Emigración

Dende hai un añu’l Principáu d’Asturies complementa los sos actos institucionales de celebración del Día d’Asturies dientro de la rexón, con una fiesta dedicada a la emigración. Esti compromisu, establecíu ente’l Conseyeru de Xusticia, Seguridá Pública y Relaciones Esteriores, Francisco Javier García Valledor, y el Presidente de la FICA, Jose Luis Casas, va fraguase esti añu na ciudá arxentina de Buenos Aires.
Les razones poles que foi elixía foron apuntaes pol director de l’Axencia Asturiana d’Emigración, Luis Miguel Fernández Romero, nel actu de presentación: ‘Buenos Aires ye la ciudá del mundu, fuera d’España, onde más asturianos residen. Y porque pal Principáu resulta una obligación moral, reconocer y homenaxear a Manolo del Campo, un añu depues de la so muerte’. El pasáu añu celebrárase en Madrid esti día, en colaboración col Centru Asturianu de dicha ciudá, por dos razones que destacó Romero: ‘Por ser la ciudá española na que más asturianos residen y por homenaxear a un pueblu qu’acababa de sufrir un horrible atentáu’.
El programa d’esti añu va siguir los actos que tradicionalmente vienen organizando los asturianos de Buenos Aires. Una fabada nel Centru Asturianu pa conmemorar la xesta de Cuadonga y un espectáculu compuestu polo meyor del folklore fechu dientro d’Asturies, coordináu pol grupu folklóricu ‘Vezos Astures’, y lo meyor del folklore fechu fuera de la rexón, organizáu pol ‘Grupu Pelayo’, fundáu por Manolo del Campo hai más de cincuenta años. Estos actos tendrán el so prólogu na ciudá de Mendoza, onde’l día 10 van inaugurase les nueves instalaciones cola presencia del espectáculu de ‘Vezos Astures’.
Otra manera, Jose Luis Casas, presidente de la FICA, fue invitáu pola Conseyería a acompañar al conseyeru, Francisco Javier García Valledor, y al director de l’Axencia Asturiana d’Emigración, Luis Miguel Fernández Romero, a los actos de conmemoración del día d’Asturies en Buenos Aires. Aprovechando esta visita, Jose Luis Casas va reunise’l día 12, a les 10:30 hores na Se social del Centru Asturianu de Buenos Aires, con representantes de los demás Centros Asturianos de l’Arxentina, pa tratar asuntos d’interes de la FICA, como la prósima reforma de la Llei d’Asturianía.

Amás de pol presidente de la FICA, el conseyeru de Xusticia va tar acompañáu pol director de l’Axencia Asturiana d’Emigración, Luis Miguel Fernández Romero, el Vicepresidente del Conseyu de Comunidaes Asturianes y el coordinador del Gabinete del Conseyeru. Pero, mentes Buenos Aires prepara’l so Día d’Asturies, otros centros asturianos del mundu tamien entamen les sos fiestes de celebración de la festividá de la Santina de Cuadonga. Ésti ye’l casu de dalgunos centros españoles, como’l de Madrid, el de Barcelona, A Coruña, Cantabria, Salamanca y Torrevieja; y de dalgunos centros asturianos de fuera d’España, como’l de Bruseles, el de Nueva York, el de Monterrey en Mexico o’l de Sâo Paulo.

El CA de Sâo Paulo preparó, como cada añu, la so Fiesta d’Asturies aprovechando la festividá del Día de la Independencia brasileña. Los actos de celebración escomenzaron el pasáu 7 de setiembre, en Lagoas, a les once y media la mañana, con una gran romería asturiana. Tres de la misa campal, fíxose distribución del bollu preñáu y la botella vino ente les más de doscientes persones congregaes; y anque taba previsto terminar la celebración con un torneu de bolos, el mal tiempu fixo que nun pudiere xugase. Pela nueche emitióse dende la Radio Imprensa FM un programa dedicáu dafechu al Principáu onde participaron el Presidente del CA, Jose María Aldariz, y el gaiteru astur-brasileñu, Carlos Luiz Bacelar. Pero los actos nun terminen equí. La 49 edición d’estes fiestes siguirá’l sábadu 24 de setiembre, a les ocho la tarde, cola presencia del director Luis Miguel Fernández Romero, que va aprovechar pa esponer la relación del Principáu colos emigrantes y de les ayudes asistenciales que promueve l’Axencia dientro del Plan d’Emigración. Tres d’esti actu, va facese la presentación del Coral Iberico na Sociedade Hispano Brasileira. La fiesta culminará’l domingu 25, a les dos de la tarde, con una gran fabada asturiana na Sociedade Hispano Brasileira na que se va facer presentación del gaiteru Bras Rodrigo y Lorena Gómez, que tarán acompañaos polos gaiteros y cuerpu folklóricu de la SHB.

