El Principáu busca el rastru de seis asturianos desapaecíos na dictadura arxentina

Seis ciudadanos d’orixen asturianu, polo menos, son los que l’Axencia Asturiana de Cooperación tien detectao na llarga llista de los desapaecíos na dictadura militar arxentina. El director de l’Axencia, Rafael Palacios, anunció que’l gobiernu del Principáu va colaborar en xeres de busca ya identificación de víctimes del réxime implantáu pol xeneral Videla en 1976.

Palacios entrevistóse nos últimos díes na so visita al país austral con autoridaes y colectivos de derechos humanos pa interesase pol paraderu d’asturianos fechos desapaecer polos militares. L’Axencia de Cooperación tien hasta agora los casos confirmaos d’Antonia Margarita Fernández, uvieína desapaecía en mayu de 1978, y Rocío Ángela Martínez Borbolla, xixonesa desapaecía en xunu de 1976. Otros posibles prixoneros políticos asesinaos y colos restos en paraderu desconocíu podíen ser los de Ceferino Fernández, nacíu en Tinéu en 1943 y que desapareció en setiembre de 1975, enantes de que’l xeneral Videla tomara’l poder n’Arxentina y mientres gobernaba la vilda de Perón; otru casu ye’l de Cecilia Viñas, fía d’un asturianu, desapaecía en xunu de 1977 xunta’l so home Hugo Reinaldo Penino.

Col oxetu de recabar información sobre estos y otros posibles casos el gobiernu del Principáu va colaborar coles autoridaes arxentines y entidaes d’esi país dedicaes a la busca de desapaecíos. L’administración asturiana va participar na creación d’un bancu de datos xenéticu y desplazar a Bonos Aires a un investigador pa qu’afonde nos archivos esistentes sobre prixoneros desapaecíos a la busca de los asturianos que pudieran correr la tráxica suerte de más de trenta mil ciudadanos n’Arxentina gobernada polos militares de la dictadura.