Emigración

La directora xeneral de Mocedá del gobiernu asturianu, Carmen Barrera, defendió esta mañana nuna comparecencia na Xunta Xeneral “el rigor y la seriedá” del informe sobro empleabilidá de titulaos universitarios elaboráu pol caderalgu Joaquín Lorences. Barrera argumentó que la situación de los llicenciaos asturianos nun ye mui distinta de la que viven los mozos y moces d’otres comunidaes. La responable de mocedá caltuvo un encesu debate col diputáu del grupu popular Diego Comins qu’aporfió en pregunta-y, con datos d’otros informes na mano, si’l gobiernu autonómicu “sigue sosteniendo que se trata too d’una llienda urbana”. Diana Camafeita d’IX-BA apeló a nun frivolizar con términos como’l de ‘llienda urbana’ en consideranza “a los munchos mozos y moces obligaos a buscar trabayu fuera d’Asturies”.

La directora xeneral de Mocedá defendió les polítiques entamaes pol gobiernu del Principáu pa consiguir la inserción llaboral de los mozos y moces qu’inda nun fueron quien acceder al mercáu de trabayu y anunció la elaboración d’un tercer plan de xuventú per parte l’executivu pa dir favoreciendo esa inserción de la xente mozo desempleao.

El diputáu popular Diego Comins retrucó a la representante del gobiernu asturianu con datos qu’al so xuiciu “desmienten l’optimismu del que fai gala el gobiernu del señor Areces”. Pela so parte, nel turnu d’intervenciones, la diputada d’Izquierda Xunida-Bloque por Asturies, Diana Camafeita, refirióse a la situación “grave” que carecen munchos mozos y moces asturianos, y encamentó a los populares a “quitase de la foto fixa” pa sumase a la busca de soluciones.

Les bandes de gaites de Corvera y Gozón convirtieron el so sitiu nel desfile del Día San Patricio nuna embaxada sonora d’Asturies pela Quinta Avenida y xuntóse a los miles d’irlandeses americanos que festeyaben la Gran Parada nuna auténtica celebración de xermandía ente los pueblos del Arcu Atlánticu européu y la so prollongación n’América. Los gaiteros de les bandes dirixíes por Bras Rodrigo ufiertaron nel desfile un repertoriu amestáu de sones asturianos ya irlandeses.

La emoción ente los músicos de la Gran Banda yera apalpable:“Ye una esperiencia única tar equí”, comentaba un esultante Bras Rodrigo na cai 47, poco enantes d’escomenzar el desfile. “Tamos toos peremocionaos. Por primera vez en la historia del desfile de San Patricio hai una banda de gaites d’Asturies. Y eso ye un motivu más pa sentimos arguyosos de representar a la nuestra tierra.”

Xunto a Rodrigo y los 35 músicos de Corvera y Gozón aguardaben tamién l’iniciu del históricu eventu el director de l’Axencia Asturiana d’ Emigración, Luis Miguel Fernández Romero, y María Gelchie, presidenta del Centru Asturianu de Nueva York, encargaos de encabezar la comitiva asturiana por las cais de Manhattan. Nel desfile, que concluyó pasaes les cinco la tarde, cuatro temes, dos asturianos y dos hibernoamericanos, sobresalieron especialmente na selección preparada pa la ocasión por los gaiteros asturianos. Cuando la comitiva s’alcontraba enfrente la catedral de San Patricio sonaron les canciones asturianes más destacaes: “Asturies, patria querida” y el “Himnu de Cuadonga”, una melodía especialmente arreglada pa participar nel desfile d’un pueblu, l’ irlandés, que siempre se ha caracterizó por sentir una especial devoción mariana.

Más tarde, a la altura de la tribuna presidencial, los gaiteros de Rodrigo correspondieron al cariñosu saludu que-yos dedicó el director xeneral del desfile, John Dunleavy, con la interpretación de Danny Boy, un xesto especialmente apreciáu pol numerosu públicu que presenciaba el desfile, qu’asinamesmo demostró una vez más el so entusiasmu hacia God bless America, tema col que la delegación del Principáu completó l’homenaxe a los sos agospiadores.

El programa d’actos del día completóse con una misa n’honor de San Patricio, celebrada pela mañana na céntrica catedral homónima, a la que asistió la delegación asturiana al completu, que tuvo una nueva oportunidá d’apreciar la proverbial amabilidá irlandesa de manes del cardenal Egan, que s’allegó a saludalos personalmente al términu del oficiu relixosu.