Siguiendo n’America, el Centru Asturianu de Monterrey (Mexico) presenta’l so programa de fiestes pa celebrar el día d’Asturies, que se va facer el prósimu domingp, día 11. El programa previstu pa la conmemoración de Nuestra Señora de Cuadonga cunta con una misa y ofrenda floral a la Santina na ilesia de la medaya milagrosa, asina como la entrega de los premios ‘Urogallo’, que sirven como reconocimientu a aquelles persones que destacaron pol so llabor a la comunidá.

El Centru Asturianu de Bruseles abre la celebración el sábadu día 10 con una recepción na sala d’actos del ayuntamientu de Bruseles, onde’l so alcalde, Fredy Thielemans, recibirá los directivos del Centru Asturianu de Bruseles, los directivos del Centru Asturianu de Lieja. asina como a les personalidaes invitaes. A les doce la mañana, los grupos folklóricos desfilarán col ramu hasta’l Mannekenpis, que va ser vistíu con traxe d’asturianu pa la ocasión, y onde se va facer una degustación de sidra. A les dos de la tarde, el Presidente del Centru dará un discursu de bienvenía, al que va siguir l’actuación de los grupos folklóricos ‘Puxa Asturias’, ‘La Santina’, ‘Los pequeños de La Santina’, ‘Esbardu d’Aviles’ y la banda de gaites del Centru. Depues de la xinta y de la misa, a les ocho la tarde, el centru fadrá entrega del so galardón l’Horru d’Oro.

El Centru Asturianu de Nueva York fue más adelantáu nes sos celebraciones y el pasáu domingo reunió a un centenar de persones nel Círculu Español de Queens, onde oficiaron una misa y esfrutaron d’una xinta de la hermandá. Ellí, la gaita de Xuacu Amieva amenizó una comida na que s’axuntaron varies xeneraciones d’emigrantes españoles.
N’España, los centros asturianos tamien preparen les sos propies celebraciones. Como’l Centru Asturianu de Madrid, que’l domingo día 18, na Quinta Asturias, abre la xornada con un torneu de bolos asturianos, de petanca y de tiru a la rana. A les doce la mañana celebrarán una misa cantada pol Coru del centru, al que siguirá una procesión de la Santina. El pregón d’esti añu cuerre a cargu de la escritora, periodista y premiu Mazana d’Oru, María Teresa Álvarez, Condesa de Latores. Al terminar, el coru y los gaiteros del centru van actuar, pa dar pasu depues a una espicha a la que tán invitaos tolos asistentes. A les cinco la tarde actuarán el Grupu Vocal “Cantariego” y de l’Agrupación Folklórica “L´Alborá”

