Emigración El Principáu entrega les sos distinciones a los artistes que colaboraron cola Emigración by asturnet 2 de marzu, 2006 L’Axencia Asturiana d’Emigración de la Conseyería de Xusticia y Esteriores va entregar esti xueves 2 les sos distinciones a los artistes y grupos que colaboraron a lo llargo del añu pasáu n’actividaes culturales de la Emigración. Una gala presidida pol conseyeru Francisco Javier García Valledor va servir como marcu de reconocimientu a tolos colaboradores de les comunidaes asturianes nel Esterior. Los artistes y componentes de grupos musicales y de baile van recibir una figura fecha espresamente pol creador Ástur Paredes y titulada “Páxaru Atlantis” nun actu nel qu’amás de la entrega de distinciones va haber diverses actuaciones a cargu de dellos de los músicos y grupos presentes. L’Auditoriu d’Uviéu ye’l sitiu qu’acueye esta Gala de la Emigración a les 20.00 hores. 2 de marzu, 2006 0 FacebookTwitterPinterestEmail
Emigración Valledor estrena traxe del país nun actu d’homenaxe a la emigración by asturnet 2 de marzu, 2006 Un traxe de bon tastu, con fieltro, elegante y de gala. Valledor estrenó nel Auditoriu Príncipe Felipe d’Uviéu’l traxe del país que tien camentao emplegar nos actos especiales como afalagu a una seña d’identidá que tolos pueblos europeos tienen en consideración y que n’Asturies entá nun tien una reconocencia que ye xeneralizada en toa Europa. El Conseyeru tenía fecha l’anuncia de qu’estrenaría’l traxe que-y ficiera Gloria Roza en Nueva York, encabezando vistíu col traxe tradicional, la delegación asturiana na Gran Parada del San Patricio d’esti añu en Nueva York. Valledor tien previsto usar l’atuendu de gala en tolos sos actos oficiales na ciudá norteamericana, incluída la cena organizada pol ‘lobby’ irlandés nel restaurante del Hotel Waldorf Astoria, pero esti xueves fizo l’estrenu nun actu menos formal pero munchu más emotivu, arrodiáu por tolos que lleven trabayando nesti añu caberu pol espardimientu de la cultura de nueso ente la emigración. L’Axencia Asturiana d’Emigración de la Conseyería de Xusticia y Esteriores fizo entrega esti xueves 2 de les sos distinciones a los artistes y grupos que collaboraron a lo llargo del añu pasáu n’actividaes culturales de la Emigración. Los artistes y componentes de grupos musicales y de baile recibieron una figura fecha espresamente pol creador Ástur Paredes y titulada “Páxaru Atlantis” nun actu nel qu’amás de la entrega de distinciones hebo diverses actuaciones a cargu de dellos de los músicos y grupos presentes. L’Auditoriu d’Uviéu foi’l sitiu qu’acoyó esta Gala de la Emigración dende les 20.00 hores. Ver Galería de Semeyes 2 de marzu, 2006 0 FacebookTwitterPinterestEmail
Emigración Areces promete buscar trabayu a los asturianos retornaos y a los sos descendientes by asturnet 28 de febreru, 2006 El presidente del gobiernu asturianu Vicente Álvarez Areces comprometióse a buscar trabayu a los emigrantes que quieran tornar al país y a los sos descendientes. Les ayudes a los asturianos del esterior pa que vuelvan a entamar una nueva vida llaboral dientro l’estáu van xestionase al través del Serviciu Públicu d’Empléu del Principáu. L’anunciu fízolu’l cabezaleru del executivu autonómicu na reunión que caltuvo esti llunes 27 n’Uviéu cola Secretaria d’Estáu d’Emigración y Emigración Consuelo Rumí. La responsable de política migratoria aconceyó con Areces pa concretar l’aportación de l’administración española a Asturies nesa materia, una cantidá cifrada pal añu 2006 en 1.577.033 euros. La comunidá asturiana va participar como miembru de plenu derechu nel comité qu’estudia la reforma de la lexislación actual tocante a Emigración y que va concretase nun Estatutu de los españoles nel esterior. L’enfotu del executivu que preside Rodríguez Zapatero ye facilitar a tolos ciudadanos del estáu que quieran volver posibilidaes de refacer la so vida de nuevu y pa ello va crease una oficina específica d’atención a estes persones, anunció n’Uviéu, Consuelo Rumí. Nel cursu de la reunión ente la responsable d’Emigración ya Inmigración del gobiernu central y el presidente del Principáu, tratóse tamién de la situación de los ciudadanos estranxeros n’Asturies y de la educación de los sos fíos. Según datos de l’administración estatal na nuestra comunidà hai 3.200 inmigrantes escolarizaos. 28 de febreru, 2006 0 FacebookTwitterPinterestEmail
