Educación

La Unión d´Historiaores Progresistes (UHP) vieno acabante esta selamna de facer un llamamientu al estudiantáu universitariu pa la fuelga del 24 d’ochobre y a movilizase contra la LOMCE y los retayos que ta sufriendo la educación pública. Na so convocatoria de la fuelga fain un llamamientu a estudiantes y trabayadores a sofitar los actos que se van desendolcase na xornada de fuelga xunitaria nel conocíu como “campus del Milán”, onde s’axunten les carreres d’Humanidaes de la Universidá d’Uviéu.

Pa la UHP, l’aprobación de la LOMCE constitúi un pasu más “hacia l’adecuación del sistema educativu a les necesidaes del capital. Dexando a la Universidá en manes de les empreses, convirtiéndola nuna escuela especializada pa les élites onde nun tienen llugar los y les estudiantes d’estracción popular”. Xunta ello, la UHP sorraya la “marxinalización de los estudios críticos, col oxetivu de crear trabayadores autómates y non personas crítiques y lluchadores”. Al so mou de ver, too esto concrétase en táctiques que se puen ver anguañu: réxime de permanencia, aumentu de les tases dende la implantación del plan Boloña, mengua de beques o’l actual Conseyu Social de la Universidá d’Uviéu, “onde s’alcuentren los principales empresarios capitalistes d’Asturies”.

Tamién denuncien que sufren entá más esta situación qu’otros coleutivos: “Por una parte, la progresiva devaluación de la Hestoria al ser una ciencia social y crítica considerada improductiva y contraria a los intereses de les élites actuales. Por otra parte, la falta de nuevas inversiones n’investigaciones y la non convocatoria de nueves oposiciones afecten de manera significativa a la nuestra carrera. El nuestru futuru ta selláu: o lluchamos o tamos condergaos a engrosar les filas del paru y la precariedá”.

Por mor d’ello, la Unión d’Historiaores Progresistes fai un llamáu a la fuelga contra los intentos de degradación y privatización de la educación públicay anuncia dende esti miércoles 23 a les 19:30 l’entamu d’un encierru pa protestar contra les polítiques contra l’estudiantau y la comunidá educativa. Ellí van desendolcase delles actividaes de cara a que la fuelga seya un éxitu. El propiu xueves habrá una mesa redonda con profesores, alumnos y becarios,a les 10:00 sobre la situación de la educación y les alternatives a la LOMCE. A les 11:00 una charra de Benigno Delmiro sobre’l movimientu estudiantil durante el franquismu y la transición. Toes les actividaes sedrán al aire llibre a non ser en casu de lluvia.

La visita de 40 escolinos del colexu Sagrada Familia de L’Entregu pon el ramu a la esposición sobre canción asturiana de la Casona del Bravial. La esposición “Hai una lletra cantada” sobre canción asturiana que se pudo visitar na Casona del Bravial a lo llargo de les últimes selmanes termina esti vienres 25 d’ochobre cola visita d’un grupu de 40 escolinos del Colexu Sagrada Familia de L’Entregu.

Estos neños y neñes, d’edaes ente los 10 y 12 años, van visitar la esposición a les 10:30 de la mano de la cantante Pilar Barreñada Montes, que tamién-yos va interpretar en direuto dalgunes canciones. Pela so parte, José Luis Alonso Rozada, presidente de l’Asociación de la Canción y el Folclor Valle de Nalón va fala-yos de la muestra d’instrumentos musicales tradicionales fechos por él mesmu qu’acompaña la esposición, ente los que s’incluyen gaites, bandurries, rabeles, castañueles o carraques.

La esposición “Hai una lletra cantada” recueye la trayeutoria de dalgunos de los principales representantes de la canción asturiana nel conceyu de Samartín del Rei Aurelio, dende les voces más veteranes como les de Silvino Antuña, Graciano Fernández o Gerardo Orviz, a les voces de cantantes xóvenes como Emi Fanjul o Andrés Collado, ente otros. Amás, nesta muestra tamién pue sentise la voz de munchos d’estos cantantes interpretando temes tan conocíos como “Hai una llinia trazada”, “Pasé’l puertu Payares” o “Viva la xente minero”, ente otros munchos.

