Emigración

Aprovechando’l paréntesis del branu, el Centru Asturianu de La Rioja prepara dalgunos de los actos que va celebrar en setiembre: una gran sardinada’l día 9, con motivu del Día d’Asturies; la fiesta de San Matéu y l’amagüestu tradicional que coincide col empizu de la seronda.

El Centru Asturianu de La Rioja prepara, aprovechando’l parentesis del branu, dalgunos de los festeyos que van tener llugar el prósimu mes de setiembre, que van empezar col Día d’Asturies, el día 9. Cuatrocientos quilos de sardines van asase nuna gran sardinada que se va preparar na plaza enfrente’l centru, onde nun va faltar la sidra y otres especialidaes típicamente asturianes, amenizao too ello por música rexonal.

Va siguir otra de les fiestes grande que celebra’l Centru de La Rioja, la de San Mateu, equí llamada tamien fiesta de la vendimia. Una xornada dedicada a Asturies, onde tamien se va degustar sidra, empanaes, chorizos a la sidra y quesu cabrales, ente otros productos asturianos. L’actuación de grupos folclóricos va dar pasu a la proyección d’un videu sobre Asturies. Tamien se va poner un puestu dende’l que se van repartir folletos informativos sobre’l Principáu.

El tradicional amagüestu va dar pasu al empiezu de la seronda, que se va celebrar con castañes y sidra dulce. Como novedá esti añu va mayase sidra na propia plaza y ta pensándose na posibilidá de montar un llagar nel mesmu sitiu.

El Centru Asturianu de La Rioja nació hai una decada. Juan Ignacio Cossent Aguínaco, un uviedín afincáu en tierres riojanes dende hai años, ta al frente d’el dende entós. Trátase d’un centru particular, yá que foi montáu mayormente por xente mozo y como respuesta a una situación: “víemos qu’Asturies taba en declive, mentes La Rioja se ponía nel otru estremu y pensemos que yera’l momentu d’esparder les rellaciones entre les dos comunidaes p’apoyar la nuestra tierra”, afirma Cossent.

En tou esti tiempu fíxose un hermanamientu cola sidra, al travies del Conseyu Regulador de La Rioja, y un hermanamientu de la llingua castellana cola asturiana, cita que se fixo nel emblemáticu Monesteriu de San Millán de la Cogolla, cola asistencia de representates del Gobiernu asturianu. “Queremos que tolo que faigamos tenga repercusión social y fomente’l conocimientu y rexonalismu ente Asturies y La Rioja”, diz el so presidente.

La Escuela de Gaita ye otra de les sos iniciatives. Formada esti añu, ye ún de los sos grandes arguyos y un pasu más nesta xuntanza ente asturianos y riojanos. Unes 70 families participen nel Centru, munches d’elles ensin tar rellacionaos con Asturies, pero con un sentimientu común: l’amor por tolo asturiano.

El prósimu mes de setiembre va celebrase un hermanamientu cola localidá de Baños del Riu Tobía, una zona chacinera con escelencia, que cunta nestos momentos con 20 empreses d’esti tipu en funcionamientu, y que tien una idiosincrasia mui asomeyada a Noreña. L’actu va tener llugar el 21 de setiembre. Ente tanto, una delegación del centru va dir hasta’l Principáu pa participar nel Congresu d’Asturianía.

El conseyeru de Xusticia, Seguridá Pública y Relaciones Esteriores, Francisco Javier García Valledor, anunció’l domingu 30 de xunetu nun alcuentru cola asociación Xoven Asturianía Americana la puesta en marcha d’un programa de movilidá pa universitarios descendientes de asturianos, que ñaz con un presupuesto inicial de 40.000 euros pa esti añu, a lo que habrá de sumase la consignación presupuestaria que se destine nos prósimos presupuestos. El programa va financiar la estancia y la manutención de fíos d’emigrantes asturianos en América Latina que tén estudiando en dalguna universidad del continente para que faigan estudios na Universidá d’Uviéu.

La estancia mínima na capital asturiana va ser de cuatro meses y la másima d’un año y los estudios que se faigan equí sedrán convalidaos nel país d’orixen.Menos por esto cabero, el plan ye dafechamente igual que’l nomáu programa Erasmus, que permite l’intercambiu d’estudiantes ente universidaes de la Unión Europea y que l’añu pasáu recibió’l Premiu Príncipe de Asturias de la Concordia.

El programa aprobaráse na prósima xunta del Consejo de Gobierno y ente otres ayudes, incluirá paquetes pa gastos de viaxe y manutención durante cuatro meses y mediu, que van tener una asignación total de 1.500 euros y estancia gratuita na Residencia Juvenil Ramón Menéndez Pidal d’Uviéu o asignación total de 1.900 euros si nun ta incluía la residencia (como asocederá nos casos d’estudiantes que tengan familia n’Asturies).

