Educación

Casi un cientu docentes asturianos tuvo celebrar a les puertes del Institutu Xovellanos de Xixón un aconceyamientu al torgar el gobiernu asturianu la celebración del mesmu nel centru educativu, por pesllalu pa facer imposible l’aconceyamientu sigún denuncien los sindicatos.

Nesti aconceyamientu, convocáu polos representantes llegales del profesoráu rechazose l’actuación del conseyeru Riopedre por atalantar que vulnera l’artículu 21 de la Constitución onde se garantiza’l derechu de reunión.

Amás considerose que ta vulnerándose pergravemente la llei de llibertá sindical.

El Conseyu de Gobiernu de la Universidá d’Uviéu, presidíu pol Rector Vicente Gotor, aprobó ayeri por 36 votos a favor, nengún en contra y cinco abstenciones, el “Reglamentu sobre presentación y receición d’escritos en bable/asturianu nel Rexistru de la Universidá d’Uviéu”, un testu qu’avanza na reconocencia de los drechos de los asturfalantes na Universidá d’Uviéu.

El documentu, qu’ufre Asturnews na so versión completa, permite l’usu del asturianu pa presentar documentos nel Rexistru de la Universidá, na práctica totalidá de los casos, siendo necesaria una torna al castellán pa los procedimientos de más urxencia, yá que los testos n’asturianu han pasar, mientres l’asturianu nun seya oficial, pela Unidá de Traducción recientemente creada pola Conseyería de Cultura.

Los testos unviaos n’asturianu, y pa garantizar la igualdá d’usu colos presentaos en castellán, van pasase a traducción, cuntando los plazos dende’l momentu nel que’l testu torna a la Universidá yá traducíu al asturianu.

El Rector comentó, tres el conceyu onde s’aprobó esti Reglamentu, qu’esta decisión “ye un apoyu a la cultura asturiana, lo máximo a lo que podemos llegar ensin oficialidá”. Con esta decisión, albidra’l Rector “ficimos más qu’en tolos últimos años”. La decisión, espera, “va evitar tensiones cola xente a la qu’hasta agora se-y refugaben testos por tar escritos n’asturianu”.

El Reglamentu va entrar en vigor, dempués de firmar el conveniu pa la torna de los documentos cola Conseyería de Cultura, en celebrándose les elecciones europees del 7 de xunu.

REGLAMENTU SOBRE PRESENTACIÓN Y RECEICIÓN D’ESCRITOS EN BABLE/ASTURIANU NEL REXISTRU DE LA UNIVERSIDÁ D’UVIÉU.

La llingua asturiana participa n’Estonia na mayor conferencia sobre llingües minoritaries del mundu, la ICML, qu’entamó’l xueves y va desendolcase hasta’l sábadu 30. El representante asturainu foi Alejandro Fernández-Cernuda Díaz que presentó na primer sesión, el xueves 28 de mayu, una comunicación entitulada “Neology as an Ally for Language Planning: a Case-study on Asturian”.

Web de la Conferencia

L’ALLA abre güei les sos puertes a los interesaos n’asistir a los Cursos de Branu, qu’organiza cada añu la institución, en dellos casos, en collaboración cola Universidá d’Uviéu. Los principales cursos convocaos esti añu son: Cursu Elemental de Llingua Asturiana, Cursu Avanzáu de Llingua Asturiana y Capacitación pa la Traducción al Asturianu.

Amás, van impartise nesta ocasión, los cursos: La presencia de la Llingua Asturiana n’Internet. Nueves posibilidaes, Otros xuegos y tradiciones populares na enseñanza, Ecoloxía y Mediu Ambiente n’Asturies, Ferramientas prá normalización llingüística del gallego-asturiano y Cursu d’especialización en Filoloxía Asturiana (I), amás de la primer fase del Cursu de Gallego-Asturianu.

Los cursos van ser en Santantolín, capital del Conceyu d’Ibias, en réxime d’internáu y del 3 al 14 d’agostu. El Llar de l’Academia, onde güei s’entama’l procesu de matriculación, ta asitiada na cai Marqués de Santa Cruz, 6 – 2u, d’Uviéu. El plazu va tar abiertu hasta’l 5 de xunu.

Pa más información ha llamase al teléfonu 985211837 o escribir al corréu alla@asturnet.es

L’Auditoriu das Quintas d’A Caridá, va celebrar güei, vienres 22 de mayu, el sétimu “Día das Lletras en Gallego-Asturiano” con un actu nel que van participar los rapazos de los institutos d’Entrambasauguas.

L’actu va cuntar con una llectura de poemes en gallego-asturianu per parte de los neños de les escueles y con un conciertu del grupu folk “Mezá”, de Bual.

L’actu, que lleva trés años celebrándose ensin ayuda del Gobiernu d’Asturies, organícenlu los profesores d’eonaviegu de les escueles ya institutos de la fastera.

Énte les anuncies na prensa asturiana de güei del Secretariu Xeneral de la Universidá d’Uviéu no que cinca al usu alministrativu y académicu de la llingua asturiana Fai!, organización presente nel Claustru de la Universidá asturiana quier declarar lo que vien darréu:

1- Que nesta universidá, que se diz asturiana, y que tien unos estatutos universitarios que nel so artículu 6 garanticen claramente que naide nun puede ser discrimináu/ada pol emplegu de la llingua asturiana, vien prohibiéndose y censurándose reiteradamente l’usu normal del idioma del país, lo mesmo nel campu académicu -tesis, trabayos…- que nel alministrativu.

