Educación

L’Atenéu N’Alfoz anuncia l’apertura del plazu pa inscribise nel “Cursu Avanzáu de Llingua Asturiana” que va comenzar les sos sesiones el martes 25 de febreru. Hasta esi día la xente adulto interesao va poder inscribise nel mesmu, tanto nel Centru Tomás y Valiente como nel Centru Sociocultural de Les Vegues (Corvera).

Dende l’Atenéu despliquen qu’esti cursu “quier ser un mecanismu d’afondamientu nel conocimientu y deprendimientu de la gramática asturiana y otres cuestiones más del idioma pero tamién una manera d’acercase a la cultura y a la historia asturiana, va ser impartíu pol técnicu responsable del Serviciu de Normalización Llingüística de Corvera”. Poro, esti cursu, de calter gratuitu y con una duración de trenta hores, va desarrollase en sesiones de dos hores tolos martes, n’horariu de 18 a 20 hores.

Les sesiones del cursu van facese nel Aula 2 del Centru Sociocultural de Las Vegas/Les Vegues. Los conteníos del cursu son los que s’indiquen de siguío:

-Repasu de les normes ortográfiques; -Gramática de la llingua asturiana; -Léxicu; -Situaciones comunicatives, escrites y orales; -Acercamientu a la historia de la llingua asturiana; -Actitúes y prexuicios llingüísticos, qué son y cómo funcionen; -Manifestaciones artístiques n’asturianu.

La fundación d’IX (FEC) desenvuelve dende güei una conferencia internacional pa “plantegar les alternatives dende la Esquierda a la reforma del PP contra la Universidá Pública y la Ciencia”. Jaime Aja, director de la Fundación pola Europa de los Ciudadanos, alviertía esti día que’l Gobiernu de Rajoy “quier acabar cola autonomía universitaria y valse yá d’una estratexa perfectamente orquestada pa contraer cada vez más el financiamientu públicu en beneficiu de la medría de tases y la necesidá de competir por recursos privaos”.

La Fundación pola Europa de los Ciudadanos (FEC), venceyada a Izquierda Xunida, en collaboración con otres fundaciones y grupos a nivel estatal ya internacional, desenvuelve güei y mañana la so Conferencia Internacional ‘Universidá, Ciencia ya Investigación: Resistencia y Alternatives Europees’. Ente los sos oxetivos fundamentales ta “evaluar la situación de la universidá y la ciencia n’Europa y de plantegar les bases y les estratexes pa construyir alternatives dende la izquierda”, según esplica’l director de la fundación, Jaime Aja.

Nel alcuentru participen docentes, investigadores, científicos y activistes de Francia, Alemaña, Italia, Grecia, Bélxica, Finlandia, Austria, Portugal y España. Na so organización, amás de directamente la FEC, tuvo una participación bien activa ‘Transform! Europe’, una rede europea pal pensamientu alternativu y el diálogu políticu, formada por 23 organizaciones de 17 países, que trabayen nel campu de la educación política y l’analís científicu críticu. Los alderiques programaos cunten, amás, col sofitu del Partíu de la Izquierda Europea (PIE) y del Grupu de la Izquierda Unitaria Europea, nel que ta integráu IX.

Jaime Aja esplica que les meses redondes de güei vienres van dedicar a les reformes conservadores entamaes na Universidá a nivel européu, con especial incidencia nel Estáu español. “Los cambeos drásticos na Universidá Pública –detalla- fueron unu de los principales oxetivos que’l Gobiernu de Mariano Rajoy marcóse na so primer llexislatura. El ministru José Ignacio Wert prepara una contrarreforma’ de la Llei Orgánica d’Universidaes que busca, ente otres cuestiones, la subordinación total de la docencia y la investigación a necesidaes definíes puramente pol cortoplacismu de los axentes del mercáu, según una forma d’organización qu’asonsañe’l modelu empresarial”.

“Quieren acabar –alvierte- cola autonomía universitaria y válense yá d’una estratexa perfectamente orquestada pa contraer cada vez más el financiamientu públicu en beneficiu de la medría de tases y la necesidá de competir por recursos privaos”.

