Educación

La Universidá va entamar a almitir escritos en llingua enantes de qu’acabe esti mes de xunu, según fizo anuncia’l rector Vicente Gotor na rueda de prensa na que se presentó la robla del conveniu pal traductor automáticu.

A últimos del presente mes van poer presentase escritos n’asturianu na Universidá d’Uviéu, según recueye’l conveniu la collaboración de Gobiernu autonómicu y la Universidá fadrase de manera que, cuando na institución académica se presente un escritu n’asturianu, ésti se tresllade a la nueva Unidá de Traducción de la Cosneyería de Cultura pa realizar la torna al castellán pa la so posterior tramitación.

El Rector dixo qu’asina van evitase problemes que se dieron nos rexistros de la Universidá, cuando se presentaron documentos n’asturianu. Sicasí, namái van almitise “determinaos escritos”, descartando aquellos qu’exixan axilidá na tramitación.

L’ALLA va presentar güei miércoles, 17 de xunu a les 12:00 hores, nel Hotel Principado d’Uviéu, los conteníos de los xxvii Cursos de Branu, que van celebrase n’Ibias ente los díes 3 y 14 d’agostu, cola participación de más de 100 persones. Nel actu van intervenir la Presidenta de l’Academia, Ana María Cano González, y el Direutor de los Cursos, Xosé Antón González Riaño.

Nesta edición van ufiertase trés cursos dientro de la Estensión Universitaria de la Universidá d’Uviéu: Cursu Elemental de Llingua Asturiana, Cursu Avanzáu de Llingua Asturiana y Capacitación pa la Traducción al Asturianu, dientro del programa d’Afondamientu Cultural y Llingüísticu, nel que tamién s’incluyen La presencia de la Llingua Asturiana n’Internet. Nueves posibilidaes, Otros xuegos y tradiciones populares na enseñanza, Ecoloxía y Mediu Ambiente n’Asturies, Ferramentas prá normalización llingüística del gallego-asturiano y un Cursu d’especialización en Filoloxía Asturiana, empobináu a Filólogos y maestros.

Ibias va acoyer tamién la 1ª Fase de Capacitación en Gallego-Asturianu.

Unidá Nacionalista Asturiana y dellos sindicatos presentaren una demanda escontra la conocida como Carrera Profesional del funcionariáu asturianu. El Tribunal Cimeru ta acabante da-yos la razón y UNA albidra qu’esti fallu “favorez la tresparencia y elimina l’intentu d’instaurar el servilismu y el chantaxe retributivu.

Pa favorecer l’aprobación d’esta carrera profesional, el Gobiernu ufría 2.500 euros añales con calter retroactivu al 1 de xineru de 2007 a quien firmare’l compromisu voluntariu d’adhesión, un testu que munchos firmaron, pero que pa UNA “nun significa que tean d’alcuerdu, sinón que nun-yos quedó otra pa dignificar el so sueldu”.

UNA quixo recordar tamién “l’actitú vergoñante ya indigna del sindicatu CCOO, que xunto al Principáu, “apoyó dafechu esta propuesta alloriante”.

El llunes entamó la campaña de matriculación na asignatura de llingua asturiana nos centros educativos asturianos, que va durar hasta’l 26 de xunu, y en secundaria del 1 al 15 de xunetu. Aprovechando estes feches el sindicatu d’enseñu SUATEA, recuerda a la inspeición educativa y a la dirección de los centros “que l’asignatura de Llingua Asturiana y Gallego-Asturianu ye d’obligada ufierta”.

SUATEA quier dexar claro, amás, que “lo mesmo que los inspectores de los centros tienen que procurar velar pol cumplimientu de toles lleis educatives, deberíen facer lo mesmo col accesu al estudiu y conocimientu de la nuesa llingua, que ye un derechu reconocíu espresamente pola llexislación y qu’ha de ser respetáu y garantizáu”.

