Educación

Güei llunes 23 de marzu a les 5 de la tarde entamó en Llanes un cursu d’asturianu oriental, tituláu “Variedaes Llingüísticas nel Oriente d’Asturias. La h.abla oriental”. El cursu ta organizáu pol Centru de Profesoráu y de Recursos del Oriente (CPR de Llanes) y pol Seminariu de Filoloxía Asturiana de la Universidá d’Uviéu. Les clases danse nel CPR de Llanes.

El cursu tien un total de 3 creitos (30 hores). Impártese los díes 23, 25 y 30 de marzu, y los díes 1 y 20 d’abril.

Les materies que s’imparten nel cursu son les que vienen darréu:

–“La h.abla oriental, una variedá del asturianu. Características fonéticas y morfolóxico-sintácticas. Llendes col asturianu central y la franxa Purón-Deva. Las h.ablas cántabras. Aspectos sociollingüísticos”, por María Cueto Fernández, llicenciada en Filoloxía Románica, investigadora de les llendes llingüístiques n’Asturies. –“La llingua oral. Cuentos y tradiciones”, por Ramón Sordo Sotres, investigador de la cultura oral nel Oriente d’Asturies. –“Toponimia”, por Fernando Álvarez-Balbuena, profesor de Filoloxía Románica (Universidá d’Uviéu), responsable de los equipos d’encuestadores de la Xunta Asesora de Toponimia. –“La lliteratura n’asturianu oriental. D’Enrique González Rubín a Concha Quintana. Comentariu de testos”, por Xuan Busto Cortina, profesor titular de Filoloxía Románica y especialista en lliteratura asturiana.

La Xunta de Personal Docente non Universitariu, integrada polos sindicatos Suatea, FETE-UXT, CC.OO, ANPE y CSI-CSIF, vieno acabante convocar esti xueves una fuelga pal día 1 d’abril en tola enseñanza pública.

Según s’informaba al traviés d’una nota prensa, la convocatoria produzse tres de la manifestación del martes pa espresar el malestar pola actuación de la Conseyería d’Educación y del Gobiernu asturianu y ante la falta de respuesta del conseyeru d’Educación.

Pa los convocantes hai un “absolutu despreciu” por parte’l Gobiernu asturianu hacia’l profesoráu: “La non convocatoria de mesa sectorial de negociación n’Educación supón qu’asuntos de la máxima importancia pal conxuntu de los docentes, tanto funcionarios de carrera como funcionarios interinos nun se negocien”.

Los sindicatos quéxense sobremanera de qu’a estes altures de cursu se desconoza cuál va ser la ufierta d’emplegu públicu asina como del fechu de que les plantiyes de los centros educativos s’aprobaren de manera unillateral. Per otru llau, les quexes cinquen tamién a la información sobree’l númberu d’unidaes que van funcionar pal prósimu cursu.

La Xunta fai anuncia na mesma nota de prensa de la convocatoria que tien previsto desixir al Conseyeru d’Educación nuna entrevista que tien de celebrase’l llunes “l’abertura darréu de negociaciones, la convocatoria de la mesa sectorial y la retirada del plan d’evaluación docente, asina como la racionalidá y planificación qu’eviten perxuicios irreparables al nuesu alumnáu”.

UVIÉU, 19 de Marzu (EUROPA PRESS) La Xunta de Maxisteriu va votar la mención d’asturianu separtada del restu de propuestes en sesión monográfica esta selmana que vien nuna sesión monográfica. La proposición d’asturianu va votase al marxe de les otres cuatro menciones, que van dir incluyíes n’otra propuesta sobre la que se va decidir n’otra sesión estremada

Al paecer, ya que nun hai confirmación oficial al respective, la propuesta de la direición de Maxisteriu tien cuatro menciones o especialidaes que sedríen la de Llingua Estranxera, Educación Musical y Artística, Educación Física y Educación Especial. Pela so parte, la Comisión Docente, que tien de dar el preste a les propuestes pa llevales depués a la Xunta de la Escuela, va presentar otra de Llingua Asturiana, según informó, Ramón d’Andrés, profesor de la Facultá de Filoloxía qu’imparte asturianu en Maxisteriu.

Poro, otres fontes consultaes apuntaben ayeri que nun va haber una única votación pal paquete completu de cinco menciones, sinón que va celebrase una sesión monográfica, previsiblemente esti llunes, na que los profesores de Maxisteriu decidiríen si pauten o non la mención d’asturianu.

El Rectoráu ya tuvo qu’intervenir hai poco pa garantizar que nun taba en peligru la mención d’asturianu, pero l’enguedeyu nel que vuelve tar el tema fai imprescindible una decisión rápida qu’esclarie darréu les duldes y que desautorice dafechu a la direición del centru o la sofite en llugar de permitir la escandalera que se ta formando con esta cuestión na comunidá universitaria.

Más d’un millar de persones, según fontes policiales, y cerca de tres según la organización, manifestáronse esti martes n’Uviéu contra’l Plan d’Evaluación Docente pa los profesores de Primaria y Secundaria acabante d’entamar pola Conseyería d’Educación y Ciencia del Principáu d’Asturies.