Tres l’intensu día de ayer, les bandes de Corvera y Gozón van ofrecer esta tarde un nuevu recital de gaita nel Centru Asturianu de Nueva York, que despedirá al conxuntu de la representación del Principáu con una cena-baile al remate del conciertu.

Les bandes de gaites de Corvera y Gozón, dirigíes por Bras Rodrigo, apuren les últimes hores d’ensayos en Nueva York enantes d’afrontar la histórica cita d’esta tarde: la primer participación d’Asturies nel desfile del Día de San Patricio.Los 35 músicos tienen preparao pa esta ocasión especial una esbilla de temes asturianos tradicionales, dalgunes composiciones propies y dos temes n’honor de la doble raíz cultural de sus anfitriones, ‘Danny boy’, una de les canciones más populares ente los irlandeses d’entrambos llaos del atlánticu, y ‘God bless America’, l’himnu sentimental americanu.

El desfile del Día de San Patricio, onde los músicos van tar acompañaos d’una representación del Gobiernu asturianu, con Luis Miguel Fernández Romero a la cabeza, va ser el puntu cimeru d’un viaxe que ta cumpliendo enforma dos de los oxetivos previstos nel Plan de Emigración 2004-07, la promoción internacional d’Asturies y l’ atención a les comunidaes asturianes del esterior.

Dende el domingu pasáu, la delegación asturiana desenvolvió una intensa actividá a lo llargo de tol Estáu de Nueva York. El mesmu domingu, les bandes de gaites y los representantes del Principáu, acompañaos de María Gelchie, presidenta del Centro Asturiano de Nueva York, tuvieron la oportunidá de participar nel desfile de San Patricio de la localidá de Tarrytown, asitiada a 60 kilómetros de Manhattan, al que siguió una xinta de xermandía cola comunidá hibernoamericana de la zona.

El mesmu espíritu d’hermanamientu tuvo presente tamién nel actu protocolariu celebráu el martes nun céntricu restaurante neoyorquín; al qu’asistieron, ente otros, Luis Miguel Fernández Romero; María Gelchie; Bras Rodrigo; Jesús Carbajal, vicepresidente del Centru Asturianu de Nueva York; José Egea, cónsul d’España en Nueva York; Rafael Piñeiro, xefe de personal de la Policía de Nueva York; John Dunleavy, director xeneral del Festival de San Patricio en Nueva York, y representantes del Centru Español de la ciudá. Como preeba d’amistá y reconocimientu mutuu, asturianos ya hibernoamericanos intercambiaron presentes nel actu, que tuvo’l so momentu más emotivu cuando la gaita de Bras Rodrigo entonó los sones de Danny Boy y Asturies, patria querida.

El portal Emigrastur de l’Axencia Asturiana d’Emigración presentóse esta tarde na sala de prensa del Edificiu de Servicios Múltiples del Principáu (EASMU)cola presencia del conseyeru de Xusticia y Esteriores Francisco José García Valledor. Esta nueva páxina web quier ufiertar un sitiu d’alcuentru ente los asturianos repartíos pel mundu, asina como valir de fonte d’información actualizada a diariu sobre asuntos d’interés pa los emigrantes.

Emigrastur ye’l nome del portal qu’empobina l’Axencia Asturiana d’Emigración col fin de xuntar nél les inquietúes y necesidaes comunicatives comunes a tolos asturianos del esterior. Noticies actualizaes diariamente, enllaces,documentación, un foru y un chat pal contactu en tiempu real de los emigrantes repartíos pel mundu, formen los conteníos principales d’esti sitiu web.

Na presentación ente los medios de comunicación el conseyeru d’Esteriores afirmó que la nueva web surde “pa cubrir varios de los oxetivos del Plan Integral d’emigración”, ente ellos el de “xenerar una ferramienta pa que los emigrantes asturianos puedan comunicase al través

de la rede en tiempu real y ente ellos”. García Valledor situó tamién la puesta en funcionamientu del portal atendiendo a les necesidaes de “sofitar a les colectividaes asturianes nel esterior y meyorar el conocimientu de la realidá llingüística y cultural d’Asturies”.