Asina mesmo, comenten “pa evitar malos entendíos y que nun se cumplan les intrucciones d’aniciu de cursu”, esperen que nengún equipu direutivu, nin nengún maestru “escaeza que los/es escolinos/es puen escoyer Llingua Asturiana y Gallego-Asturiano al empecipiar cualesquier cursu educativu independientemente de la escoyeta del cursu anterior”.

Pa SUATEA alvierten “teniendo en cuenta qu’esta ufierta ye obligatoria … taremos vixilantes de que se cumpla la llexislación vixente”. Con esti comunicáu, esperen “qu’al entamu del cursu viniente nun nos atopemos colos mesmos problemes de tolos años, por mor de nun ufiertar esta asignatura y nun respetar la Llei d’Usu”.

La Plataforma de docentes de llingua asturiana amosó nun comunicáu unviáu ayeri, el so malestar “énte la situación provocada na Xunta Xeneral d’Asturies polos partíos políticos”.

Según el coleutivu nun conceyu que tuvieron esta selmana col PP aplaudieron “la so proposición na que s’instaba al gobiernu asturianu a la creación de la especialidá de llingua asturiana con celeridá de manera que’l cursu viniente los profesores de secundaria yá pudieren optar a les places esistentes nesta etapa”.

La Plataforma manifestó la so “allegría al comprobar que se volvíen sensibles a un tema que, independientemente de posiciones polítiques, tien qu’axuntar a la sociedá asturiana”.

Sicasí, los docentes de llingua asturiana, “sorpréndieronse” de ver que’l PP “Dos díes depués PACTA col PSOE les enmiendes, y recula na so posición incial. ¿Por qué? Ellos sabrán”.

“Hai un problema llaboral y hai un problema de dignificación. Llevamos más de venti años trabayando interinamente, nun somos como los demás, nun tenemos les mesmes posibilidaes d’accesu a los nuestros puestos de trabayu y, cola proposición del grupu parllamentariu del PP víemos la posibilidá d’un cambiu hacia la normalidá”.

Según la organización “Engañáronnos como engañaron al restu de colectivos que sí son sensibles a esti problema. Amagostaron col PSOE una proposición que nun garantiza la estabilidá de los puestos de trabayu, nin la de trabayar en condiciones dignes como’l restu de compañeros docentes”.

Per otru llau, comenten nel comunicáu “el PSOE asturianu sigue bloquiando y dinamitando cualquier avance que dignifique’l nuestru llabor. Nun tuvieron nin la cortesía nin la educación d’atender la pitición d’una reunión col nuestru colectivu. Ye indigna la posición d’un partíu políticu que s’autodefine como d’izquierdes. Son conscientes de la situación allegal y de la indefensión del nuestru colectivu y nun fain nada”.

Pa los maestros d’asturianu “tamos falando d’indefensión llaboral, d’allegalidá llaboral. Somos trabayadores a los que se nos impide trabayar en condiciones dignes. Nun sabemos qué va pasar nin con nosotros nin cola asignatura. Esti añu desapaecen les plantiyes funcionales, onde tábemos col restu del colectivu d’interinos. ¿Ónde van metenos esti cursu qu’entra, inventarán los nuestros responsables políticos, los nuestros xefes, un nuevu caxón desastre pa los del “bable”, pa que callemos la boquina?

La Plataforma va siguir firme nes reivindicaciones, “porque son xustes”. Nun pidimos, dicen, “otra cosa que ser igual que’l restu de profesores, colos mesmos derechos, coles mesmes obligaciones. Iguales. El Conseyu Escolar del Estáu yá se posicionó sobre esto. Un accesu a la función pública como’l restu, con unes oposiciones”.

Esti colectivu denuncia tamién que “la Universidá asturiana va formar a futuros profesionales que van, si tienen suerte, a ser parte d’una llista d’interinos. ¿Hai dalguna situación similar en dalgún llugar del universu? Pa desquiciar”.