La presidenta de la Xunta de Personal Docente d’Educación non Universitaria y responsable de Suatea, Beatriz Quirós, foi la encarga de facer de vocera afitando la importancia d’esta respuesta tan positiva de los docentes al llamáu reivindicativu qu’amuesa la indignación qu’hai en tolos centros educativos.

Representantes de los sindicatos d’enseñanza Suatea, FETE-UXT, ANPE, CSI-CSIF, y CC.OO encabezaron la marcha dende la estación de Renfe de la capital asturiana hasta la sede de la Conseyería d’Eudación y Ciencia na plaza d’España.

Dellos miles d’estudiantes manifestáronse de manera pacífica en munches de les principales ciudaes españoles pa protestar contra lo que consideren una imposición del Espaciu Européu d’Educación Superior (EEES) baxo proclames como ‘Nin LOU, nin Bolonia, nin precariedá’ o ‘Por una Universidá non mercantilizada’. El xueves n’Uviéu, una convocatoria conxunta de l’Asamblea d’Estudiantes y los sindicatos mayoritarios n’Asturies (Comisiones Obreras, Suatea y la Corriente Sindical d’Izquierdes) nun fueron a xuntar mediu millar de manifestantes na primer convocatoria que se facía n’España como preámbulu a les de güei.

Les protestes más numberoses, convocaes pola Coordinadora d’Asamblees d’Estudiantes, tuvieron llugar en Barcelona y Madrid, llugar onde se rexistró la detención d’un menor.

Esti sábadu, 7 de marzu, a les 15 hores, dos hores de la manifestación convocada pola Xunta pola Defensa de la Llingua, va tener llugar na Biblioteca d’El Fontán n’Uviéu, la xunta fundacional del Colectivu de Docentes de Llingua Asturiana.

La xunta tará abierta a tolos docentes d’asturianu o gallego-asturianu que quieran participar d’esti proyectu coletivu qu’entamará cola llectura y aprobación de los estatutos y l’acta fundacional del colectivu.

El Rector de la Universidá d’Uviéu, Vicente Gotor, comentó ayeri a los medios de comunicación la so opinión sobre les movilizaciones plantegaes a favor del asturianu na Facultá de Maxisteriu, unes reinvindicaciones que dende’l so puntu de vista “tán debíes a la falta d’información”.

Y ye que según argumentó’l Rector, “La directora (de Maxisteriu) sabe que tien una recomendación tanto per parte del Principáu como del equipu de gobiernu, de tener una mención de 30 créitos d’asturianu”. Amás añadió que “nel master de secundaria tamién va haber asturianu pa que los profesores que tean nél seyan los que dean les clases nes escueles”.

Quixo tamién Gotor recordar que na facultá de Filoloxía “hai estudios reglaos per primer vegada”, mientres que faciendo alcordanza del periodu del Rector Vázquez comentó “en diez años nun se ficiere nada pola llingua asturiana”.

Los sindicatos d’enseñanza Suatea, Comisiones Obreres, UXT y USO ficieron güei un llamáu a la sociedá pa movilizase’l próximu sábadu pola creación de la especialidá docente de llingua asturiana y l’aprobación d’una mención d’esta materia nos nuevos planes d’estudiu de Maxisteriu.

Les cuatro centrales sindicales dieron esti xueves una rueda de prensa, al llau de la Xunta pola Defensa de la Llingua, p’apoyar la manifestación que pal próximu sábadu tien convocada la Xunta n’Uviéu, a les 17.00 hores na estación de Renfe d’Uviéu.

La Rede de Servicios de Normalización Llingüística nos Conceyos busca monitores p’actividaes socio-educatives, deportives y d’ociu al traviés de la llingua asturiana. P’apuntase a la bolsa d’empléu ye condición poder comunicase n’asturianu y que a la vez tean capacitaos/es pa dirixir talleres de manualidaes, teatru, dibuxu, informática, deportes, música, o tamién pa dar charres informatives (educación pa la salú, nueves tecnoloxíes, ecoloxía, arte, historia, etc) tanto pa neños y mozos como p’adultos.

L’oxetivu ye facer una base de datos como bolsa d’empléu “e la que char mano”<, según comenten los sos responsables. Los candidatos habrán demostrar la so competencia llingüística acreditando formación n'asturianu y/o superando una entrevista personal.

Los interesaos puen ponese en contautu mandando un currículum al corréu redenormalizacion@gmail.com onde indiquen datos personales, actividaes que puen dar, formación en llingua asturiana y si tienen la condición de trabayadores autónomos.

Les Conseyeríes d’Educación y Ciencia, y de Cultura y Turismu organizaron pa esti cursu actividaes culturales en centros educativos de Primaria y Secundaria p’apoyar la promoción de la llingua asturiana y del gallego-asturianu, nes que se cuntaba participaren 8.600 alumnos.

La ufierta d’actividaes pa Primaria contempla 11 conciertos de Xentiquina, nos que los escolinos participen dempués de trabayar los testos y la música de los cantares, y diez actuaciones del grupu teatral ‘Asturmitomanía’, que recupera dellos raigaños mitolóxicos asturianos.

En total van ser 28 centros educativos de Primaria y 4.000 escolinos los que participen nos conciertos de Xentiquina, mentantu que les funciones teatrales van empobinaes a 2.000 estudiantes de trece centros.