Emigración

El Boletín Oficial del Estáu (BOE) del sábadu 31 d’avientu de 2005 recueye’l Real Decretu 1612/2005 pol que se modifica’l Real Decretu 728/1993 pol que se regulaben les pensiones asistenciales por ancianidá en favor de los emigrates españoles. Una de les novedaes d’esta modificación tien que ver colos emigrantes retornaos, yá que busca cubrir lessituaciones de necesidá d’aquellos emigrantes retornaos que nun tienen dengún tipu de pensión o prestación económica pública

Amás, na nueva redacción de la disposición adicional tercera establezse que “los emigrantes españoles que vuelvan a España van poder beneficiase de pensión asistencial por ancianidá, siempre qu’acrediten los requisitos (…) hasta qu’algamen el derechu a una pensión del sistema de Seguridá Social o a otra pensión pública, prestación o subsidiu de cualisquier Alministración pública española”.

El Centru Asturianu de Madrid sigue faciendo públiques les sos distinciones añales. Tres la concesión de los Urogallos de Bronce, agora toca-y el turnu a les Madreñes y Mazanes d’Oro. El delegáu del Gobiernu n’Asturies, Antonio Trevín Lombán recibe la Madreña d’Oro Astur-Lleonesa xunto a Pedro Argüelles.

Otru de los distinguíos pol Centru que preside Cosme Sordo en Madrid ye’l Padre Ángel García, fundador de Mensaxeros pola Paz. Esti galardón ta otorgáu a común coles Cases d’Asturies d’Alcobendas, Alcalá de Henares, y los Centros Asturianos de Toledo y Tres Cantos.

Les Mazanes d’Oro del Centru Asturianu de la capital del estáu van nesta ocasión pal periodista espertu en temes de salú Ramón Sánchez Ocaña, Concepción Sierra Ordóñez y Rodrigo Uría Muruéndano.

El Centru Asturianu de Madrid dio a conocer los galardones que concede añalmente a aquelles persones o entidaes que se distinguieran a lo llargo del últimu añu polos sos méritos. Va unos díes l’agrupación que preside Cosme Sordo daba a conocer los nomes de los premiaos colos sos Urogallos, agora nos premios xenerales resalta l’apurríu a la Fundación Príncipe d’Asturies como entidá asturiana del añu.

Los Picos Urriellos, empobinaos a la categoría deportiva, van nesta ocasión pa la Federación Asturiana de Minusválidos Físicos del Principáu, como entidá; como deportista n’activu de 2006, el premiáu ye’l balonmanista Alberto Entrerríos y nel capítulu de vieyes glories, el futbolista Secundino Suárez Vázquez “Cundi”. Juan Antonio López Brañas recibe’l premiu a sociu del añu y los escudos d’oru Margarita Díaz Suárez, Julia Rosa García, José Riesgo Pérez y Vicente Rodríguez Alvarez. Como asturianos predilectos de Madrid distínguese a Juan Alvargonzález González, Eduardo Hevia Vázquez y José Delfín Villaláín Blanco. La Fundación Príncipe d’Asturies recibe’l premiu a la entidá asturiana del añu.

Una escultura del artista Vicente Moreira remembra dende va unos díes na playa xixonesa de L’Arbeyal la traxedia de los llamaos Neños de la Guerra, miles de rapacinos asturianos qu’embarcaron nel Puertu del Musel en 1937 rumbu a dellos países d’acoyida como Francia, Bélxica, Inglaterra o la antigua Unión Soviética. El monumentu inaugúrase esti sábadu 17 al meudía cola presencia de supervivientes de la Odisea, ente ellos el propiu autor de la escultura.

La iniciativa del monumentu surdió en 1988 nun alcuentru ente antiguos Neños de la Guerra en Xixón y hasta agora nun se vio materializada na obra de Vicente Moreira. L’asitiamientu de la escultura na playa l’Arbeyal, enfrente mesmo del Puertu del Musel, señala’l puntu de partida de miles de rapacinos asturianos, unviaos poles sos families o poles autoridaes republicanes a países amigos qu’en dalgunos casos, como nel de los neños acoyíos pola URSS, convirtiéronse na so nueva patria a lo llargo del restu de les sos vides. Precisamente l’actu d’esti sábadu y la presencia nél de ‘neños’ supervivientes va ser oxetu de grabación del equipu formáu polos realizadores Llucía Herrera y Xuan Lluiz Ruíz pa completar el material filmáu del so documental “L’Escaezu”, sobre los rapacinos acoyíos pola Unión Soviética.

El prósimu domingu a les 12 la mañana va tener llugar nel Teatru Xovellanos de Xixón, dientro del Festival “Bravo Asturianísimo”, l’hermanamientu ente’l Grupu Folclóricu xixones ‘Trebeyu’ y el Grupu folclóricu del Centru Asturianu d’Alcobendas, nun actu presidíu pol conseyeru de Xusticia, Francisco Javier García Valledor, y que quier estrenchar los llazos ente l’Asturies exterior y interior.

Como consecuencia del Estudiu de Baille Asturianu na Emigración fechu por Fernando Ornosa pa l’Axencia Asturiana d’Emigración, van tener llugar una serie d’hermanamientos de Grupos de baille asturianos que tán fuera d’Asturies, con grupos asturianos del interior, siguiende les llinies trazaes nel Plan Integral d’Emigración 2004-2007. La finalidá d’estos alcuentros ye la d’ayudar a estos de grupos de la Emigración pa desendolcar el so llabor na distancia al travies del tratu directu con grupos asturianos.

