Emigración

La Universidá de Rollins en Florida va entamar nos díes 24 y 26 de febreru un simposiu nel que se va analizar la presencia asturiana nos EEUU, col que se pretende difundir la historia y el legáu cultural de la emigración asturiana en norteamérica.

El congresu, dirixíu pol profesor Alberto Prieto-Calixto, propunxo, amás, definir les señes identitaries de la comunidá asturiano-americana, tratando de cultivar ente los sos miembros esa herencia cultural.

A los actos tán invitaos, ente otros, el rector de la Universidá d’Uviéu, Juan Vázquez; el xerente del Archivu d’Indianos , Santiago González Romero, y el presidente del Conseyu de Comunidaes Asturianes, Manuel Fernández de la Cera, que va asistir en representación del Gobiernu del Principáu d’Asturies.

Diverses iniciatives como la desenvuelta por www.asturianus.org

L’Axencia Asturiana d’Emigración acaba d’abrir el plazu de presentación de solicitúes pa subvencionar proyectos entamaos poles comunidaes d’emigrantes nel esterior. Les ayudes van empobinaes a equipamientos de los centros sociales d’estos colectivos y al desenvolvimientu de les sos actividaes.

El plazu de solicitú dura hasta’l 28 de febreru pa les comunidaes asturianes de dientro del estáu y hasta’l 15 de marzu pa les que tán nel esterior. Les subvenciones distribúinse en dos modalidaes: una, pa facer actividaes de difusión y impulsu de la cultura asturiana, asina como de promoción d’Asturies y otra pa facer inversiones n’equipamientos y infraestructures, tales como : Alquisición, Construcción., Reforma., Conservación, Equipamientos.

Puen concurrir a esta convocatoria les Comunidaes Asturianes o Centros Asturianos que gocen del “reconocimientu de l’asturianía”, nos términos previstos nel artículu 4 de la Llei del Principáu d’Asturies 3/1984, de 9 de mayu, de Reconocimientu de l’Asturianía, y que cumplan con tolos requisitos marcaos na convocatoria. Les solicitúes, acompañaes de la documentación correspondiente, tienen que presentase nel Rexistru Xeneral de la Conseyería de Xusticia, Seguridá Pública y Relaciones Esteriores, cai Uría, 10, 8ª planta, 33003, Uviéu, o por cualquiera de los medios establecíos nel artículu 38 de la Llei del Principáu d’Asturies 30/92, de 26 de payares, de Réxime Xurídicu de les Alministraciones Públiques y del Procedimientu Alministrativu Común.

Seis ciudadanos d’orixen asturianu, polo menos, son los que l’Axencia Asturiana de Cooperación tien detectao na llarga llista de los desapaecíos na dictadura militar arxentina. El director de l’Axencia, Rafael Palacios, anunció que’l gobiernu del Principáu va colaborar en xeres de busca ya identificación de víctimes del réxime implantáu pol xeneral Videla en 1976.

Palacios entrevistóse nos últimos díes na so visita al país austral con autoridaes y colectivos de derechos humanos pa interesase pol paraderu d’asturianos fechos desapaecer polos militares. L’Axencia de Cooperación tien hasta agora los casos confirmaos d’Antonia Margarita Fernández, uvieína desapaecía en mayu de 1978, y Rocío Ángela Martínez Borbolla, xixonesa desapaecía en xunu de 1976. Otros posibles prixoneros políticos asesinaos y colos restos en paraderu desconocíu podíen ser los de Ceferino Fernández, nacíu en Tinéu en 1943 y que desapareció en setiembre de 1975, enantes de que’l xeneral Videla tomara’l poder n’Arxentina y mientres gobernaba la vilda de Perón; otru casu ye’l de Cecilia Viñas, fía d’un asturianu, desapaecía en xunu de 1977 xunta’l so home Hugo Reinaldo Penino.

Col oxetu de recabar información sobre estos y otros posibles casos el gobiernu del Principáu va colaborar coles autoridaes arxentines y entidaes d’esi país dedicaes a la busca de desapaecíos. L’administración asturiana va participar na creación d’un bancu de datos xenéticu y desplazar a Bonos Aires a un investigador pa qu’afonde nos archivos esistentes sobre prixoneros desapaecíos a la busca de los asturianos que pudieran correr la tráxica suerte de más de trenta mil ciudadanos n’Arxentina gobernada polos militares de la dictadura.

El director de l’Axencia Asturiana de Cooperación del Principáu, Rafael Palacios, interesóse nel so viaxe a Arxentina pola suerte de dos desapaecíes asturianes y participó na marcha convocada poles Madres de la Plaza Mayu dende va venticinco años pola Resistencia contra la Fame. Palacios va dar a conocer esti martes 31 los resultaos de les sos xestiones col gobiernu arxentín sobre les dos asturianes que desapaecieron na dictadura militar.

El responsable de Cooperación del gobiernu autonómicu aconceyó nos últimos díes con autoridaes de la república austral y con organizaciones en defensa de los derechos humanos pa interesase pol paraderu de dos muyeres d’orixen asturianu deteníes nos primeros tiempos de la dictadura del xeneral Videla. Esti yera ún de los asuntos que llevaron a Rafael Palacios a Arxentina, amás d’interesase por proyectos de cooperación del Principáu desenvueltos nesi país y d’aconceyar con entidaes non gubernamentales y de l’administración federal pa intercambiar puntos de vista sobre temes de cooperación al desarrollu.

El domingu 5 de febreru, el Centru Asturianu de Bruseles y l’Asociación d’Asturianos en Bruseles (ASBRU) entamen en collaboración col Círculu Cultural Antonio Machado de Luxemburgo una xornada dedicada a la minería y la reconversión minera.

La sesión va tar dividida en dos partes: una primera que se va desendolcar nuna visita a la mina de Blegny, tres de la qu’habrá una xinta nel Centru Asturianu de Bruseles, y una segunda estapa dedicada a un ciclu de cine, tres del que’habrá un coloquiu a partir de les cuatro y media la tarde na Casa d’Asturies.

Esta tarde, el Salón “Príncipe d’Asturies” del Centru Asturianu de Madrid va acoyer la entrega del títulu “Asturianu Universal” al Padre Ángel García, Presidente de Mensaxeros de la Paz. Esti reconocimientu que conceden les Cases d’Asturies d’Alcobendas y Alcalá d’Henares y los Centos Asturianos de Madrid, Toledo y Tres Cantos, va tener llugar a les ocho nun actu que va cuntar cola presentación per parte del Conde de Llatores, Sabino Fernández Campo.

L’Asociación Mensaxeros de la Paz, frutu del trabayu del Padre Ángel García, ye una Obra Social declarada d’Utilidá Pública cuyos fines son acoyer n'”hogares funcionales” a menores privaos d’ambiente familiar o abandonaos y a mozos en dificultá social. Esta asociación, d’ámbitu internacional, recibió la Medaya d’Oru de la Solidaridá Social, así como’l Premiu Príncipe d’Asturies de la Concordia nel añu 1994, ente otros.

El director de l’Axencia Asturiana de Cooperación del Principáu, Rafael Palacios visita Arxentina col fin d’evaluar los estremaos proyectos puestos en marcha pola administración autonómica nesi país y ente otros alcuentros previstos con autoridaes de la República austral va caltener una reunión con autoridaes del gobiernu pa interesase pol paraderu de dos desapaecíes asturianes:Antonia Margarita Fernández García y Rocío Ángeles Martínez Borbolla.

Les dos ciudadanes asturianes poles que va entrugar el director de Cooperación del Principáu desaparecieron mientres la dictadura militar arxentina y dende entós los sos familiares desconocen dafechu’l so paraderu. Palacios va tentar na so visita conocer les noticies que les autoridaes arxentines tienen de les dos prixoneres polítiques feches desapaecer pola dictadura militar.