El conseyeru de Xusticia, Seguridá Pública y Relaciones Esteriores, Francisco Javier García Valledor, anunció’l domingu 30 de xunetu en Xixón dellos conteníos de la nueva Llei d’Emigración, de la que yá hai un borrador mui avanzáu. L’anuncia fízola Valledor nuna espicha-alcuentru cola asociación Joven Asturianía Americana. Na nueva Llei destaca la creación de una nueva figura, los “asturianos de adopción”, mediante la cual quier reconocese a aquelles persones que, ensin tener el so orixen n’Asturies, trabayen activamente pa preservar y difundir la cultura d’esta tierra collaborando colos Centros Asturianos.

El reconocimientu a los asturianos o asturianes d’adopción ye una de las principales demandes de los Centros latinoamericanos, que ven nes xentes nun asturianas de los llugares onde s’alluguen, principalmente xóvenes que trabayen en comuña nes sos actividaes sociales y culturales, la única oportunidá de caltener viva l’asturianía nel futuru nunos territorios que ya nun reciben emigrantes.

Espicha de branu d’Asturianos en Madrid

El 22 de xunetu, y dende les 19,00 hores, l’asociación Asturianos en Madrid ASMA va cellebrar la so espicha de branu nel restaurante el Bosque Sagrado, Casa de Campo de Madrid. L’asociación ASMA ye una asociación creada pola nueva emigración asturiana en Madrid que tien como oxetivos cimeros promover la unión de la comunidá asturiana en Madrid, facilitar la coordinación de desplazamientos a ASturies, facer eventos d’artistes asturianos, posibilitar a a la comunidá asturiana la posibilidá de disfrutar d’actividaes culturales y deportives y promover la toma de conciencia sobre la esistencia de la comunidá asturiana residente en Madrid

El Centru asturianu ‘La Xana’ de Fuengirola va participar per cuarta vez na Nueche Celta de Miijas, que se va celebrar esta na nueche na localidá malagueña. El programa de la IV Nueche Celta inclúi esti añu importantes actuaciones, como les del grupu granadín de rock Morrigane, The Lord of the Flames (musical celticu con baille y espectáculu de fueu), Supervivientes (música celta de fusión, Celtic Tigers (música folk y rock irlandesa) y Amigos de Guinness (música tradicional celta fecha por sevillanos), amás de les bandes de gaites del Centru Asturianu de Madrid y del d’Alcalá d’Henares qu’abrirán la máxica nueche con un pasacais per Mijas, qu’empezará a les 20.30 hores.

Na IV Nueche Celta de Mijas, un eventu de gran esitu que ta siendo imitáu nos conceyos vecinos, habrá una sidrería asturiana, un pub, una tradicional tasca española y una taberna irlandesa, asina como cinco actuaciones sobre l’escenariu.

Esta Nueche, na que se van poder degustar especialidaes culinaries d’Asturies como’l quesu Cabrales o’l chorizu a la sidra, va celebrase esta nueche na plaza Virxe de la Peña, a partir de les 20.30 hores.

El presidente de la Federación Asturiana de Centros Asturianos, Jose Luis Casas Villanueva, reconoz qu’estos organismos quieren facer aportaciones ya influyir na futura Llei d’Asturianía anunciada pol Gobiernu rexonal.

Casas anunció que con esti envís la Federación que preside va presentar una comunicación nel III Congresu de Asturianía, que se celebrará en Xixón los díes 1, 2 y 3 d’agostu.

Xunto al presidente de Federación Asturiana de Centros Asturianos compareció na presentación del Congresu’l presidente del Conseyu de Comunidaes Asturianes, Manuel Fernández de la Cera, y el director xeneral de Rellaciones Institucionales y del Serviciu Xurídicu, Manuel Cabaleiro.

Fernández de la Cera destacó la “importancia” del Congresu y recordó que la emigración tuvo un pesu”primordial” tanto nel desarrollu económicu como cultural d’Asturies.

El Congresu va axuntar en Xixón los Centros Asturianos y Cases d’Asturies con reconocimientu d’asturianía espardíos per tol mundu, y va cuntar con más de 150 participantes, procedentes de 25 centros asturianos d’España, 30 d’America, 5 d’Europa y ún d’Oceanía.

Los oxetivos del Congresu son, sigún desplicaron los sos organizadores, reflexonar sobre lo que ye l’asturianía, lo que ye construir Asturies dientro y fuera de la propia comunidá y, per otra parte, analizar les polítiques del Gobiernu del Principáu, refrendándoles o suxiriendo cambios o iniciatives.

Nos tres díes d’actividaes van tocase bloques temáticos d’interes pa la emigración, ún d’ellos sobre la proyección de la cultura asturiana nel esterior, qu’inclúi una ponencia sobre l’himnu d’Asturies y un informe sobre la Escuela d’Asturianía que prepara monitores de cultura tradicional asturiana pa los centros asturianos.

El bloque temáticu dedicáu al apartáu social, ún de los de mayor importancia pa los centros asturianos d’America, va desarrollase’l segundu día cola presentación y debate del Estatutu de los Ciudadanos Españoles nel Esterior y una mesa redonda na que se van analizar les polítiques sociales hacia la emigración na alministración Central, autonómica y local.

Nes apartáu faise una mención especial a los emigrantes retornaos.

Habrá tamien un bloque dedicáu a los emprendedores y profesionales asturianos fuera de la Comunidá Autónoma, en cuya organización participó tamien l’Institutu de Desarrollu Económicu del Principáu d’Asturies (IDEPA) y les Cámares de Comerciu d’Asturies.

El programa mete tamien un bloque dedicáu a les muyeres y a la mocedá nos centros asturianos que va tratar d’analizar y treslladar los problemes tocantes a la so participación nos centros.

Van presentase, amás, una serie de comunicaciones feches por socios de los centros asturianos y reuniones de trabayu (Talleres) p’analizar la problemática d’estos colectivos n’Europa y restu del mundu, America y España.

La sala d’esposiciones del Centru Municipal Integráu de Pumarín Xixón-Sur va ser la se del Congresu, qu’agospiará esos díes una esposición organizada pol propiu Conseyu de Comunidaes Asturianes y fecha pola Asociación de Profesores de Música Tradicional.

El Congresu completase con una serie d’actividaes culturales, como un conciertu de Jose Manuel Fernández Guti y Jesús Arevalo (ver); l’actuación del grupu DRD y la participación de la banda de Gaites formada polos alumnos de la Escuela d’Asturianía na propia se del Congresu.

Depues de que’l pasáu 16 de mayu la directora del Institutu de la Muyer, Begoña Fernández, tachare de ‘discriminatoria’ la prohibición de que les muyeres entraren na Sociedá d’Artesanos ‘Nuestra Señora del Carmen’, organizadora de la popular Descarga de Cangas, y afalare a les muyeres a solicitar la so entrada en tala sociedá, el colectivu encargáu d’entamar el disparu masivu manifestaron qu’agora ‘nun ye’l momentu de decidir sobre esta cuestión’, y aplazaron el debate hasta’l prósimu mes de setiembre.

La Sociedá d’Artesanos, el colectivu encargáu d’organizar l’espectáculu pirotecnicu más famosu d’Asturies, asegura que’l vetu a la muyer mantiense dende 1902 ‘por tradición’. De fechu, aquellos que mantienen que la prohibición debe siguir, ‘pa nun desfacer el colectivu’, aseguren que la muyer yá cumple’l so papel na fiesta, ‘vistiendo y engalanando la Virxe del Carmen’, asina como teniendo llimpia la ilesia. Actividaes de les que se fai cargu l’asociación de Bienhechoras de Nuestra Señora del Carmen, fundada peles mesmes feches que la Sociedá d’Artesanos.

Tres de la solicitú d’ingresu na sociedá per parte de dalgunes muyeres, ensin que se-yos permitiere tala entrada, la directora del Institutu Asturianu de la Muyer, Begoña Fernández, facía un llamamientu ‘a toles muyeres que quieran pa que soliciten la so entrada na Sociedá d’Artesanos porque los estatutos nun llimiten la so entrada, ente otres coses, porque eso sedría illegal’. Nel so discursu, Begoña Fernández llamó a los responsables de la Sociedá a cumplir y facer cumplir la llei, poniendo fin a esti tipu d’actitúes, y nun descartó llegar a los tribunales si esta discriminación “vuelve a facese efectiva otra vuelta”.

Sicasí, pesie a estes alvertencies dende’l Principáu, a les llamaes de les Peñes de la Pólvora del Ayuntamientu cangues que pidieron que s’aplicare ‘la lóxica de los tiempos’, los responsables vuelven mantener la so ‘tradición’ aplazando’l planteamientu de la cuestión hasta setiembre, de manera qu’hasta l’añu que vien, polo menos, les muyeres nun van poder usar el so derechu a disparar na famosa ‘Descarga’.

Fardaxu, el grupu que revolucionó la música celta en l’Arxentina, ta a piques de cumplir los sos primeros cinco años, efemeride que tien pensao celebrar el prósimu sábadu 22 de xunetu, a partir de les diez de la nueche en SF Multiespacio, Cabrera 4849. A lo llargo d’esti tiempu, Fardaxu tuvo abondos exitos y reconocimientos internacionales, como los galardones que-yos dieron n’España y EEUU, o los trabayos discográficos editaos en l’Arxentina y España.