La visita d’esti grupu escolar pon el ramu a una de les esposiciones más visitaes de les llevaes a cabu hasta agora na Casona del Bravial de Blimea.

El Sindicatu Unitariu de Trabayadores de la Enseñanza d’Asturies (SUATEA) llama a la movilización xeneral contra la LONCE y los retayos na Educación Pública Asturiana el prósimu xueves 24, día de fuelga xeneral na educación. “Los centros educativos asturianos tán viviendo nesti cursu les consecuencies de los retayos del gobiernu central. Pero’l gobiernu asturianu tamién retaya en materia educativa”, alvierte’l sindicatu asturianu.

Los centros educativos asturianos tán viviendo nesti cursu les consecuencies de los retayos del gobiernu central. Pero’l gobiernu asturianu tamién retaya en materia educativa. Nos centros educativos falta personal, les sustituciones tarden en cubrise, les medies xornaes disparáronse ente’l profesoráu interín, los equipos docentes ca vez tienen más trabayu y menos personal pa facelu y sigue habiendo alumnáu que nun puede disponer del tresporte escolar. A eso hai qu’añedi-y los docentes que despidieron esti cursu teniendo pedío la plaza que-yos correspondía y a quien la Conseyería obligó a recurrir a los tribunales pa facer valer los sos derechos.

L’amortización de cientos de places de profesores que se xubilaron, puestos que nun se repunxeron nin por funcionarios nin por profesoráu interín ta suponiendo una xuba de les xeres que tien que facer quien tovía tien trabayu asina como una merma na correcta atención al alumnáu. La Conseyería sigue manteniendo los 25 alumnos /aula n’educación infantil de tres años pesie a les promeses de la Conseyera. Miles d’alumnos y alumnes quedaron ensin poder matriculase en Formación Profesional y nes Escueles d’Idiomes. A esto hai qu’añedi-y los aumentos d’horariu docente y del númberu d’alumnos/es sobre too en Bachilleratu y la falta d’atención a les demandes de los centros, sobre too nes escueles rurales.

Nes enseñances de 0 a 3 años, colos retayos fáise ca vez más enguedeyao desendolcar el trabayu (direcciones compartíes, eliminación de decenes de puestos de trabayu…)

N’Asturies, sigún SUATEA, “persabemos lo que suponen los retayos. Pero esta situación pue empiorar radicalmente cola LOMCE, qu’estos díis tramítase nes Cortes y nel Senáu. Una llei que tien el refugu de la inmensa mayoría de los partíos políticos, sindicatos docentes, organizaciones estudiantiles y xuveniles, Federaciones de Madres y Padres y de la mayoría de la sociedá. Esta práctica unanimidá contra la Llei nel ámbitu docente ye la que va llevar nuevamente a la Comunidá Educativa a movilizase’l día 24 como fecha clave nesta etapa de la protesta contra los retayos y la Llei Wert. Llevamos semanas espresando’l nuestru refugu a dicha ley y a los retayos al traviés de la consulta ciudadana que se vieno faciendo n’abondos centros, nes cais y nes places d’Asturies y de tol estáu y que va siguir faciéndose hasta finales d’esti mes”.

SUATEA quier encamentar la participación en toles movilizaciones que se tán faciendo esta selmana y les que van siguir plantegándose depués de la Fuelga del 24 d’ochobre, yá que la Llei empioró tovía más nel marcu de la tramitación parlamentaria. Estes son delles consecuencies d’esta Llei contra la que vamos siguir batallando d’aprobase hasta la so total derogación:

