Educación

Tres díes de banderes a media asta. La Universidá d’Uviéu cellebra güei la segunda de tres xornaes de llutu pol fallecimientu de Julio Rodríguez, rector de la universidá asturiana ente 1996 y 2000, col asitiamientu d’un llibru de pésames nel edificiu hestóricu de la institución académica y la preparación d’un actu relixosu n’alcordanza del que fora antecesor del actual rector, Juan Vázquez.

Nacíu na llocalidá lleonesa de Ponferrada en 1939, Julio Rodríguez llicencióse cursó estudios de Ciencies na Universidá d’Uviéu y permaneció xuníu a esta entidá a lo llargo de tola so carrera profesional, como profesor titular na Facultá de Química primero y llueu en calidá de caderalgu.

Rodríguez accedió al decanatu d’esti centru en 1984 y pasó, cuatro años depués, a desempeñar el cargu de vicerrector d’Estudiantes y Estensión Universitaria. Nes ellecciones universitaries de 1996, Julio Rodríguez foi elixíu rector y permaneció al frente de la Universidá asturiana hasta l’añu 2000, cuando Juan Vázquez lu sucedió nel cargu.

El presidente autonómicu, Vicente Álvarez Areces, qu’acudió esta mañana a firmar nel llibru de condolencies allugáu na sé hestórica de la Universidá n’Uviéu, llamentó la desapaición de Rodríguez -que falleció n’Italia depués d’una enfermedá declarada hai poco más d’un añu- y eloxó’l puxu que-y diera a la institución académica durante los cuatro años en qu’ocupó el rectoráu.

El llunes, a les 9,30 hores. Responsables de l’Asociación de families pola escolarización n’asturianu algamó güei formalmente esa cita pa entrevistase col Conseyeru de Xusticia, Seguridá Púlica y Relaciones Esteriores, Francisco Javier García Valledor, depués que miembros del collectivu mantuvieren un encierru de dos hores na propia Conseyería, n’Uviéu, pa reclamar rempuesta a dos cartes ensin contestación.

Llueu d’acceder, en tornu al mediudía, a les instalaciones del departamentu que dirixe Valledor, los pas y mas defensores de la escolarización en llingua asturiana reclamaron un contactu directu col conseyeru, que s’alcuentra esfrutando d’unos díes de vacaciones. Énte la so ausencia, y depués d’un diálogu con técnicos de la Conseyería, los miembros de l’asociación accedieron a abandonar les dependencies a les 14,30 hores con un documentu na mano: El compromisu por escrito de la cita con Valledor pal llunes prósimu, firmáu pol secretariu técnicu de la Conseyería de Xusticia.

Según precisó a Asturnews Arturu Xosé Bermeyu, voceru de los pas y mas qu’acudieron a solicita-y una rempuesta a García Valledor, nos archivos de la Conseyería de Xusticia acumúlense dos cartes ensin contestación, una unviada n’ochobre de 2003 y otra na seronda de 2004. En dambes se-y solicitaba al conseyeru d’Izquierda Xunida-Bloque por Asturies un alcuentru pa falar de la escolarización en llingua asturiana.

Marcha atrás na Secundaria

Les misives empobináronse-y al titular de Xusticia, argumentó Arturu Bermeyu, porque “trátase d’unos drechos de Xusticia y, amás, personalmente, el conseyeru diz ser defensor de l’asturianu”. “Ye triste qu’haiga que llegar a esta situación pa que nos reciban”, llamentóse’l representante de l’asociación de families pola escolarización en llingua asturiana.

Según Bermeyu, “pasaron 30 años y n’Asturies tovía nun s’escolarizó n’asturianu. Hai dalgo en Primaria, pero desapaez en Secundaria”. El collectivu de pas y mas que güei accedió a la Conseyería de Xusticia reclama que tolos centros educativos del Principáu ufierten con calter universal l’asignatura de Llingua Asturiana, reclama una escolarización digna nesi idioma y asegura qu’hai “miles” de casos d’alumnos que quieren estudiar asturianu y nun puen facelo.

Archivu. Arturu Bermeyu asume una multa de 90 euros depués de reclama-y una cita a Riopedre na conseyería

Más de 400 tesis doctorales con conteníos sobro Asturies. El Ministeriu d’Educación y Ciencia cataloga nel so sistema informáticu esa cifra d’investigaciones universitaries al rodiu’l Principáu o con referencies directes a él, y afita Madrid como’l principal centru de producción d’esos estudios, tres de la propia Universidá d’Uviéu.

Son datos del sistema Teseo, una base de datos na que’l Ministeriu cataloga toles tesis doctorales defendíes y consideraes aptes nes universidaes españoles dende l’añu 1976. Nesi periodu, depositáronse nel ‘almacén’ informáticu d’Educación un total de 411 tesis sobro Asturies, dos terceres partes d’elles (282) rexistraes y lleíes na Universidá d’Uviéu.