Per otra parte, los díes 9, 10 y 11 de setiembre, el Centru Asturianu de Barcelona celebrará la Santina 2005. Dientro de los actos destaca’l Festival de Música Celta previstu pa güei que va cuntar coles actuaciones de los siguientes grupos: “City of Barcelona Pipe Band”,“Chundarata”(Centru Aragones-Casa d’Aragón, “Risca L’Alba”,“Dealan” y el solista “Iñaki Sánchez Santianes” ganador del certame Ciudá d’Uvieu 2005, modalidá gaita. Amás, va contase con solistas de gaita irlandesa y catalana (Sac de gemecs ). Mañana, a les siete la tarde, Ferrán Bello, Director Xeneral del Departarment de Cultura de la Generalitat, fadrá llectura del pregón, pa depues actuar la cantante de Tonada Dª Mª Rosario González Martínez. De siguío gran recital del Coru del Centru, dirixíu por Eva Villena. Al acabar l’actu ufiertaráse una degustación de sidra y aperitivu asturianu, qu’ofrecerá’l Centru a los socios asistentes y convidaos. El día 11 será’l día d’Asturies en Barcelona, qu’entamará col Concursu de Bolos, modalidá ‘Cuatreada’. A les once y cuartu la mañana saldrán en solemne procesión y misa n’honor de la Virxe de Cuadonga, a la que se-y fadrá una ofrenda floral. Namás acabar, el centru entregará la so distinción, l’Asturcón de Plata. A les doce y media ta prevista una muestra de Música y Danza asturiana, cola participación del grupu “Andecha pol Raigañu” y Rosario González. Tres de la xinta, actuará’l Ballet Folklóricu de Sarriá “Esbart Sarrià” a quienes se-yos rinde homenaxe na cellebración del so cincuentenariu.

El Centru Asturianu de Cantabria, en Santander, celebrará los díes 14,16, 17 y 18 de setiembre la fiesta la Santina. El pregón d’apertura de la fiesta va ser a cargu del catedráticu d’Inxeniería Electrica de la Universidá de Cantabria, Luis Gáspar Vega, nun actu que va tener llugar nel Hotel Bahía, el día 14, a les nueve la nueche y que va tar dedicáu a los más de siete mil asturianos que residen na rexón. Los salones del Centru Asturianu van ser oxetu’l día 16 d’una conferencia sobre gastronomía asturiana, tres de la que’l Coru Ronda Altamira va facer una actuación pa tolos presentes. L’actu va entamar a les ocho la tarde. Al día siguiente, nel mesmu sitiu, va haber un concursu d’escanciaores de sidra natural asturiana. L’actu central dedicáu a la festividá de la Santina va ser el domingo 18, cuando a les once y media la mañana entame una procesión n’honor a la patrona, que saldrá de la Finca d’Altamira. A mediudía, va oficiase una misa cantada pol coru de la Fundación Principe d’Asturies, na que se va facer una ofrenda floral a la santa. A les ocho la tarde, y como broche a los actos de celebración, va facese una romería típicamente asturiana.

El Centru Asturianu de A Coruña entamó los sos festeyos el pasáu día 7 y van durar hasta’l prósimu martes 13 de setiembre. Les fiestes patronales escomenzaron pasáu miercoles nel salón de actos del local social de l’asociación, cola llectura del pregón a cargu del periodista asturianu Jose Francisco Rodil. Les celebraciones acabarán el martes a les ocho la tarde con una misa en memoria de los socios fallecíos.

Otru centru que yá empezó coles sos celebraciones ye’l de Salamanca. Como otros años, el Centru Asturianu de Salamanca montó una carpa nel Campu San Francisco xunta les del Centru Gallegu, l’Extremeñu y la Casa d’Andalucía. Como’l día 8 de setiembre coinciden la patrona de Salamanca, la Virxe de la Vega, el día d’Extremadura y el día d’Asturies, el centru asturianu de la ciudá salmantina celebra con ellos esti día, aprovechando les instalaciones de les Feries y Fiestes de la ciudá. Amás de preparar degustaciones de productos típicos asturianos y de repartir cartelos y catálogos informativos sobre la nuestra comunidá, güei actuará’l grupu ribeseyanu de música folk Corquieu nel escenariu instaláu nel recintu de les Cases Rexonales de la banda gaites Villa del Adelantado. Mañana, el Centru celebra los díes d’Asturies y Extremadura con una procesión que sal dende la Puerta de Zamora hasta’l Campu San Francisco, que va ser acompañada pola Banda de Gaites Villa del Adelantado y un grupu folklóricu extremeñu. Nel recintu de les Cases Rexonales, fadráse una misa campestre oficiada por cuatro sacerdotes: un gallegu, un extremeñu, un andaluz y un asturianu.

