La Conseyería d’Esteriores sorprendida poles piticiones de la guía d’indumentaria tradicional

La guía d’indumentaria tradicional editada pola Axencia d’Emigración del Principáu col fin de facela llegar a les comunidaes asturianes repartíes pel mundu ta a puntu d’esgotar la so tirada inicial de mil exemplares. La Conseyería de Xusticia y Esteriores nun da abastu énte les numberoses piticiones de llibreríes, centros d’enseñanza, instituciones y particulares.

El llibru de la investigadora y etnógrafa Gloria Roza ta a puntu de convertise nun auténticu ‘best-seller’, según fontes de la propia Conseyería, que se vio desbordada dende la presentación pública del volume y nun descarten la tirada de nuevos exemplares pa satisfacer la demanda creada.

La guía entamóse como respuesta a una necesidá de los grupos folclóricos de la Emigración qu’hasta la fecha nun disponíen de referencies de los resultaos de les últimes investigaciones etnográfiques sobre la indumentaria considerada como tradicional asturiana. La mayoría de los traxes tradicionales qu’usaben los grupos de los emigrante, procedíen del esteriotipu de la Sección Femenina franquista, modelu perallonxáu de los verdaderos traxes que se gastaron nel mundu rural asturianu y nes villes nos sieglos XVIII y XIX, dómines de les que son les indumentaries recoyíes nel llibru de Roza.