Emigración La Conseyería d’Esteriores sorprendida poles piticiones de la guía d’indumentaria tradicional by asturnet 24 de febreru, 2006 La guía d’indumentaria tradicional editada pola Axencia d’Emigración del Principáu col fin de facela llegar a les comunidaes asturianes repartíes pel mundu ta a puntu d’esgotar la so tirada inicial de mil exemplares. La Conseyería de Xusticia y Esteriores nun da abastu énte les numberoses piticiones de llibreríes, centros d’enseñanza, instituciones y particulares. El llibru de la investigadora y etnógrafa Gloria Roza ta a puntu de convertise nun auténticu ‘best-seller’, según fontes de la propia Conseyería, que se vio desbordada dende la presentación pública del volume y nun descarten la tirada de nuevos exemplares pa satisfacer la demanda creada. La guía entamóse como respuesta a una necesidá de los grupos folclóricos de la Emigración qu’hasta la fecha nun disponíen de referencies de los resultaos de les últimes investigaciones etnográfiques sobre la indumentaria considerada como tradicional asturiana. La mayoría de los traxes tradicionales qu’usaben los grupos de los emigrante, procedíen del esteriotipu de la Sección Femenina franquista, modelu perallonxáu de los verdaderos traxes que se gastaron nel mundu rural asturianu y nes villes nos sieglos XVIII y XIX, dómines de les que son les indumentaries recoyíes nel llibru de Roza. 24 de febreru, 2006 0 FacebookTwitterPinterestEmail
Emigración Valledor encabeza la delegación asturiana nel San Patriciu de Nueva York by asturnet 22 de febreru, 2006 El conseyeru de Xusticia y Esteriores del Principáu, Francisco Javier García Valledor, va encabezar, vistíu col traxe tradicional, la delegación asturiana na Gran Parada del San Patricio d’esti añu en Nueva York. Valledor tien previsto usar l’atuendu de gala en tolos sos actos oficiales na ciudá norteamericana, incluída la cena organizada pol ‘lobby’ irlandés nel restaurante del Hotel Waldorf Astoria. La delegación d’Asturies va tar formada como nel añu anterior poles bandes de gaites de Corvera y Villa de Xixón. Los gaiteros de los combos dirixíos por Bras Rodrigo acuden nesta ocasión col premiu a la meyor banda estranxera algamáu nel San Patricio de 2005. María Guilche, presidenta del Centru Asturianu de N.Y. va encabezar xunta a García Valledor la delegación de la nuestra comunidá nel desfile pola Quinta Avenida del prósimu 17 de marzu. 22 de febreru, 2006 0 FacebookTwitterPinterestEmail
Emigración Una esposición remembra en Bruseles los rostros de la emigración asturiana by asturnet 16 de febreru, 2006 La Casa dAsturies de Bruseles acueye hastal prósimu 3 de marzo una amuela fotográfica sobre los emigrantes del nuestru país en Bélxica. La exposición titulada Al paso del tiempo apaez estremada en dos partes, una na que senseñen semeyes apurríes polos propios emigrantes de los sos primeros años nel llugar dacoyida y la otra parte recueye imáxenes del fotógrafu afro-francés Arnaud Spani sacaes a la comunidá asturiana en Bruseles a la llargo de los últimos años. Lamuesa, compuesta por cuarenta y cinco semeyes, inaugurólal conseyeru de Xusticia y Esteriores del Principáu, Francisco Javier García Valledor y la vicepresidenta del gobiernu autonómicu, María José Ramos. Valledor aprovechó la so visita a la capital belga pa preparar la celebración del prósimu 8 de setiembre en Bruseles. 16 de febreru, 2006 0 FacebookTwitterPinterestEmail
Emigración Cooperación descubre más casos d’asturianos desapaecíos n’Arxentina by asturnet 16 de febreru, 2006 El director de l’Axencia Asturiana de Cooperación Rafael Palacios dio a conocer esti miércoles 15 nuevos datos sobre casos d’asturianos desapaecíos n’Arxentina na dictadura militar. Polo menos otres dos persones, una nacida en Xixón y la otra en Siero, súmense a la llista asturiana del xenocidiu arxentín. Familiares d’estos últimos punxéronse en contactu con Cooperación tres ver nos medios informativos les noticies sobre la busca de desapaecíos anunciada pol Principáu. Son los casos de María Josefa Fernández, nacida en Gijón en 1952 y que fue secuestrada en 1978, a la salida del trabayu, y de José Luis Villa Noval, natural de Santa Olaya de Vixil, en Siero, nacíu en 1937 y que desapareció en 1977. El director de Cooperación del Principáu recalcó l’interés del gobiernu autonómicu por colaborar na identificación y busca de más deteníos políticos asturianos fechos despaecer polos militares y faló de les dificultaes d’esti llabor, ente otres razones porque nes llistes conocíes munchos deteníos d’orixe asturianu apaecen embaxo la denomación de “gallegos”, como se llama n’Arxentina a tolos pensinsulares. 16 de febreru, 2006 0 FacebookTwitterPinterestEmail