El Centru Asturianu de Torrevieja nun ye menos y tamien se suma a les celebraciones de la festividá asturiana. Mañana, a les diez de la nueche, entamarán una verbena dedicada a la Santina na que va actuar l’artista xixonesa ‘Elena’. El domingo, a les once y media, entamará una procesión dende’l centru hasta la ilesia de San Roque, onde habrá una misa n’honor a la Virxe, amenizada pol grupu ‘L’Estruendu’. Terminada la misa, la procesión volverá a la se de l’agrupación, acompañada poles autoridaes asturianes y torrevexenses presentes nel actu. La Banda Gaites del CA d’Alicante ufiertará un conciertu a la una y media la tarde, pa que depues dea comienzu’l tradicional repartu del bollu y la botella vino pa los socios. A les seis y media, el centru tien previsto organizar un concursu d’escanciaores, mentes qu’a les siete y media entamará un festival públicu a cargu de l’Agrupación Artística Xixonesa, nel que van participar los siguientes artistes. En canción lixera: Silvia García, Susana Valles, Nerea Vázquez, Alejandro Nosti y Nerea Menendez. La canción asturiana va tar representada por Lito Cabal. Mentes que la canción española va selo por Antonio Montero. Acabáu’l festival va dar comienzu la representación teatral de les obres ‘La dama de las camelias’ y ‘La separación’. Jose Ramón Uría y Susana van presentar la Danza Clásica Española, a cargu de Fernando Luis Mendez Fraga y onde se va contar cola participación estelar del sociu de la entidá Jose Antonio del Cantu La Vara, campeón de tonada asturiana.

Como dicimos, estes namás son dalgunes de les munches celebraciones del Día d’Asturies que se fain a lo llargu del mundu polos nuestros emigrantes col fin de festexar la patrona de la so tierra d’orixe, recordando la so cultura y l’asturianía que sienten más allá de les fronteres y les distancies.

El grupu ribeseyanu Corquieu, que ta acabante de sacar el so últimu discu ‘Salia’, va tocar el prósimu día 10 de setiembre nel recintu de les Cases Rexonales de la banda gaites Villa del Adelantado, con motivu de la cellebración del Día d’Asturies per parte del Centru Asturianu de Salamanca.

Como otros años, el Centru Asturianu de Salamanca va montar una carpa nel Campu San Francisco xunta les del Centru Gallegu, l’Extremeñu y la Casa d’Andalucía, dende’l día 7 de setiembre hasta’l día 15. Como’l día 8 de setiembre coinciden la patrona de Salamanca, la Virxe de la Vega, el día d’Extremadura y el d’Asturies, el centru asturianu de la ciudá salmantina va celebralu conxuntamente colos demás, aprovechando les instalaciones de les Feries y Fiestes de la ciudá.

Amás de preparar degustaciones de productos típicos asturianos y de repartir cartelos y catálogos informativos sobre la nuestra comunidá, el día 10 ta prevista l’actuación del grupu ribeseyanu de música folk Corquieu nel escenariu instaláu nel recintu de les Cases Rexonales de la banda gaites Villa del Adelantado.

Al día siguiente, día 11, el Centru celebra los díes d’Asturies y Estremadura col siguiente programa d’actos:
– A les 11.30 Salida en procesión dende la Puerta de Zamora hasta’l Campu San Francisco.
– Virxe de Cuadonda acompañada pola Banda Gaites Villa del Adelantado.
– Virxe de Guadalupe acompañada por un grupu extremeñu.
– A les 12 Misa campestre nel escenariu del recintu de les Cases Rexonales, oficiada por cuatro sacerdotes, gallegu, extremeñu, andaluz y asturianu.
– Actuación d’un grupu extremeñu, de la Banda Gaites Villa del Adelantado y del Grupu Rocieru Amigos d’Andalucía na cellebración.
– A les 14.00 Degustación de productos asturianos y estremeños pa les autoridaes asistentes y los invitaos.
– A les 13.30 Actuación de la Banda Gaites Villa del Adelantado
– A les 20.30 Actuación del grupu extremeñu

Jose Luis Casas, Presidente de la FICA, fue invitáu pola Conseyería de Xusticia, Seguridá Pública y Relaciones Esteriores, a acompañar al Conseyeru, Francisco Javier García Valledor y al director de l’Axencia Asturiana d’Emigración, Luis Miguel Fernández Romero a los actos de conmemoración del día d’Asturies que va celebrar el Centru Asturianu de Buenos Aires el prósimu día 11 de Setiembre. Aprovechando la visita, Casas va reunise colos representantes de los demás CA pa tratar asuntos d’interes, como la prósima reforma de la Llei d’Asturianía.