Más privatización y más conciertos educativos: los conceyos deberán ceder suelu público pa llevantar centros privaos. Los conciertos tán garantizaos tamién pa los centros que segreguen al alumnáu. El conceptu d’educación como serviciu públicu desapaez. Más xerarquización: les direcciones de los centros serán xerentes cola obligación de sacar resultaos curiosos en reválides feches por axentes esternos; pa ello presionarán con tresllaos forciaos a docentes y espulsarán al alumnáu más desfavorecíu p’“algamar asina la escelencia”, despreciando asina’l llabor del profesoráu y condenando al fracasu a millones d’alumnos y alumnes. Más arbitrariedá na contratación de docentes interinos a la carta, y na peñera del profesoráu funcionariu en función de la especialización del centru. Los concursos de tresllaos oxetivos conviértense en papel moyao. Más relixión y menos hores pa les materies necesaries pa la formación humana, artística y científica del alumnáu y más privilexos pa la ilesia católica que pretende recuperase de la perda xeneralizada del alumnáu cola implantación d’una alternativa a la relixón evaluable. Mayor despreciu a la participación y a la xestión democrática de los centros cola perda de funciones del Conseyu Escolar y el refuerzu de les direcciones de los centros que se convierten en xerentes encargaos d’algamar una puntuación nun ranking del que dependerá la financiación del centru y los salarios docentes.

Por ello SUATEA perafítase nel llamáu a participar nes movilizaciones entamaes pal día de la fuelga (n’Avilés, Uviéu, Xixón y Cangues, polo menos, va haber concentraciones na mañana del 24 alredol del mediudía) asina como na manifestación que con salida de RENFE va facese a les 6 de la tarde na capital asturiana.

“La situación sigue siendo crítica”, o polo menos asina lo tresmitió esti miércoles pela mañana’l Rector, Vicente Gotor, na presentación de la programación deportiva pa esti cursu de la Universidá d’Uviéu. Una de les midíes d’aforru, el zarru de les instalaciones nes fines de selmana, podría anidiase gracies al conveniu cola Dirección Xeneral de Deportes pal usu de los equipamientos d’El Cristu, pero entá nun hai nada seguro.

Sigún afitó’l Rector na rueda de prensa de presentación d’esa programación, la Universidá d’Uviéu caltien los sos equipos de competición, entamando pel de fútbol, que xuega en Tercer División, col patrociniu de la empresa Betagroup, los d’atletismu, masculín y femenín, co sofitu de Normalux y Caxa Rural; y el de baloncestu femenino, que compite na segunda categoría nacional.

El grupu parlamentariu d’IX na Xunta Xeneral va demandar nel plenu del próximu vienres los votos del restu de los grupos de la Cámara pa que s’estableza una moratoria na nueva normativa aplicada esti cursu al tresporte escolar n’Asturies coles mires de que nun s’apliquen les restricciones que tán xenerando problemes. La Proposición Non de Llei rexistrada demanda tamién al Gobiernu que se busque un alcuerdu con tolos implicaos que nun signifique “aplicar el tirallinies y dicir que son 1.500 metros ensin ver ónde tán y en qué condiciones de seguridá”, como aseguró Ángel González, voceru parlamentariu d’IX na Xunta Xeneral al términu de la Xunta de Voceros.

Na sesión del xueves, IX tamién va preguntar polos motivos polos que nun s’executó una partida d’un millón d’euros afitada nel presupuestu de 2013 pal colexu Carmen Ruiz Tilve d’Uviéu, yá que “a día de güei IX desconoz por qué nun se contrató nada”. De la mesma, va demandar información sobre cuándo tien previstu’l Gobiernu executar esta partida pa esti colexu.

La Universidá d’Uviéu va abrir el próximu llunes 14 d’ochobre la matrícula pa los que deseyen cursar el cursu preparatoriu pa realizar l’exame d’accesu pa mayores de 25 y mayores de 45 años. El plazu va tar abiertu hasta’l día 15 noviembre y la matrícula puede formalizase na Unidá d’Accesu del Vicerrectorado d’Estudiantes (c/ González Besada nº13, Uviéu).

El cursu celebrarase los vienres pela tarde y sábados pela mañana na Escuela d’Inxeniería Informática (C/ Valdés Salas, 11 – 33007 Uviéu), y va empezar el 29 de noviembre. Los interesaos en solicitar más información sobre’l mesmu pueden dirixise a la Unidá d’Accesu (C/ González Besada,13), llamar al teléfonu 985104115 o al traviés del corréu selectividaduniovi.es.

