Escéniques

El grupu de teatru asturianu “La sonrisa del lagarto” representa “Prisionero 119.109” nel Centru de Cultural de Caxastur de la Colexata de Xixón, a partir de les 20,00 hores de güei vienres 24 de payares. Basada nos testimonios reales de les persones sobrevivientes de los campos de concnetración y esterminiu la obra dirixida por Sergio Gayol y la compañía La Sonrisa del Lagarto cuenta’l momentu nel que los sobrevivientes entamen a cuntar lo que pasó.

El Conseyu d’Alministración del Teatru Xovellanos de Xixón aprebó ayeri por unanimidá les actividaes del programa de festexos pa la Navidá y l’Antroxu 2007. La programación del Teatru xixonés del primer trimestre de 2007 nun se pudo aprebar pol votu contrariu de los representantes del Partíu Popular a que s’estrenara la obra “Lorca eran todos”, escrita y dirixida por Pepe Rubianes.
“Lorca eran todos” ta previsto que se represente coincidiendo col Día Mundial del Teatru, 27 de marzu. La obra algamó gran polémica depués d’unes declaraciones sobre l’Estáu Español por parte del autor nun programa de la Televisión Pública catalana, dende esi momentu hebo dificultaes pa poder representase en Madrid y n’otres ciudaes españoles. Hai unes selmanes l’alcade d’Uviéu afirmaba que la obra nun se diba ufrir en nengún espaciu públicu del conceyu.

Iván Álvarez Raja, conceyal delegáu del Teatru Xovellanos, puso de manifiestu, en comunicáu de prensa, que la data alcordada púnsose muncho enantes del entamu de la polémica. Afitando que “la política d’esta Alministración ta a favor de les llibertaes públiques y perespecialmente de la llibertá d’espresión n’especial la de los axentes culturales”
“Lorca eran todos” ye un montaxe que toma’l nome de la placa de la fosa común na que reposa Federico García Lorca, en Viznar (Granada), en referencia a les persones qu’ellí s’hayen, y documenta los caberos meses de vida del poeta granadín fusiláu en 1936. Entama cola marcha de Lorca de Madrid en xunu de 1936 pa Granada depués de qu’el Frente Popular ganara les elecciones, pa siguir col entamu de la Guerra Civil, la so detención y el so fusilamientu. Dende estos testos d’historiadores como Agustín Perón, Ian Gibson, Eduardo Molina y José Luís Vila Sanjuán, se va entetexendo esta obra.
El conceyal del Ayuntamientu de Xixón y Presidente del Teatru Xovellanos fae un llamáu a los xixoneses a que disfruten d’esta obra y a los conseyeros del Partíu Popular a que “xulguen depués de ver l’espectáculu”

La compañía de teatru Kumen va poner n’escena esti vienres “La aldea perdida”, considerada una de les obres más relevantes d’Armando Palacio Valdés. La representación fadráse nel Teatru Palacio Valdés d’Avilés a partir de les 20,15 hores.

Teatro Margen va poner n’escena “El viaje a ninguna parte”, mañana 16 de payares a les 20,00 nel Centru Cultural Caxastur de Mieres. La representación enmárcase nel Ciclu Alcuentros n’Asturies de Caxastur.
N’esti ciclu de teatru participen venticinco compañíes. Ente otres de les obres que se van representar, n’esti ciclu, destaquen King Richard, d’Higiénico Papel; Iberia, de Teatro del Norte; Indignos, d’Amarenato; Prisionero 119.109, de la Sonrisa del lagarto; o “Suspiros de España” de Tatro Crónico.

Inaciu Galán ya Isaac de l’Arada recoyeron el premiu pol monólogu Asturianos al volante… esti sábadu nun actu nel colexu de Morea (Ayer), nel que se punxo de manifiestu’l remocicar d’esti xéneru humorísticu.

El monólogu premiáu puo sentise nel Segundu Certame de Monólogu Modernu n’Asturianu organizáu pola asociación H.A XAREOS que se celebró’l sábadu 28 d’ochobre na Sala Albéniz de Xixón. Esti festival, que busca que’l monólogu asturianu siga siendo un referente na vida cultural de los asturianos, y que siga siéndolo n’asturianu, con unes formes y una temática renovaes, tuvo presentáu precisamente por Inaciu Galán y González, cuntando coles actuaciones de Cellero, Lluis Antón González, Benxa Pérez y l’estrenu de Delitu Rural y otros alumnos de la escuela Cellero.

La compañía de tetaru asturiana Margen va representar esta nueche, dende les 20,30, dos de los más conocíos entremeses de Cervantes. “La guarda cuidadosa” y “La cueva de Salamanca”. La escenificación tien como actores principales a José Antonio Lobato, Ángeles Arenas, Teresa Quirós, Juan Manuel Román, José Luís de San Martín, Carlos Mesa y Alfonso Aguirre. Los entremeses cervantinos tarán dirixíos por Arturo Castro quien xunta a Josá Antonio Lobato ye autor de les versiones que se van amuesar nel teatru uvieín.
La función inclúyese nel ciclu de teatru profesional de la Dirección Xeneral de Cultura del Principáu d’Asturies.