Jose Luis Casas va reunise’l día 12, a les 10:30 hores na Se social del Centru Asturianu de Buenos Aires, con representantes de los demás Centros Asturianos de l’Arxentina, pa tratar asuntos d’interes de la FICA y sobre la prósima reforma de la Llei d’Asturianía.

Por esa razón, dende la FICA rueguen a los Presidentes de los Centros Asturianos, faigan lo posible por asistir o unviar a una representación por tratase d’asuntos de gran interes

El grupu folclóricu ‘Principado’ de Llugones va dedicar la so VIII Selmana Cultural a la diáspora asturiana, embaxo’l lema ‘Nosotros tamien fuimos emigrantes’. El programa d’actos, qu’inclúi un coloquiu a cargu de Carlos Madera y Manuel Fernández de la Cera, amás de varios conciertos y una exposición fotográfica, va desendolcase ente los díes 1 y 15 d’ochobre.

Col fin de llograr una meyor comprensión de la inmigración que nos arrodia, y basándose na emigración asturiana d’hai unes decades, va organizase una exposición fotográfica, del 3 al 15 d’ochobre, na Casa Cultura de Llugones, con una colección de semeyes que foron cedíes espresamente pa esti actu pol Ayuntamientu de Llanes, l’Archivu d’Indianos de Colombres y dalgunos particulares.

El día 13, xueves, Carlos Madera, director xeneral de Cultura del Principáu, el folclorista Fernando de la Puente y Manuel Fernández de la Cera, presidente del Conseyu de Comunidaes Asturianes, acompañaos por dalgunos representantes del consuláu de Mexico, van facer un coloquiu sobre la emigración asturiana.

Los actos organizaos inclúin la presentación, pal día 15, de varios cantares al emigrante, interpretaos pol grupu ‘Principado’, que foron recuperaos por Fernando de la Puente cola intención de grabar un discu. Amás, n’homenaxe a l’Arxentina, l’Asociación de Baille 2000 va facer una demostración de tangos, mentes que’l Coru San Felix interpretará un conciertu d’habaneres, como homenaxe a Cuba y los sos emigrantes.

El Centru Asturianu de Sao Paulo ultima dientro la programación de les celebraciones del Día d’Asturies la emisión en directo d’un programa dedicáu íntegramente a la realidá y la música del nuestru país. La cita ye esti miércoles 7 a les 21.00 hores na frecuencia de FM de Radio Imprensa.

El programa especial dedicáu a la so tierra d’orixe polos emigrantes asturianos de Sao Paulo va poder siguise en tol mundu al través de la sección on line de la páxina web de la emisora brasileira. Los conteníos del espaciu van tar dedicaos a l’alcordanza del país y les espresiones de la so cultura nel día enantes de que se celebre oficialmente la fiesta nacional d’Asturies.

Más información

El Centru Asturianu de Torrevieja súmase a les celebraciones del Día d’Asturies con un programa centráu nos díes 10 y 11 de setiembre, y nel que colaboren la Conseyería de Relaciones Esteriores, l’Axencia Asturiana d’Emigración, el Conseyu de Comunidaes Asturianes, l’Agrupación Artística Xixonesa asina como l’Ayuntamientu de Torrevieja.

La nueche del sábado, día 10 de setiembre, a les diez de la nueche, el Centru Asturianu organiza una verbena dedicada a la Santina na que va actuar l’artista xixonesa ‘Elena’. Esta fiesta va tener llugar nel parking del Centru y va valir como preámbulu al día grande de la celebración, que va ser de domingo, día 11.

