Escéniques

L’Arribada entama güei la xornada cola presentación, a les cinco y media la tarde, de les obres de teatru “Oh 36!” y “Poison” de Lluis Portal Hevia. Media hora más tarde, Elma S. Vega presenta “El enigma del palacio de Bao”, mientres que de magar les seis y media va facese un homenaxe a la héstorica actriz del teatru asturianu Aurora Sánchez.

La xornada termina con teatru, de la mano de la Compañía Asturiana de Comedies, y a partir de les siete y media, va poder esfrutase de la representación de “La trastᔠd’Arsenio González.

Esta célebre melodía va sonar esta fin de selmana nel teatru de La Llaboral, en Xixón. Más de 250.000 espectadores de toles edaes esfrutaron yá de “La vuelta al mundo de Willy Fog. El musical”, basáu na serie de televisión del mesmu nome. Llega a La Llaboral esta “fantástica aventura llena de bon humor”, que va poder vese, el sábadu a les cinco y siete y media la tarde; y el sábadu, a les doce la mañana y les cinco la tarde.

Los precios tán ente los 12 y los 18 euros, con descuentu especial cola Promoción “Pack Familia” (4 entraes) namás en taquilla y venta telefónica nel 902 106 601,

Nieves Castells, Ana López y Raquel Rom ero protagonicen “Con la muerte en los tacones”. Una hestoria na que trés hermanes reciben la noticia de la muerte de la so madre, viéndose obligaes a faer un viaxe xuntes pa cumplir la última voluntá de la difunta. Mari Fe, una executiva agresiva, trunfadora y ex alcohólica; Esperanza, una hippie paranoica, adicta a los ansiolíticos y con problemes de contención urinaria; y, a lo último, Caridad, una ama de casa neurótica escorrida poles desgracies. El so oxetivu yá nun va ser llegar al so destín, sinón sobrevivir al viaxe.

•

La Dirección Escénica ta a cargu de Joan Miguel Reig. La obra va poder vese nel teatru de La Llaboral, en Xixón, esti vienres, 24 de setiembre a les nueve la nueche. Pueden m ercase les entraes nel teléfonu 902 106 601, na rede de caxeros de Caxastur y nos puntos de venta de La Llaboral, en Campu Valdés y na Tienda de la Llaboral.

Los monologuistes Carlos Alba, Silvino Torre y Lluis Antón González, actuarán nes Fiestes de San Matéu d’Uviéu, na llocalidá de La Corredoria, dientro de la programación festiva qu´esti añu s’entama nos barrios de la ciudá, col so espectáculu “Tres pates pa un bancu”. L’actuación sedrá’l vienres 17 de setiembre y la hora de comienzu ye les nueve la nueche, na plaza del Conceyín, onde tán situaos los chiringuitos y demás atraciones de les fiestes uvieínes.

La Compañía Antonio Gades llega esti sábadu 28 d’agostu al Xovellanos pa poner n’escena Fuenteovejuna. La representación d’esta coreografía va dar entamu a les ocho y media embaxo la dirección de Cerco Araúzo (qu’a lo llargo de munchos años bailló con Gades asocediendo a Cristina Fuejos en Carmen) la Compañía Antonio Gades recuperó pa los escenarios Carmen, Bodas de Sangre, Suite Flamenca y Fuenteovejuna. Estrenada n’avientu de 1994 na Ópera Carlo Felice de Xénova, Fuenteovejuna foi’l testamentu artísticu d’Antonio Gades, la postrera de les sos coreografíes.

Meses antes de finar, Antonio Gades creó una Fundación encargada de curiar el so patrimoniu artísticu, espublizar la so obra y fomentar la danza española por tou’l mundu. Devuelta a los escenarios a instancies d’esta Fundación, la Compañía Antonio Gades ye agora la única responsable de poner n’escena los sos ballets.

Mañana entama’l seminariu que’l grupu Teatro del Norte organiza hasta’l 30 d’agostu. Los “XII Alcuentros nel Norte”, seminariu de pedagoxía teatral, onde esti añu van trabayar “El Personaxe y la so construcción”. Los pedagogos participantes na actividá son Lucas Trapaza, Ana Gladis Rodríguez, Manuela Caso, Zé Paredes y Cristina Samaniego.

