Escéniques

La gala d’entrega de Premios del «I Certame de Teatru Escolar en Llingua Asturiana/Gallego-asturianu», va facese esti miércoles 8 de mayu a les 18.30 hores nel Teatru de Llaboral Ciudá de la Cultura (Xixón). Nel trescursu del actu van representase delles de les obres premiaes. L’actu ta dientro de los de la Selmana de les Lletres Asturianes.

Esti vienres, 3 de mayu, Día de les Lletres Asturianes, nel teatru El Llar de Corvera (en Les Veguues), a les 22.30 y de baldre, Carlos Alba interpreta “Llázaro de Tormes”, la versión n’asturianu del Lazarillo estrenada apocayá.

El Valey Centru Cultural de Castrillón acueye la representación de “Los amores de Ximielga”. Sedrá güei vienres 5 d’abril a les ocho la tarde y por 4 euros.

“Los amores de Ximielga” ye una obra clásica del teatru costumbrista asturianu. L’acción desenvuélvese nuna aldea de la nuesa Asturies, onde les males colleches y un cientu de problemes faen depender a tolos vecinos de Silvestrón, l’emprestador del llugar, que ye un ricu avariciosu, que s’aprovecha de la mala situación de los vecinos del llugar pa quedase colos sos bienes y manipolialos al so antoxu.

El grupu de teatru Telón de Fondo tien preparaada una nueva obra pa estrenar el 5 de mayu d’esti añu nel Teatru Xovellanos de Xixón. Ye una obra basada nel Tíu Vanya d’Antón P. Chéjov, que Lluis Antón González, autor del testu n’asturianu, tresllada a l’Asturies de principios del sieglu XX, col títulu d’El tíu Antonín. Nel repartu van tar José Luis Fenández, el propiu Lluis Antón González, Carmen Suarez Trapiello, Ángel Héctor Sánchez y Marilú Casas. La dirección ta al cargu de Sara García Rodriguez, mientres que la producción ye cosa de Xulio Vigil. Yá pue vese un trailer de la obra.

Dende va selmanes pueden mercase les entraes nel propiu teatru o na páxina web del mesmu por namás seis euros.

Telón de Fondo lleva trabayando nel campu de les artes escéniques dende l’añu 1973, faciendo por normalizar l’asturianu nesti campu.

La obra

“Branu de 1930. La tranquila vida rural d’una casona asturiana, la de los Arboleya, na que viven el tíu Antonín, cola so madre y la so sobrina Sonia, vese alterada pola llegada d’un matrimoniu, formáu por un profesor retiráu y la so muyer, muncho más moza qu’él. La monótona y aburrida vida, dedicada namás qu’al trabayu nel campu, sufre un cambiu radical cuando Helena, la muyer del profesor trestoca l’equilibriu de les rellaciones de la casa, desatando un conflictu nel que les pasiones y les envidies faen asomar la traxedia”.

Merca entraes pa ver El tíu Antolín

La Federación de Compañíes de Teatru Asturianu (FETEAS) publica tolos años un llibru de testos teatrales denomáu “Teatru n’asturianu” en collaboración col Teatru Prendes de Candas del Conceyu de Carreño. Esta publicación va intentar tener a lo menos trés obres de teatru que pueden ser escrites n’aturianu o ser traducíes a esta llingua. Unu de los testos que se publicar va ser el ganador del concursu de testos teatrales Aurora Sánchez. Esti premiu va dar a conocer dientro de los Alcuentros de Teatru Amateur qu’entama FETEAS y va apurrise el día que se dan los Premios del Salón de Teatru Costumbrista de Candás. Los otros dos testos van ser escoyíos por un Xuráu d’ente aquellos que se presenten al concursu de testos teatrales Carlos Álvarez Novoa. Dambos dos tienen abiertu’l plazu pa presentase hasta’l viniente 31 de marzu de 2013.

Bases completes del concursu

Esti domingu 24 de febreru a les 20.30 hores, el Centru Niemeyer d’Avilés acueye “Las Noches del club de la comedia”. Globomedia presenta “Las Noches del Club de la Comedia”, el so late nightshow de mayor ésitu de xira pelos meyores teatros del estáu, nun espectáculu con Toni Mogg, Miguel Lago y David Broncano.

Esti miércoles 20 de febreru, el grupu de teatru La Xana de Perlora va representar “L’abeyón”, obra d’Eloy Fernández Caravera. Sedrá de magar les siete la tarde ne salón d’actos del centru cultural Pumarín Xixón-Sur.

Na obra, Mersa ve como por fin pueden cumplise los sos suaños de casase pero tarrez que vuelva’l abeyón y lo desfaiga too. Anque paezan bruxeríes, les coses van complicándose y non solo pue desfacese’l so casoriu sinón…¡el de la fía del que va ser el so home!

El grupu cultural La Xana entama la so andadura en 1980 y dende entós, de forma ininterrumpida, ficieron numberoses representaciones n’Asturies o llugares como Suiza.

Con motivu de la celebración de la XXXIV Selmana de les Lletres Asturianes, la Conseyería d’Educación, Cultura y Deporte fai esta convocatoria a tolos centros educativos de la Rede Asturiana qu’imparten Llingua Asturiana y Gallego-Asturianu. L’oxetivu de la mesma ye empobinar l’actividá teatral en Llingua Asturiana y Gallego-Asturianu como modelu d’espresión y la normalización del so usu nel ámbitu educativu.

Ente toles representaciones recibíes fadráse una selección de les que van participar nuna Gala Final nel Teatru la Llaboral de Xixón, el próximu miércoles, 8 de mayu, organizada pola Conseyería d’Educación, Cultura y Deporte del Principáu d’Asturies dientro de la XXXIV Selmana de les Lletres Asturianes.

Bases completes del concursu

Esti vienres ye unu de los “vienres diferentes” del Tierra Astur de Xixón. El monologuista Carlos Alba Cellero tará echando los sos monólogos demientres la cena de magar les nueve y media la nueche. Un momentu pal humor asturianu nesti chigre xixonés asitiáu xunto a la Playa de Pando o Poniente.

El grupu de teatru Factoría Norte estrana güei xueves a les seis de la tarde, la versión n’asturianu de la so obra “Nora, la neña de sal”, basana nun llibru infantil de Fátima Fernández Méndez.

Sedrá nel Auditoriu Teodoro Cuesta de Mieres del Camín a un preciu de cinco euros. Darréu percorrerá otros teatros d’Asturies.