Escéniques

Un actor de pesu pa da-y vida a la prosa d’Armando Palacio Valdés. L’artista vascu Txema Blasco, conocíu pola so participación en llargumetraxes como ‘Carne de gallina’, ‘Tierra’ y ‘Vacas’, y con amplia esperiencia en teleseries d’éxitu, encabezará’l repartu de la recreación musical de la novela ‘José’, un espectáculu que s’estrenará el 4 de setiembre nel parque de Les Conserveres de Candás baxo dirección de Pablo Quiroga.

N’escena, Blasco tará flanqueáu polos integrantes del grupu teatral Nun Tris, la Coral Polifónica Aires de Candás, el Grupu de Baille Tradicional San Félix, la Peña El Nodo y los efectos de lluz y soníu proporcionaos pola empresa candasina Pirotecnia Morís, nun espectáculu que se representa por segundu añu consecutivu col envís d’atrayer a visitantes al conceyu de Carreño, pero que presenta novedaes respecto a la función de 2003.

Amás de poner n’escena un montaxe dafechu distintu al del añu pasáu -la Mancomunidá’l Cabu Peñes escueye cada añu un proyectu nuevu pal espectáculu-, el públicu allugaráse nesta ocasión nel anfiteatru de Les Conserveres, plaza qu’ocuparán los participantes na obra, y l’elencu tará formáu por venti actores.

L’encargáu de cordinar la recreación escénica de la novela marinera de Palacio Valdés, el realizador Pablo Quiroga, acumula con sólo 25 años d’edá una producción audiovisual qu’algamó varios premios a nivel estatal. Ente los curtiometraxes dirixíos por Quiroga figuren ‘Frío mortal’, ‘Envidia mortal’, ‘Conexión mortal’, ‘El año de los tres ochos’, ‘Ático’, ‘Anunciación’, ‘Migración’ y ‘Doble fondo’.

Web oficial del espectáculu

Siguen les movilizaciones porque’l compromisu municipal entá nun garantiza la recuperación del Arango como espaciu cultural. La plataforma ‘Cultura pal Arango’, qu’ayeri cellebró una nueva asamblea, analiza con cierta rocea les garantíes del Ayuntamientu y mantién la convocatoria d’una manifestación pal 16 de setiembre, mes nel que prevé tener llistu el plan de viabilidá técnica pa reflotar el teatru.

Pesie a la entrevista que’l pasáu vienres mantuvieron responsables de la plataforma cola alcaldesa de Xixón, Paz Fernández Felgueroso, que se comprometió a pedi-yos a los propietarios del Arango que paralicen la conversión de la sala nuna clínica de Corporación Dermoestética, los miembros de ‘Cultura pal Arango’ afitaron ayeri la necesidá de caltener les reivindicaciones na cai, na convicción de que la recuperación de la sala pa usos culturales baxo aval municipal ta dafechu nel aire.

Nesti sen, Constantino Hevia, miembru’l collectivu, amosóse roceanu cola propuesta que dexó acusbiar l’alcaldesa pa permitir l’usu temporal del Arango por parte d’una empresa privada y, depués d’unos años, recuperar l’inmueble como teatru. “Eso convertiría l’Arango mui probablemente n’apartamentos de luxu”, pronosticó Hevia.

Con esi barruntu presente, ya interpretando que la entrada agora d’una empresa privada nel céntricu teatru xixonés acabaría col Arango como teatru, ‘Cultura pal Arango’ esforzaráse n’aprovechar el mes de ‘conxelación’ de les negociaciones con Corporación dermoestética pa ultimar el so plan técnicu de viabilidá pa recuperar la sala como espaciu cultural.

Pa ello ye preciso que los propietarios del llocal accedan a la fin a entrega-yos una llave a los miembros de la plataforma pa qu’éstos puean entrar nel teatru, comprobar en qué estáu s’alcuentren les instalaciones y ellaborar un plan de recuperación realista y verosímil. Según precisó Constantino Hevia, el collectivu inda nun recibiera, a fecha d’ayeri, el preste p’acceder al interior del Arango.

Felgueroso comprométese a ‘conxelar’ la conversión del Arango en macroclínica pa busca-y un usu cultural

“Vamos a escuchar”. Asina afronten los responsables de la plataforma ‘Cultura pal Arango’ la entrevista qu’esta mañana mantendrán cola alcaldesa de Xixón, Paz Fernández Felgueroso, na qu’esperen que la rexidora municipal “se defina” na eventual recuperación del teatru, que’l collectivu quier catalogar como inmueble d’usu cultural nel inminente Plan Xeneral d’Ordenación Urbana.