Mientres se lliberaba la páxina web establecióse una comunicación vía videoconferencia con dos socios mozos del centru asturianu de Mendoza (Arxentina), Gabriel Quintero y Daniel Ecerquetti, colos que caltuvo una charra el conseyeru. Estos rapazos, xunta otros socios mozos del centru Asturianu de Mendoza organizaron apocayá un congresu pa tratar de los temes que los afecten como nueves xeneraciones descendientes d’emigrantes.Quintero y Ecerquetti agradecieron al representante del gobiernu del Principáu la puesta en marcha d’esti portal que va poder poner en contactu a los asturianos repartíos per cualquier esquina del mundu y a facilita-yos toa clase d’información alrodiu de los temes más diversos, dende programes de ayudes y subvenciones, hasta ufiertes d’empléu.

Más información

El Centru Asturianu de Lieja (Bruseles) va escomenzar una etapa nueva el prósimu 26 de marzu cola fiesta d’esaltación de l’asturianía qu’embaxo’l lema “Xuntos” va entamar en collaboración col Centru Asturianu de Bruseles. Con esti actu, al que van asistir Francisco Javier García Valledor, Conseyeru de Xusticia, Seguridá Pública y Relaciones Esteriores, Manuel Fernández de la Cera, presidente del Conseyu de Comunidaes Asturianes, José Luis Casas Villanueva, presidente de la Federación Internacional de Centros Asturianos, y Chema Vega, miembru del Gabinete de la Conseyería de Xusticia, Seguridá Pública y Relaciones Esteriores, el Centru Asturianu de Lieja vuelve a la primer llinea de la vida asociativa asturiana en Bélxica tres dellos años d’inactividá.

Al pesar de que se trata d’una institución que tien el reconocimientu d’asturianía, el popular centru nun pudo evitar un declive nel so funcionamientu qu’agora, col sofitu fraternal del Centru Asturianu de Bruseles, empieza a superar. L’actu va iniciase a les 11 h del 26 de marzu con una degustación de quesu Cabrales, ya inclúi una recepción nel Ayuntamientu de Lieja, asina como l’actuación del grupu de baile folclóricu Puxa Asturies del Centru Asturianu de Bruseles. Esti centru tien previsto hasta un autocar Bruselas-Lieja pa que toos aquellos asturianos residentes na capital belga que quieran sofitar cola so presencia al Centru Asturiano de Lieja nesta nueva andadura lo puedan facer.

Anguaño reside en Bélxica, un país que tien la mesma superficie que Galicia, una población que supera los cincuenta mil españoles, de los cualos la mayoría son asturianos y andaluces. Pa unos emigrantes qu’escomenzaron llegar a Bruseles a mediaos de los años 50, los centros y asociaciones valieron d’abellugu y sustratu d’identidá colectiva, espacios onde revivir ensin problemes d’idioma nin tensiones culturales escenarios prósimos a los abandonaos nel país d’ orixe. Güei, más de mediu sieglu después, estos centros siguen constituyendo un vínculu importante y un eficaz instrumentu de xuntura ente tres xeneraciones d’emigrantes asturianos.

La presencia d’Asturies nes celebraciones del Día de San Patricio en Nueva York nun va limitase a la participación nel tradicional desfile de la Quinta Avenida. El cabezaleru de la delegación,Luis Miguel Fernández Romero, director de l’Axencia d’Emigración del gobiernu del Principáu, va aprovechar la so estancia na ciudá norteamericana pa aconceyar con profesionales y empresarios de la colonia asturiana col fin d’estrechar llazos ente l’administración autonómica y estos emigrantes de la élite llaboral esterior. El representante del Principáu tamién tien previsto reunise nuna cena organizada pola colonia asturiana coles autoridaes neuyorquines, ente elles el gobernador del estáu Georges Pataki.

La Gran Banda de Gaites, compuesta por más de sesenta músicos, va ser la cara visible d’Asturies nesti viaxe de seis díes a Nueva York, col que la Conseyería de Xusticia y Relaciones Esteriores quier proyectar el potencial cultural de la nuestra comunidá na principal metrópolis de los Estaos Uníos, al empar qu’entamar un alcuentru oficial ente’l nuestru gobiernu y los emprendedores asturianos residentes na ciudá de la Gran Mazana. Estos emigrantes de la élite profesional esterior organicen el miércoles 16 una cena pa la delegación del Principáu a la que tán convidaos el gobernador del estáu de Nueva York, George Pataki, el xefe del Departamentu de Policía de la ciudá, el cónsul español y la presidenta del Centru Asturianu.