Tres d’esti númberu destaquen les estremaes instituciones universitaries de Madrid, que dende la transición a la democracia produxeron casi mediu cientu d’investigaciones con conteníos asturianos o referencies directes a Asturies. Les vecines universidaes de Santiago de Compostela y de Cantabria siguen a la capital del Estáu na llista, con 12 y 9 tesis, respectivamente, y centros de Cataluña, Salamanca y Andalucía ufren cifres más modestes.

En términos comparativos absolutos, Galicia cuenta con más de 800 tesis doctorales empobinaes al so estudiu, en tantu que Cantabria acércase pero nun llega a la cifra d’investigaciones en tornu a Asturies: Un total de 177 estudios.

Siempre según los datos oficiales del Ministeriu d’Educación na so base de datos, los estudios científicos relacionaos d’algún mou cola llingua asturiana salen primordialmente de la Universidá d’Uviéu, onde, ente otros, Ramón D’Andrés estudió en 1987 la sociollingüística de la parroquia xixonesa de Deva, Xosé Antón González Riaño abordó en 1992 la interferencia llingüística na escuela y José Antonio Fernández Vior analizó en 1996 la fala’l conceyu d’A Veiga, amén de la tesis pionera de Xosé Lluis García Arias sobro aspectos llingüísticos en Teberga.

En feches más recientes (2000), Ángel Huguet pasó-y revista a la relación ente llinguaxe y conocimientu matemáticu y, dende la Universidá de les Islles Baleares, Julio Llaneza estudió la toponimia de Samartín del Rei Aurelio.

La Universidá despacha carnés de llector con númberos d’identificación penriba’l cien mil. La biblioteca universitaria d’Asturies, desdoblada en 18 sales de préstamu y consulta nos campus d’Uviéu, Xixón y Mieres, algama un númberu d’usuarios superior al doble de los sos propios alumnos, que sumen poco más de 41.000. El serviciu bibliográficu universitariu ta acabante habilitar una hemeroteca virtual con alertes personalizaes.

Esta ferramienta, concebida pa facilita-yos a los investigadores la busca d’artículos en publicaciones especializaes españoles ya hispanoamericanes, ponse al algame de los universitarios asturianos en comuña cola Universidá de La Rioja, ya incorpora una base de datos de casi mediu millón d’artículos asoleyaos en 2.400 revistes científiques.

Con esti preséu informáticu, los investigadores vinculaos a la Universidá d’Uviéu puen llocalizar testos de difícil ubicación, acceder a un resume de cada artículu y solicitar l’unvíu d’avisos mui concretos nel corréu ellectrónicu cuando se publiquen artículos que versen sobro un asuntu del interés del usuariu.

Orixinaria de 1608, con puxu especial nel sieglu XVIII y modernizada a finales del XIX, la biblioteca de la Universidá d’Uviéu tuvo que ser reconstruyida dafechu depués de la destrucción que sufrió por mor de la revolución d’ochobre de 1934.

El serviciu bibliográficu universitariu proporciona anguaño a los sos más de cien mil usuarios les posibilidaes de sacar llibros en préstamu, facer consultes en sala, solicitar l’alquisición de nuevos títulos y acceder a llibros custodiaos n’otres biblioteques, al traviés del denomináu préstamu interbibliotecariu.

Nun habrá más innovación por falta de dineru. El rector de la Universidá d’Uviéu, Juan Vázquez, sacó alantre ayeri les primeres cuentes del so segundu mandatu cola aprobación d’un presupuestu de casi 176 millones d’euros pa 2005, una cantidá que’l rector xulga insuficiente p’acometer los proyectos naguaos y na qu’echa en falta a lo menos 6 millones más pa renovar la docencia n’escueles y facultaes.

El llamentu de Vázquez estendióse amás al aumentu porcentual del presupuestu universitariu respecto al añu qu’agora acaba: Poco más d’un 2,5 por cientu, lo que representa un espoxigue perbaxo del aumentu del nivel de vida nos últimos doce meses -acordies col Índiz de Precios de Consumu-. Cifres que, a los güeyos del rector, nun permiten falar siquiera d’un crecimientu na partida presupuestaria, sinón más bien d’un descensu.

Con eses blimes, Juan Vázquez declaró que la Universidá asturiana habrá dirixise a lo llargo del añu prósimu con un presupuestu austeru y “de contención”, y responsabilizó dafechu d’ello a les cuentes trazaes pola Alministración autonómica, institución que sufraga les dos terceres partes de los gastos totales de la Universidá d’Uviéu.

Vázquez fizo esi reproche darréu de la primer xuntanza de trabayu del nuevu conseyu de gobiernu universitariu, que dirixe la institución académica asturiana depués de l’aniciu, en mayu pasáu, del segundu cuatrieniu de Juan Vázquez al frente’l rectoráu.