Pa Mayores de 45 el cursu va tener una duración de 18 hores, con una tasa de matrícula de 150 euros. Les asignatures van ser los dos del exame: Llingua castellana y Comentariu de testu o Desenvolvimientu d’una tema xeneral d’actualidá. Mentantu que pa Mayores de 25 el cursu va tener una duración de 54 hores, con una tasa de matrícula de 250 euros. Les asignatures van ser los trés de la fase xeneral (Llingua castellana, Comentariu o Tema xeneral d’actualidá y Llingua estranxera, a escoyer ente alemán, francés, inglés, italianu o portugués) y dos de los cuatro posibles de la fase específica. Si l’alumnu deseya preparar más de dos asignatures, va poder faelo con una tasa adicional de 50 euros per asignatura.

Los mayores de 25 tienen la opción de solicitar la beca que concede’l Ministeriu d’Educación. La solicitú de beca tien de realizase al traviés de l’aplicación creada con esi envís na páxina web del Ministeriu d’Educación (www.mec.es) y el plazu remata’l próximu 15 d’ochobre.

El cursu preparatorio pa realizar l’exame d’accesu pa mayores de 25 o de 45 años namái se va impartir en casu d’esistir un mínimu de 60 alumnos. Coles mesmes, cada asignatura va haber de tener siquier cinco estudiantes matriculaos pa ser impartida. En total ufiértense 100 places a lo más, que van ser axudicaes por rigorosu orde d’inscripción. La matriculación nel cursu nun implica la inscripción pa realizar l’exame d’accesu.

Estos díes alcuéntrase abiertu’l plazu d’inscripción pal Cursu Básicu de Llingua Asturiana en Corvera hasta’l 23 d’ochobre, primer día de un cursu que ye gratuitu y va impartise los miércoles de seis a ocho la tarde.

Dende esta selmana y hasta’l 23 d’ochobre, ábrese’l plazu pa inscribise nel “Cursu Básicu de Llingua Asturiana (II)” que, igual que na edición anterior, quier ser “un mecanismu de deprendimientu de les normes básiques d’escritura del idioma, pero tamién una manera d’acercase a bien d’aspectos de la cultura asturiana”.

El cursu, de carácter gratuitu, va ser impartíu pol técnicu responsable del Serviciu de Normalización Llingüística de Corvera. L’horariu del mesmu va ser tolos miércoles de 18 a 20 hores, siendo la primer sesión el próximu miércoles 23 d’ochobre nel Centru Sociocultural de Las Vegas/Les Vegues.

Gemma Pulgar y Pedro Vigil son los padres d’Illán, un neñu del Colexu Auseva d’Uviéu nel que lleva tola educación primaria estudiando llingua asturiana. Agora, cuando ta en sestu cursu, la Conseyería d’Educación incumple la llexislación, y el so neñu lleva dende l’entamu del cursu ensin profesor d’asturianu. L’Asociación Iniciativa pol Asaturianu y la familia tán dispuestos a llegar a los tribunales si nun se da una solución y animen a otres families a sumase.

Iniciativa pol Asturianu apoya a esta familia y a les munches otres qu’a lo llargo d’Asturies viven situaciones asemeyaes pola negación de drechos reconocíos pola llei y por sentencia del Tribunal Superior de Xusticia d’Asturies, que declaró illegales los cupos d’alumnos pa l’asignatura d’asturianu. El propiu centru educativu reclamó a la Conseyería que-y unviaran un profesor d’asturianu, pero Illán sigue ensin recibir clases de la so propia llingua.

La organización ta dispuesta a apoyar a esta familia hasta les últimes consecuencies, y ta asesorándolos pa llegar a los tribunales si ye necesario, pues a xuiciu de la organización, el drechu a estudiar asturianu ye irrenunciable y ha respetase dende les instituciones. Lo contrario ye una marxinación de ciudadanos por mor de la so llingua, lo que contradiz al espíritu de la Llei d’Usu del Asturianu de 1998, asina como la llexislación internacional en Drechos Humanos y la Carta Europea de les Llingües Minoritaries, ratificada por España.