Na mañana del domingo, a les once y media, entamará una procesión dende’l centru hasta la ilesia de San Roque, onde, a les 12 la mañana, habrá una misa n’honor a la Virxe, amenizada con gaita y tambor del grupu ‘L’Estruendu’. Terminada la misa, la procesión volverá a la se de l’agrupación, acompañada poles autoridaes asturianes y torrevejenses presentes nel actu. La Banda Gaites del Centru Asturianu d’Alicante ufiertará un conciertu a la una y media la tarde, pa que depues dea comienzu’l tradicional repartu del bollu y la botella vino pa los socios.

A les seis y media, el centru tien previsto organizar un concursu d’escanciaores. Mentes qu’a les siete y media entamará un festival públicu, nel parking del centru, a cargu de l’Agrupación Artística Xixonesa, nel que van participar los siguientes artistes. En canción lixera: Silvia García, Susana Valles, Nerea Vázquez, Alejandro Nosti y Nerea Menendez. La canción asturiana va tar representada por Lito Cabal. Mentes que la canción española va selo por Antonio Montero.

Acabáu’l festival va dar comienzu la representación teatral de les obres ‘La dama de las camelias’ y ‘La separación’, colos actores Mª Rosa Díaz, Dino Lamedo, Palmira Suárez, Paquita Rey y Manuel Martínez. Tres d’ellos, Jose Ramón Uría y Susana presentarán la Danza Clásica Española, cuya dirección artístitica cuerre a cargu de Fernando Luis Mendez Fraga y que va contar cola participación estelar del sociu de la entidá Jose Antonio del Cantu La Vara, campeón de tonada asturiana.

Como pieslle del festeyu, la nueche del día once va recordar a la anterior, con una verbena celebrada nel parking del centru, que va tar amenizada otra vuelta por ‘Elena’.

El plenu del Ayuntamientu de Cabranes decidió por unanimidá y a propuesta de l’alcaldía, otorgar les tres primeres distinciones que s’entregan nel conceyu a tres emigrantes asturianos n’America, como ‘homenaxe a tola emigración’. L’actu d’entrega tuvo llugar el pasáu sábadu, coincidiendo cola celebración del Día l’Emigrante que la localidá organiza por tercer añu consecutivu.

A les cinco y media la tarde del pasáu sábadu, día 27, entregáronse los títulos de fíu adoptivu a títulu póstumu a Jose Manuel del Campo, fundador del grupu Pelayo del Centru Asturianu de Buenos Aires, a quien tamien se va facer homenaxe esti añu con motivu del Día d’Asturies per parte de les autoridaes del Principáu. Una de les últimes actuaciones d’esti asturianu, profundamente vinculáu al folklore rexonal, tuvollugar na celebración del primer Día l’Emigrante de Cabranes, nel añu 2003.

Tamien se-y entregó esti títulu al tesoreru de la Unión Cabranense de La Habana, Constantino Díaz Luces, de 95 años d’edá. El tercer galardonáu, tamien a títulu póstumu, foi pa Manuel Corripio García.

Al actu d’entrega de les distinciones asistieron el presidente del Conseyu de Comunidaes Asturianes, Manuel Fernández de la Cera, y el director de l’Axencia Asturiana d’Emigración, Luis Miguel Fernández Romero. La distinción pa Manolo del Campo foi recoyida pol presidente del Centru Asturianu de Buenos Aires, Jose Antonio Nespral, de visita estos díes pela rexón, mentes que la dedicada a Constantino Díaz Luces garróla nel so nome l’expresidente de la Unión Cabranense, Mario García Granja.

El Centru Asturianu de Cantabria, en Santander, que reúne a más de siete mil emigrantes asturianos, va celebrar nos díes 14,16, 17 y 18 de setiembre la fiesta la Santina. El pregón d’apertura de la fiesta va ser a cargu del catedráticu d’Inxeniería Electrica de la Universidá de Cantabria, Luis Gáspar Vega, nun actu que va tener llugar nel Hotel Bahía, el día 14, a les nueve la nueche.

