Educación

El gobiernu del Principáu d’Asturies promocionará la llingua asturiana nel encuentru Expolangues, que va desendolcase los prósimos días 6, 7, 8 y 9 de febreru en París. El salón internacional d’idiomes ya tuvo a Asturies con stand propiu en delles ocasiones.

A París, el Principáu va llevar información documental con un cartafueyu informativu, n’asturianu y tornáu al inglés, francés y alemán, y al catalán, euskera y gallego. Nesi cartafueyu desplícase l’orixen, la historia y la situación actual de la llingua asturiana y de la so producción literaria, cifrando’l númberu actual de falantes en más de 250.000.

También va amosase material lliterariu n’asturianu y castellán, asina como información sobre Asturies, la so ñaturaleza y paisaxe.

El stand’ va inaugurase’l día 6 a les 18 hores nel Parc Expo de París, y nel actu van tar presentes Consuelo Vega, Direutora Xeneral de Cultura, la presidenta de la Academia de la Llingua, Ana Cano, y el poeta Pablo Antón Marín Estrada, ganador del premiu de poesía Xuan María Acebal 2007.

El cuatrocientos aniversariu de la fundación de la Universidá d’Uvieu va traer consigo, amás de conciertos, conferencies y esposiciones, la posibilidá de participar en tres talleres organizaos pol vicerrectoráu d’estensión universitaria coles siguyientes temátiques: creación de revistes, fotografía y xenetica. Tolos interesaos tienen hasta’l 8 de febraru p’apuntase a estes actividaes.

El primeru de los tres talleres, creación de revistes, va entamar el 25 de febreru y va cuntar cola direición del diseñador Oscar Marine. “Oviedo me mata”, será una publicación cultural que naz cola famosa revista creada por Marine nos ochenta “Madrid me mata”, como referente. El cursu va durer hasta’l 28 de febreru.

“El papel de la simbiosis na evolución”, segunda de les propuestes, va correr al cargu de Lynn Marguilis, catedrática de la Universidá de Massachusets ya esperta en bioquímica y xenetica. Esti cursu escomienza’l 10 de marzu y va durar hasta’l 13 del mesmu mes. Por últimu, y ya nos meses de marzu y abril (del 31 al 3), será’l turnu del taller de fotografía embaxo direición del premiu nacional de fotografía, Alberto García-Alix.

El Colexu San Eutiquio dedica esti añu la so Selmana Cultural al llibru, y con esti motivu entama una esposición bibliográfica asina como un conxuntu d’actividaes que van a contar cola presencia de destacaos autores asturianos. La Selmana Cultural desarrollaráse los díes 21 a 25 de xineru nel centru educativu, que ta asitiáu nel barriu xixonés de Cimavilla. Ente los conferenciantes van tar Aurora García Rivas, Daniel García de la Cuesta, Humberto Gonzali ya Inaciu Galán, ente otros.

La selmana va entamar esti llunes con un tiempu pa la reflexón que va abrise cada día y que la primer xornada va dedise a “¿Por qué ye importante la llectura?”. A les 12.30 va producise la inauguración oficial de La Selmana Cultural cola presencia de Justo Vilabrille Linares, Conceyal d’Educación y Cultura del Ayuntamientu de Xixón y d’Humberto Gonzali, escritor y xestor cultural, amás del director del Colexu y la coordinadora del departamentu de lliteratura del mesmu. A la una la tarde va abrise la esposición sobre llibros que preparó’l centru.

El martes la reflexón va titulase “El Cementeriu de los Llibros Escaecíos” y a les nueve y diez de la mañana va ser Aurora García Rivas, escritora en castellanu y gallego-asturianu, la qu’entame les charres con “Averándose a la poesía”. A les 11.00 hores pieslla’l día un “Conciertu didácticu de Música Tradicional”, con Daniel García de la Cuesta , miembru del grupu folk Lliberdón, investigador, concertista y conferenciante de temática tradicional.

El miércoles 23 la reflexón va xirar alredor de “Pa entender matemátiques ha lleese”. Y a les 11.00 hores entama la xornada de conferencíes con “L’humor gráficu y el Cómic n’Asturies” con Ernesto García del Castillo “Neto”, dibuxante y humorista gráficu de La Voz de Asturias, pa zarrase dempués, a les 12.30 hores, cola conferencia “Cómo llegar a ser empresariu cultural “, con Inaciu Iglesias, empresariu, editor y escritor.

