Educación

Esti miércoles 24 de setiembre, la Oficina Municipal de la Llingua del Conceyu de Xixón presentó l’axenda escolar 2008/2009, dedicada esti añu a la lliteratura, y la carpeta didáutica “N’asturiano queda guapo”, un primer vocabulariu básicu pa los más pequeños. Nel actu, que tuvo llugar a les 13 hores nel Salón de Receiciones de la Casa Conceyu, tuvieron presentes el Conceyal de Política Llingüística, D. Jesús Montes Estrada, la Responsable de la Oficina Municipal de la Llingua, Mª Xosé Rodríguez López y direutores d’escueles de 0 a 3 años y d’Institutos de Secundaria de Xixón.

Esta ye la quinta axenda escolar que s’edita col enfotu de promover l’usu y conocimientu de la llingua asturiana ente l’alumnáu de secundaria y bachilleratu al tiempu que se-yos faciliten a los estudiantes recursos pa una meyor organización y distribución del tiempu escolar; Si les primeres axendes falaben de los díes internacionales, de les llingües del mundu, de la ecoloxía y de Xixón, esti añu toca falar de lliteratura.

Al traviés de les ilustraciones de Lupe Sabugo y los testos de Mª Ángeles García Rodríguez, l’axenda recueye los típicos espacios pal horariu escolar, les feches d’exámenes, el profesoráu, los deberes diarios, los trabayos de cada asignatura, un xustificante pa les faltes d’asistencia, pero tamién dexa sitiu pa les feches importantes, pa les señes de los collacios y collacies y sobre manerapa falar de lliteratura y conocer los distintos xéneros, téuniques d’escritura, d’organización de biblioteques o cómo facer un marcapáxines.

L’axenda va repartise ente los maestros y maestres d’asturianu del conceyu de Xixón y los casi 700 alumnos y alumnes matriculaos en llingua asturiana en Secundaria y Bachilleratu nos centros escolares del Conceyu.

D’otra manera la carpeta didaútica “N’asturiano queda guapo” ye una coleición de 7 cartelos ilustraos con un vocabulariu básicu sobre’l bañu, la clas, el cuerpu humanu, la ciudá, les formes xeométriques y los colores, el recréu y el comedor que va valir p’averar a los más pequeños a la llingua asturiana.

La campaña, que va repartise ente les escueles de 0 a 3 años y los d’Educación Infantil y Primaria de Xixón, faise en collaboración colos Servicios de Normalización de Llangréu, Siero, Cangas de Narcea, L.lena y Samartín del Rei Aurelio y ta subvencionada pola Conseyería de Cultura y Turismo.

El Centru d’educación d’Adultos del Fontán tien el plazu de matrícula abiertu pa un cursu de Llingua Asturiana y Cultura p’adultos que va entamar el dos d’ochobre y va acabar en xunu.

Los interesaos puen apuntase enantes del 25 de setiembre con una fotocopia de carné y dos semeyes, de llunes a vienres de 10:00 a 13:30 hores. El cursu ye de baldre.

El conceyu de Cangas del Narcea convoca esta plaza por concursu-oposición. Pídese bachiller o equivalente y el requisitu específicu d’un cursu de 50 hores o más.

La duración de la contratación ye la del cursu, de 60 hores de duración, que se fadrá nel últimu trimestre del añu. El plazu de presentación d’instancies fina’l 22 de setiembre

Bases contratación

La escuela de Música Tradicional Llangréu, allugada nel Conservatoriu Profesional de Música “Valle del Nalón”, anuncia como novedaes pal nuevu cursu les especialidaes de FLAUTA TRAVESERA DE MAERA qu’impartirá Pepín de Muñalén y VIGULÍN qu’ impartirá Héctor Braga. Otra nueva ye ‘l cambiu de profesora de Canción Asturiana que sedrá Anabel Santiago en llugar de Begoña Calleja por motivos de trabayu aunque impartirá tres cursos de téunica vocal complementarios al cursu d’Anabel.

Esti cursu faense 10 anos dende la creación de la escuela, pronto confirmaremos eventos rellacionaos col décimu aniversariu nel que tiense en proyeutu un conciertu de los profesores con invitaos de cursos y talleres cellebraos en anos pasaos y un festival nel que participarien gaiteros de ditintes zones d’ España . También se ta proyeutando el viaxe d’ intercambiu cola “Segudo Olaeta Musiko Eskola” de Gernika-Lumo pa finales del mes d’ ochobre.

Les clases entamen el 4 d’ Ochobre.Finalmente la ufierta pal cursu 2008/2009 queda asina:

INSTRUMENTALES Canción Asturiana. Anabel Santiago Tambor Asturianu. Chema Fombona. Gaita Asturiana. Chus Solís. Xipla y tamboril. Luis Mondelo. Curdión diatónicu Xose Ramón Navia. Flauta travesera de maera. Pepín de Muñalén. Vigulín tradicional. Héctor Braga. Zanfoña. Héctor Braga. Bandurria. Héctor Braga. Pandereteres. Laura Ruiz. Baille Asturianu. Laura Ruiz. D’ANICIU/OTRES Aniciu na música tradicional (Neños dende 6 anos) Fani Moro. Averamientu a la música tradicional. (Adultos) Fani Moro. Llinguaxe Musical Fani Moro. Folklore. Fani Moro. Mecánica y mantenimientu gaita Pelayo Fernández. COMBOS Combo-Banda Gaites. Chus Solís. Combo-Bandina tradicional. Héctor Braga Combo-Pareya tambor y gaita Valentín Fuente – Manuel Durán. Combo-Gaita/Canción Asturiana. Valentín Fuente. Combo-Gaita/Baille. Laura Ruiz – Valentín Fuente. Combo-Ensame Folk. Alberto Ablanedo.