2- Que col nuevu escenariu que se plantega dende la Secretaría Xeneral de la Universidá d’Uviéu sigue calteniéndose esplícitamente la marxinación a la llingua asturiana, cola prohibición d’usu del idioma nel ambetu alministrativu, onde nun se va a tener derechu a ser contestáu na llingua propia, nin nel académicu, onde nun se va a normalizar la situación de les tesis y trabayos n’asturianu, por exemplu, a pesar de les promeses del Rector que fai “Cases de les Llingües” onde caben toes menos la de nueso.

3- Instamos al Rector, apelando al so compromisu públicu col usu normal de la llingua asturiana na universidá que dirixe, a que dexe de poner parches que bien poco igüen y aborde, ensin esclusiones, un plan de normalización del usu del idioma propiu d’Asturies en tolos ámbitos académicos y alministrativos, formando de mou afayadizu al personal alministrativu, regularizando de manera exemplarizante l’usu académicu en trabayos, tesis y tribunales, na so imaxe corporativa y retulación interna y esterna, plantegando nuevos escenarios onde l’asturianu seya llingua vehicular en tou tipu de carreres y desterrando de la nuestra institución cualquier pantasma represiva pa colos derechos llingüísticos de les y los asturianes y asturianos.

4- Fai! cree qu’una institución tan importante p’Asturies como lo ye la Universidá d’Uviéu tien que se poner al frente de la defensa de la llingua d’esti país. Si nun ye asina…quiciabis podría autodenomase universidá, pero enxamás podría dicise asturiana.

El PP vieno acabante de presentar esti martes pela mañana una proposición non de llei na Xunta pa que se reconoza oficialmente la especialidá docente de Llingua Asturiana.

El Grupu Parlamentariu Popular presentó na Xunta Xeneral esti día una proposición non de llei p’afalar al Gobiernu autonómicu a crear la especialidá de bable/asturianu pal profesoráu de Llingua Asturiana y Gallego-Asturianu d’Infantil, Primaria y Secundaria, col enfotu de que los profesores d’esta materia cunten con “idéntiques garantíes llaborales y profesionales que’l restu”.

Los diputaos del PP encargaos de presentar la proposición foron Joaquín Aréstegui y Emilio Pérez Cueva qu’ufrieron una rueda prensa pa facese ecu d’esta midida, desixida dende hai tiempu pola Plataforma de Profesores de Llingua Asturiana y polos sindicatos mayoritarios na enseñanza.

Los dos parlamentarios criticaron que los profesores d’asturianu tean condergaos a ser interinos, sin psibilidaes d’algamar plaza nuna oposición nin participar en concursos de tresllaos.

Pérez Cueva foi entá más lloñe al pidir amás de la reconocencia de la especialidá la “correspondiente convocatoria d’oposiciones y el concursu de tresllaos”.

Los sindicatos asturanos ANPE, CSIF, FE-CC.OO, SAE, Satse, Sicepa, Simpa, STAJ, Suatea, Usipa y CSI acaben convocar pal lluns día 25 una movilización pa desixir al Gobiernu asturianu la constitución d’una mesa sectorial nos ámbitos de la so competencia como son la sanidá, la xusticia, l’alministración pública y educación.

La manifestación convócase baxo la conseña ‘Sanidá, xusticia, alministración pública y educación: pola mesa sectorial’, y va percorrer les cais d’Uviéu.

Esti vienres finen en Xixón les XIV Xornaes de la Llingua y la Cultura Asturiana, nes que participen diez colexos que dende hai catorce años organicen cola Fundación Municipal de Cultura y la Universidá Popular de Xixón esta selmana d’actividades culturales nes que participaron más de 2.000 escolinos.

Pela mañana desendolcáronse les últimes sesiones del taller de cómic n’asturianu, pa escolinos del quintu cursu, y del del cocina tradicional, pa cuartu, dambes nel Atenéu de La Calzada, llugar onde tamién va tener llugar el conciertu del grupu Tuenda. Los colexos responsables d’esta veterana actividá son los colexos Miguel de Cervantes, Atalía, Eduardo Martínez Torner, Federico García Lorca, El Lloréu, Montiana, Príncipe de Asturias, Santa Olaya, Tremañes y Xove, toos ellos de Xixón.

Dende esti llunes, vienen desendolcándose nel Atenéu la Calzada y en dellos colexos de Xixón les XIV Xornaes de Llingua y Cultura Asturiana que van aportar a la fin el viernes 15, a les siete y media de la tarde nel Centru Municipal del Atenéu de La Calzada. Esti miércoles celebráronse Talleres de cocina tradicional asturiana nos que los rapacinos de cuartu cursu cocinaron recetes de bollos preñaos, mantecaes y frixuelos que van siguir cocinando’l xueves y el vienres a les 9 y a les 11 la mañana.

Esti día tamién se desendolcaron talleres de cerámica palos rapacinos de cuartu cursu nos colexos Federico García Lorca y Montiana y mañana xueves y el vienres celebraránse talleres de cómic nel Atenéu a les 9,15, les 11 y les 12,30.

El pieslle de les Xornaes va ufrilu’l grupu Tuenda con un conciertu pa tolos públicos que va tener lluagr nel Atenéu de La Calzada a les 19,30 hores.