A les ocho la tarde del día 16, nos salones del Centru Asturianu santanderín, ta previsto que se dea una conferencia sobre gastronomía asturiana, tres de la que’l Coru Ronda Altamira va facer una actuación pa tolos presentes. Al día siguiente, nel mesmu sitiu, va haber un concursu d’escanciaores de sidra natural asturiana.

L’actu central dedicáu a la festividá de la Santina va ser el domingo 18, cuando a les once y media la mañana entame una procesión n’honor a la patrona, que saldrá de la Finca d’Altamira. A mediudía, oficiarase una misa cantada pol coru de la Fundación Principe d’Asturies, na que se va facer una ofrenda floral a la santa. Mentes qu’a les ocho la tarde, una romería asturiana va servir de colofón a los actos preparaos pol Centru.

El Centru Asturianu de Nueva York pidió esta mañana per boca de la so presidenta María Guelchi sofitu al gobiernu del Principáu pa consiguir una nueva sé pa l’agrupación na Gran Mazana. Guelchi cifró en mediu millón de dólares l’aportación necesaria pa comprar un local destináu a acoyer les actividaes de los asturianos residentes na ciudá de los Rascacielos.

La pitición de presidenta del Centru neoyorquín fízose esta mañana nel cursu de la presentación de los actos conmemorativos del décimu aniversariu del empiezu de l’agrupación. Nos actos, organizaos en colaboración cola Axencia Asturiana d’Emigración, va celebrase un homenaxe a les víctimes del 11-S y el gaiteru Xuacu Amieva va ufiertar delles actuaciones a la colonia asturiana en Nueva York.

La presentación de los actos del Centru neoyorquín féxose esta mañana na sé de la Conseyería de Xusticia y Esteriores y cuntó cola presencia del titular del departamentu, Francisco Javier García Valledor, del director de l’Axencia Asturiana d’Emigración, Lluis Miguel Fernández Romero, la presidenta del Centru Asturianu, María Guelchi y el gaiteru Xuacu Amieva.

Esta mañana, el director de l’Axencia Asturiana d’Emigración, Luis Miguel Fernández Romero, acompañáu por Jose Antonio Nespral, Presidente del CA de Buenos Aires, y Ana Villanueva, representante del grupu folklóricu Vezos Astures, dio una rueda de prensa pa presentar los actos de cellebración del Día del Principáu d’Asturies na emigración 2005 ‘Homenaxe a Manolo del Campo’, que va tener llugar na ciudá de Buenos Aires el prósimu 11 de setiembre.

El pasáu añu, esti día celebróse en Madrid, en collaboración col Centru Asturianu de la ciudá, por dos razones que destacó Fernández Romero: ‘Por ser la ciudá española na que más asturianos residen y por homenaxear a un pueblu qu’acababa de sufrir un horrible atentáu’.

Dende hai un añu’l Principáu d’Asturies complementa los sos actos institucionales de celebración del Día d’Asturies dientro de la rexón, con una cellebración dedicada a la emigración. Esti compromisu, establecíu ente’l Conseyeru de Xusticia, Francisco Javier García Valledor, y el Presidente de la FICA, Jose Luis Casas, va fraguase esti añu na ciudá arxentina de Buenos Aires. Les razones poles que foi elixía foron apuntaes pol director de l’Axencia: ‘Buenos Aires ye la ciudá del mundu, fuera d’España, onde más asturianos residen. Y porque pal Principáu resulta una obligación moral, reconocer y homenaxear a Manolo del Campo un añu depues de la so muerte’.

Pa ello van siguise los actos que tradicionalmente vienen organizando los asturianos de Buenos Aires. Una fabada nel Centru Asturianu pa conmemorar la xesta de Cuadonga y un espectáculu compuestu polo meyor del folklore fechu dientro d’Asturies, coordináu pol grupu ‘Vezos Astures’, y lo meyor del folklore fechu fuera de la rexón, organizáu pol ‘Grupu Pelayo’, fundáu por Manolo del Campo hai más de cincuenta años.

Los actos tendrán el so prólogu na ciudá de Mendoza, onde’l día 10 van inaugurase les nueves instalaciones cola presencia del espectáculu de ‘Vezos Astures’.