L’Informe PISA (PIACC) de 2013 p’adultos asitia a España a lo cabero en matemátiques y ye antepenúltima en llectura, superando solamente a Italia, dambes na categoría d’adultos de les 23 economíes desenvueltes nes que se realizó esti estudiu de calter añal. Pela so parte, Xapón lidera los dos categoríes, secundada per Finlandia.

L’informe PIACC 2013 tamién señala diferencies educatives nos niveles más altos, yá que demientres nos países de la OCDE el nivel escelente algama’l 12% de la población, n’España esta tasa solo llega al 5%. Les males resultancies d’esti informe acháquense al sistema de la LOGSE, yá criticáu na so dómina y más agora, con perspectiva, y en vistes de les resultancies, pero dellos intelectuales atalanten que tien de producise por más motivos.

Asina, en comprensión llectora, los que tienen ente 16 y 65 años namái consiguen 252 puntos, 21 per debaxo del promediu de la OCDE y 19 per debaxo del de la UE. En matemátiques ye peor entá: somos los postreros de la llista con 246 puntos, 23 per debaxo de la OCDE y 22 per debaxo de la UE.

A años lluz queden países como Xapón, Finlandia, Holanda, Australia o Suecia, que los sos titulaos en Bachilleratu o FP de Grau Mediu llogren, ello ye qu’igual o mayor puntuación que los universitarios o estudiantes de FP de Grau Cimeru españoles.

Nuna escala del 1 al 5, l’adultu mediu residente n’España asitiase nun 2, lo que significa, según esti informe, que sabe realizar cálculos matemáticos senciellos, pero nun entiende’l gráficu del recibu de la lluz, nin llogra comparar acertadamente precios d’hoteles. Esti nivel, coles mesmes, implica cierta dificultá pa estrayer conclusiones d’una llectura y la posibilidá de perdese nun testu de cierta fondura y riqueza como pue ser El Quixote.

Amás un terciu los españoles atopense nel nivel 1 o per debaxo del 1, lo que significa que namá pueden lleer testos curtios, entender un vocabulariu básicu, realizar operaciones aritmétiques sencielles o entender porcentaxes bien simples.

La otra cara de la moneda son los mozos españoles, que s’averen a la media de la OCDE y saquen casi 30 puntos (nun baremu de 500) a la población adulta d’España, siendo la mayor diferencia ente adultos y mozos de tol Informe, superada solamente per Corea del Sur.

El Vicerrectoráu d’Estensión Universitaria y Comunicación de la Universidá d’Uviéu pon en marcha de nuevu l’Aula de música pop-rock’ con un cursu dedicáu a David Bowie sol títulu “David Bowie: L’home que vendió’l mundu”. Como yá fixera n’anteriores ediciones col cursu monográficu sobre Nick Cave, el dedicáu al Punk o al Britpop, el Vicerrectoráu d’Estensión Universitaria de la Universidá d’Uviéu pretende siguir promoviendo la so aula de música pop-rock y pa eso creó un nuevu cursu que va ser impartíu por profesoráu del mundu de la música como Igor Paskual (Loquillo), Pelayo Pastor (El Guah.es) o Lara González (Undershakers), ente otros.

Ésti cursu desenvolveráse dende’l 8 d’ochobre al 12 d’avientu. Les sesiones realizarán los martes en Xixón (nel Antiguu Institutu), los miércoles n’Uviéu (nel Edificiu Históricu) y los xueves n’Avilés (na See Universitaria) n’horariu de 18.30 a 21.00 hores (podrá escoyese una de les opciones).

La matrícula va tar abierta de forma gratuita pa tol públicu que pueda tar interesáu na materia hasta l’empiezu de los cursos, quitando Uviéu que yá completó l’aforu.

Web con tola información del cursu y matriculación