Emigración El Centru Asturianu de Menorca organiza un conciertu de Xuacu Amieva en Maó by asturnet 9 de febreru, 2006 El Centru Asturianu de Menorca ye l’organizador d’un conciertu del gaiteru Xuacu Amieva y el so grupu que va celebrase el prósimu 14 de xunetu nel Claustre del Carme de Maó, según anunció al rotativu Última Hora de Menorca la presidenta de la casa rexonal, Nati Quirós. La iniciativa cuenta col sofitu económicu de la conceyalía de Cultura de Maó y quier ser el primeru d’una serie d’actividaes entamaes pola colonia asturiana na isla balear. La presidenta del Centru quier llevar a Menorca un nuevu conciertu de música folk del país pa la celebración del Día d’Asturies en setiembre. El centru colabora tamién nel intercambiu de grupos folklóricos menorquinos con asturianos y frutu d’esa xera ye la xestión pa que’l conceyu de Llangréu y el de Maó intercambien entrambes agrupaciones locales pa actuar en Menorca y n’Asturies. Nati Quirós amosó tamién el deséu de los asturianos residentes na segunda isla de les Baleares en convidar a l’Academia de la Llingua Asturiana pa qu’ún de los sos miembros viaxe a la isla col fin de dar a conocer la problemática del idioma. 9 de febreru, 2006 0 FacebookTwitterPinterestEmail
Emigración El Principáu va unviar una guía con modelos de traxe tradicional pa los grupos folklóricos de la emigración by asturnet 8 de febreru, 2006 L’Axencia Asturiana d’Emigración va unviar una guía d’indumentaria tradicional del país a les más de doscientes agrupaciones folklóriques de la emigración pa que sirvan de patrón na vistimenta de les sos actividaes. El volume ye obra de la etnógrafa y modista Gloria Roza. El conseyeru de Xusticia y Esteriores, Francisco Javier García Valledor y el responsable de l’Axencia d’Emigración, Luis Miguel Fernández Romero, van presentar esti xueves públicamente la guía de traxes tradicionales elaborada pola investigadora Gloria Roza. Con esti llibru téntase que los grupos de baile de los Centros Asturianos y Cases d’Asturies repartíos pel mundu dispongan de modelos y patrones pa vistir a los sos componentes siguiendo los diseños orixinales envez de la indumentaria estandarizada d’otres dómines que falseaba los traxes tradionales del país. La presentación d’esta guía práctica va facese esti xueves 9 a les 11,30 na sé de la Conseyería de Xusticia y Esteriores nun actu que cuenta cola presencia de l’autora del llibru, Gloria Roza. 8 de febreru, 2006 0 FacebookTwitterPinterestEmail
Emigración Cuarenta grupos folklóricos de la emigración intégrense na FAFA by asturnet 6 de febreru, 2006 El Conseyeru de Xusticia, Seguridá Pública y Relaciones Esteriores, Francisco Javier García Valledor, tuvo presente na Asamblea Extraordinaria de la Federación d’Agrupaciones de Folclore Asturianu xunto al director de l’Axencia Asturiana d’Emigración, Luis Miguel Fernández Romero y pol presidente de la FAFA, Angel Herrera, cellebrada ayeri nel Centru Cultural Carbayedo d’Avilés. L’aconceyamientu valió p’acoyer a más de cuarenta grupos de música y bailes provenientes de l’Asturies esterior. L’asamblea de la FAFA fuera convocada col envís d’acoyer, formalmente, como nuevos socios, a los más de cuarenta grupos de folclore asturianu formaos por emigrantes asturianos de tol estáu, Arxentina, Cuba, Chile, Venezuela, Uruguái, Bélxica y Brasil; y a los que’l conseyeru de Xusticia, Seguridá Pública y Relaciones Esteriores, Francisco Javier García Valledor, quixo dar la bienvenida nun actu nel qu’amás tuvo presente la directiva de la Federación, asina como los representantes d’estos grupos folclóricos. 6 de febreru, 2006 0 FacebookTwitterPinterestEmail