Educación

La clasificación de Shanghai 2013 de les universidaes mundiales confirma de nuevu de Harvard, Stanford y Berkeley y dexa nidio qu’españa nun s’alcuentra al nivel que se debería esixir con Universidaes como la d’Uviéu que suspenden dafechu l’esamen. Nel mentáu ranking a les tres populares universidaes sígueles el Massachusetts Institute of Technology (MIT), en cuarta posición, ente que la universidá británica de Cambridge, primer centru non estadounidense de la clasificación, apaez en quintu llugar.

Anguaño, al igual qu’en 2012, les universidaes estadounidenses ganen de llargu, ya que de les primeres 20 clasificaes, 17 son d’Estaos Xuníos. Sicasí, el ranking namái asitia a diez universidad españoles ente les 500 meyores del mundu, ente que l’añu pasáu fueron once. La Universidá que perdió esi puestu foi la de Vigo, mentantu que la d’Uviéu, como davezu, nun apaez. Amás, talamente como en2012, nenguna apaez ente les 200 primeres.

El prósimu xueves día 1 d’agostu, a les 7 la tarde, voi dar un conciertu didáuticu nel Escenariu Atlánticu, la carpa qu’hai na punta Lequerica. Tá programáu pola UP de Xixón pal Festival Arcu Atlánticu.

Nel conciertu podrán vese y sentise en direutu más de venti instrumentos musicales usaos na tradición musical d’Asturies y d’otros países del Arcu Atlánticu. Acompáñase l’actividá cola proyección d’imáxenes. Tá invitao tol mundiu.

El Colexu Rural Agrupáu del Cabu Peñes, en Gozón, aprobó va dellos meses el cambiu pa denomase “Cabu Peñes” en llugar del castellanizáu “Cabo Peñas”. Iniciativa pol Asturianu unvió una felicitación al centru aprovechando pa convidalos a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l’asturianu na páxina web y na rotulación del centru, etc. Pa la organización “esti ye un nuevu exemplu” que se suma a otros como los colexos xixoneses de Montiana o Xove y que surdió gracies a la propuesta d’un profesor miembru d’Iniciativa pol Asturianu y que pudo llevase alantre gracies al sofitu de tola comunidá educativa.

El procesu surdió nel mes d’ochobre de 2012, cuando Fernando Padilla, profesor del centru y miembru d’Iniciativa pol Asturianu propunxo al Claustru camudar el nome de castellán a asturianu y esti aprobólo por unanimidá. Dempués l’alcuerdu del claustru pasóse al Conseyu Escolar y esti tamién lu aprobó. Con estos alcuerdos solicitóse la conformidá al Conceyu de Gozón, que la dio con tiempu y forma. Con too esto fízose la solicitú al la Conseyería d’Educación, que nuna resolución posterior aprobó’l cambiu de nome.

Iniciativa pol Asturiana aprovechó p’animar a otros centros educativos a dar pasos nesti camín hacia un usu normal del asturianu, “que dea a los alumnos y a tola comunidá educativa una visión del asturianu como una llingua que nun s’usa namás nes actividaes de l’asignatura de llingua asturiana, sinón en tola ámbitos de l’actividá escolar, como una llingua d’usu normal”, espliquen nel comunicáu.

La organización Iniciativa pol Asturianu, al traviés de la so Vocalía d’Enseñu, ta acabante poner en marcha una campaña pa facer medrar la matriculación na asignatura d’asturianu nes escueles ya institutos d’Asturies, “onde la demanda ye mui alta per parte de les families y alumnos, pero onde tovía apaecen importantes torgues pa matriculase na asignatura, con incumplimiento de la llexislación en dalgunes ocasiones”, espliquende de la organización. La campaña busca implicar al profesoráu d’asturianu con un folletu con un diseñu en blancu y negru que pueden imprentar ellos mesmos a baxu costu y según el volume d’alumnos del centru nel que trabayen.

El folletu, que pue imprimise como cartelu tamién, inclúi información básica pa los alumnos y families, informando de los sos drechos en cuantes a l’asignatura d’asturianu, que ye obligatorio ufiertar en tolos niveles y en tolos centros públicos, concertaos o privaos d’Asturies, como afita la llexislación vixente y una sentencia recién del Tribunal Superior de Xusticia d’Asturies.

Iniciativa pol Asturianu unvió una carta a tolos centros públicos, concertaos y privaos d’Asturies, recordando les sos obligaciones con respectu a l’asignatura d’asturianu, asina como dándo-yos el so sofitu y asesoramientu si la Conseyería d’Educación punxere dalguna torga a la matriculación n’asturianu o nun punxere a disposición del centru un profesoráu suficiente pa l’asignatura.

Amás, anímase al alumnáu, families y futuros profesores de l’asignatura a espardar esta campaña en papel y nes redes sociales, pa facer medrar la matriculación de llingua asturiana nos centros de toa Asturies. Esta ye una campaña pa tol territoriu na qu’Iniciativa pol Asturianu quier implicar a toles persones posibles na so zona concreta, con unes acciones mui simples, como son la impresión y repartu d’unos folletos y cartelos nel so centru, asina como informar de los posibles problemes que puedan surdir.

Descarga’l material de la campaña pa imprimilu y participar

La Conseyería d’Educación, Cultura y Deporte pon en marcha, el llunes 10 de xunu, una campaña informativa pa impulsar la matriculación en Llingua asturiana y Gallego-asturianu, col lema #yoapúntome, porque lo llevamos dientro / #euapúntome, porque lo levamos dentro. La difusión d’esta campaña fadráse gracies a dellos materiales que pueden descargase na so páxina web. Del 11 al 21 de xunu ta abiertu’l plazu pa matriculase, anque munchos centros ponen dificultaes na matriculación, como denunció estos díes SUATEA.

La enseñanza de la llingua asturiana entamó a impartise oficialmente en 1984, nuna serie de centros educativos públicos, aumentando’l númberu d’ellos nos años sucesivos. Estes enseñances impártense anguaño en 331 centros educativos.

La matriculación nesti añu 2013 pue facese ente’l 10 y el 21 de xunu (pa Educación Primaria) y ente’l 2 y el 15 de xunetu (ESO y Bachilleratu).

La Llingua asturiana y el Galllego-asturiau son materies de currículum que se pueden estudiar en tolos centros públicos d’Enseñanza Primaria y Secundaria. Col envís de llograr qu’esti fechu lu conozan la mayor cantidá posible de padres y d’alumnos/es, “ye polo la Conseyería pon en marcha una Campaña Informativa de Matriculación en Llingua asturiana/Galego-asturiano. Con ella, el Gobiernu d’Asturies quiera mosar el so apoyu a la enseñanza del asturianu, promover la conocencia d’un fechu cultural arriquecedor que forma parte de la nuesa identidá y que contribúi a la formación integral del alumnáu, respetando siempre la llibre opción y la voluntariedá del so deprendimientu”, espliquen dende Política Llingüística.

Materiales de la campaña

El Sindicatu Unitariu y Autónomu de Trabayadores de la Enseñanza d’Asturies (SUATEA) denunció al traviés d’una nota de prensa “el so más firme refugu a la situación de discriminación permanente que sufren los docentes de Llingua Asturiana nel exerciciu de la so actividá llaboral”. Recuerden que la falta de definición llegal de la materia, al nun esistir una especialidá de la mesma, asina como la condición interina del 95% del personal que la imparte “xeneren una situación de vulnerabilidá que fai posible auténticos atropellos dende va años, y que siguen güei, agravaos amás poles agresiones a la escuela pública de los gobiernos central y autonómicu, que xeneren una competencia ente materies onde la Llingua Asturiana xuega coles cartes marcaes”.

Anques espliquen que “son munches les estorbises que sufre’l profesoráu d’asturianu dende va tiempu”, destaquen trés puntos, que reproducimos darréu:

1) Centros escolares que “desaconseyen” estudiar asturianu: Esta práctica, mui común va dellos años per parte de ciertos equipos directivos, vuelve agora n’Educación Secundaria causada pola competencia ente materies optatives xenerada pol aumentu de la xornada llectiva del colectivu docente, al necesitase más hores pa completar horarios. Pasó yá’l cursu pasáu, sobremanera en bachilleratu, cuando padres d’alumnos recibieron llamaes telefóniques per parte de los equipos directivos pa “indica-yos” cuála yera la meyor opción pa los sos fíos ente les asignatures optatives de cara a la PAU y/o la so futura formación académica. Nin que dicir tien que l’asturianu yera siempre desaconseyáu. O cuando, habiendo espresamente ratio pa formar grupu, se facía tolo posible por desmontalu pa poder completar l’horariu de profesores d’otra especialidá.

2) Desidia o incluso boicot a la de tresmitir información a los docentes: Dende la Conseyería d’Educación púnxose en marcha -con retrasu- la ufierta d’actividaes llamada “Axenda didáctica Escolar” y remitióse a los centros per corréu electrónicu vía intranet con carácter de comunicación oficial a la que se-y tien que dar entrada per rexistru. Tenemos constancia de qu’en dellos institutos d’educación secundaria los equipos directivos nun dieron nenguna información al profesoráu d’asturianu nin al departamentu correspondiente. En dellos casos los docentes pudieron enterase per otres víes de tala convocatoria pero en dellos otros non, perdiendo asina la posibilidá d’acceder a tales actividaes.

3) Falta d’apoyu institucional pa la matrícula d’asturianu. Dende los centros ta faciéndose nestos díes propaganda a favor de la matriculación n’asignatures como idioma alemán y francés. A diferencia d’otros cursos nun hai campaña a favor de la matriculación n’asturianu. Si yá ye dura la competencia de la llingua asturiana con llingües estranxeres, si amás nun cunta con nengún tipu de propaganda institucional nel so favor, a diferencia d’otres materies, ta implícitamente trabayándose pa que nun hebia matrícula.

4) Incumplimientu de les ratios. Ta informándose nos IES de qu’esti añu nun hai ratio pa cursar llingua asturiana na ESO, como yá diz la llei y afitaron los tribunales, pero en Bachilleratu siguen pidiendo 8 alumnos, nuna interpretación restrictiva de la sentencia del TSXA y del recursu perdíu pol Principáu qu’interpreta que l’establecimientu de ratios ye contrariu a derechu na ESO (Llei d’Usu del 98 y Estatutu d’autonomía) dao que la propia llexislación al respectu establez el calter de VOLUNTARIEDÁ. Con esto ta allargándose conscientemente una conculcación de derechos en bachilleratu depués de reconocese la so existencia na ESO, tando pendiente de resolución el recursu presentáu por SUATEA sobre esta cuestión.

Dientro del marcu de la Universidá Asturiana de Branu, que se celebra na primer quincena d’agostu en Cangas del Narcea, la Universidá d’Uviéu y l’Academia de la Llingua Asturiana organicen esti añu un cursu baxo’l títulu “Xestión cultural n’Asturies: trabayando con llingües y cultures”, onde va afondase na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averándonos a la conocencia de la situación de la estaya y apurriendo ferramientes básiques pal trabayu nel campu de la xestión cultural n’Asturies. El cursu va celebrase ente los díes 5 y 9 d’agostu en réxime d’internamientu y tien un preciu, pensión completa incluyida, de 190 euros.

Esti programa tuvo un bon nivel de matriculación pero entá queden delles places llibres pa los que pue matriculase unu a lo llargo de los próximos díes nel llar de l’Academia de la Llingua Asturiana n’Uviéu, na cai l’Águila.

El cursu ta dirixíu por Isabel Hevia, profesora de la Universidá d’Uviéu y esperta en programes sociales d’acción cultural, y va cuntar ente’l profesoráu col periodista y especialista en xestión cultural Inaciu Galán encargáu del bloque d’Averamientu a la xestión cultural, la responsable de la Oficina de Normalización Llingüística de Xixón, Mª Xosé Rodríguez, que va centrar les sos sesiones nel campu de la xestión de la normalización de llingües y el periodista de TPA y profesor de la Universidá CJC, Cristobal Ruitiña, que dedicará la so parte del cursu a la difusión de la información nel ámbitu de la xestión cultural.

Esti cursu tien reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies. Amás, al tar nos programes de los Cursos de Branu de la Universidá d’Uviéu, el títulu inclúi créitos universitarios.

Más información pa la matriculación nel cursu

El Colexu Públicu Montiana, de Xixón, ta acabante recibir l’aprobación de la Conseyería d’Educación pa que’l centru pase a denomase “Montiana”, nome tradiconal y dende va años oficial del llugar onde s’asitia, en llugar del deturpáu “Monteana”. Iniciativa pol Asturianu unvió una felicitación al centru aprovechando pa convidalos a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l’asturianu na páxina web y na rotulación del centru, etc.

Esta decisión, que surdió del propiu centru, demuestra pa la organización que “l’alministración va mui per detrás de la ciudadanía nel usu de la toponimia tradicional y oficial d’Asturies”. Recuerden que yá va unos años, el CP de Xove, tamién en Xixón, camudaba la versión castellanizada “Jove” pola agora oficial y usada polos xixoneses dende siempres.

La convocatoria de mayu de la Prueba de conocencia de la llingua asturiana, qu’entama l’Academia de la Llingua Asturiana yá tien el plazu de matrícula abiertu. El 25 de mayu de 2013 va facese la prueba semestral n’Uviéu, pudiendo matriuclase hasta’l 23 de mayu nel llar de l’ALLA, asitiáu na cai l’Águila d’Uviéu.

Horariu de matrícula: llunes a xueves de 9:00 h. a 15:00 h. y de 16:00 h. a 19:00 h. Vienres de 9:00 h. a 14:00 h.

Información completa de la Prueba de Conocencia

El Día de les Lletres Asturianes llega güei vienres a les 12 a les escueles al traviés del Colexu Públicu San Miguel (Trevías) nel conceyu de Valdés. Nel mesmu va producise la intervención d’autoridaes, la entrega de premios del «XVIII Certame Artísticu Lliterariu»; del «X Certame de Cartelismu» y del II Certame de Creación Audiovisual, y delles actuaciones.