Al alcuentru acudirán amás los conceyales José Manuel Sariego (PSOE) y Jesús Montes Estrada (Izquierda Xunida-Bloque por Asturies), col compromisu firme d’esti últimu de mantenese “inamovible” na defensa de la reapertura del Arango como sala cultural, tal como recueye’l programa electoral col que IX-BA algamó ser sociu de gobiernu llocal de los socialistes nes últimes elecciones municipales.

Nuna nueva asamblea pública cellebrada a última hora d’ayeri énte’l céntricu teatru xixonés, los miembros de ‘Cultura pal Arango’ declaráronse “sorprendíos” poles recientes declaraciones de Felgueroso nel diariu ‘El Comercio’ nes que dicía asumir la conversión del teatru nuna macroclínica de Corporación Dermoestética, y aseguraron que “la presión sigue tando na cai”.

Nesi sen, la plataforma convoca una manifestación pal prósimu xueves 16 de setiembre que pretende forzar a los responsables municipales a avalar la reapertura’l teatru como sala d’usu cultural, acordies con un estudiu de viabilidá que yá ta en marcha.

A la concentración d’ayeri, na que participó’l grupu ‘Buenosbares’ con una amuesa de xuegos malabares, asistieron, ente otros, el viceconseyeru de Vivienda y Bienestar Social del Principáu, Manuel García Fonseca (IX-BA), y el cabezaleru vecinal Juventino Montes.

L’alcaldesa de Xixón da un pasu alantre na tortuosa negociación al rodiu’l teatru Arango. Paz Fernández Felgueroso comprometióse esta mañana énte miembros de la plataforma ‘Cultura pal Arango’ a pedi-yos tiempu a los propietarios del teatru pa que reconsideren la reapertura de la sala como espaciu cultural y ‘conxelen’ el so alcuerdu con Corporación Dermoestética.

Asina quedó asoleyao nun alcuentru que mantuvieron güei representantes del collectivu ciudadanu cola rexidora xixonesa, xuntanza a la que tamién asistieron el conceyal socialista José Manuel Sariego y el tercer teniente d’alcalde, Jesús Montes Estrada (Izquierda Xunida-Bloque por Asturies).

Ye al especial puxu d’esti edil, señaló Boni Ortiz, voceru de ‘Cultura pal Arango’, al que hai que-y atribuir el compromisu de Felgueroso, que gobierna’l municipiu en coalición con IX-BA y que recientemente declaró nel diariu ‘El Comercio’ la so “asunción” de la conversión del teatru xixonés nuna macroclínica de Corporación Dermoestética.

La mediación de Fernández Felgueroso permitirá agora, albidren los miembros de la plataforma, ‘conxelar’ les negociaciones nun plazu aprosimáu d’un mes pa que nesi intervalu los integrantes de ‘Cultura pal Arango’ accedan al interior de la sala y puean ellaborar un proyectu de viabilidá de la recuperación del inmueble pa usos culturales.

Nesti sen, la plataforma buscará implicar nel proyectu a industriales “a los que yá se tocó”, mantendrá la convocatoria d’una manifestación pal prósimu 16 de setiembre y enfótase nos llocales alternativos, “asemeyaos al Arango y tamién céntricos” que, sostién Ortiz, “yá se-y ofrecieron a Corporación Dermoestética”.

Web de la plataforma ‘Cultura pal Arango’

Xiru nos métodos. La plataforma ciudadana ‘Cultura pal Arango’, que defende la recuperación d’esi teatru xixonés pa usos culturales, ultima una campaña de boicot a Corporación Dermoestética, firma que ta prósima a materializar un alcuerdu colos propietarios del Arango pa reconvertilu nuna clínica d’estética. Según afirmen los miembros del collectivu, “Corporación Dermoestética nun va necesitar campaña de propaganda n’Asturies, porque vamos face-yla gratis”.

Asina lo asegura Boni Ortiz, voceru de la plataforma, qu’agora plantégase “forzar la máquina de les aliances” y buscar con urxencia un aval públicu del Ayuntamientu de Xixón que permita reabrir el teatru porque, considera Ortiz, “l’Arango yá ye un símbolu del deterioru absolutu d’esta ciudá y d’esta comunidá”. Pa Ortiz, “l’asuntu ta igual que taba hai tres meses”.