Aja analiza que la contrarreforma universitaria en marcha “vieno preparase a lo llargo de los últimos años por aciu una serie de midíes d’afuegu financieru y llaboral qu’afecten a estudiantes, investigadores, profesoráu y personal d’alministración y servicios, nel marcu de la execución de les midíes enmarcaes nel llamáu procesu de Bolonia”.

Pal director de la FEC, “esta realidá nun se dirixe namái contra les universidaes públiques españoles. La ofensiva vien impulsada en bona midida pola mayoría conservadora nes instituciones de la Unión Europea y ta estendida en numberosos países de la nuesa redolada”.

Por ello -d’ende la pertinencia de les xornaes inauguraes güei na Residencia d’Estudiantes del CSIC (C/ Pinar, 21-23)- “ye necesario analizar en fondura la situación actual y diseñar estratexes de respuesta. Pa ello resulta imprescindible conocer modelos y respuestes alternatives yá ensayaos n’otros sistemes universitarios”, señala.

Jaime Aja destaca que “ye la primer vegada que se realiza nel nuesu país un actu alternativu d’estes característiques p’axuntar a espertos de tantos países europeos. A la conferencia alleguen académicos, investigadores, sindicalistes y activistes con una llarga esperiencia nel analís, ellaboración y movilización dientro del campu de la universidá y l’investigación”.

Los sindicatos que conformen la Xunta de Personal Docente non Universitariu d’Asturies –SUATEA, ANPE, FETE-UXT, CCOO, CSIF, – tres la xunta caltenida’l día de güei comunicabe el so contundente refugu a la ufierta d’empléu públicu anunciada pola Conseyera d’Educación y, por mor d’ello, convoquen una movilización pal xueves 6 a les 18 hores na cai Fruela d’Uviéu.

L’ábanu de persones que van llegar d’otres comunidaes autónomes esta garantizada yá que Asturies ye la única comunidá que convoca oposiciones de FP; esto va faer que’l costu d’esti procesu sía desproporcionáu. Pa ello va ser necesariu esviar cientos de miles d’euros destinaos a cubrir necesidaes básiques esistentes na mayoría de centros docentes a un procesu que pa nada ameyora’l sistema educativu asturianu cuidando que la ufierta nun cubre nin una mínima parte de les xubilaciones que se producieron nos últimos años.

Na nota de prensa na que los sindicatos facíen la convocatoria dexabe nidio que “dáu’l refugu que faemos patente por aciu esti comunicáu tolos sindicatos con representación na Xunta de Personal Docente non Universitariu d’Asturies esiximos a la Conseyera reconsiderar la so postura y que nun convoque oposiciones.

En casu de siguir nel so enfotu, cuidao que la llei dexar, que convoque y guarde les places pa los procesos d’oposición de los próximos años”.

Como actu de protesta contra la decisión de la Conseyera convocamos al profesoráu interín asturianu a una movilización el próximu xueves 6 de febreru a les 18:00 hores na cai Fruela delantre de la Xunta Xeneral del Principáu.

El coordinador d’IX, Manuel González Orviz, denunció güei la eliminación per parte d’HUNOSA de les beques d’estudiu a fíos con discapacidá de los sos trabayadores, y que va suponer dexar ensin estes ayudes a 42 persones. La decisión de la empresa pública supon un nuevu varapalo a la protección de los menores y de sofitu a la formación d’estudiantes con dalgún tipu de minusvalía.

La dirección de la compañía comunicó va dos selmanes al comité intercentros la decisión qu’implica, amás, incumplir l’alcuerdu suscritu colos representantes de los trabayadores pa la implementación d’estes ayudes, tal que se venía faciendo hasta ágora.

González Orviz dixi que suprimir les beques demuestra la escasa sensibilidá del Executivu de Mariano Rajoy: “Entendemos que tratar de retirar 42 ayudes a fíos de trabayadores con discapacidá, ye una mala midida y lóxicamente nun nos va sacar de la crisis”.

Izquierda Xunida, anunció’l so coordinador, va esixir al Gobiernu Central qu’esclarie si la decisión d’esaniciar les ayudes n’HUNOSA forma parte de dalgún plan d’ámbitu nacional y si afecta a otres empreses y entidaes públiques.

SUATEA refuga les intenciones de la Conseyera d’Educación sobre la convocatoria d’oposiciones na enseñanza pública nuna nota de prensa asoleada darréu de les declaraciones de la conseyera d’Educación a una emisora de radiu, nes que manifestó la so intención de convocar ufierta d’emplegu públicu docente n’Asturies, n’abierta contradicción colo que dicía hai menos d’un añu, cuando prefería esperar al desenvolvimientu curricular de la nueva llei d’educación pa saber cuáles sedríen les necesidaes reales de los centros.

SUATEA dix desconocer les razones d’esti cambiu de postura y l’enfotu de la Conseyera en faer una risible ufierta d’empléu públicu cuando delles comunidaes del nuestru entornu yá manifestaron claramente qu’esti cursu nun va haber oposiciones bel so territoriu. Tamién s’afirmara la necesidá d’una partida presupuestaria curiosa y específica pa sacar allanare la convocatoria, tres la prórroga del Presupuestu na nuesa Comunidá

El sindicati entrúgase “¿de qué partida va quitase esi dinero?” y diz que l’efectu llamada ta sirvíu, cuando na nuesa comunidá nun existe ninguna peñera que protexa l’emplegu de quien ta faciendo’l so trabayu n’Asturies. Una convocatoria que SUATEA considera ruina, pola intención de convocar 14 places, que “va suponer la rotación nel emplegu pa miles de docentes que güei tán trabayando o nes listes d’interinos ya intérines”.

SUATEA vieno esixendo la convocatoria del 100% de les vacantes ensin cubrir na nuesa comunidá, unes 1500 nos últimos años, lo que ta suponiendo de fechu la destrucción d’emplegu públicu y amenorgar de l’atención al alumnáu asturianu.

A SUATEA abulta-y r”aru l’interés la Conseyera en poner enriba la mesa una ufierta pública d’emplegu risible, que consideramos una burlla macabra de nefastes consecuencies pa la Escuela Pública asturiana y que cunta col refugu de la inmensa mayoría del profesoráu y los sos representantes”.

Los gazapos llingüísticos en gallegu yá nun tienen escapatoria cola puesta en marcha del FotoTrabadas, un concursu, entamáu pola Asociación Trabalingua, que busca da-y caza a tolos erros que pueden apreciase nos cartelos, na sinalización, nes cartes y n’otros medios escritos dependientes de l’alministración pública nos que se produza tantu un mal usu de la llingua gallega como l’ausencia de la mesma. Al traviés d’esta iniciativa los integrantes de l’asociación universitaria dan un pasu más escontra la concienciación y normalización de la llingua gallega nel so usu públicu, solicitando pa eso l’ayuda de persones ayenes a l’agrupación pa denunciar estos erros.

Coles mires de incentivar la participación nel concursu, l’asociación va otorgar un premiu a la fototrabada que más sofitos reciba nes redes sociales.

El cursu pasáu l’asociación llevó a cabu a iniciativa Ti informes, Trabalingua denuncia, y “foi ende d’onde salió la idea de les FotoTrabadas” desplica na so web Antía Ver, integrante de Trabalingua, faciendo fincapié en que “l’añu pasáu entamaba too d’otra manera, cuidando que na anterior actividá yeren los mesmos miembros de l’agrupación los encargaos de llevar a cabu l’acción quedando la sociedá como mera informadora o indicadora”.

Trabalingua ye una asociación que surde a partir d’un grupu d’estudiantes que s’enteren del so interés común pola llingua gallega dempués d’allegar a les primeres Xornaes de la llingua n’abril de 2009, entamaes polos Comités.

El nuevu presidente de la Conferencia de Rectores d’Universidaes Españoles (CRUE), Manuel López, afirmó qu’una reforma “en fondura” del sistema universitariu español precisaría “d’un pactu d’Estáu” y abogó por reformes puntuales: “Nun podemos someter una cuestión estratéxica de llargu plazu a los vaivenes electorales. Tien que tescender a los partíos democráticos”, defendió’l tamién rector de la Universidá de Zaragoza delantre los medios y axencies de prensa quefalaron con elli nel entamu de 2014.