Al empiezu de les actuaciones d’esti domingu, día 18, la Banda de Gaites Respingo, del Centru Asturianu d’Alcobendas, va interpretar les pieces ‘La Fonte’l Regueirón’, ‘La Feriona’, ‘Aires del Cueto’, ‘Jota de Rengos’, ‘El Mio Xuan’ y ‘ El Oso’. Pa más tarde, tener llugar l’actu propiamente d’hermanamientu ente’l grupu de baille Andolina, del Centru Asturianu d’Alcobendas, col Grupu Trebeyu de Xixón, nel que se va danzar el ‘Ramu de Oubacho’, ‘Los Sueltos’, ‘El Careau’ y la ‘ Jota’l Cuera’.

A esti actu que se va facer dientro del programa de Bravo Asturianísimo, ta previsto que vaiga Francisco Javier García Valledor, conseyeru de Xusticia y Relaciones Exteriores del Principáu d’Asturies y Luis Miguel Fernández Romero, director de l’Axencia Asturiana d’Emigración, asina como l’alcaldesa de la ciudá, Paz Fernánez Ferlgueroso.

Emigrastur

El Centru Arxentinu d’Asturies celebra el venti aniversariu de la so creación con una xinta d’hermandá na que los socios de la entidá van compartir la celebración cola vicecónsul de la República sudamericana y autoridaes locales y autonómiques.La sociedá agrupa a antiguos emigrantes asturianos n’Arxentina retornaos al so país.

Los socios del Centru Arxentinu van xuntase nun hotel del barriu xixonés de Montevil el prósimu domingu 4 d’avientu a les 14.30 pa celebrar la so xinta en conmemoranza del venti aniversariu d’esistencia de la entidá.

Luis Miguel Ferández Romero, director de l’Axencia Asturiana d’Emigración, aconceya güei a les cinco la tarde na se de la Dirección Xeneral d’Emigración de Madrid col nuevu director xeneral d’Emigración, Agustín Torres, pa tratar los diferentes programes nos que collaboren emtrambes entidaes.

Mañana vienres, el director de l’Axencia Asturiana d’Emigración tien previsto participar nel actu institucional de clausura de la Selmana Cultural de l’Asociación ASMA, que va tener llugar na llibrería La Central nel nuevu edificiu del Museu Nacional Centru d’Arte Reina Sofía en Madrid, a les siete y media la tarde, que coincide col recital “Nomes Propios” d’escritores asturianos. Nel actu, que va tar presentáu pol tamien escritor Martín López-Vega, van facer llectura de los sos poemes los autores Silvia Ugidos, Vanessa Gutierrez, Jordi Doce y Julio Rodríguez, recientemente premiáu col Premiu “Vargas Llosa” de novela.

Les escueles de Llaranes n’Avilés acueyen hasta’l prósimu 25 de payares l’amuesa “Emigración e Instrucción Pública” organizada pola Obra Social y Cultural de Cajastur. La esposición enseña los llabores de los emigrantes asturianos con ésitu alluende les fronteres pa la creación de centros docentes destinaos a los neños más desfavorecíos de los sos llugares d’orixen.

L’amuesa estructúrase en tres bloques de conteníos: la emigración n’Asturies; la relación ente emigración y Instrucción Pública; y les escueles. Nos paneles de la esposición puede vese información referente al movimientu migratoriu asturianu con dirección a América y tocante al papel de les sociedades d’instrucción, destacando a la Sociedá de naturales del conceyu de Boal, la más importante d’ Asturies. Tamién s’enseña una reproducción de lo que yera l’aula d’una escuela rural de los años treinta. El material ye too orixinal procedente de diverses escueles de Boal y de particulares.

El prósimu xueves día 10 de payares, a les 20 hores, nel Salón Príncipe d’Asturies del Centru Asturianu de Madrid que preside Cosme Sordo, l’inxenieru asturianu Urbano Arregui va recibir, de manes del so Presidente la Mazana d’Oru, másimu galardón que concede la entidá.

Urbano Arregui nació en La Pola Siero. Amás de la so trayectoria profesional nel Ministeriu de Fomentu, onde ocupó ente otros el cargu de Subdirector Xeneral d’Obres Hidráuliques (del MOPU) y Presidente de la Confederación Hidrográfica del Norte, tien fecho un inxente llabor en favor de la música, con grandes méritos nel campu de l’Actividá Coral del Principáu, como primer Presidente y fundador de la Federación Coral Asturiana. Forma parte como Asesor de la Comisión de Galardones del Centru Asturianu de Madrid del que ye sociu dende va munchu tiempu.

Ente los numberosísimos galardones que tien recibío podemos destacar la Medaya d’Oru d’Uviéu y la de Torrevieja, amás del Urogallu Especial con mención honorífica que-y concedió la entidá astur-madrileña.

Emigrastur

El prósimu sábadu, 15 d’ochobre, a les siete la tarde, l’Edificiu Asturies de Bruseles entama una conferencia sobre ‘Los derechos sociales, llaborales y civiles de los emigrantes’, ún de los temes que más preocupa a la comunidá asturiana residente na capital belga. La conferencia va correr a cargu de Pedro Jesús Rodríguez Martínez, director xeneral de Servicios Sociales, Comunitarios y Prestaciones de la Conseyería de Vivienda y Bienestar Social del Principáu d’Asturies.

L’actu ta organizáu pol Centru Asturianu de Bruseles que, d’esta manera, quier atender la demanda de los sos socios, que deseen recibir información sobre aquellos temes que más-yos preocupen, como ye’l casu de la torna y los trámites alministrativos que se necesiten.