El xueves 24 entama cola reflexón “Carta a un neña que nun quier lleer”. A les once la mañana l’escritor y presentador de la TPA y la Cadena SER, Inaciu Galan y Gonzalez, va entamar una charra titulada “Facer televisión n’asturies”, na que va poder vese un documental preparáu por alumnos del centru y pol propiu autor a costafecha pa la ocasión y nel que se pue ver el procesu de realización del so programa de la TPA, “Al Aldu: Xente de Casa”. Esi mesmu día, a les doce y media la mañana escritor, etnógrafu, dibuxante ya ilustrador Alberto Álvarez Peña va falar de los “Mitos del Conceyu de Xixón”.

L’últimu día de la selmana cultural va abrise con una reflexón sobre “Los llibros…”, a la que va siguir, a les 11 hores una segunda sesión de la charra d’Inaciu Galán “Facer televisión n’asturies”, que va repetir la charra del xueves pa dellos alumnos más del centru.

L’Academia de la Llingua Asturiana emitió ayeri un comunicáu nel que declaraba que “llueu de revisar col máximu procuru’l conteníu y plantegamientos de la propuesta de Currículu d’Educación Infantil, quier treslladar a la sociedá asturiana y, de mou especial, a les estayes rellacionaes col ámbitu educativu que’l documentu curricular incumple dafechu l’espíritu y la lletra de la Llei d’Usu del Asturianu, darréu que l’artículu 10.1 de la mesma garantiza la enseñanza de la llingua asturiana en tolos niveles y graos educativos.”

De la mesma forma, l’ALLA denuncia que “Les referencies, escases y descontestualizaes, que’l testu curricular fai del asturianu constitúin un recursu de maquillax qu’en nengún casu dexa la posibilidá d’enseñar y dignificar la nuesa llingua nesta estaya educativa.”

Diz amás l’Academia, qu’“El currículu, arriendes d’ello, amuesa una gran debilidá didáutico-pedagóxica al nun tener en cuenta que l’asturianu ye la llingua familiar de munchos escolinos d’Asturies colo qu’ello implica de desventaya pal deprendizax de la llingua castellana y/o estranxera.”

Asinamesmo, l’Academia de la Llingua Asturiana anuncio qu’en contautos calteníos col Conseyeru d’Educación, “féxo-y ver estes circunstancies asina como la grave responsabilidá de la Conseyería nel casu de caltenese l’actual estáu de redaición del documentu curricular.”

“La institución -sigue’l comunicáu- en tou casu, fairá llegar a los responsables educativos del Principáu les enmiendes afayadices pa que la presencia de la Llingua Asturiana s’axuste a les llendes xurídiques calteníes na Llei d’Usu del Asturianu y anima a la comunidá educativa asturiana (padres y madres d’escolinos, sindicatos d’enseñanza, profesoráu, etc.) a facer lo propio”.

L’Academia de la Llingua Asturiana abrió estos díes el plazu p’apuntase a la primer prueba añal de conocencia de la llingua asturiana. L’ALLA abre esta posibilidá sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu”. P’apuntase a la prueba, ta abiertu’l plazu hasta’l 26 de xineru que vien.

La prueba va tener dos partes, una escrita (dictáu, torna, exercicios gramaticales, redaición) y otra falada (conversación). Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica Asina mesmo, l’Academia aconseya la llectura de testos fechos acordies cola normativa, como los asoleyaos pola Institución.

L’ALLA fai dos convocatories añales onde poder evaluase de teoría gramatical: conocencia y dominiu del funcionamientu gramatical del asturianu y de la normativa académica; práutica escrita: emplegu amañosu de la llingua, puestu en práutica gracies a exercicios gramaticales y de composición escrita y práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. Tamién ha tenese conocencia del allugamientu de la llingua dientro de la sociedá asturiana asina como del procesu de normalización en que ta inxerta.

P’apuntase pue dirixise unu, hasta’l 24 de xineru, a les oficines de l’ALLA, na cai Marqués de Santa Cruz, 6, 2u, d’Uviéu. Cualesquier dulda pue resolvese al traviés del teléfonu 985 21 18 37 o del corréu alla@asturnet.es

Dende esta selmana y hasta’l 31 de xineru pueden apuntase tolos interesaos n’acudir a los cursos d’asturianu que tolos años ufierta la Universidá Popular de Xixón, a los qu’esti añu se sumen dalgunu nuevu, anque non especificamente d’asturianu, si dau nesta llingua.

El sitiu onde se van poner les clases va ser el Centru de Cultura Antiguu Institutu. Hai un cursu básicu de 60 hores, «Llingua Asturiana I», qu’empieza’l 13 de febreru y que se va dar de llunes y miércoles, de 19:00 a 21:00 hores. El cursu de segundu nivel, «Llingua Asturiana II», que suelen facer los que fixeron el primeru, tien la mesma duración y empieza’l 14 de febreru, a los martes y xueves, de 19:00 a 21:00 hores. Hai un tercer cursu, más especializáu y que ye novedá esti añu, «Recursos didácticos pa docentes de Llingua Asturiana», de 20 hores, qu’empieza’l día 14 de febreru, a los martes y xueves, de 17:00 a 18:30 hores.