La estaya d’educación d’Unidá Nacionalista Asturiana considera que l’actitú de los grupos políticos con representación nel parlamentu asturianu tocante a la creación de la especialidá d’asturianu ye “un engañu impresentable” en tanto que representa “una maniobra política que nun fai más que poner torgues a la concesión d’unos derechos llaborales incuestionables siguiendo la política que meyor se-y da a la Federación Socialista Asturiana, la de impedir sistemáticamente cualesquier avance nos derechos llingüísticos n’Asturies”.

La formación recordó que la proposición pactada polos grupos PSOE y PP “ye más de lo mesmo y nun busca otro que ganar tiempu cola aprobación d’unes midíes que non solo yá taben presentes nel pactu de Gobiernu sinón qu’amás yá fueron tomaes hai unos años pol propiu executivu”.

Asina, UNA defín como “alloriante” qu’un de los puntos del alcuerdu tomáu ente les dos fuerces polítiques seya l’encargu d’un informe sobre la posibilidá de creación de la especialidá “cuando saben de sobra qu’esi informe yá esiste, porque ellos mesmos lu encargaron, y que diz claramente que nun hai pega pa la creación de la especialidá”.

Asina mesmo llamenten la cobardía del grupu parlamentariu d’IU-BA que, formando parte del pactu de Gobiernu “nun ye quien a presionar a los sos socios pa que garanticen una de les cuestiones fundamentales pa la sobrevivencia de la llingua d’Asturies, la so presencia digna dientro del sistema educativu y tán presos d’un pautu de gobiernu inoperativu, indignu y denigrante”.

Pa UNA, los tres grupos repártense un papel na mesma comedia y comparten la mesma responsabilidá: la FSA fai de guardián pa nun se mueva nada, el PP brinda al sol y depués escuende la copa; mientres que IU-BA, nun exerciciu d’hipocresia ya avezáu, fai como’l perru que lladra cuando pasa’l peligru.

El Conseyeru d’Educación y Ciencia asiste a la inauguración de la I Sestaferia del Profesoráu de Llingua Asturiana, unes xornaes qu’organiza’l Centru de Profesores y Recursos d’Avilés al rodiu del desenrrollu curricular y didácticu de l’asignatura, y que va tener llugar güei y mañana.

Ente les actividaes programaes pa estes xornaes rescamplen les dedicaes a los materiales curriculares pa les diferentes estayes como: “Currículu Primaria”, a cargu de Severino Antuña y Maite González; “Niveles de concrección del Currículu de Secundaria” por Genaro A. Mejido; y “Currículu d’adultos” a cargu de Luis Manuel Menéndez Sánchez.

No que cinca a los materiales didácticos, trataránse diferentes temes como l’usu de les nueves tecnoloxíes nel aula, el trabayu del comic nes clases de llingua asturiana o’l tratamientu y usos del cine y la televisión.

El Conseyeru d’Educación y Ciencia, José Luis Iglesias Riopedre, inauguró güei la I Sestaferia del Profesoráu de Llingua Asturiana: ‘Xornaes de desarrollu curricular y didáctitu’, y destacó nesa inauguración lo qu’atalanta ye una importante presencia del asturianu nes aules del Principáu, onde lu estudien 17.000 escolinos de Primaria y 4.450 de Secundaria.

Esti sábadu 30 de mayu terminó con una escursión doble y una recepción de despidida la XII edición de la conferencia internacional sobre llingües minoritaries (ICML), qu’axuntó per tres díes na ciudá universitaria de Tartu, n’Estonia, a especialistes de tol mundu n’árees como’l billingüismu, la planificación llingüística, los drechos llingüísticos o la pedagoxía.