El xueves 17 va ser el día nel que la presencia del nuestru país se visualice cola so participación na Gran Parada del Día de San Patricio

pela Quinta Avenida de Manhattan. Más de sesenta gaiteros de les bandes de Corvera y Gozón, dirixíos pol maestru Bras Rodrigo, van xuntase a los miles d’irlandeses y a les delegaciones d’otres naciones del arcu celta atlánticu participantes nel desfile.La Conseyería d’Esteriores quier asina reafirmar la identidá cultural d’Asturies en xermandía cola del restu de los países atlánticos con colonies residentes en NYC.

Ye esta la primer vez que la nuestra comunidá asiste oficialmente a la celebración de la fiesta nacional irlandesa na ciudá de los rascacielos, una folixa inda más vieya que’l Desfile del Día de la Hispanidá, que se festeya na isla de Manhattan cada 17 de marzu dende 1672. La delegación del Principáu va permanecer seis díes na capital neuyorquina, cásique una selmana de xornaes intenses n’actos d’estrechamientu de llazos colos asturianos residentes en NY y de difusión del potencial de la nuestra comunidá na ciudá nás populosa de los Estaos Uníos y la qu’abelluga un númberu más grande de procedencies étniques y nacionales.

Más información alrodiu del Día de San Patriciu en NY
Más información

Talo adelantró ayer Asturnews la comunidá asturiana va tar presente por primer vez na celebración del Día de San Patricio en Nueva York. Na rueda de prensa celebrada na Conseyería de Xusticia, Seguridá Pública y Relaciones Esteriores; el titular del departamentu, Francisco Javier García Valledor anunció la participación de les bandes de gaites de Corvera y Gozón nel desfile Día de San Patricio pela Quinta Avenida de Manhattan , que se va celebrar el prósimu 17 de marzo, coincidiendo cola festividá del Patrón d’ Irlanda.

Pa García Valledor, trátase d’un fechu de “gran trascendencia” que, en primer llugar, “tien ser consideráu parte de les acciones de promoción d’Asturies nel esterior” que prevé el Plan Integral de Emigración 2004-2007, poniendo un especial énfasi en recalcar el calter “tresversal” del programa.

Per otru llau, el Conseyeru comentó que, cola participación de dos bandes de gaites asturianes nel desfile del Día de San Patricio, fortalécense los llazos de unión del Principáu con “eso que llamamos l’Arcu Atlánticu”, una “comunidá de raígaños culturales” semeyantes que en munchos casos tien “descubierto” el nuestru país al través de la participación de los gaiteros asturianos nel Festival Intercélticu de Lorient.

Acompañaron al Conseyeru nesta presentación Carlos Madera, director Xeneral de Política Llingüística y Promoción Cultural y Bras Rodrigo, director de les bandes de gaites de Corvera y Gozón, que en dambos casos abondaron na gran importancia que tien p’Asturies participar nun eventu que la comunidad hibernoamericana lleva celebrando dende enantes mesmo de que “los Estaos Uníos se constituyeran como país”, remebró Bras Rodrigo.

Asturies va participar per primer vez oficialmente na celebración del Día de San Patriciu en Nueva York. Una representación de la colonia asturiana na ciudá de los rascacielos y les bandes de gaites de Corvera y Gozón van desfilar pela Quinta Avenida de Manhattan al llau de los miles d’irlandeses que tolos 17 de marzu se xunten pa festeyar el día de la so nación.

L’anunciu oficial de la participación asturiana nel desfile niuyorquín del Patrick’s Day ficiéronla esti martes al meudía el Director de l’Axencia Asturiana d’Emigración, Luis Miguel Fernández Romero y el Director Xeneral de Cultura y Política Llingüistica, Carlos Madera, acompañaos del director de les bandes de gaites de Corvera y Gozón, Bras Rodrigo. La delegación del Principáu va participar en diverses actividaes na so estancia en Nueva York y nes que la colonia asturiana presente na ciudá va tener una presencia destacada. Socios del Centru Asturianu de NYC acompañarán a los gaiteros de Corvera y Gozón na Gran Parada de la Quinta Avenida portando banderes d’Asturies.

El Día de San Patricio celébrase nes principales capitales norteamericanes pero ye’l festeyu de Nueva York, la ciudá con más númberu d’irlandeses y descendientes d’irlandeses, el que algama la mayor espectacularidá. Nesta ocasión, bien sucediendo dende’l San Patricio de 2002, na Gran Parada de la Quinta Avenida habrá una alcordanza d’homenaxe a les víctimes del 11-S, con especial mención a los bomberos y policíes que perdieron la vida nel ataque a les Torres Ximielgues. Estos dos cuerpos del conceyu de Nueva York tienen una participación destacada nel desfile debío a los oríxenes irlandeses de bona parte de los sos miembros. La celebración del prósimu 17 de marzu cumple esti añu la so edición 244 desque en 1762 una unidá militar d’Irlanda destinada nes colonies d’América festeyó la primer vez el so día nacional.

