Educación

La Conseyería d’Educación del Principáu va convocar nesti 2009 la ufierta pública d’emplegu pa cubrir les vacantes de la plantiya y, al mesmu tiempu, “da-y estabilidá al emplegu”, según confirmaó’l responsable d’Educación, José Luis Iglesias Riopedre, al sindicatu Suatea tres caltener un conceyu na sede de la Conseyería.

Nesti aconceyamientu, el sindicatu asturianu dexixó “tresparencia” na mesa y una convocatoria acorde col sistema transitoriu en vixencia hasta’l 2011.

La Conseyería d’Educación vieno acabante de publicar el llibru “A la gueta del material espardío”, que recueye materiales didácticos pa Secundaria escoyíos polos profesores Xurde Fernández y María Ángeles Rodríguez.

El llibru espublízase col enfotu de valir de ferramienta pa los enseñantes nel so llabor d’inxertar les competencies básiques nes sos promagramaciones, axuntando materiales lliterarios y socio-culturales.

Los alumnos d’asturianu nos centros públicos y privaos del país xorrecieron nos tres últimos años un 9% hasta algamar más de 21.700 alumnos cursando Llingua Asturiana nes distintes etapes de la enseñanza non universitaria nel Principáu.

Nel cursu 2006-2007 había 19.753 alumnos matriculaos nesta materia (19.514 na rede pública y 239 na rede concertada), mientres que nel cursu 2007-2008 la cifra xorreció hasta los 21.409 estudiantes (20.654 na rede pública y 755 na concertada), pa finar nesti añu colos 21.748 (21.119 en centros públicos y 629 en concertaos) qu’estudien asturianu nes nueses escueles y centros de secundaria y bachilleratu.

Esti cursu tán matriculaos en Llingua Asturiana 17.166 alumnos de Primaria en 228 centros públicos y 458 cursen esta materia en seis centros concertaos. Nel casu de la rede pública, l’asignatura escuéyela 1 de cada 2 alumnos de Primaria.

N’Educación Secundaria Obligatoria hai 4.054 alumnos matriculaos, de los que 3.883 estudien en centros públicos y 171 en centros concertaos. Nel Bachilleratu l’asignatura tien 538 alumnos, matriculaos toos en centros educativos públicos.

Un total de 459 alumnos estudien gallegu-asturianu esti cursu nel Principáu d’Asturies, 251 en Primaria 198 na ESO y diez en Bachilleratu.

El Principáu va ufrir en 2009 a la Universidá d’Uviéu 132,5 millones de euros, con un xorrecimientu del 6 por cientu en relación a 2008, en llugar de los 144 que pidía la institución. Esta partida asoleyose esti llunes darréu de la presentación del proyectu de Presupuestos Xenerales del Principáu pa 2009.

La selmana pasada la Universidá fizo público que’l so presupuestu tendría de ser pa 2009 de 218,2 millones de euros, porque sólo’l capítulu de nómines del personal llega a los 127 millones.

Esa cifra quedaba condicionada a la contribución de l’Alministración autonómica y queda agora rebaxáda en cásique 12 millones d’euros.

El rector de la Universidá d’Uviéu, Vicente Gotor, valoró ayeri l’aprobación per parte de la Xunta de la Facultá de Filoloxía de la propuesta de creación d’un Minor de Llingua Asturiana, un títulu que “el decanu trabayó bien” y col que tuvo “una amplia mayoría”, solliñó.

Asina s’espresó en declaraciones a Europa Press. Al so xuiciu, esta propuesta supón que “per primer vez na historia de la Universidá d’Uviéu l’asturianu cuente con un títulu universitariu oficial y regláu que, si bien nun va ser equivalente a una llicenciatura, sí va esixise pa poder impartir clases de llingua asturiana tanto n’enseñanza primaria como en secundaria”.

El Minor d’Asturianu ye un aspeutu más dientro de la propuesta xeneral de títulos del decanu. La previsión ye qu’estos estudios se pongan en marcha de magar el cursu 2010-2011. Hasta entós, la propuesta ha desarrollase nos diversos planes d’estudios y aprobase n’instancies superiores, tanto autonómiques como estatales.

España ye’l país de la Unión Europea onde los neños entamen primero a deprender un idioma estranxeru, de magar los tres años, pero tamién ye onde menos tiempu mediu se dedica a la llingua estranxera en primaria con sólo’l 6,5% del total según un estudiu de la Comisión Europea.

L’estudiu, vieno ellaboráu pola rede d’información sobre la educación n’Europa ‘Eurydice’ y afita que “en delles comunidaes autónomes d’España, los neños entamaron ya deprender una llingua estranxera de magar de los tres años, y esta práutica ta estendiéndose al conxuntu del país demientres l’añua escolar 2008/2009”.

La comunidá xermanófona de Bélxica ye otru exemplu del enfotu que lleva a que la enseñanza d’una llingua estranxera entame a los tres años. Poro, na mayoría de los Estaos, los neños entamen a deprender un idioma estranxeru ente los ocho y los diez años.

El tiempu dedicáu a la enseñanza d’idiomes estranxeros nes escueles primaries alcuéntrase perbaxo del 10% del horariu llectivu total, menos en Bélxica (14%), Malta (15%) y Luxemburgo (39%). N’España, paez ablucante que’l tiempu mediu dedicáu la llingua estranxera en primaria seya sólo’l 6,5% del total.

El Conceyu Universitariu pol Asturianu (CUPA), declaró al traviés d’un comunicáu a los medios que gracies a la decisión de la Xunta de Facultá de Filoloxía d’introducir l’asturianu dientro de los estudios reglaos “l’asturianu va tar per primer vegada como materia dafechu oficial na Universidá d’Uviéu”, lo que consideren “un pasu hestóricu pal idioma”.

Feliciten los miembros del CUPA a los miembros d’esta Xunta de Facultá pola so “responsabilidá y consensu” a la hora del votu y recueren qu’esti cambiu “dexa abierta la posibilidá de que la propia demanda del enseñu d’asturianu na Universidá, convierta’l ‘minor’ nun ‘maior’ nun futuru”.

Dempués de l’aprobación de la propuesta de Minor d’asturianu na Xunta de la Facultá de Filoloxía, la Xunta pola Defensa de la Llingua Asturiana caltién la crítica a la solución adoptada, que ye pa la organización “claramente insuficiente, porque caltién a la llingua asturiana nun estatus marxinal, en comparanza col rangu qu’ocupen el restu llingües con estudios reglaos de filoloxía”.

La organización afirmó que “nun existen razones técniques que lleven a esta solución de compromisu”. “Nel ámbitu universitariu nun esiste alderique sobre la esistencia como tal de la llingua asturiana, esiste cuerpu de profesores abondo pa entamar una titulación propia de grau y esiste demanda d’estudiantes, mui superior a la que tienen la mayoría de los títulos de grau esistentes nesti momentu na Facultá de Filoloxía”.

Les universidaes españoles que formen parte del G9, ente les que figura la Universidá d’Uviéu xunta la mayoría de les Universidaes de rexones uniprovinciales, tan estudiando la posibilidá d’espedir títulos conxuntos cola idea de “fomentar la movilidá” de los estudiantes. La noticia diola’l rector de la Universidá d’Estremadura (UEx), Juan Francisco Duque, tres de l’Asamblea Xeneral de Rectores del G-p que se celebrara nesa Universidá.

Al alcuentru del G9 asistieron amás del presidente y rector de la UEx, Juan Francisco Duque Carrillo, el rector de la Universidá Uviéu, Vicente Gotor; el de la Universidá de Cantabria, Federico Gutiérrez-Solana Salcedo; el de la Universidá de Castiella La Mancha, Ernesto Martínez, la rectora de la Univesitat d’Illes Balears, Montserrat Casas Ametller; el rector de la Universidá de la Rioxa, José María Martínez de Pisón Cavero; el rector de la Universidá del País Vascu; Juan Ignacio Pérez Iglesias, el rector de la Universidá Pública de Navarra, Julio Lafuente López; el rector de la Universidá de Zaragoza, Manuel José López Pérez, y el secretariu xeneral del G9, Jorge Martínez Castro.

La Facultá de Filoloxía de la Universidá d’Uviéu celebro güei una Xunta de Facultá na que se dedicio’l futuru del asitiamientu del asturianu nel Espaciu Européu d’Educación Superior. Les distintes sensibilidaes de la facultá votaron favoratiblemente la propuesta presentada pol Decanu José Antonio Martínez p’asitiar al asturianu nes enseñances reglaes al traviés d’un ‘minor’ y nun dieron de pasu la propuesta del profesor Félix Fernández de Castro que quier que la enseñanza del asturianu nun tenga presencia nos planes futuros.

Sobre’l casu son numberoses les persones y colectivos que se vienen posicionando. El Rector, Vicente Gotor, que nomó al actual decanu yera favoratible a la propuesta del mesmu, como tamién lo son los profesores del Seminariu de Filoloxía Asturiana qu’apoyaben la propuesta “ensin reserves” y el Conceyu Universitariu pol Asturianu, que puntualizó “preferir un ‘maior'” pero que ve nel ‘minor’ “un pasu hestóricu”.

D’otra banda tán la posición de la Xunta Moza qu’esixe un ‘maior’, que según pudo saber la redacción d’Asturnews nun ta énte les propuestes presentaes pa la Xunta de Facultá de güei xueves. Nesti sen espresóse tamién la ex Decana Ana Mª Cano, que dimitió dempués de ver refugada la so propuesta de ‘maior’ enantes del branu y que nun presentó nenguna propuesta formal.

Sicasí, la votación foi positiva pal ‘minor’ d’asturianu, pero nun va ser entovía definitiva, porqu’esti títulu ha pasar pel órganu correspondiente asitiáu en Madrid y encargáu de da-y el preste a estes propuestes feches dende les universidaes de tol estáu.