Educación

El Conceyu Universitariu pol Asturianu (CUPA) unvió un comunicáu nel que quixo “celebrar publicamente la victoria de Vicente Gotor nes elecciones a Rector de la Universidá d’Uviéu”. Una victoria que pal CUPA “ye un síntoma del cambiu de mentalidá na comunidá universitaria asturiana”, que según los responsables de la organización “apuesta por un modelu d’institución que mire p’Asturies y que tenga a la llingua asturiana como l’elementu de gran importancia que ye”.

Dende’l CUPA creen “que n’esta contundente victoria de Vicente Gotor tuvo muncho que ver l’apoyu del electoráu asturianista qu’impulsamos dende la nuesa organización y que supunxo un reblagu nel númberu de votos en munches de les facultaes” y aprovechen p’agradecer l’apoyu de les persones que “vieron como’l CUPA que Vicente Gotor yera’l candidatu más afayadizu pa la normalización del asturianu dientro de la nuesa Universidá”.

El CUPA diz tamién na nota de prensa unviada ayeri na que queríen anunciar que “ collaborarán pa que n’esta nueva etapa, el Rectoráu faiga les polítiques afayadices pa esa normalización”.

La organización quixo tamién denunciar “delles práctiques llevaes a cabu a lo llargo de la xornada previa y na mesma xornada de votaciones”, que pa la organización fueron “más propios d’otros tiempos pasaos, pa nós un indicador de la so escasa cultura democrática” de dellos miembros de la comunidá universitaria.

El CUPA quixo darréu, “recordar y afitar que’l CUPA ye una organización independiente de cualesquier partíu políticu, sindicatu, grupu de presión, etc. que nun rinde cuentes a nadie, sacante los sos miembros y que respeta la independencia de toles demás organizaciones”. Polo que la organización “esixe la mesma actitú al restu de les organizaciones”.

Pela so parte, Vicente Gotor Vicente Gotor, prometió ayeri na so primer intervención dempués de la victoria “facer cambios fonderos na universidá”, siendo “la victoria d´un movimientu de cambiu na Universidá. Ye´l mio compromisu: el mio programa ye un contratu pa cola sociedá asturiana”.

Comunicáu onde’l CUPA pidía’l votu pa Gotor

“Quiero universitarios llibres, capaces de xenerar nueves idees y d’ufrir alternatives a la sociedá asturiana”. Vicente Gotor, nuevo rector de la de la Universidá d’Uvieu tres ganar la segunda vuelta de les eleiciones zarraba con estes palabres la so intervención tres la xornada de votaciones. Gotor algamó 4.521 votos, lo que suponen el 63,25% de los apoyos. Paz Andres, pela so parte algamó 2.647 votos, el 36,75% del total ponderáu.

El catedráticu de Quimica agradeció a la comunidá universitaria’l buen comportamientu nestes eleiciones y tuve palabres especiales pal so equipu de trabayu de trabayu durante los últimos años, pa los profesores y pal alumnáu. 28.000 miembros d’esta comunidá universitaria, ente Doctores, profesores non doctores, alumnos y personal d’alministración y servicios, taben llamaos a votar nestos comicios.

No que cinca a los resultaos por estayes, nel casu de los Doctores, Gotor consiguió 684 apoyos, el 62’93 de los votos frente a los 403, el 37’07% algamos por Paz Andres. Los profesores y el personal d’investigación apoyaron con un 67’17% de los votos a Gotor (444 votos) y con 217 votos, el 32’83 a la candidata Andres Sáenz. Nel casu de los alumnos Gotor Santamaría consiguió 2.883 votos, el 62’82% y Andres el 37’18%, con un total de 1.706 votos. El personal d’alministración y servicios apoyó tamien mayoritariamente a Gotor, con 510 votos y el 61’37%, frente a los 321 qu’apoyaron a la otra candidata, el 38’63%.

“Caminar pelos espacios abiertos del tiempu hasta’l centru de la ocasión oportuna”. Paz Andres resumió nesta cita del escritor Baltasar Gracián les sos intenciones, tres estes eleiciones y pal periodu de mandatu que va entamar el nuevo Rector Vicente Gotor, ayeri nel patiu central de la Universidá. La catedrática de Derechu prometió durante esti actu, una oposición crítica pero leal y anticipó que esta va tar basada na búsqueda d’alcuerdos y el debate. “Nunca vamos recurrir a la descalificación”.

Paz Andres valoró positivamente los resultaos algamaos nestes elecciones y reconoció que la esperiencia electoral sirvio-y pa conocer meyor la Universidá. La candidata tamien tuvo palabres de felicitación pal socesor de Juan Vázquez y quiso agradecer a la comunidá universitaria y a tolos miembros de la mesme que depositaren la so confianza na so candidatura.

La catedrática destacó que’l mandatu de Gotor llega nun momentu crucial pa la institución acadámica asturiana col oxetivu d’algamar una adaptación esitosa al espaciu educativu europeu como meta. Nesta nueva estaya, Andres prometió defender los planteaminentos del so programa, pa devolver la confianza depositada nel so proyectu, y recordo-y a Vicente Gotor que tien la obligación, como Rector, de poner en práutica les sos idees.