Ente los llogros conseguíos nos últimos tiempos por Fardaxu, hai que destacar la xira que’l grupu fixo nel añu 2005 por España, na que tocó col prestixosu músicu gallegu Carlos Nuñez.

Anguaño, Fardaxu anda preparando’l que va ser el so tercer discu nel mercáu.

La ciudá de Guayaquil esfrutó los díes 24 y 27 de xunu de dos recitales qu’enllenaron d’asturianía’l Club de Campu Español de la ciudá ecuatoriana y el Teatru Centru d’Arte, nel marcu de los festeyos de la Verbena de San Xuan, organizaos pola Sociedá Española de Beneficencia.

Jesús Arevalo, al pianu, y Jose Manuel Fernández Guti, a la gaita, ufiertaron dos conciertos qu’axuntaron a un bon númberu d’espectadores y nos que dexaron claro que, depues de dos decades xuntos, la compenetración ente los dos ye una realidá.

Un representante del Gobiernu Asturianu principió l’actu, con unes palabres nes que destacó que “lo meyor que tien un pueblu p’amosase a los demás ye la so cultura tradicional, la expresión del so sentir más fondu, y la forma más universal de la cultura ye la música porque comparte’l mesmu llinguax”.

Jorge Pardo, xefe del gabinete de la Conseyería de Xusticia, Seguridá Pública y Rellaciones Esteriores del Principáu, asistió al segundu conciertu nel marcu del so viaxe oficial a Guayaquil, onde la colonia asturiana recibió per primer vez una visita institucional.

El representante asturianu presentó “los sones de la Asturies verde y montañosa que s’esparde con arguyu a lo llargo del mar Cantábricu. La gaita ye a Asturies lo que l’aire qu’alendamos ye pa cualasquier de nós, esencia de la so vida y del so ser”.

De Guti dixo que “ye maestru, interprete y compositor, músicu que supo entemecer tradición y modernidá poniendo la nuestra gaita na categoría d’instrumentu”; demientres qu’a Jesús Arevalo nomólu como “solista, compositor y profesor nel Conservatoriu de Música que consiguió una xenialidá: llograr que’l piano harmonice cola nuestra gaita nuna fusión tan sorprendente como deliciosa, frutu d’un trabayu d’investigación cenciellamente pa remembrar”.

Arevalo y Guti esgranaron un repertoriu con temes folclóricos d’Asturies, onde nun faltaron temes tradicionales nin composiciones escritas pol propiu Jose Manuel Fernández.

La canción ‘Guayaquil de mis amores’ foi una de les sorpreses de la velada, na que gaita y pianu sonaron a mou d’agradecimientu a la hospitalidá brindada a los asturianos polos habitantes d’eses tierres.

L’auditoriu correspondiólos acoyendo con emoción pieces como l’ ‘Himnu d’Asturies’, el ‘Vals de Naveo’, la ‘Muñeira de Llibardón’ o la ‘Polca de la Xana’, ente otres.

Jesús Arevalo y Jose Manuel Fernández nacieron n’Uvieu y empezaron nel mundu de la música siendo malapenes unos neños. Guti foi reconocíu como ún de los meyores gaiteros d’Europa y a el debese la ‘Marcha de Mayo’, tema compuestu pa la boda del Príncipe Felipe de Borbón y la Princesa Letizia. Pela so parte, Arevalo vien d’una familia hestóricamente lligada a la música y gústa-y definise como “afinador de pianos”.

El Centru Asturianu de Barcelona va celebrar el prósimu día 15 de xunetu, a partir de les ocho de la tarde, la so II Nueche Celta, que nesta nueva edición va rindir homenaxe a la memoria de los músicos asturianos Igor Medio y Carlos Redondo, del grupu de folk Felpeyu, que morrieron la pasada fin de selmana nun accidente de tráficu cuando precisamente diben a tocar a un Festival de música celta en Calaf (Barcelona).

Dende les ocho la tarde del prósimu día 15 de xunetu, el Centru Asturianu de Barcelona va celebrar la so II Nueche Celta na qu’habrá actuaciones de la bandina tradicional ‘El Refaxu la Vieya’, el grupu Risca l’Alba de la entidá asturiana en Cataluña, asina como de City of Barcelona Pipe Band y Keympa. Una nueche de música organizada en collaboración cola Axencia Asturiana d’Emigración y Cajastur, na que se va recordar la memoria de los músicos de Felpeyu, Carlos Redondo ya Igor Medio.