16 y 17 d’agostu, a les ocho y media la tarde, la obra del polemicu ganador de tres premios Pulitzer, Edward Albee, que lleva por títulu ‘La cabra o quien es Sylvia?’, dirixida, interprestada y traducida por Jose María Pou. Estrenada en Cataluña en payares del 2005, ‘La cabra’ ye una traxedia que va directamente al centru del amor, los celos y los ideales, desafiando los límites de la tolerancia humana.

‘La Cabra o quien es Sylvia?’ foi estrenada en Nueva York, nel Golden Teatre, el 10 de marzu de 2002, recibiendo’l mesmu añu tolos premios que se dan nesta ciudá a la meyor función: el Tony, el New York Drama Critics Cercle, el Drama Desk y l’Outer Critics Cercle. Dende entós yá se representó (y sigue representándose) en más de 30 ciudaes del tol mundu.

De les obres del so autor, Edward Albee, destaquen ‘El sueño americano'(1961), ‘¿Quien teme a Virginia Woolf?’ (1962), ‘La balada del cafe triste’ (1958), adaptada a partir d’una novela de la escritora norteamericana Carson McCullers, ‘Tiny Alice’ (1964) y ‘Un equilibrio delicado’ (1966), pola que ganó’l Premiu Pulitzer de Teatru de 1967. Con ‘Seascape’ (1975), Albee ganó’l so segundu Premiu Pulitzer. Les siguientes obres foron ‘The Lady from Dubuque’ (1977), una adaptación de ‘Lolita’ (1979), del novelista rusoamericanu Vladimir Nabokov, y ‘El hombre de tres brazos’ (1983). En 1994 recibió por tercer vez el Premiu Pulitzer por ‘Tres mujeres altas’ (1991).

‘La cabra’ ye precisamente la destilación de lo meyor d’Albee. Desconcertante, esperimental y entretenida, toca temes de verdaderu dolor: la confusa naturaleza del amor, la necesaria perda de la inocencia o les vivificantes propiedaes de vivir en peligru.

El propiu autor dixo de la obra que ‘por fin escribí la función que me va echar del teatru americanu’. Función que va poder vese los díes 16 y 17 d’agostu nel teatru Xovellanos de Xixón a partir de les ocho y media la tarde.

Mañana martes 8 d’agostu, a les once la nueche, el grupu de teatru Producciones Nun Tris va estrenar la obra ‘La vixigona nun tien remediu’ na Plaza La Baragaña de Candás. Baxo la dirección artística d’Inma Rodríguez y Antón Caamaño, Nun Tris afonda nos estremaos aspectos del teatru asturianu, concentrando agora tolos esfuerzos en recuperar la comedia asturiana, rellacionándola cola Commedia de’ll arte, orixen d’esta manifestación artística popular.

‘La vixigona nun tien remediu’ abre con una pieza musical de gaita y tambor qu’acompaña a una compañía d’actores y volatineros hasta una plaza onde, al travies d’una coreografía, coloquen el telón y l’atrezzu. La nueva obra de Producciones Nun Tris cunta la historia d’un vieyu agarráu llamáu Don Calzón que ta namoráu de la guapa Sabelina que, al tiempu, ta namorada de Floro. Sicasí, el padre de la moza quier casala con diferentes pretendientes, en función del que más perres-y dea. Ente too ello, la Vixigona, criada vieya, ye la que va complicar y resolver tolos conflictos que surden a lo llargo d’una obra a la que, ente actu y actu, lleguen los volatineros al pueblu pa facer una función.

L’estrenu de ‘La vixigona nun tien remediu’ va poder vese mañana, a partir de les once la nueche, na Plaza La Baragaña de Candás, dientro de la so Selmana Cultural dedicada a lo ‘Fecho n’Asturies’.

La compañía entreguina Barataria Teatro, del director Roberto Corte, participa estos díes nel encuentru de teatru El Fringe (Edimburgo) con ‘Solo para Paquita’, un monólogu interpretáu pola actriz Patricia Rodríguez, nel que’l personaxe protagonista busca nel universu femenín, dende’l desconciertu y la contradicción desesperada. Pa la ocasión, la compañía asturiana va facer representación de la obra n’ingles, nuna versión de Beatriz González Carbajal, revisada por Richard Caldwell-Jones.

Depues d’exitos de públicu y crítica como ‘Hasta que la boda nos separe’ y ‘Gasolina con capullos’, pieza escrita n’asturianu pol propiu Roberto Corte a comuña col poeta Chechu García, Barataria Teatro llega a la capital escocesa con ‘Solo para Paquita’, depues de llevar ocho representaciones d’esta pieza per Asturies.