L’asociación Asturactiva entama dende’l 8 de payares al sábadu que vien, el IV Festival de Cuentos de Xixón “Cuentos pa un mundu posible”. Les actividaes incluyen la llectura de cuentos por Puala Carballeira, Félix Albo, Charo Pita y Tim Bowley.
Los cuentos cuntaránse dende les 8 la tarde nel Muséu Barjola. El vienres Féliz albo fadrá una sesión especial dientro del programa d’ociu alternativu “Abierto hasta el amanecer” nel Centru Cultural d’El Llano dende les 11 de la nueche.

El Xardín Botánicu acoyerá esti domingu la iniciativa “Leer el paisaxe”, que permitirá a los y les visitantes esperimentar la llectura de la prensa nes instalaciones, col paséu y la estancia nos diferentes paisaxes qu’ufre’l Botánicu, asina como una alborada poética a cargo de delos miembros del grupu Encadenados.
Cola entrada’l visitante recibirá de baldre na taquilla del Botánico un exemplar d’un de los tres diarios, en papel, asturianos y el so suplementu. Dende ehí, paséu y llectura van difundise cola posibilidá de tomar de baldre una consumición na cafetería o sentir la nátura dende dalgún de los bancos esparcíos pol mayor múseu al aire llibre d’Asturies. Amás, na cafetería dellos monitores conectaos a internet abrirán el paraxe natural a la información, permitiendo la consulta de bien de diarios.
Amás, dellos de los poetes pertencientes al grupu “Encadenaos” fadrán de 12:30 a 13:30, llectures poétiques de les sos creaciones, o resucitarán versos de Gioconda Belli, lleíos por Maypi Solís: (Abandonados, Dándose y Textura de sueño” y de José Hierro, lleíos por Carmen Sánchez: (Caballero de otoño, El momento eterno, y Vida).

Esti martes 24 d’ochobre, a les 20,00 hores, na Colexata del Centru Cultural Cajastur Palaciu de Revillaxixeo, fadráse l’actu de celebración del Atenéu Obreru de Xixón, que s’inxerta ente les actividaes de cellebración de los 125 años d’actividá ateneística de la institución xixonesa.
L’actu del Día Social del Atenéu Obreru de Xixón va consistir na actuación de la Coral del Atenéu de La Calzada “Luís Quiros” col so espectáculo “El soníu de les pallabres”, del que se va facer estrena, y que ye un amiestu poéticu nel que la recitación y la musicación de los poemes busquen un resultáu nel que s’entremecer la expresión xestual, el conteníu semánticu y la sonoridá de les pallabres.
L’Atenéu Obreru de Xixón creóse en 1881 como una entidá cultural privada ensin ánimu de lucru y con dimensión pública. Ente los fines de la institución tán fomentar la enseñanza y la cultura. Faciendo pa llegar estos fines alantre conferencies, exposiciones, teatru y, sobre too, cursos y talleres. La Bibliote del Atenéu creada en 19047 llegó a contar con más de 15000 volúmenes, convirtiéndose nel estandarte de la entidá obrera. En 1937, depués de la ocupación franquista, l’Atenéu vese obligáu a piesllar y hasta 1981 nun volvería abrir les sos puertes.

El nuevu Ciclu de teatru infantil de Cajastur entama güei n’Uviéu cola puesta n’escena del cuentu de “La ratina presumida” del grupu malagueñu Elestable Teatro. La programación teatral, que se desndolcará hasta’l 5 de febreru, cuntará cola participación de 24 grupos teatrales que pondrán n’escena 54 representaciones nos centros culturales de Cajastur n’Uviéu, Xixón, Mieres y Llangréu. El ciclu cuenta con grupos internacionales de Bulgaria, México o Brasil, asina compañíes asturianes y de delles comunidaes españoles, como Andalucía o Castieya y Llión.
Tres de la puesta n’escena de güei, el ciclu siguirá per Mieres, Fábula Teatro con “Peces de Colores”, un conciertu dramtizáu por cuatro instrumentos y sopranu. En Sama los asturianos de la Pipa Teatro, con “Todos al Trean” fadrán un tren con bizcochu y chucheríes al tiempu que mos cuenten hestories. La fin de selmana siguiente tocará-yos el turnu a los Telonicllo de Valladolid, que van interpretar “Kaspar”. El domingu en Sama, el públicu tendrá la ocasión de sintir el llinguaxe puru d’Andersen nel so 200 cabudañu gracies al grupu búlgaru y residente en Xixón, Teatru Plus y el so espectáculu “Es verdad, es verdad”.
El mes de payares entama col espectáculu “La vija durmiente” de los granadinos de LaSal, un espectáculu que fala de la vieyez y de la rellación colos más nuevos y pol qu’algamaron el Premiu a la meyor interpretación femenina de la Feria Teatru nel Sur de Palma del Río 2006. En Sama los asturianos Alevosía, pondrán n’escena “Sorpresa”
El ciclu de teatru infantil siguirá hasta bien entráu xineru con bien de reprensentaciones empobinaes a los más neños y neñes, anque siempre queda un espaciu pa que los y les que yá nun son nueves puedan disfrutar de les funciones.