El pasáu 1 d’abril, Vázquez convirtióse nel primer rector que resulta reelixíu na Universidá asturiana na democracia reciente, depués de ganar al so únicu oponente, el caderalgu de Química Vicente Gotor, por alpenes 150 votos de diferencia.

El remocicamientu integral de la Universidá Llaboral pasa de proyectu a realidá. El Conseyu de Gobiernu autorizó na so xuntanza de güei l’aniciu de les obres nel edificiu xixonés, que camudará sustancialmente pa incorporar un centru d’arte, l’Institutu del Teatru y les dependencies de la radiotelevisión autonómica. Los trabayos costarán más de 50 millones d’euros y empezarán pola reforma’l centru de formación profesional.

Col alcuerdu d’esta mañana, l’Executivu asturianu cumple’l trámite caberu pal empiezu de les obres previstes nel denomináu Plan d’Usos de la Universidá Llaboral, un proyectu que quier convertir l’inmueble xixonés nun gran complexu multiusos d’equí a 2007 y cuya dotación presupuestaria yá fora avanzada hai unes selmanes pola conseyera de Cultura, Comunicación Social y Turismu, Ana Rosa Migoya.

De fechu, el Gobiernu abrió-y güei les puertes a la licitación de les obres nel antiguu centru de formación profesional, pero espera autorizar formalmente el restu de les intervenciones antes de la primavera prósima, en sucesives y regulares xuntances de los miembros del Executivu.

La primer inversión aprobada esta mañana pal proyectu pol Gobiernu’l Principáu ye de 7,5 millones d’euros. A l’adecuación de talleres de la Universidá Llaboral pa crear nellos un centru d’arte empobinaránse otros 9 millones, mientres que l’habilitación de les dependencies del Institutu del Teatru y les Artes Escéniques consumirá poco más de 11 millones d’euros.

Accesu llibre y directu a servicios de les universidaes públiques de Cantabria, Baleares, La Rioja, Zaragoza, Estremadura, La Mancha, País Vascu y Navarra. Los estudiantes de la Universidá d’Uviéu podrán utilizar les biblioteques y aules d’informática d’esos centros como servicios propios, gracies a un conveniu firmáu güei en Ciudad Real polos rectores del denomináu ‘Grupu 9’, nel que s’integra la Universidá asturiana.

L’alcuerdu, robláu esta mañana en Castiella-La Mancha cola ausencia’l rector de la Universidá d’Uviéu, Juan Vázquez, dará-yos más movilidá a los alumnos de les nueve entidaes universitaries asociaes nel ‘G-9’, toes elles baxo’l signu común de ser les úniques Universidaes públiques nos sos respectivos territorios.

Amás d’habilitar el serviciu collectivu a fondos bibliográficos y aules informátiques, les nueve universidaes asociaes pondrán en marcha nel prósimu cursu académicu un máster en comuña sobro tecnoloxía de la información y les comunicaciones, impartíu ‘on-line’ por profesores de les estremaes instituciones académiques del grupu.

Asinamesmo, los estudiantes de la Universidá d’Uviéu podrán beneficiase darréu d’una ufierta de más de 40 titulaciones impartíes vía Internet, dientro d’un proyectu que les universidaes del ‘G-9’ denominen campus virtual compartíu y que nesti cursu escolar axunta a 3.000 alumnos.

Siguimientu “altísimu” o “mui desigual”. La estaya de mocedá de la Xunta pola Defensa de la Llingua, Xunta Moza, y la Conseyería d’Educación discrepen sobro l’éxitu de la fuelga convocada güei en Secundaria pa reclamar clases d’asturianu en tolos institutos, con independencia’l númberu d’alumnos matriculaos na asignatura. Decenes d’estudiantes concentráronse al mediudía n’Uviéu y Xixón.

Frente al “siguimientu desigual” defendíu dende Educación, el collectivu de defensa llingüística, que centró les sos movilizaciones de güei frente a esa Conseyería y na Plaza Mayor de Xixón, aseguró que dellos centros educativos d’Uviéu, Siero, Cangas de Narcea, Mieres y Piloña, ente otros conceyos, rexistraron un altu índiz de participación na psotesta, convocada contra lo que la Xunta considera un incumplimientu llegal que-yos impide cursar Llingua a alumnos que lo soliciten en centros nos que nun hai un númberu mínimu d’estudiantes matriculaos n’Asturianu.

El paru alitáu pola Xunta cellébrase un día depués que’l conseyeru d’Educación y Ciencia, José Luis Iglesias Riopedre, comprometiera la presencia de l’asignatura de Llingua en tolos cursos de Secundaria pal prósimu 2005, reconociendo dificultaes pa la matriculación nesta materia nel Bachilleratu.