El presidente de la CRUE solicita al Gobierno “flexibilidá” a la d’aplicar les futures reformes de la Universidá española, qu’espera que sían “parciales” y “alcordaes” ente Educación y la comunidá universitaria. Según Manuel López, el Ministeriu d’Educación inda nun-yos plantegó nengún tema concretu, pero sí-yos avisó de que los cambeos van ser “puntuales”. Sicasí, López solicita que se dean “facilidaes” pa la xestión de les universidaes españoles. y que se fine coles restricciones na convocatoria de places de profesores nes universidaes, finando la so tasa de reposición del 10 per cientu y enanchándola en función de les necesidaes.

SUATEA desixe a l’Alministración asturiana que faga cumplir les resoluciones del Conseyu Escolar del Principáu, sigún apautó na sesión d’avientu del 2013 y concretamente les 4 referentes a la llingua asturiana, claves nun nuevu contestu como ye la LOMCE, y qu’entamen pola inclusión de l’asignatura “Llingua y Lliteratura Asturiana” dientro del currículu de les enseñances non universitaries.

El Conseyu Escolar del Principáu d’Asturies celebró l’otru 4 d’avientu de 2013 una sesión ordinaria onde s’aprobaron por unanimidá cuatro resoluciones relatives a la llingua asturiana. SUATEA entiende qu’estes resoluciones son positives pa la normalización del idioma nel ámbitu educativu y encamienta a l’Alministración asturiana a desendolcales y non a dexales pa prau como vien siendo vezu dende cuantayá.

Les resoluciones aprobaes, avalaes toes elles pola lexislación vixente, resúmense en:

a) La inclusión de l’asignatura “Llingua y Lliteratura Asturiana” dientro del currículu de les enseñances non universitaries en toles sos etapes, asegurando la non discriminación de los alumnos que la escueyan.

b) El reconocimientu esplícitu, dientro del Decretu d’Especialidaes del profesoráu d’Educación Primaria y Secundaria, de la especialidá de Llingua Asturiana, de forma que puean convocase concursu-oposición y de tresllaos por tala especialidá.

c) Que l’Alministración Educativa garantice la ufierta de l’asignatura Llingua Asturiana y Lliteratura en tolos centros d’Asturies (públicos y privaos), con calter voluntariu pal alumnáu y siendo la Conseyería d’Educación la encargada de velar pol cumplimientu estrictu d’esta norma.

d) Aprovechar les ventayes curriculares del enseñu del asturianu (incluyendo la so contribución al dominiu de les Competencies Básiques), de forma que’l so deprendimientu seya posible pa la xeneralidá del alumnáu que cursa enseñances non universitaries nel sistema educativu asturianu.

En realidá, estes resoluciones nun son otro que’l cumplimientu de la lexislación vixente, marcada pola Llei d’Usu de 1998, y polo tanto ye obligación de l’Alministración desendolcales. La murnia realidá ye que dende l’aprobación de la llei les estorbises puestes polos diferentes gobiernos pa la so aplicación faen posible que quince años depués instituciones como’l Conseyu Escolar del Principáu tengan que recorda-y a la Conseyería d’Educación cuála ye –tovía- la xera pendiente.

Pa SUATEA ye inaceptable qu’a más de quince años de l’aprobación de la Llei d’Usu, qu’inclúi la obligatoriedá de la ufierta en toles etapes educatives, ésta tovía nun se dea, o que nun exista la especialidá docente, clave pa la dignificación de l’asignatura.

Col nuevu marcu llegal qu’abre l’aprobación de la LOMCE, qu’obliga a rediseñar el currículu de toles etapes educatives, yá ye hora de que la Conseyería d’Educación asuma la so responsabilidá, de la que se vien safando cuantayá, pa encarar la dignificación de la Llingua Asturiana y del Gallego-Asturiano nel sistema educativu. Les resoluciones aprobaes pol Conseyu Escolar del Principáu son un toque d’atención nesa dirección que l’Alministración fadría bien en respetar y cumplir.

Más de la metá de los estudiantes de la Universidá d’Uviéu, el 57 per cientu, que participaron nel programa de beques nel Bancu Interamericano de Desenvolvimientu (BID) en Washington siguieron la so trayectoria llaboral na prestixosa institución. El rector, Vicente Gotor, destacaba esta mañana les escelentes resultancies llograes nel programa formativu financiáu pol Banco Sabadell Herrero nun alcuentru colos beneficiarios del programa nel que tamién tuvo presente’l director xeneral del Banco Sabadell Herrero, Pablo Junceda.

L’alcuentru de becarios del BID sirvió amás pa presentar a los trés nuevos beneficiarios del programa, que van viaxar nesti 2014 a Washington pa desenvolver unes práctiques de seis meses en distintos departamentos del BID.

Gotor animó a los exalumnos de la institución “a siguir dexando tan alto’l pabellón de la Universidá, porque eso pa nós supon un gran valor añedíu” y se congratuló de que quien siguieron la so vida llaboral n’EEXX caltengan venceyos cola Universidá d’Uviéu.

Pela so parte, Pablo Junceda aseguró que sofitar el programa d’ayudes “supon tou un luxu porque’l nuesu compromisu con esta gran Universidá ye firme”. Amás, el directivu de Banco Sabadell Herrero remarcó la importancia de la esperiencia internacional dientro de la trayectoria llaboral y personal, pero encamentó a los mozos “a volver, anque nun sía físicamente, y apurrir valor ya idees nesta tierra.”

Les beques nel BID tán destinaes a estudiantes d’últimu cursu, según aquellos titulaos y titulaes que llograren el so títulu, na Universidá d’Uviéu, nos postreros 5 años. La beca cubre una estancia de seis meses Estaos Xuníos. L’ayuda sufraga coles mesmes el billete d’ida y vuelta n’avión hasta Washington y una dotación de 1.650 euros mensuales pa los gastos d’agospiamientu y mantención.

Tanto’l Decanu de Profesoráu como’l Defensor Universitariu pidieron esta semana disculpes al alumnu al qu’una funcionaria quixo prohibir l’usu del asturianu en dos cartes unviaes personalmente al alumnu de la Facultá de Profesoráu y Educación de la Universidá d’Uviéu que vivió esti casu de discriminación lingüística. Los dos llamentaron los fechos y nel casu del Decanu, esplicó la posición favorable pa col usu del asturianu de la so Facultá.

Pela so parte, el Defensor Universitariu quixo esplicar el fechu nes limitaciones que pon el Reglamentu d’Usu del Asturianu nel Rexistru de la Universidá. Recordóse-y al Defensor qu’esti Reglamentu foi parcialmente modificáu pol Tribunal Superior de Xusticia d’Asturies na sentencia 4912/2010, na que s’aclariaba que la Universidá d’Uviéu nun pue llinder l’usu del asturianu a determinaos contestos, pues la Llei d’Usu del Asturianu de 1998 otorga a los asturianos el drechu d’usu del idioma énte l’alministración, ensin discriminación nenguna.

Según facía anuncia esta selmana navidiega la web d¡Iniciativa pol Asturianu, solicitóse al Defensor y al Decanu que pidan al Rector, de forma oficial, que’l Reglamentu en cuestión se modifique acordies coló dispuestu pola TSXA en 2010. L’alumnu en cuestión quixo aprovechar la ocasión p’agradecer a les munches persones y colectivos que se solidarizaron cola so situación.

Dende Iniciativa pol Asturianu y el Conceyu Universitariu pol Asturianu solicitóse yá, tanto al Decanu de Profesoráu como al Defensor del Universitariu, una xunta pa buscar avanzar en midíes, qu’en dambes entidaes, puedan ayudar a meyorar les actitúes hacia l’asturianu del profesoráu, personal de servicios y alministración y alumnáu. Ente les midíes propuestes, campañes de sensiblización y conocencia de los drechos llingüísticos de los alumnos, l’usu del asturianu na rotulación y cursos d’asturianu pal personal, que sirva pa da-yos una formación al menos básica.