Amás de la evaluación de los proyectos de desarrollu y d’interesase pol paraderu de les desaparecíes asturianes el representante del gobiernu asturianu tien programaes diverses reuniones de trabayu con responsables del Gobiernu de la República Arxentina col fin d’intercambiar esperiencias y abrir ámbitos de llabor común en temes como emigración, adultos mayores, discapacidaes, infancia, xénero y promoción de persones en riesgu d’esclusión social.

Rafael Palacios va tar n’Arxentina hasta’l prósimu 30 de xineru nun viaxe oficial qu’inclúi amás de los aconceyamientos institucionales una reunión con Hebe de Bonafini, Presidenta de l’Asociación “Madres de Plaza de Mayo” y la participación del representante asturianu na 25º Marcha de la Resistencia y Llucha contra la Fame que ye un Crimen”.

El Centru Asturianu de Buenos Aires va cellebrar a partir marzu’l Primer Cursu de Llingua y Cultura Asturianes en Buenos Aires, entamáu conxuntamente pola Subcomisión de Cultura y Prensa de la institución y l’Academia de la Llingua Asturiana.Los oxetivos xenerales del cursu son que los alumnos accedan al conocimientu de la realidá llingüística d’Asturies al travies del averamientu a la lliteratura, el lexicu, la ortografía y sintaxis de la llingua asturiana. Amás, va tratase d’esparder la realidá cultural d’Asturies dende’l puntu de vista de la etnografía, la economía, la mitoloxía y la relixón.

De manera que los conteníos van tar basaos nos siguientes apartaos: historia, evolución, normativización llingüística y normalización social de la llingua asturiana; historia y evolución de la lliteratura escrita asturiana; estudiu sociollingüísticu, situación legal y averamientu al lexicu, ortografía y sintaxis de la llingua asturiana.

Ente la temática cultural d’Asturies, van dictase clases sobre’l mundu de la maxa; el ciclu agrariu y festivu; la vaca, el gochu y otros animales; cazadores y pescadores; la collecha: de la miel a la mazana y la sidra; los cuentos; lleendes y figures mitolóxiques de la tradición oral; el xuegu y la danza; los santuarios; los ‘vaqueiros’ d’alzada, y el territoriu asturianu.

El Centru Asturianu de Tres Cantos, ´Aires de Asturias´, convoca’l IX Concursu de Fabada Asturiana, el VI Concursu d’Arroz con Llechi y el I Concursu a la Orixinalidá´ Fabes con….. ´ pal prósimu sábadu, 21 de xineru, a la una la tarde. Los participantes, sían o non del centru, van poder participar en cualisquier modalidá, aportando les sos propies recetes que van ser probaes y calificaes por un xuráu a lo llargo la mañana.

Los tres Concursos van facese a la vez el sábadu día 21 a les 13:00 hores, nes instalaciones del Colexu Antonio Osuna (Islas, 26 – 2ª Fase en Tres Cantos).

La Fundación Archivu d’Indianos, agospiada na Quinta Guadalupe de Colombres, va repilar a lo llargo de tou esti añu documentación y toa mena d’oxetos que tengan que ver cola emigración hacia Europa. Ampliando d’esta manera les llinies del museu, qu’hasta la fecha tenía trabayao namás sobre la emigración americana.

Pa llogar esti oxetivu, y por cuenta de que se-yos echa’l tiempu enriba, el presidente del Patronatu anunció que van trabayan n’andecha con otres entidaes que se dediquen a los mesmos fines asina como a iniciar una ronda de contactos colos centros asturianos de toa Europa, pa que dicha documentación nun se pierda enantes de ser recopilada.

Pa too ello, l’Archivu va disponer d’un prestupuestu pal 2006 que llega a los 363000 euros.