Acordies colos datos asoleyaos pol propiu conseyeru con ocasión de la última Selmana de les Lletres Asturianes, cellebrada en mayu, unos 16.000 escolinos de Primaria y Secundaria recibieron enseñances d’asturianu nel cursu académicu pasáu. Selmanes más tarde, la directora d’Ordenación Académica del Principáu, Dolores Guerra, estimó en 19.523 los alumnos que cursaron Llingua l’añu académicu pasáu, 16.000 en Primaria y el restu en Secundaria.

El casu más visible na controvertida enseñanza d’asturianu na Secundaria protagonizólu Arturu Bermeyu, pá d’una alumna a la que se-y negó la posibilidá de matriculase en Llingua nel so institutu d’Uviéu. El pasáu 21 de setiembre, Bermeyu asumió una multa de 90 euros por desobediencia y resistencia a l’autoridá depués que la Policía lu detuviera na sé d’Educación y Ciencia, onde permanecía a la espera d’una rempuesta personal d’Iglesias Riopedre.

Arturu Bermeyu asume una multa de 90 euros depués de reclama-y una cita a Riopedre na conseyería

Mieres quier sonar más. La nueva Casa de la Música del municipiu mineru, habilitada nes dependencies del vieyu economatu d’Hunosa ya inagurada esti mediudía pol presidente autonómicu, Vicente Álvarez Areces, quier afitar la villa como un centru de referencia nes enseñances musicales impartíes nel Principáu. L’inmueble acueye clases pa más de 300 alumnos.

Depués d’unes obres de remocicamientu que requirieron una inversión d’un millón d’euros y qu’hubieron superar importantes resquiebres na estructura del edificiu, utilizáu nos últimos años como sé de la Escuela d’Inxeniería, la villa minera agospia agora nun flamante espaciu de tres plantes a los estudiantes del Conservatoriu y de la escuela de música, qu’imparte enseñances de música tradicional.

Amás d’ello, la reforma del vieyu economatu d’Hunosa habilitó espacios d’ensayu pa la banda y l’orfeón municipales, y permitió instalar un nuevu auditoriu espresamente concebíu pa la interpretación de música en directu. Nun futuru prósimu, a eses dotaciones habrá que-yos añadir una sala con equipos de grabación.

La nueva Casa de la Música de Mieres, que güei foi inagurada de forma oficial por Álvarez Areces, pon fin a la ‘diáspora’ d’alumnos por estremaos centros educativos de la villa y acaba coles severes llimitaciones d’espaciu que-yos imponía la Casa de Cultura a los estudiantes de música del conceyu.

Discursu del alcalde de Mieres na inaguración

El prósimu 10 de payares los alumnos y alumnes d’enseñances medies tán convocaos a una fuelga en protesta pola situación de l’asignatura de Llingua Asturiana nos institutos. La movilización entámala Xunta Moza col fin de denunciar l’incumplimientu por parte de la conseyería d’Educación de la normativa tocante a la ufierta en tolos centros de Secundaria del asturianu como asignatura optativa. La organización xuvenil de la Xunta pola Defensa la Llingua quier sofitar con esta protesta les denuncies que los mesmos alumnos afectaos y los sos familiares lleven faciendo dende l’empiezu’l cursu, ensin llograr hasta agora nenguna respuespa por parte les autoridaes educatives del Principáu.

La intención de Xunta Moza ye cuntar na movilización del 10 de payares col apoyu d’otres organizaciones y poro ta en converses pa llograr el másimu respaldu a la fuelga, la primera que s’entama na enseñanza contra la discriminación llingüística. Nes últimes selmanes instituciones como l’Academia la Llingua, organizaciones polítiques como Andecha Astur y el Bloque por Asturies, y sindicatos como SUATEA, vienen denunciando les deficiencies na escolarización en Llingua Asturiana nos centros d’enseñances medies. Al primer casu denunciáu de discriminación llingüística nesti cursu, el de la neña Catuxa Bermeyu nel IES Naranco d’Uviéu, foron sumándose otres denuncies alrodiu l’inclumplimientu de la normativa vixente n’otros centros d’Asturies: IES de Ciañu, Universidá Llaboral de Xixón o l’Alfonso II d’Uviéu. Hasta la fecha la única solución qu’ufiertó la Conseyería d’Educación foi la posibilidá del treslláu de los alumnos a otros centros onde hubiere profesores d’asturianu, una alternativa que choca coles mesmes disposiciones llegales de la comunidá autónoma, clares respective a la ufierta de Llingua Asturiana en tolos centros educativos.

Xunta Moza tien convocada pal mesmu día de la fuelga d’estudiantes una concentración énte la sé de la Conseyería qu’empobina José Luis Riopedre na Plaza d’España d’Uviéu.