Amás van celebrase dellos talleres d’otres materies, representaciones, proyecciones de vidiu, charres, alcuentros y demostraciones, teniendo por llar, en réxime d’internáu, el Colexu El Prial de L’Infiestu.

Va ser nel pub Padul, na cai los Alas, a les 23 hores del miércoles, 25 d’agostu. Vuelve’l monólogu-rock d’El Pola y el Rafa Kas, vuelven les rises del grupu humorísticu ”Caleya urbana”.

El Teatru Xovellanos acueye esti vienres 20 y sábadu 21 d’agostu, de magar les 20:30 hores, la obra “Sexos”. Nella Pepón Nieto, Adriana Ozores (de nuevu xuntos tres Los homes de Paco) y Anabel Alonso encabecen una comedia agriduz sobre les rellaciones de pareya o, cómo llegar a los cuarenta echando de más a la muyer o al home que tienes na cama y de menos a la muyer o home que querdríes tener.

Pep Antón Gómez escribe esta hestoria onde se crucien, estorben y complementen, les hestories de dos pareyes y una soltera. Alberto y Cristina lleven casaos demasiao tiempu pa que’l sexu importe. O eso dicen ellos como consuelu. Isabel y Martín lleven empareyaos el tiempu xustu por qu’él entá lo demuestre too na cama, pa qu’ella aproveche too esi esplegue de raxón sexual namás que’l reló biolóxicu dexe de tocar a rebato y s’asele con un embaranzu. A Maite, la despareyada, val-y tolo que toos tean dispuestos a demostra-y… na cama. Aquexaos del cumplimientu de los 40, dispuestos a osadíes sexuales amarutaes de namoramientos, Alberto y Cristina, Isabel y Martín, Maite, nun saben que tán buscando lo mesmo que yá tienen.

Sobre un escenariu minimalista, desnudu casi, Sexos progresa a base de diálogu acedu, personaxes tan convincentes que nos saldríen al pasu cualquier día en cualquier esquina, y un talentu inmensu de los protagonistes pa metese al públicu nel escenariu. Y, a éstes hai cuters que corten menos que Sexos.

Los prtecios de la butaca tán ente los 15 en xeneral a los 20 euros.

Güei, martes 17 d’agostu, ye la xornada cabera na que va poder esfrutase de la Compañía Asturiana de Comedies nel Teatru Xovellanos. A les 20:30 hores la va poner n’escena lo que ye’l so últimu quefer teatral, “El Tratu de Chiripa”, d’Arsenio González. Con esta comedia, que caltien la llínea habitual de la Compañía, súmase un eslabón más a un repertoriu del que formen parte títulos como “El Tramposu”, “El Diablu l’aldega”, “Pachina y la Parentela” o “La Trastá”.

La Compañía Asturiana de Comedies lleva década escribiendo y representando situaciones d’enorme comicidad que retraten prototipos costumbristas de la nuesa rexón. La escenografía, dirección y montaxe cuerre al cargu de Eladio Sánchez, que cuntó nesta ocasión con Armando Felgueroso como director axuntu. La nutrida repartida d’actores que van protagonizar esti estrenu ta compuestu por Pili Ibaseta, Josefina García, Belén Sánchez, Marta Cases, Mar Buelga, Eladio Sánchez, Arsenio González, Norberto Sánchez, Armando Felgueroso, Iván Fernández y Sergio Buelga.

Dempués de dos díes d’actuaciones, el Teatru Xovellanos de Xixón diz adiós a Pepe Viyuela, Teté Delgado y Asunción Balaguer, protagonistes de la versión que Juanjo Seoane y Bernardo Sánchez roblaron del xenial guión cinematográficu de Rafael Azcona.

Embaxo la dirección del tamién cineasta Pedro Olea y con una repartida que se completa con escelentes interpretaciones al cargu de Manuel Millán, María Felices, Diego Pizarro, Jorge Merín y José María Álvarez, esta incursión teatral tien a méritu basase non tantu nel guión cinematográficu, sinón nel testu que reescribió Azcona cerca del final de la so vida.

La propuesta que Juanjo Seoane Producciones fai de “El Pisito” ta dotada d’absoluta vixencia y la so aportación al clásicu del nuesu cine ye una incursión más fonda na comedia ensin allixerar el drama que vivía la España de los cincuenta.