Na ufierta de cursos de la Universidá Popular de Xixón qu´entamen nel mes d´ochobre preséntense tres cursos de llingua: unu de Llingua Asturiana: básicu, otru de conversación y espresión escrita y un terceru de traducción. Tolos cursos serán n´horariu de tarde dos díes a la selmana.

La matrícula podrá formalizase nes Oficines d´Atención al ciudadanu del Ayuntamientu de Xixón, nos Caxeros Ciudadanos o na web www.gijon.es hasta´l 6 d´ochobre. Y el preciu de la matrícula son 15 euros y la duración de los cursos 40 hores.

El Centru d’educación d’Adultos d’El Fontán tien el plazu de matrícula abiertu pa un cursu de Llingua Asturiana y Cultura p’adultos que va entamar el dos d’ochobre y va acabar en xunu.

Los interesaos puen apuntase enantes del 25 de setiembre con una fotocopia de carné y dos semeyes, de llunes a vienres de 10:00 a 13:30 hores. El cursu ye de baldre.

Cuatrocientos años tuvieron que pasar pa qu’un Rector de la Universidá d’Uviéu echara un discursu oficial na llingua d’Asturies. Foi nel actu d’entrega de diplomes de los Cursos de Branu de l’ALLA. Vicente Gotor, escoyíu nel mes de mayu como máximu mandatariu de la universidá asturiana espresó amás, la so voluntá de “buscar el consensu” p’atopar “una solución a la llingua ente los estudios reglaos” de la Facultá de Filoloxía, afitando lo dicho estos díes pol decanu en funciones d’esta facultá.

Xunto al Rector, presidieron l’actu la directora de l’Academia de la Llingua Asturiana y ex decana de Filoloxía, Ana CAno, el director de los cursos, Xoxé Antón González Riaño, y el secretariu de los mesmos, Pablo Xuan Manzano.

Gotor espresó tamién la so “voluntá pa que la llingua y la cultura asturiana tengan el so llugar académicu y científicu na Universidá” dexando claro que les sos declaraciones conllevaben un “compromisu” sobre “los estudios reglaos d’asturianu qu’hasta agora nun s’establecieron na Universidá”.

La presidenta de l’Academia agradeció al rector la so “collaboración” cola entidá, asina como’l fechu de que se dirixere al públicu n’asturianu y que lo ficiere nun espaciu como’l paraninfu.

Gotor anunció tamién nel actu, como yá ficiere n’otres ocasiones, que próximamente la páxina de la Universidá d’Uviéu va tener la so versión en llingua asturiana, llabor nel que yá tán trabayando los técnicos de l’Academia.

El Rector de la Universidá d’Uviéu, Vicente Gotor, y la Presidenta de l’Academia de la Llingua Asturiana, Ana María Cano, piesllen oficialmente los XXVI Cursos de Branu. L’actu va ser mañana xueves 11 de setiembre, a les 19:30 hores, nel Paraninfu de la Universidá d’Uviéu, asitiáu na cai San Franciscu.

Según informa l’ALLA nun comunicáu, nos cursos d’esti añu participaron un centenar de persones nos cinco niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, Cursu de Capacitación pa la Traducción al Asturianu –toos tres inxertos nos Cursos d’Estensión Universitaria de la Universidá d’Uviéu-, los cursos Internet, nueves teunoloxíes y enseñanza del asturianu y la segunda fase del Cursu de Capacitación en Gallego-Asturianu.

A lo llargo del actu intervendrá tamién el direutor de los Cursos de Branu, D. Xosé Antón González Riaño.

El decanu de Filoloxía, José Antonio Martínez, dana anuncia ayeri de la so intención de promover la entrada del asturianu dientro de los nuevos estudios europeos, al traviés d’un “minor”, una propuesta que rebaxa la presentada pola anterior decana, Ana Cano, pero que según el decanu en funciones “podría xenerar más consensu”. La propuesta foi calificada pol Conceyu Universitariu pol Asturianu como “un pasu hestóricu pal asturianu, qu’entraría nos estudios universitarios reglaos per primer vegada na hestoria”.

Martínez quier aprobar pal mes d’ochobre la nueva propuesta. Dende’l Conceyu Universitariu pol Asturianu albidren más afayadizo que l’asturianu tuviere asitiada dientro de los nomaos “maior”, pero dicen ser “conocedores de les dificultaes internes y sobremanera esternes, que n’otres ocasiones yá echaron p’atrás les propuestes de reglar los estudios de Filoloxía Asturiana na Universidá d’Uviéu”. Por esa razón, espliquen “camentamos perimportante’l pasu d’asitiar al asturianu dientro de les enseñances reglaes al mesmu nivel qu’otres llingües oficiales”.

La Directiva del CUPA puntualiza nun comunicáu unviáu a los medios qu’esta propuesta “dexa abierta la posibilidá de que la propia demanda del enseñu d’asturianu na Universidá, convierta’l “minor” nun “maior” nun futuru”.

Esti vienres 15 d’agostu, peslláronse los XXVI Cursos de Branu de l’Academia de la Llingua asturiana que vienen desendolcase na Escuela-Llar de Santantolín, nel Conceyu d’Ibias y que cuntarron dende’l día 4 cola participación de más de 150 alumnos.

Los cursos de Branu de l’Academia inclúin un Cursu Elemental de Llingua Asturiana, un Cursu Avanzáu de Llingua Asturiana, dellos Cursos d’Afondamientu Cultural y Llingüísticu y la segunda fase del Cursu de Gallego-Asturianu, dellos en collaboración cola Universidá d’Uviéu.

Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies.