Educación

Militantes de Xunta Moza y estudiantes de maxisteriu llevaron la so denuncia al actu de toma de posesión de cargos universitarios. Ellí repartiéronse octavilles informatives nes que se pedía la dimisión inmediata de la directora de la Escuela Universitaria de Maxisteriu pola so propuesta d’esclusión de la llingua asturiana de los nuevos planes d’estudiu.

Recordóse asinamesmo l’asaltu a la llegalidá vixente que propón esta dirección. La Llei 1/98 d’Usu y Promoción del Asturianu recueye: “La Universidá d’Uviéu tien de garantizar la capacitación del profesoráu pal enseñu del asturianu y el gallegu-asturianu na enseñanza reglada”.

Los estudiantes deplegaron una pancarta onde podía lleese “Por una escolarización n’asturianu. Escuela de Maxisteriu” y reclamaron la creación d’una Mención de llingua Asturiana, como midía indispensable pa la formación de los futuros mayestros y mayestres, y la presencia d’asignatures de llingua Asturiana nos estudios comunes d’Educación Primaria y Secundaria.

Sobre esti mesmu conflictu, la Xunta pola Defensa de la Llingua Asturiana convoca una manifestación el prósimu día 7 de marzu a les 17:00 na Estación del Norte d’Uviéu col lema “La llingua asturiana en Maxisteriu y nel sistema educativu ¡Como les demás!.

Énte’l reciente anunciu fechu pol Principáu d’Asturies de la creación de 750 nueves places nes escueles del primer ciclu d’Educación Infantil, Unidá Nacionalista Asturiana espresa’l so esmolecimientu porque “vuelva a nun tenese en cuenta la realidá plurillingüe d’Asturies nel usu de la llingua vehicular d’estes escueles y poro, vuelva a afondase nel error de nun tener en cuenta a los escolinos y escolines pa los que la llingua asturiana ye la so llingua materna”.

Asina, remiten a les recomendaciones espresaes pola UNESCO con motivu del Día Internacional del Idioma Maternu, nes que sorrayaben espresamente’l calter beneficiosu de la enseñanza plurillingüe, calter que “vien afitáu tamién por abondosos estudios psicopedagóxicos realizaos en families billingües o plurillingües”.

Pa la organización nacionalista ye una “absoluta irresponsabilidá que les primeres estayes educatives supongan, pa los más de los neños y neñes, un choque llingüísticu brutal ente lo que ye la llingua familiar y la llingua de la escuela”. Dende UNA recuerden que les escueles que acueyen a neños col marxen d’edá de los 0 a los 3 años tienen la obligación d’ufierta-y al alumnu un entornu d’adaptación progresiva a lo que será la vida escolar, sorrayando que “tremitiendo-y al alumnáu la idea de que los nomes de les coses anteriores a la escuela yá nun valen, en nengún casu va xenerase un clima de respetu y apreciu pol alumnu o alumna que tenga como llingua familiar l’asturianu o la fala del navia-eo”.

Al mesmu tiempu Unidá Nacionalista Asturiana (UNA) remite a les normatives vixentes nel restu de comunidaes con llingües propies diferentes al castellanu, onde “fai por fomentase l’usu del castellán y la llingua propia, pa que dambos idiomas seyan a sentise como vehículu válidu de comunicación y patrimoniu cultural a valorar”. Nesti sen recuerden que “mal que-y pese a l’Alministración educativa asturiana sigue habiendo neños y neñes n’Asturies pa los que los que’l conceptu “Cerdito” va dir indiscutiblemente asociáu al cuentu que-y cuenten na escuela porque nel so esquema mental nun entra otro que nun seya “Gochín””.

La formación pregúntase a la fin “por qué tienen que ser los falantes d’asturianu y fala los que salgan perdiendo siempre nesi procesu educativu d’alquisición de competencies y poro, de desarrollu educativu. Por qué una Alministración que tendría de representar los intereses de tola ciudadanía asturiana nun pue entender una educación billingüe que respuenda d’una vez por toes a la realidá d’Asturies y non a la de los sos propios esquemes mentales”.

El Vicerrectoráu d’Internacinalización y Cooperación al Desarrollu de la Universidá d’Uviéu presentó esti miércoles la Casa de les Llingües y el so logotipu. El centru que va aconceyar actividaes y servicios rellacionaos con distintos idiomes qu’hasta agora s’alcontraben repartíos per diferentes Vicerrectoraos de la Universidá sedrá la institución qu’entenderá de la llingua asturiana na Universidá a la hora d’entamar actividaes.

Amás del español pa estranxeros y de les llingües tradicionales europees impartiránse cursos de les llingües emerxentes, como’l chinu, el xaponés o l’árabe, incluyendo amás un serviciu de traducción pa toes elles.

La Casa de Les Llingües va dar rmspuesta a la enseñanza d’idiomes, non reglada, orientada a la comunidá universitaria y al conxuntu de la sociedá asturiana.

La páxina web Puertu Asturies, xestionada por personal docente de llingua asturiana, ta acabante abrir un foru “pa tolo rellacionao cola situación na que queda l’asignatura d’asturianu y, poro, los mayestros dempués de los últimos socesos”. El foru espera ser un llugar d’utilidá qu’informe a los maestros de les novedaes y movilizaciones, como la que’l próximu 7 de marzu va celebrase n’Uviéu a favor del enseñu del asturianu.

Foru de la páxina Puertu Asturies

La esti llunes a l’Alministración del Principáu de negase a negociar les plantíes docentes de los centros d’Asturies por atalantart que con 9.331 docentes queden cubiertes eses plantíes. La contratación de más de 2.000 interinos queda condicionada por mor d’ello pal Principáu a les necesidaes futures.

>Según informó CC.OO nuna nota prensa, nel Conceyu de la Mesa Xeneral de Negociación de la Función Pública, l’Alministración refugó los pidimientos de CC.OO sobre’l cobru de sexenios pa interinos, l’ampliación de les llicencies pagaes, o les diferentes reducciones de xornada “pese a contar col respaldu de tolos sindicatos”.

Los cursos de la Universidá Popular d’Avilés tien abiertu’l plazu p’apuntase hasta esti llunes 23 de febreru. Los interesaos puen facelo nel edificiu de la Pescaderia Vieya Municipal, asitiada na plaza de Santiago López, s/n. o llamando a los teléfonos 98.512.91.08 y 98.512.93.75., n’horariu de 9:00 a 13:00 y de 17:00 a 20:00 hores.

Ente los cursos ufiertaos ta incluyíu unu d’aniciu a la llingua asturiana.

Folletu informativu de los cursos de l’AUPA

Por cuenta la sentencia del Tribunal Supremu qu’obliga a convertir les plantiyes funcionales en plantiyes orgániques Dende’l Bloque por Asturies (BA) xúnense “a la petición de dignificar, d’una vez por toes, l’asignatura d’asturianu y gallego-asturianu n’educación infantil, primaria y secundaria como asina lo tan faciendo tanto’l colectivu d’interinos de llingua asturiana y gallego-asturianu como los sindicatos d’enseñanza mayoritarios n’Asturies y solicitamos que se cree inmeditamente la especialidá de llingua asturiana, que se dote de places nes plantiyes orgániques de tolos centros, la convocatoria d’oposiciones, y por último, el concursu de tresllaos. Esta midida ye importante y necesaria si nun queremos poner en peligru cientos de puestros de trabayu na enseñanza asturiana, que de nenguna manera se pue consentir y muncho menos nestos tiempos de crisis onde l’alministración pública tien la obligación de cumplir la llei”.

Por eso nel Bloque por Asturies entienden que “nesti tema nun valen atayos nin soluciones cosmétiques como cambiar de nome a la plantiya actual y poné-y otru hasta que’l Tribunal Supremu lu vuelva a declarar illegal, o dicir que’l problema ye que nun haiga oficialidá. Nun mos vamos conformar tampoco con supuestos informes xurídicos que s’usen como disculpa pa la creación de la especialidá y que namás esisten na cabeza del Señor Riopedre”.

Cualquier otra cosa que nun fuere esto paez-y al Bloque que lo único que trae ye la precariedá de l’asignatura y del profesoráu y por mor d’ello nun desixen otra cosa que’l “cumplimientu del pactu de gobiernu y igual que nun tamos dispuestos a consentir qu’haiga ciudadanos de primera o de segunda pol idioma qu’usen tampoco vamos consentir qu’haiga maestros de primera nin de segunda por trabayar na especialidá d’asturianu”.

El diputáu d’IX-BA-Verdes, Francisco Javier García Valledor, ufrió esti día una rueda de prensa na qu’acusó al PSOE de tar incumpliendo’l pautu de gobiernu cola intención de les conseyeríes d’Educación y d’Alministraciones Públiques de prescindir de los profesores d’asturianu na plantía orgánica del Principáu d’Asturies. Valledor dixo esperar qu’esi aspeutu de la plantiya se corrixa colos mecanismos pa solucionar diferencies nel senu del Gobiernu.

El pautu de Gobiernu ente la FSA-PSOE ya IX-BA-Verdes establez, nel epígrafe d’Educación, que va garantizase dafechu la enseñanza del asturianu en tolos niveles y graos, respetando la voluntariedá del so aprendizaxe, y que la escoyeta del asturianu como asignatura en dengún casu va ser motivu de discriminación de los alumnos. Amás l’epígrafe del pautu sobre educación falaba inclusu d’un estudiu xurídicu pa evaluar la posibiidá llegal de la creación de la especialidá de profesor de llingua asturiana, lo que queda enforma lloñe de lo que vien asocediendo nestos últimos meses.

Según Valledor, el Gobiernu asturianu tien que remitir la selmana que vien esa plantía orgánica a Madrid y na mesma paez que nun van tar los profesores d’asturianu, pese a que nuna primer comunicación a los centros educativos s’informara de l’inxerimientu de profesores d’asturianu en 38 casos.