Magar que la plataforma inda nun da por perdida la batalla y mantién la convocatoria d’asamblees abiertes pa los prósimos xueves énte la fachada principal del teatru, la reapertura del Arango como sala cultural paez alloñase de mou definitivu si se tomen en cuenta les declaraciones del presidente de Corporación Dermoestética que publica na so edición de güei el diariu ‘La Voz de Asturias’. Nelles, l’empresariu sostién que l’Ayuntamientu apoyó dende’l principiu la operación y prevé que les obres empezarán en dos meses.

El tercer teniente d’alcalde de la Corporación xixonesa, Jesús Montes Estrada (IX-BA) mantuvo esta mañana un alcuentru con miembros de ‘Cultura pal Arango’ nel que-yos pidió un plazu de 48 hores pa buscar otra vuelta l’apoyu del so sociu nel Gobiernu municipal, el PSOE, qu’ostenta l’Alcaldía.

Doce espectáculos escénicos pa lo que queda de mes. Los conceyos de Villaviciosa, Gozón, Avilés, Siero, Nava, Carreño y Pravia acoyerán na segunda mitá d’agostu una docena de representaciones dramátiques y de dancia programaes dientro’l Circuitu Asturianu de Teatru, que prevé la cellebración de 203 espectáculos en 2005.

Acordies colos datos apurríos pola Conseyería de Cultura, Comunicación Social y Turismu del Principáu, la compañía Yheppa Títeres abrirá’l calendariu de representaciones de la segunda quincena d’agostu, con una actuación nel parque Vallina de La Villa el miércoles 18. Pesllará’l mes ‘Teatro Estudio de Gijón’, que pondrá n’escena en Pravia, el 31 d’agostu, la obra ‘Los emigrados’.

Amás d’eses dos compañíes, participarán nel circuitu veraniegu d’artes escéniques los grupos Margen, Bacanal, Teatro del Norte, Dúo en la Lona, La Diosa del Sarcasmo, Higiénico Papel y la compañía de dancia d’Estrella García, con actuaciones espardíes per places y cases de cultura de los siete conceyos qu’acoyerán la programación.

El Circuitu Asturianu de Teatru ye un programa de collaboración ente 19 ayuntamientos y la Conseyería de Cultura que, baxo la coordinación del Institutu’l Teatru y les Artes Escéniques, fai programaciones semestrales.

Web del Institutu’l Teatru y les Artes Escéniques

Una xornada de fiesta tradicional n’once pasos. El Teatru Xovellanos y la Banda de Gaites Noega presentaron esti mediudía l’espectáculu ‘Camín a Xixón’, que mañana pesllará na Plaza Mayor d’esa ciudá el II Concursu llocal de gaita, como un montaxe innovador nel que la gaita afítase como protagonista y filu conductor.

Los organizadores del eventu prometen una puesta n’escena “espectacular”, según avanzaron güei nuna comparecencia pública nel Teatru Xovellanos a la qu’asistieron Ismael y Xaime González Arias, autores respectivamente de los arreglos y del llibretu de la obra; Alberto Varillas, coordinador del proyectu; Pablo Alonso, responsable de l’asociación cultural Banda de Gaites Noega; y Carmen Veiga, xerente’l Xovellanos.

L’espectáculu que mañana se pondrá n’escena enriba l’escenariu de la Plaza Mayor apóyase como argumentu na entrada en Xixón d’un pelegrín qu’aporta a la ciudá en plenes fiestes patronales, una escusa que-yos val a los organizadores del montaxe p’amosar cronolóxicamente una xornada de folixa al traviés d’once temes de música tradicional.

Escaleres d’incendios, salides d’emerxencia. El veteranu arquitectu Miguel Díaz-Negrete, técnicu siguidor de la obra de construcción del Teatru Arango na década de los cincuenta, estudia cola llei na mano la seguridá de la sala xixonesa énte la so posible reapertura, col envís d’ayudar a los miembros de la plataforma ‘Cultura pal Arango’ a concretar qué inversión sedría necesaria pa recuperar l’edificiu con fines culturales.