El sindicatu de trabayadores de la enseñanza d’Asturies recordó la obigatoriedá d’ufiertar l’asignatura de Llingua Asturiana y Gallego-Asturiano nos centros educativos de la rexón pa la prósima epoca de matriculación. SUATEA pidió a los responsables d’educación nun comunicáu que, a diferencia d’ocasiones anteriores, respeten la Llei d’Usu no que cinca a esta materia.

El sindicatu tamiñen denunció la situación de desigualdá que sufren los escolinos qu’escueyen estudiar esta asignatura por mor de la creación de ratios na formación de los grupos de llingua asturiana. Otramanera tamien criticaron la situación del colectivu de mayestros de llingua asturiana por mor de la non oficialidá de la mesma. SUATEA considera que l’ l’asturianu y el gallego – asturianu namái van dexar de ser una materia de segunda cuando la llingua asturiana algama’l rangu llegal que yá tienen el restu de llingües del estáu.

Los dos candidatos ganadores na primer vuelta de les eleiciones al Rectoráu de la Universidá d’Uvieu, Paz Andres y Vicente Gotor, concurren esti miercoles a una nueva xornada de votación na que puen participar los 28.000 miembros de la comunidá universitaria. Na primer ronda, Gotor algamó 3643 votos, un 49’29%, colos que tuvo cerca de la mayoría absoluta y Andres, 1713 votos con un porcentaxe del 22’56%.

Les urnes van permanecer abiertes de 10.00 a las 19.00 hores. Va haber meses electorales nos Cámpus d’Uvieu, 22; de Xixón, 6 y de Mieres, 1 y el centru de recuentu de los datos va tar nel Edificiu Históricu de la Universidá n’Uvieu. L’indice de participación na primer vuelta foi del 28,44 por cientu, con casi la totalidá de los profesores doctores acudiendo a les urnes (91,79), un altu porcentaxe de participación nel restu del personal docente (63,56) ya’l personal d’alministración (88,79) y una baxa implicación de los estudiantes (21,21).

Paz Andres va votar a les 13.00 hores na Sala de Grados de la Facultá d’Económiques demientres que Vicente Gotor va facelo a les 11.30 hores na mesa 8 del Edificiu Santiago Gascón. El Rector saliente, Juan Vázquez tien previsto exercer el so derechu al votu a les 12:30 hores na Sala de Grados de la Facultá d’Económiques

El Centru Municipal de Pumarin Xixón-Sur, en Xixón, va acoyer el 7 de mayu la celebración de la Selmana de les Lletres Asturianes del Colexu Públicu Laviada, un actu nel que los protagonistes van ser d’un llau los neños y neñes de llingua asturiana de la nuesa escuela y pel otru, Nacho Fonseca, el creador del grupu musical pa neños “Xentiquina” y que lleva per títulu “Suaños na mar”. Con esti actu, el Laviada quier “facer un homenaxe al so llabor en favor de la nuesa llingua, un trabayu qu’ enxamás s’escaecerá. Un trabayu col que disfrutamos una llarga riestra de xeneraciones d’escolinos asturianos”.

L’actu ye de llibre asistencia, anque encamiente acutar plaza pa dalgunu de los dos pases, que van facese a les seis y a les siete la tarde. L’espectáculu va entamar con una esbilla de poemes, pa siguir darréu cola entregada del galardón “Estrelli na mar 2008” a Nacho Fonseca.

La representación de Suaños na mar ta basada nun testu de Beatriz González, María XesúsPrieto y Xosé Lluis Remis Cancios y la música de Nacho Fonseca.

Paz Andres pidio-y esta mañana en rueda de prensa a Vicente Gotor, l’otru candidatu al Rectoráu de la Universidá, la cellebración d’un debate públicu, nun local de la Universidá y que cunte cola presencia de los medios de comunicación. La candidata llamentó, una vegada más, que nun se cellebrara alderique dalgún durante la primer vuelta y reconoció que la so propuesta al respectu foi refugada por Gotor, col argumentu de que yera dalgo que nun reclamaba la comunidá universitaria a estes altures de les eleiciones.

“Esti ye’l momentu de subsanar esta ausencia d’alderique. Yo siento que la comunidá universitaria reclama la cellebración de debates”, declaró Andres al tiempu que recordó qu’ella aceptó toles ufiertes de debate que-y propunxeron dende los distintos medios de comunicación de la rexón, al contrariu que Vicente Gotor que manifestó claramente la so negativa a esti tipu d’iniciatives. Según Paz Andres la non cellebración de debates quíta-y tresparencia a la campaña y rebaxa’l nivel democráticu de la mesma. “Ta robándose-y a la comunidá universitaria y a la sociedá asturiana un elementu de valoración importante”.