Lo qu’entamó como una campaña espontánea de protesta en forma de sms cola conseña:’Yo tamién soi una llienda urbana’ pa retrucar a les conclusiones optimistes del Informe Lorences ta camín de tresformase nel iniciu d’un fondu discutiniu alrodiu de les causes de la nueva emigración asturiana. L’asociación trabaya na preparación d’un Foru Debate pa celebrar na capital del estáu alrodiu del éxodu de la xente mozo fuera del nuestru país.

Esta asociación que cuenta anguaño con más de 1.500 afiliaos quier que los representantes políticos, los axentes sociales y la Universidá d’Uviéu aconceyen nun alderique abiertu pa reflexionar a propósitu de la sangría social que supón l’abandonu d’Asturies de cientos de mozos cada añu.

La mecha que prendió la indignación y el plasmu na colonia asturiana de Madrid -una de les más numberoses de la nueva emigración- foi l’informe del caderalgu Joaquín Lorences alrodiu de la empleabilidá de los llicenciaos na Universidá d’Uviéu y emponderáu pol presidente Areces como preba argumental de que la fuga masivo de xente mozo yera alpenes ‘una llienda urbana’ ensin correspondencia cola realidá.

L’asociación “ASMA(Asturianos en Madrid)” quier agora qu’esos mesmos responsables políticos y los autores del informe, ente otros axentes sociales implicaos, sienten a desplicar los sos argumentos razonaos y a debatir seriamente el que ye ún de los problemes más graves de la nuestra tierra.

El Conseyeru de Xusticia y Esteriores Francisco Javier García Valledor punxo como exemplu d’asturianismu a los emigrantes repartíos per tol mundu: “Son un exemplu d’amor y procuru pa cola cultura, el folclor y la llingua d’Asturies qu’oxalá tuviéremos equí -otru gallu nos cantara”, afirmó nun actu llenu d’emoción nel que se reconoció’l llabor de los artistes que llevaron la nuestra cultura a la xente l’esterior. Na gala, l’anécdota protagonizóla Xune, cantante de Dixebra, qu’agradeció la distinción al grupu con humor: “Nunca pensé que nos fuera a dar un premiu el Gobiernu”, p’añedir, en serio que lo cambiaba “guapamente pola oficialidá pal asturianu”.

La reivindicación esperesada pol vocalista de Dixebra nun rompió’l protocolu d’un actu nel que taba latente el sentimientu d’identificación cola cultura más comprometida con Asturies. Asina lo manifestó Valledor al reconocer el trabayu de los artistes y colectivos premiaos: “Sois vosotros los que caltenéis l’álitu d’asturianismu cola nuestra xente del esterior” y coyendo’l lema de la gala: “Asturies cola so xente”, añadió

que “güei Asturies ta cola so xente gracies a que vos mantuvistes el vínculu que nos axunta y que munches veces olvidamos que ye la nuestra cultura”. Una representación simbólica d’esti vínculu ente Asturies y la xente del esterior yera la litografía d’Astur Paredes entregada a cada premiáu y que l’artista realizó espresamente pa la ocasión col títulu: ‘Páxaru atlantis’.

La gala celebróse na Sala de Cámara del Audiotoriu d’Uviéu presentada pola escritora Ana Vanessa Gutiérrez y ente bloque y bloque de premiaos, foron sucediéndose les actuaciones en directu de dellos de los artistes y grupos presentes. Vicente Prado ‘El Pravianu’ abrió l’actu y darréu foron desfilando pel escenariu Mari Luz Cristobal Caunedo, Michael Lee Wolfe, Anabel Santiago, el cuarteto Torner, el coro ‘La Flor’ de L.lena y grupos de baile, pa finar cola presencia d’otru maestru gaiteru: Xuacu Amieva. Ente estes actuaciones hubo collaboraciones de luxu como los duos ente Anabel Santiago y Michael Lee Woolfe, y ente Xuacu Amieva y Mari Luz Cristobal Caunedo. L’actú remató cola interpretación xeneral del Asturies Patria Querida a los sones de la gaita d’Amieva.