Fai! acusa de “falta de voluntá política y cinismu”al equipu rectoral col asturianu Consideren “una hipocresía” l’alegar “problemes xurídicos” pa evitar facer avanzar la llingua asturiana na Universidá y solicita que se garantice la non discriminación de les y los falantes d’asturianu. Porque defender l’asturianu “ye más que facer bolígrafos, taces y camisetes billingües”.

La Comisión de Reforma de los Estatutos de la Universidá d’Uviéu, “controlada mayoritariamente por miembros afines a V.Gotor”, refugó, nel so últimu conceyu la propuesta qu’avalaren los claustrales de Fai! pa que l’asturianu fuere “llingua propia” na Universidá. La Comisión alegó “problemes xurídicos”. Asinamesmo, la mayoría afín al rector refugó otra propuesta transaccional, una adaptación a la Universidá del conteníu de la Llei d’Usu y Promoción, que pretendía dotar de drechos a la comunidá universitaria pa emplegar l’asturianu en forma escrita o na oral dientro d’esta institución.

A Fai! paéz-y qu’en realidá “esiste un problema de falta de voluntá política y compromisu del actual rector cola llingua asturiana”. Pa esta organizacióin, “defender l’asturianu ye muncho más que facer bolígrafos, taces y camisetes billingües”. Y ye que, “a pesar del compromisu anunciáu por Vicente Gotor col asturianu, la situación d’esta llingua dende la so llegada nun fizo más que caltenese na mesma situación desastrosa carecida demientres el mandatu de Vázquez”. La organización d’esquierda estudiantil considera que “lo que se pretende, en realidá ye caltener a la llingua asturiana nuna situación de subdesarrollu y d’infravaloración frente al castellán”.

En cualquier casu, l’equipu rectoral tien demostrao nun saber dar un pasu alantre p’hacia la normalización d’esta llingua. Fai! ve “un exerciciu claru d’hipocresía y cinismu electoral” al refugar, incluso, treslladar les mínimes lleis asturianes a la Universidá. Poro, “non sólo nun s’impulsa la llingua propia dende la Universidá sinón que se pretende reducir la so presencia social”. De fechu, “aléguense problemes xurídicos pa refugar la oficialidá, pero cuando estos problemes nun esisten –adaptaciones de la Llei d’Usu- lo que s’amuesa ye una falta de voluntá col asturianu ablucante y un intentu sistemáticu de topar xides”.

Pa finar, Fai! solicita al Rector que “cumpla les sos promeses electorales y s’implique col desendolcu de garantíes xurídiques que permitan a los asturiano-falantes la igualdá de derechos dientro de la Universidá d’Uviéu, evitando cualquier discriminación por motivos llingüísticos” dientro de la institución que dirixe.

Fai! cunta anguaño con representación nel Claustru de la Universidá d’Uviéu y una y otra vuelta vien solicitando a esti equipu rectoral que tope soluciones pa integrar académicamente la llingua asturiana en titulaciones como Maxisteriu o Filoloxía, asina como pa garantizar l’usu efectivu del idioma per parte de cualquier miembru de la comunidá universitaria.

Javier López Espinosa, presidente de l’Asociación “La Brisa de Japón”, remitió a los medios una nota de prensa na que protesta pola, pa la organización “mala xestión” de la Vicerrectora d’Estudiantes, Susana López Ares.

Espinosa comenta que “a la vista de les polémiques que tamos viendo tolos díes, vémonos obligaos moralmente a emitir esti comunicáu”. Y ye que según esplica l’autor del comunicáu, polos llabores d’organización de les xornaes d’asia na Universidá aconceyó nos últimos meses “col Rector, vicerrector y otros cargos de la institución”, pero, añade, “foi imposible aconceyar cola Vicerrectora Ares a pesar de la nuestra insistencia”.

“Mientres el Rectoráu va ceder l’Edificiu Hestóricu pa les actividaes, la Vicerrectora mostró la so total falta de consideración”, diz Espinosa. “Con esti comportamientu camuda l’accesibilidá y talante que siempres demostraron anteriores Vicerrectores d’Estudiantes”, amás de, añaden, “una falta de deslealtá tremenda p’hacia les promeses electorales que mos ficieron a munchos estudiantes que confiamos n’ellos.

Según diz Espinosa “L’apueste pola cultura xaponesa y el mantenimientu d’esti eventu quedó nun gran incumplimientu, ceder namás el llugar nun ye abondo, ye necesaria financiación”.

La Brisa de Japón diz entender “que tamos en crisis”, pero non “que la Universidá triplicare’l númberu d’altos cargos”.

Asombre a Espinosa, que “persones que mos vendieron el talante de pluralidá agora mos paguen a los estudiantes que confiamos n’ellos non solo col desagradecimientu de nun ayudanos en nada, incumpliendo asina les sos promeses electorales, sinón quitándonos lo que yá teníemos a base de munches hores de trabayu dedicaes a la nuesa universidá de forma altruista”.

Espinosa remata’l comunicáu comentando “sé qu’alzar la voz pue trayenos consecuencies negatives, porque toos sabemos qu’hai coses qu’anque seyan difíciles de demostrar, esisten”.