Otramanera, la catedrática de Derechu anunció la so intención de nun retirase de la campaña como se dixo enantes de la cellebración de la rueda de prensa. Nesti sen, Paz Andres recordó que la normativa ellectoral esixe mayoría absoluta na primer vuelta pa ganar les eleiciones, estremu que nunse dio nesta ocasión, y por eso hai que dir a la segunda vuelta respetando la normativa vixente. “Tolos demás sumen más que la mayoría qu’haya algamao cualquier candidatu. La segunda vuelta colócanos nun nuevu escenariu onde la comunidá universitaria va tener que pronunciase ente dos persones”, sorayó Paz Andres al tiempu que manifestó’l so optimismu nesti nuevu tiempu de reflexón.

L’Aula Magna de la Universidá d’Uvieu acueye esti miercoles les cellebraciones el día de la Universidá de Llión. Nel alctu central, que va entamar a les 13:00 hores, van intervenir los rectores de les instituciones asturiana y llionesa, Juan Vázquez y Ángel Penas; l’ex Rector de la Universidá d’Uvieu, Teodoro López Cuesta; l’ ex-Rector de la Universidad de Llón, Miguel Cordero del Campillo; y Cesar Álvarez, ex Secretariu Xeneral del Colexu Universitariu de Llión.

Otramenera, pela tarde, el profesor de la universidá llionesa Salvador Gutierrez va tar dando una conferencia sobre publicidad y propaganda titulada “Hacer hacer (la función del lenguaje en la publicidad y en la propaganda)”

Güei entamen en Xixón les actividaes d’estes xornaes a les 16:30 hores, cuando va falase de “Los drechos llingüísticos nel marcu européu y nel Estáu español”. N’esta mesa van participar Leopoldo Tolivar (catedráticu de Derechu Alministrativu), José Manuel Pérez (profesor de Derechu Alministrativu), Eva Pons (profesora de Derechu Constitucional, Cataluña) y José Manuel Urroz (maestru d’Euskera, Navarra).

La segunda mesa redonda, a les seis y media la tarde, va tratar “Los axentes sociales y la defensa de los derechos llingüísticos”. Van participar Xosé Miguel Suárez (miembru de Xeira), Xuán Xosé Mariño (director de programación de Radio Sele), Lluismi Orviz (miembru de la Xunta pola Defensa de la Llingua Asturiana) y Beatriz R. Viado (directora del selmanariu Les Noticies).

La xornada del sábadu va tar ocupada pela mañana por tres meses redondes, mientres que pela tarde va ser el momentu pa les esperiencies práctiques. A les 9:30 va tratase’l tema “Política Llingüística y educación” nuna mesa onde van tar Urbano Rodríguez (director del C. P. Jacinto Benavente), José Luis del Río (abogáu, representante del Aconceyamiento de Xuristes pol Asturianu), Emilio Imsua (profesor de Llingua y Lliteratura Gallega) y Juliá-Vicent Rey (responsable de Política Llingüística, Valencia).

A les 10:45, na mesa sobre «La formación del profesoráu n’Asturies» van tar Xosé Antón González Riaño (vicedecanu de la Facultá de Pedagoxía y miembru de l’Academia de la Llingua Asturiana), Ana Isabel Álvarez (subdirectora de la Escuela de Maxisteriu) y Carlos Lomas (responsable de sociollingüística del CPR de Xixón). La sesión de la mañana va acabar cola mesa redonda “La formación del profesoráu nos sistemes educativos con llingua vernácula oficial” con Emilio Insua, Eva Pons, Juliá-Vicente Rey y José Manuel Urroz.

La tarde del sábadu va abrise a les cuatro la tarde pa falar de les esperiencies educatives en Primaria, cola participación de Xuan Nel Rodríguez (C. P. Fozaneldi), Ánxel Álvarez (maestru xubiláu), Aitor Etxarte (Ikastola Hegoalde) y Angélica Fernández (CRA Occidente). A les 18:30 hores va tratase de les esperiencies en Secundaria. Los encargaos van ser M.ª Xosé Rodríguez (Oficina de la Llingua de Xixón), Bertu Cobreros (IES de Xixón), Lluis Gabriel Antuña, M.ª Rodríguez (IES Sotrondio) y Luisa Vayes (C. P. El Parque), y Luis Miguel Álvarez (Federación de Xuegos y Deportes Tradicionales).

Col entamu de la carrera pa suceder a Juan Vázquez al frente de la Universidá d’Uvieu, lo candidatos van participar nuna mesa redonda sobre cooperación internacional,l esti xueves 3 d’Abril nel Salón de Actos de la Facultá de Ciencies de la Educación. Nel alderique, que tien prevista la hora d’entamu pa les 19:00 hores y va ser el platu central d’esta segunda xornada, van participar los cuatro aspirantes a Rector: Paz Andres, Antonio Cueto, Santos González y Vicente Gotor.

Les xornaes tan organizaes pol grupu d’estudiantes Pachakuti de la Universidá d’Uvieu, la Coordinadora d’ONG del Principáu ya’l Conseyu de la Mocedá d’Asturies, en collaboración cola propia Universidá. Durante los dos días van analizase dellos aspeutos tocantes a les polítiques de cooperación, los problemes de desigualdá Norte-Sur, o el trabayu de les ONGD en rellación coles instituciones universitaries.