El prósimu día 14, a les diez y media la nueche, el Teatru Palacio Valdes d’Aviles va acoyer la representación de la obra ‘Filomena Marturano’, cola veterana actriz Concha Velasco na cabeza del cartel, depues d’algamar abondu esitu hai unos díes nos escenarios xixoneses. Esta pieza, dirixida por Angel F. Montesinos, producida por Juanjo Seoane y escrita nos años 40 pol comediógrafu italianu Eduardo de Filippo, ganador de premios como’l Feltrinelli di Teatro, tien recorrío les tables de tol mundu con miles de representaciones diferentes.

Juan Jose de Arteche ye l’encargáu de versionar esta obra de Filippo, protagonizada por Concha Velasco y Hector Colome, que trata los temes del matrimoniu y la maternidá, dende’l puntu de vista d’una vieya exprostituta que se ve abandonada pol so amante por una rapaza muncho más moza qu’ella.

La pieza treatral ‘País’ del escritor asturianu Dolfo Camilo Díaz va estrenase esta nueche a les diez y media, baxo la dirección d’Andres Presumida, nel ciclu que’l Teatru Palacio Valdes d’Aviles dedica a les obres producíes n’asturianu. Xuan Coll, representando un sindicalista mineru lliberáu, Cristina Bravo, Carmen Gloria García, Isabel Friera y Aique, son los actores que llevarán a escena esta traxicomedia d’ambiente mineru.

La última obra d’esti ciclu n’asturianu que tamien se va estrenar nel Palacio Valdes ye una comedia d’Alfonso Iglesias, ‘El pariente d’America’, montada pola Compañía Asturiana de Comedies. La cita va ser el prósimu vienres a les diez y media de la nueche.

El Circuitu Asturianu de Teatru de Villaviciosa va presentar mañana, a les nueve la nueche, na plaza l’Ayuntamientu de La Villa los ‘Monólogos del Chigre’ de Cellero, personaxe del actor Carlos Alba qu’unes hores primero actuará na Selmana Negra de Xixón.

Carlos Alba ye cuentacuentos, monologuista, actor y periodista, tando consideráu másimu representante del llamáu Monologuismu Cómicu Asturianu y verdaderu renovador d’esti xeneru que ta a mediu camín ente la narración y el teatru popular, onde un personaxe (nesti casu Cellero) cunta hestories d’humor con una espresividá cercana a la del xuglar, garrando los recursos espresivos del versu o’l cantu. Los primeros testos d’esti xeneru daten del sieglu XVII:

Carlos Alba percorre nestos díes la xeografía asturiana faciendo monologuismo con dos personaxes, Cellero y El Pola, que van tar na Selmana Negra de Xixón, La Villa, Candás y Avilés na selmana prósima.

L’axenda d’Actuaciones, que pue vese na páxina web del monologuista va llevalu’l miércoles 12 a les 21 hores a la Carpa del Sindicatu Estudianes na Selmana Negra, a la Plaza del Ayuntamientu en La Viulla, el xueves 13 a la mesma hora, y al Teatru Prendes de Candás el vienres 14 a les 20 hores dientru del Festival de AICA(Asoc. Intérpretes de la Canción Asturiana).

Sigún cunta na so páxina web el mesmu monologuista: “Cellero foi’l mio bisagüelu, carreteru que tolos díes diba colos gües camín d´Avilés (comu´l canciu). Foi un personaxe que dexó una fondera huelga nos suyos, pa bien o pa mal. Cellero ye, tamién, el barriu onde vivía y onde viven los Celleros, y Cellero ye la casa.” “Del mio bisagúelu cúntense, entovía güei, munchos socedíos, la xente alcuérdase de velu peles caleyes, nos chigres, n´Avilés, siempres colos sos gües, delles vegaes enfiláu, dando saltos enriba´l carru. Yo malapenes lu conocí, pero recuérdolu (magar que yera más bien ñarru) comu un paisanón del que había qu´escondese cuandu los neños tábemos xugando pela quintana y, sobre too, si mos topaba na cuadra de los sos gües, onde nun dexaba entrar a naide”

. Sigún el monologuista, cuando se plantegó dir a la gueta d´un personaxe col que facer monólogos “alcordéme d´elli. Llueu foi tomando vida propia con tol so mundiu: los sos collacios Manolín, Pin, Lin, Fozmartiellu, Xuan, Colás, Perico´l Facha… y además metióse a rucar nel mundiu de güei, na so actualidá. Nun sé qué camentaría aquel bisgüelu si allevantara la tiesta y viera al so biznietu facer lo que fa-y”.
Actuaciones nel branu de Cellero