Como yá pasare na edición anterior, en Pécs (Hungría), esti añu les llingües minoritaries de Centroeuropa y Europa l’Este fueron les protagonistes, con atención especial a la familia finougria y a la rexón del Bálticu. Tamién tuvieron espaciu —por primer vez non sólo simbólicu— les llingües de signos, con delles ponencies y cartelos nos qu’había un interesante enclín p’hacia’l billingüismu y los fenómenos d’interferencia y code switching (miesta de códigos).

Fue precisamente la xestión del contactu de códigos, tanto dientro como fuera les llingües minorizaes, una de les víes de futuru nes que coincidieren munchos de los asistentes a la conferencia. Y ello ye que, si hubiere qu’identificar una tendencia dafechamente renovadora na ICML XIII, ésta sedría la del multillingüísmu. Nesi sen, l’australianu Uldis Ozolins, ún de los ponentes estrella, dixo que, una vez trabayaes y afitaes na planificación les polítiques de sobrevivencia, de proclamación d’identidá y de llucha pol estatus y los drechos llingüísticos, agora-y tocaba’l turnu a l’espoxigue de les redes multillingües, con una interacción mayor de les axencies nos planos llocal, estatal y global.

Otres aportaciones de la ICML llamaes a crear tendencia xiraron al rodiu de temes como la demanda d’una supervisión más efectiva n’aplicación práctica de la Carta Europea de les Llingües Minoritaries o Rexonales, del potencial de la técnica los “paisaxes llingüísticos” (linguistic landscapes), de les ventayes del usu d’encuestes y metodoloxíes comunes pa la comparanza ente estudios sociollingüísticos de realidaes alloñaes y del puxu lo tecnolóxico nos averamientos más recientes nel enseñu de llingües minoritaries.

La presencia tecnolóxica, sicasí, esti añu fue más bien ruina, sacando les notables esceiciones de la plataforma eduFrysk, creada pola Academia Frisona, y de varies esplotaciones de la Rede 2.0 diseñaes por separtao por planificadores galeses, vascos y samis (lapones). Les nueves tecnoloxíes siguen siendo, nel añu 2009, l’asignatura pendiente de les llingües minoritaries.

Pa zarrar, queda namás señalar que l’actuación ibérica nes conferencies restrinxóse a les llingües catalana, vasca y asturiana. Nel casu catalán, l’enclín fue sociollingüísticu, con dellos estudios comparaos, mientres que los representantes vascos trabayaron más nel usu los soportes (televisión y Internet) pa les xeres d’espardimientu. En cuantes al asturianu, la única ponencia presentada foi d’Alejandro Fernández-Cernuda y faló del valir del análisis de la neoloxía como sofitu pa les midides de planificación.

La edición siguiente de la ICML, dientro dos años, sedrá en dalgún llugar d’Europa occidental tovía por confirmar.

Web del Congresu

L’Aconceyamientu de Xuristes pol Asturianu, fizo públicu un comunicáu nel que daben la so opinión sobre’l proyeutu d’un “Reglamenteu sobre presentación y receición d’escritos en bable/asturianu nel Rexistru de la Universidá d’Uviéu”, aprobáu en Conseyu de Gobiernu de la Universidá la selmana pasada.

Xuristes llamenten que “de la cimera institución académica del país surda un testu xurídicu tan probetayu”, que, alvierten, “enantes de que pase a les páxines del BOPA, que tol conteníu del párrafu 3 y la parte cabera del 2, entrambos del artículo 2 del talu Reglamentu, enxunto coles referencies a los mesmos notres partes del documentu, son nulos de planu por pretender aminorgar, nun testu reglamentariu, el conteníu d’un drechu –el d’empobinase al Principáu d’Asturies, de pallabra o per escritu, con validez a tolos efeutos, y ensin esceición dala per razón de la materia- proclamáu nuna llei, la 1/1998, d’usu y promoción del bable/asturianu (artículu 4), en claru incumplimientu del principiu de xerarquía normativa recoyíu nel artículu 9.3 de la Constitución”.