De fechu, la intención de los integrantes del collectivu ye que’l propiu Díaz-Negrete figure nel grupu de persones qu’accedan al interior del inmueble pa comprobar l’estáu de les instalaciones y empobina-y depués un informe al Ayuntamientu con cifres clares sobro cuánto costaría reflotar el teatru.

Si les previsiones de la plataforma se cumplen, la entrada a la sala sedrá posible a lo llargo de la selmana qu’entra, de sutaque los estremaos propietarios del inmueble alcuerden entrega-yos les llaves a los miembros del collectivu, que lleven recoyíes unes 4.000 firmes a favor de la reapertura’l teatru pa usos culturales.

‘Cultura pal Arango’ cellebró ayeri una nueva concentración énte’l teatru xixonés na qu’intervinieron La Bandina Tradicional Asturiana y los autores lliterarios José Luis Rendueles, David González y Vanessa Gutiérrez, que protagonizaron una llectura pública de testos.

Web de la plataforma ‘Cultura pal Arango’

Empezó entafarrando a los presentes con refugayes de sandía arreventada y acabó ufriendo-y el so sangre al públicu depués de revolcase enriba de cristal machacao. El cómicu italianu Leo Bassi abrió anueche les actuaciones previstes na Selmana Grande de Xixón con un espectáculu cargáu d’humor ácedu y provocador, denomináu ‘Instintos ocultos’ ya impregnáu de crítica social, nel que’l veteranu ‘showman’ afitóse como un mayestru nel control de la tensión sicolóxica collectiva.

Y eso que Bassi anició la so intervención llamentándose de la so trayectoria decadente -“y agora mírame, nel puertu de Xixón; ¿qué sedrá lo prósimo, Santander?”- y dexando acusbiar una teatral declaración de decepción sobro l’estáu xeneral de les coses. Pa cuando’l públicu escuchó tales pallabres, los espectadores de les primeres files yá se sescudíen cachos de mazana y sandía previamente machacaos nel escenariu y espardíos llueu énte’l respetable.

Capaz d’amosar la imperfección de la democracia cola cenciella amenaza de tira-y a un espectador un platu enllenu d’espluma d’afeitar -“esto ye la democracia, tener contenta a la mayoría jodiendo a la minoría”-, el cómicu italianu mantuvo la espectación cola amenaza d’inmolase n’escena depués de quemar con gasolina a dalgunos espectadores y reivindicó los principios circenses con una amuesa de malabares con hasta cinco balones de baloncesto xirando simultáneamente nel aire.

Darréu, la hipnosis. El públicu aconceyáu nel espigón de Fomento asistió fascináu a un presuntu adurmecimientu de dos persones esbillaes al debalu que resultó ser falsu y que-y valió a Leo Bassi pa encadarmar la so arenga final: “Nunca nun vos fiar de les pallabres d’un payasu”.

Guiñu caberu a la llende ente realidá ya irrealidá, verdá y engañifa, darréu de llamar a los presentes a mantener el movimientu “anque nunca nun s’aporte a nengún sitiu, sacante la muerte”, como receta pa caltener viva la utopía. Col llombu afundíu nun piñu de cristales machacaos, Bassi reivindicó’l valor del sacrificiu nuna sociedá onde too-yos resulta demasiao fácil a los nuevos neños y “se pierden les ganes de vivir”, y ufrió de sutaque el so sangre a los espectadores. “Nun me queda muncho, porque llevo munchos espectáculos esti veranu”, confesó.

Web oficial de Leo Bassi

Antes de fin de mes. Los miembros de la plataforma ‘Cultura pal Arango’, que reclamen la recuperación y remocicamientu d’esi teatru xixonés pa usu artísticu autoxestionáu, esperen poder acceder al inmueble nes prósimes selmanes pa facer les mediciones que llueu-y treslladarán al Ayuntamientu, col envís de cuantificar la inversión que se requier pa recuperar la sala.

Los integrantes del collectivu ciudadanu, que s’oponen al proyectu de conversión del Arango nuna macroclínica estética, cellebraron ayeri una nueva asamblea pública a les puertes del teatru na qu’informaron de que negocien colos poseedores de les llaves del inmueble p’acceder al recintu.

La plataforma anunció asinamesmo el so determín de siguir faciendo asamblees énte l’Arango tolos xueves que queden del mes d’agostu, y almitió la posibilidá d’un retrasu nel accesu al teatru por mor de la cellebración de la Selmana Grande de Xixón.