Educación

Cola conmemoración de la trenta y una edición del Día les Lletres, el sindicatu SUATEA vieno acabante asoleyar un llargu comunicáu nel que fai un balance y análisis de la situación del asturianu y entama celebrando qu’esti cursu se tean impartiendo los másteres en Llingua Asturiana que capaciten pa la so enseñanza en Secundaria d’esti idioma nes mesmes condiciones que los demás ( que non por ser másteres que cuesten a les y los estudiantes una bona montonera perres).

SUATEA tamién festexa que pal próximu cursu universitariu (2010-2011) s’anicien los planes d’estudiu del Minor en Filoloxía Asturiana na facultá de Filoloxía; y la Mención en Llingua Asturiana dientro’l plan d’estudios de la facultá de Ciencies de la Educación y el grau de Maestru n’Educación Primaria respectivamente.

El sindicatu diz celebralo “por tres motivos esenciales: 1. L’alumnáu universitario tien la opción de formase fonderamente a nivel universitariu en LLingua Asturiana. 2. Los estudios de LLingua Asturiana algamen l’estatus d’estudios universitarios reglaos a cuasi’l mesmu nivel que los d’otres llingües na facultá de Filoloxía y el mesmu de les otres menciones, nel casu de los graos de Mestru n’Educación Primaria. Ello supón un gran pasu alantre nel prestixu de la nuestra llingua y un encontu sólidu nel que construir los siguientes. 3. El futuru profesoráu d’Asturianu tien una aceptable formación básica universitaria cola que se pue garantizar una bona calidá na educación del alumnáu en cuasi toles etapes educatives. Sicasí, hai que denunciar qu’esta situación nun tien la so correspondencia nel terrén de la homologación y reconocimientu d’esos estudios. Tol esfuerzu de formación del profesoráu nesa especialidá solo mos habilita p’aspirar a ser, como muncho, profesoráu interín en Llingua Asturiana, pues: nun esiste’l reconocimientu la Especialidá en Llingua Asturiana o Gallego-Asturiano; nun se crearon los puestos d’estes especialidaes nes plantiyes orgániques, nun s’ufierten n’emplegu públicu (concursu-oposición) los puestos reales esistentes (anguaño 186 en primaria y 76 en secundaria ocupaos mayoritariamente por profesoráu interín al que nun se-y reconoz el derechu al accesu a un puestu fixu como funcionariu de carrera nuna especialidá na que munchos tienen bien d’años que deberíen ser valoraos pa ello ) y nun se cubre nengún d’esos puestos por concursu de tresllaos. ¿Y de quién ye la culpa d’esta intolerable situación? Evidentemente del Gobiernu PSOE-IU-BPA-LVy el PP que s’apautaron hai agora cuasi un añu na Xunta Xeneral, nuna comedia que SUATEA califico de bufa, votando toos xuntos a favor d’una moción non de llei presentada pol PP, que proponía la creación de la especialidá de Llingua Asturiana, y que tres ser emendada pol PSOE, quedó en dalgo asina como estudiar de si nun llueve y nun tira airón la posibilidá de si ye factible que se puea crear la especialidá. Esta comedia representóse énte un públicu qu’ellos suponen inorante y contentu con estes puestes n’escena si tenemos en cuenta los resultaos electorales que se producen sistemáticamente y la falta de reacción de les otres centrales sindicales. En SUATEA queremos rescamplar, y los comediantes persábenlo, que la competencia pa crear la especialidá ye del Gobiernu l’Estáu que ratifica la decisión tomada pol gobiernu de la comunidá autónoma. Ye por ello, polo que, dende SUATEA, venimos esixendo: la creación de la especialidá de Llingua Asturiana y Gallego-Asturiano, la inclusión de los puestos d’estes especialidaes nes plantiyes orgániques, la convocatoria d’oposiciones y el concursu de tresllaos.”

El restu del comunicáu plantega lo que vien darréu: Siguiendo nel ámbitu educativu, constatar que se bien calteniendo la matrícula d’alumnáu en Primaria con un 55 % del total d’alumnáu de Primaria escolarizao en Llingua, mientres que n’EI magar que los centros, na so mayoría, tán integraos nos de Primaria, el porcentaxe ye ridículu (un 13% del total del alumnáu d’EI recibe enseñanza de Llingua). Ablúcamos l’abandonu dafechu y de fechu que fai la Conseyería Educación na planificación escolar de la Llingua Asturiana y el Gallego-Asturiano na EI. ¿Sedrá porque casualmente ye ésta una etapa fundamental y crítica nel aprendimientu llingüísticu y la so continuidá? En SUATEA queremos rescamplar pa que s’analicen, estos fechos : 1. Nun se va a crear la mención en Llingua na formación del profesoráu nel grau de Maestru n’Educación Infantil. 2. Nel currículu EI nun apaez nomada en denyuri la nuestra llingua, nin se prevé (como nel casu l’Inglés) la intervención del especialista de Primaria nesta etapa. 3. Nun s’afala a la matriculación n’EI nin s’inspecciona afayadizamente’l cumplimientu obligatoriu de la ufierta nesta etapa. 4. Estos caberos díes dellos centros pidieron ampliar a EI la ufierta educativa de Llingua Asturiana y negóse-yos per parte l’alministración encontándose nel nuevu currículu d’esta etapa. Sicasí la llei d’Usu esiste y nel so “Artículu.10 – Currículu 1. Nel exerciciu de les sos competencies, el Principáu d’Asturies va garantizar la enseñanza del bable/asturiano en tolos niveles y graos, respetando sicasí, la voluntariedá del so deprendizaxe…”. En SUATEA denunciamos el sistemáticu incumplimientu d’esti artículu y, poro, esiximos a la Conseyería Educación: 1. La formación llingüística básica en Llingua Asturiana y Gallego-Asturiano del profesoráu nel grau de Maestru n’Educación Infantil. 2. La igua del currículu EI onde apaeza nomada la nuestra llingua y esplicitaos los oxetivos, conteníos, metodoloxía, competencies básiques y demás conteníos curriculares que la homologuen coles otres llingües del currículu. 3. Que mentanto nun se dean estes condiciones, se tomen transitoriamente les midíes organizatives afayadices en materia personal, material y presupuestario que, como diz esi artículu 10, garnaticen la enseñanza del nuestru idioma nesta etapa. Esi mesmu incumplimientu y abandonu súfrese tamién en Secundaria y Bachiller onde nun se respeta la voluntariedá del so deprendimientu al ser el nuestru idioma optativo-voluntariu y discrimináu al haber una ratio mínima d’alumnáu p’acceder al so aprendizaxe. Na FP, les escueles d’Adultos, Escueles Oficiales d’Idiomes y estudios universitarios non llingüísticos o relacionaos cola educación, la enseñanza la Llingua Asturiana o’l Gallego-Asturiano nun se da. Toa esta problemática del ámbitu educativu tien tamién delles correspondencies nel social, onde los fechos mos confirmen (casu Xurde Blanco por exemplu) que’l ruin marcu normativu d’anguañu, nun garantiza efectivamente los nuestros derechos llingüísticos y menos cuando l’alministración lu interpreta restrictivamente amosando la so falta de querencia hacia’l nuestru idioma y los sos falantes. Ye, poro necesaria más que nunca, LA OFICIALIDÁ DE LA LLINGUA ASTURIANA Y EL GALLEGO- ASTURINANO (nel so territoriu). Con esi enfotu dende SUATEA, aprovechamos pa convidavos a participar con nosotros nos movimientos sociales qu’afalen l’algame d’esti finxu y a asistir a la manifestación que tolos años se convoca’l día 7 de mayu col mesmu envís.”

Güei, martes 4 de mayu, y dientro de los actos de la XXXI Selmana de les Lletres Asturianes van producise visites escolares d’animación a la llectura, a partir de les diez y media la mañana. La Casa Cultura de Mieres del Camín ye’l llugar escoyíu, por el conceyu de nacencia del autor homenaxeáu.

Mañana, miércoles, a partir de les 12 hores, l’Ayuntamientu de Mieres va facer na Casa Cultura una declaración institucional y va producise’l descubrimientu d’una placa dedicada a Xosé Antonio García. Pela tarde, a les 20 hores, l’Auditoriu de la Casa Cultura va ser l’espaciu escoyíu pal actu d’homenaxe de los ganadores del Premiu “Teodoro Cuesta” a Xosé Antonio García, nel XX aniversariu del premiu. Va cuntase entós cola actuación de los hermanos Valle Roso.

La Universidá d’Uviéu convoca concursu de méritos pa cubrir una plaza de profesor de castellán pa estranxeros. El plazu de solicitúes remata’l 8 de mayu y les bases tán nel BOPA de 28 d’abril.

Esta selmana la Conseyería d’Educación y Cienciad’Asturies dio anuncia de la so intención de desaniciar los estudios de Bachilleratu que s’ufierten nel Institutu d’Educación Secundaria Carlos Bousoño, de Bual, al qu’asisten escolinos d’esti conceyu y del vecín d’Eilao. Nesti intre cursen esa formación académica 14 mozos y moces, pero pal cursu 2010/2011 la midía afectaría a 17 escolinos que, de nun camudar les coses, pasaríen a estudiar en Navia.

Escontra esta midía, anunciada pol propiu conseyeru José Luis Iglesias Riopedre, yá se posicionaren José Antonio Barrientos y Leandro López, alcaldes de Bual y Eilao respeutivamente; la direición del IES, sofitada polos 37 mayestros del mesmu; y les AMPAS d’Escolinos. Amás súmense agora la formación política Andecha Astur y l’asociación Trafego.

AA camienta que’l caltenimientu de los estudios de Bachilleratu nel IES del conceyu “conllevaría un mayor gastu económicu y temporal (nos desplazamientos hasta Navia) pa los escolinos, asina comu la perda d’hasta siete puestos de trabayu de mayestros y mayestres que colaríen del IES al desapaecer el Bachilleratu”.

Pela so parte, el colectivu Trafego espresó “el sou máis total desacordo cua decisión” y entiende “qu’é completamente desacertao qu’un neno del Villar de Buyaso, de Pastur ou de Brañallibrel teña qu’ir todos os días al Instituto Galileo Galilei de Navia, camín que ye supondría un desplazamento d’úa hora y vente d’ida y outra hora y vente de volta (dúas horas y corenta minutos cada xornada metido nun autobús, como mínimo) pra recibir úa educación de calidá y pra ter as mesmas posibilidades académicas nun futuro qu’os nenos y nenas que tardan dez minutos en chegar al centro escolar”, lo que recuerden “baxaría el rendimento académico”.

Trafego considera esti fechu “una agresión al medio rural y á súa población” que nun pue ser, según el colectivu, más qu’“outra xugada del intento de centralización que ta sufrindo Asturias”. Por ello piden a “os eonaviegos” que se muevan “pra que nun yes quiten lo sou, pra nun ver morrer el sou llugar tan axina”.

El sindicatu d’enseñanza Suatea responsabilizó estos díes a la Conseyería d’Educación de que namás el 13% de los alumnos d’Educación Infantil cursen llingua asturiana, yá que según esta organización “tán incumpliendo la obligación de garantizar la ufierta d’esta asignatura”. SUATEA recuerda que nun se ficieron campañes informatives nin se mandaron circulares a los centros informando del procedimientu pa garantizar esti derechu.

SUATEA recordó que’l Tribunal Superior de Xusticia d’Asturies estableció, nuna resolución na que refugó precisamente un recursu de Suatea por esta situación, que la Llingua Asturiana “tien que tar presente nel currículu d’Educación Infantil”. El sindicatu presentara al empiezu del cursu 2008-2009 un recursu contenciosu-alministrativu contra’l currículu d’educación infantil, por entender que nun incluyía la llingua asturiana como materia d’enseñanza. La TSXA entendió que nun yera asina, pos el currículu “indica que va ser considerada como materia integrante del currículu y tantu la llei 2/2006 como’l Real Decretu 1630/2006, establecen que les enseñances mínimes del segundu ciclu d’Educación Infantil determinen que lo conteníos educativos d’esti nivel entámense n’árees y que ente los conteníos de cultura asturiana recuéyese’l bable asturianu, cuidao que la mesma constitúi una manifestación cultural al respective”.

SUATEA amuesa como prueba de falta d’información nesta etapa escolar, qu’en Primaria esa proporción xube hasta’l 55%.

Por tollo, dende Suatea, esixen “la ufierta xeneralizada de la enseñanza de Llingua Asturiana o Gallego-asturianu na Educación Infantil”. Tamién pidió “les disposiciones reglamentaries qu’amuesen a les clares los conteníos, midíes organizativas, y recursos materiales y humanos que se van dedicar a la enseñanza de Llingua Asturiana o Gallego-asturianu na Educación Infantil”. “La puesta en marcha del plan de formación del profesoráu de EI en Llingua Asturiana y Gallego-asturianu na formación permanente”, solicitó tamién, amás de la collaboración cola universidá por que en los planes d’estudiu universitarios nuevos créese la Mención de Llingua Asturiana nel Grau de Maestru d’Educación Infantil”.

Amás, de la “valoración y reconocencia de la especialidá nel nuesu idioma nel accesu al puestu de trabayu y nos concursos de treslláu, oposiciones y llistáu de interinidad de toes lo otres especialidaes”, y la previsión del “aumentu de puestos d’especialista de Llingua nes plantiyes de 2010″.

Hasta’l 7 de mayu la Universidá d’Uviéu tien abiertu’l plazu pa los cursos de branu que celebra en distintes localidaes asturianes. Los cursos cinquen a les ciencies esperimentales, ciencies sociales y xurídiques, humanidaes ya inxeniería y tecnoloxía.

Van celebrase n’Astorga, Avilés, Cabranes-Torazu, Candás, Cangas, Castrillón, Ciañu-Llangréu, Xixón, Ibias, A Caridá (El Franco), Mieres, Navia, Noreña, Uviéu, La Pola Llaviana, La Pola Siero, Ribeseya, Salas y Siero.

Llistáu completu de cursos

El presidente de Bancu Santander, Emilio Botín, amosó esti xueves n’Uviéu la so convinción de que la universidá ye la “institución clave” p’asegurar la competitividá de les empreses.

Botín afitó esti mensaxe nel discursu que dió n’Uviéu, depués de roblar col rector de la Universidá d’Uviéu, Vicente Gotor, un conveniu pol que la institución bancaria destina 500.000 euros en cuatro años pal Centru Internacional de Posgráu del Campus d’Excelencia de la Universidá d’Uviéu.

Dende l’11 de marzu, la XPDLLA de Xixón lleva celebrando dellos alderiques alredor del tema xeneral “Llingua y Normalización”. Les charres son nel local de Sestaferia, asitiáu na cai Joaquín Alonso Bonet, 3 y de magar les 20.00 hores. Exti xueves, 15 d’abril, la tema central va ser la situación del asturianu dientro del sistema educativu.

La coeducación protagoniza unes Xornaes esti mes en Xixón que van dedicase a la “Educación afectivo-sexual, con propuestes pa trabayar nes aules. Les xornaes van desendolcase los díes 21 y 22 d’abril y la inscripción pue facese al traviés del CPR de Xixón (sólo profesoráu), del Institutu Asturianu de la Muyer y del Ayuntamientu de Xixón hasta’l 18 d’abril.

Les Xornaes van analizar como mozos y moces van construyendo´l so imaxinariu afectivu, darréu de los modelos de comportamiento amorosu que-yos ufrimos les persones adultes, los medios de comunicación, el cine, los videojuegos o los comics.

La Facultá de Filoloxía de la Universidá d’Uviéu organiza esti xueves 8, a la una la tarde, una conferencia obre les estremaes llingües de signos y llingüística xeneral. L’autor de la mesma ye’l profesor Ángel Herrero Blanco, del Departamentu de Filoloxía Española y Llingüística Xeneral de la Universidá d’Alacant.

Ángel Herrero Blanco ye, amás de profesor universitariu, Director de la Biblioteca Virtual Miguel de Cervantes y unu de los mayores espertos en llinguaxe de signos, llingües de signos y signollingüística, con bin d’obres de referencia nesti campu.