Escéniques

El monologuista Carlos Alba “Cellero” y Rafa Kas, van tar nel audiotoriu la Casa Cultura de Pravia, el vienres 7 a les 20.30 hores col espectáculu “Caleya Urbana”, col que lleven delles selmanes percorriendo los escenarios d’Asturies.

El Teatru Xovellanos quixo sumase a les celebraciones alredor d’esta disciplina artística programando trés grandes espectáculos de danza a lo llargo del mes de mayu. Falamos de la neoyorquina compañía de danza American Ballet Theatre II, de los brasileños Grupu Corpo y de la granadina, Medaya d’Oru al Méritu de les Belles Artes 2009, Blanca Li.

Trés cita que van tener llugar el 8, 20 y 29 de mayu, respectivamente, y que sorrayen la importancia que la danza en toles sos manifestaciones ocupa nel programa del Xovellanos, dende’l ballet clásicu a propuestes contemporanees qu’esquicen nueves espresividaes del movimientu.

Axuntamos el mensaxe del Día Mundial de la Danza 2010, escritu pol coreógrafu australianu Stephen Page:

“La danza ye la forma orixinal, la más vieya de la espresión humana. Al traviés del cuerpu y del llinguaxe físicu, la danza tien una poderosa conexón colos mundos emocional y espiritual. Na cultura tradicional aborixe, la danza ye l’alma, como una especie de medicina sagrada. La danza ta enraigonada na tierra, conectada col espíritu de la Madre Tierra. Mientres nun apurras a la danza nun vas poder cazar tranquilamente. Ye una parte integral de la esistencia humana.

Cuando creo un nuevu trabayu de danza pido a los baillarinos que traguen y dixeran la grana tradicional, que sientan el códigu innatu que s’atopa dientro por que podamos tresformar la esencia tradicional al mundu contemporaneu. La danza ye’l llinguaxe universal. Representa la identidá humana y una celebración del espíritu humanu. La danza ye’l corazón artísticu de la filiación. Ye un remediu sagráu universal”

El musical “Fiebre del Sábado Noche” llega a Xixón y va tar nel Teatru Xovellanos del xueves 29 d’abril al domingu 2 de mayu. Ambientada a finales de los años 70 en Bay Ridge, un suburbiu probe de Brooklyn en Nueva York, Fiebre del sábadu nueche céntrase na vida de Tony Manero.

Esti xueves, 29 d’abril, va celebrase una terturlia n’El Cafetón d’Avilés, asitiáu na cai del Sol. Na mesma va falase de la situación que vive anguaño’l teatru asturianu, con Etelvino Vazquez (Director de Teatro del Norte), Roberto Corte (Director de Barataria Teatro y Editor de La Ratonera), Mayra Fernandez (actriz de La Tejedora de Sueños), Pedro Lanza (Collaborador de la Ratonera) y la moderación d’Adolfo Camilo.

La obra “Casa de Muñecas” de Henrik Ibsen, llega güei vienres 23, al Teatru Xovellanos y a partir de les 20:30h. El preciu ta ente los 10 y 18 euros.

Resume: Nora Helmer ye víctima d’un chantaxe por un erru cometíu años de tras. El sucesu va faer taramellase los felices cimientos de la so vida familiar. L’aportar de los acontecimientos dexará-y tomar conciencia de la so realidá matrimonial, dando pasu al primer alegatu feminista de la hestoria del teatru.

El vienres 23 d’abril, a les 20:00 hores, nel Centru Cultural de La Fresnera, en Siero, la compañía Syntexto Teatro va representar la obra del escritor maliayu Lluis Portal, dedicada a la vida de Carlos García de la Concha.

Home conservador, monárquicu, católicu…, durante la dictadura de Miguel Primo de Rivera, De la Concha formó parte de la formación política creada por ésti, la Unión Patriótica. Foi diputáu provincial, y fundador de los ateneos de Villaviciosa y Xixón. Fundó en 1929 -y dirixó- el periódicu local Orientaciones, d’ideoloxía conservadora, que siguió publicándose hasta l’españíu de la guerra. Escribió en castellanu y asturianu. En rima y n’asturianu dio a la imprenta Ensueños y añoranzas (1923) y Cuentos perreros (1953).

“5” (ni cuatro, ni seis), esti ye’l títulu del espectáculu de monólogos que llega esta nueche al Teatru Campoamor d’Uviuéu y qu’axunta a cinco cares imprescindibles de la comedia. Un homenaxe a un xéneru, el stand up comedy, que se va celebrar a partir de les 20:30 hores con Dani Rovira, Miguel Iribar, David Navarro,Nacho Garcia y Juanjo Albiñana.

Les entraes tán a la venta en Caxeros de Caxastur www.cajastur.es, TiqueExpress, 902 601 106 y Taquilla del teatru, hasta momentos enantes de l’actuación.

Mañana, vienres 16 d’abril va facese en Castropol un actu d’homenaxe a la Biblioteca Popular Circulante, que va consistir nel descubrimentu d’una reproducción de la placa de la Biblioteca Popular Circulante na plaza del conceyu. Sedrá a partir de les 19.00 hores. Darréu va presentase, nel salón d’actos de la biblioteca, el llibru “El ‘Teatro Aldeano’ da Biblioteca Popular Circulante de Castripol (1929-1934)”, de Xosé Miguel Suárez.

Dientro del actu van actuar los miembros del grupu musical Moxega y va presentase’l vidiullibru “El teatro aldeano”, onde se reproduz una obra de marionetes en gallego-asturianu.

Nos actos van participar l’alcalde del Conceyu de Castropol, José Ángel Pérez y la Directora Xeneral de Política Llingüística, Consuelo Vega, amás del autor del llibru citáu y otres personalidaes de la cultura asturiana del Eo-Navia.

El sábadu 17 d’abril a les 20:30 hores la producción del Teatro Español “Mercado Llibre”, de Luis Araújo va xubir a escena nel Xovellanos. La dirección foi obra del xixonés Jesús Cracio.

Cracio ponse al mandu de la madrilana producción con una repartida compuesta por Yoima Valdés y Daniel Freire, con un testu dramáticu de Luis Araújo que foi galardonáu col Premiu Certame de Testos Teatrales “Esperpento” de Torreperogil. Araújo ye dramaturgo, director y actor, con una sólida traxectoria nacional en compañíes hestóriques como Tábano, Teatro Libre o Artefacto.

L’Ayuntamientu de Corvera abrió yá’l plazu pa presentase al primer concursu y amuesa de monologuistes asturianos “Meyor solo…”, organizáu pola Casa de la Llingua col sofitu del Gobiernu d’Asturies y Caxastur.

El certame va celebrase ente’l 30 d’abril y el 14 de mayu, pudiendo presentase obres orixinales o yá conocíes, con una duración d’ente 15 y 20 minutos.

Cada humorista saldrá al escenariu d’El Llar de Les Vegues en dos ocasiones, los vienres 30 d’abril y 7 de mayu. Los escoyíos, van pasar a la final, a celebrar el día 14 d’esi mesmu mes. El ganador recibirá 700 euros, 400 el segundu clasificáu, 200 el tercero y 100 euros el cuartu.