Amás va dase esti añu un cursu sobre sidra fechu n’asturianu. Pa too ello pues apuntate n’interné o nes instalaciones del ayuntamientu de Xixón en cada barriu.

El sindicatu acusó esti martes a la COnseyerúa d`’Educación al traviés d’un comunicáu, tres de la presentación ayeri per parte del Gobiernu del Principáu, del borrador del currículu educativu pa infantil y primaria. Según el sindicatu, “nel mesmu queda a les clares recoyío que nel segundu ciclu d’Educación Infantil los neños y neñes s’averen a la Llingua Estranxera, y asina mesmo s’inclúi la enseñanza de la relixón”. “Pero faltaría más, la llingua asturiana nun queda espeyada como tal, sinón que se plantega como una globalidá dientro de la cultura asturiana”, añade’l comunicáu.

La organización señaló amás que “con esti currículu preténdese adoctrinar a tolos escolinos d’Educación Infantil en relixón, y por supuestu, el mayestru de relixón sí pue entrar nes clases a deprender a los neños; mentatu’l de llingua asturiana nun va poder dar les sos clases, quedando la enseñanza del asturianu nun requexu de la cultura de pandereta y folixes”.

Pa Suatea “esti fechu ye un incumplimientu grave tanto de la Llei d’Usu como del Alcuerdu de personal d’Educación Infantil y Primaria nel que queda recoyío que se dotará d’especialista de Llingua Asturiana a tolos centros”.

Pal sindicatu “ta perdemostráu que la conocencia de la llingua materna facilita la conocencia d’otres llingües, pero n’Asturies como somos tan llistos, d’una tirada quitamos la llingua materna de los nuestros escolinos”. Por estos motivos, el sindicatu desixe “la eliminación de les ratios mínimes pa la constitución de grupu”. Pide tamién la “incorporación de la enseñanza de la Llingua Asturiana nel currículu d’infantil”. Y por último, demanda “midíes d’estabilización nel personal de los docentes de llingua”.

L’Academia de la Llingua Asturiana abre güei llunes el plazu p’apuntase a la primer prueba añal de conocencia de la llingua asturiana. L’ALLA abre esta posibilidá sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu”. P’apuntase’l plazu ta abiertu hasta’l 26 de xineru que vien.

La prueba va tener dos partes, una escrita (dictáu, torna, exercicios gramaticales, redaición) y otra falada (conversación). Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica Asina mesmo, l’Academia aconseya la llectura de testos fechos acordies cola normativa, como los asoleyaos pola Institución.

L’ALLA fai dos convocatories añales onde poder evaluase de teoría gramatical: conocencia y dominiu del funcionamientu gramatical del asturianu y de la normativa académica; práutica escrita: emplegu amañosu de la llingua, puestu en práutica gracies a exercicios gramaticales y de composición escrita y práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. Tamién ha tenese conocencia del allugamientu de la llingua dientro de la sociedá asturiana asina como del procesu de normalización en que ta inxerta.

P’apuntase pue dirixise unu, hasta’l 24 de xineru, a les oficines de l’ALLA, na cai Marqués de Santa Cruz, 6, 2u, d’Uviéu. Cualesquier dulda pue resolvese al traviés del teléfonu 985 21 18 37 o del corréu alla@asturnet.es

Como cada añu, la Oficina de la Llingua de Xixón, convoca dos beques de formación “especializao en xestión del patrimoniu cultural”. Les beques que s’otorguen dempués del procesu d’escoyeta van allargase hasta’l 31 d’avientu de 2008, con polo menos, siete hores diaríes n’horariu de mañana. Cada beca ta dotada con 6.010 euros.

Bases completes de les beques na web de la Oficina

L’Academia de la Llingua Asturiana dio anuncia estos díes d’una nueva publicación de la institución, “Xeitu. Manual pal deprendimientu de la Llingua Asturiana”, un llibru de testu coordináu pol escritor Xandru Martino Ruz nel que participó l’equipu de profesores d’adultos de l’Academia de la Llingua Asturiana.

Con esta nueva obra l’ALLA quier siguir col so llabor entamáu nel añu 2004, el denomáu “Cursos d’Alfebitazación en Llingua Asturiana p’Adultos”, que buscaba da-yos formación sobre escritura y llectura, a falantes patrimoniales d’asturianu, amás de sirvir pa los nuevos falantes.