Educación

Izquierda Xunida, al traviés de la so Área Federal d’Educación, denuncia la falta de diálogu y l’improvisación” a la de desenvolver el currículu d’Educación Primaria per parte de distintos gobiernos autonómicos del PP, según el “intolerable retayu de l’autonomía pedagóxica de centros y profesoráu”. IX entiende que d’esta forma tuéyese gravemente la so capacidá de decisión sobre lo que tien d’aprender l’alumnáu y, inclusive, sobre cómo tienen de faelo, convirtiéndolos en pixinos preparadores d’exames esternos”.

Enrique Díez, coordinador d’esta área federal, esplica na web de la formación y en nome de los sos componentes que “la instrumentalización y orientación memorística del currículu, al pie de la estandarización de los aprendizaxes, promueven un aprendizaxe fragmentariu, repetitivu y fondamente ideolóxicu, onde tol alumnáu tendrá d’aprender les mesmes ‘verdaes consagraes’ establecíes pol poder central”.

La Comunidá de Madrid, que foi la primera en faelo, unvió a los miembros del Conseyu Escolar Rexonal un borrador del Decretu de Currículu de Primaria que “ta sirviendo de ‘espeyu’ nel que se miren el restu de comunidaes gobernaes pola derecha ‘popular’”, señala Díez.

Como cada añu, el Vicerrectorado d’Estensión Universitaria y Comunicación publica la so ufierta de Cursos de Branu, coles mires de proxectar la conocencia a la sociedá asturiana y dientro d’ellos los cursos de la Universidá Asturiana de Branu de l’Academia de la Llingua (UABRA) que se celebren en Cangas del 28 de xunetu al 8 d’agostu. Esti añu hai convocaos, amás de los cursos elemental y avanzáu, el cursu de capacitación pala traducción, unu d’ecoloxía y otru sobre l’emplegu didáuticu d’Internet.

El curus básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana.

Pela so parte, l’Avanzáu, col mesmu númberu d’hores, adiéntrase nel estudiu de la llingua asturiana estándar y la so presencia na sociedá de l’Asturies de güei, plantegando tamién situaciones comunicatives escrites y orales, más complexes, aspeutos de la cultura asturiana y de la Historia d’Asturies, un repás a la Lliteratura asturiana contemporánea y un pequeñu cursu de téuniques de creatividá lliteraria.

Cursos d’Afondamientu

No que cinca a los Cursos d’Afondamientu Cultural y Llingüísticu, como cada añu va celebrase un cursu de Capacitación pa la Traducción al Asturianu, de 35 hores, del 28 de xunetu al 2 d’agostu, y embaxo la dirección de la decana de Filosofía y Lletres de la Universidá d’Uviéu, Cristina Valdés, y la collaboración de los profesores Xosé Lluis García Arias, Ana Mª Cano y Xosé Antón González Riaño. Nel cursu preséntense davezu los presupuestos teóricos que rixen la traducción a una llingua minoritaria, teniendo en cuenta, de mou especial, l’exerciciu de tornes de testos lliterarios y periodísticos y de testos llegales y científicos. Y a esto xúnese una sesión monográfica sobre estratexes de traducción ingles-asturianu.

El cursu dedicáu a les nueves tecnoloxíes va ser esti añu nes mesmes feches que’l de traducción y va titulase “Internet como recursu educativu y cultural”. Nes sos 35 hores va sirvir pa ufiertar nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a los recursos qu’ufre la rede y pueda diseñar, llueu, xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi y tendrá profesores como Xulio Berros y Xabiel García Pañeda.

EL caberu de los cursos d’afondamientu lleva por títulu “Ecoloxía y Mediu ambiente y desenvolverase embaxo la dirección de Carlos Lastra.

Los Cursos tán abiertos a toes aquelles persones interesaes nes materies que s’imparten, independientemente de si se trata o non d’universitarios y la matrícula fadráse na Universidá, magar los cursos de la UABRA tendrán inscribise na see de l’Academia de la LLingua.

Nel casu de los alumnos y alumnes universitarios, la carga lectiva de los cursos ye homologable, nes enseñances non anovaes (a escastar), por creitos de llibre configuración -con calificación- cuando l’alumnu cumpla los requisitos d’asistencia y supere el procesu d’evaluación; o por creitos -ensin calificación- cuando l’alumnu cumpla’l requisitu d’asistencia (90% de les sesiones).

Tamién son susceptibles de reconocencia por creitos ECTS nos estudios de Grau y Máster, siempres que l’alumnu asista, a lo menos, al 90% de les sesiones, los cursos de conteníu cultural que cunten cola oportuna autorización.

El plazu de Matrícula vieno acabante d’entamar esti pasáu 21 d’abril, quedando supeditada la realización de los mesmos a qu’algamen un númberu de matricules suficiente, anulando aquellos que la so realización envalorese invidable, según el calendariu d’anulaciones. Les persones afectaes pola anulación del cursu, yá matriculaes, tendrán de dirixise a la Unidá de Matrícula pa regularizar la so situación.

Les normes de matrícula ya tan dispoibles na web d’Uniovi
Web de la Universidá colos Cursos d’esti 2014

L’alcuerdu que va regular la ellaboración de les llistes d’aspirantes a interinidá en Asturies sigue provocando’l refugu del colectivu interín asturianu. Tal que manifestaron nel so día los dos sindicatos, SUATEA y FE-CCOO siguen oponiéndose a lo que consideren ye un retrocesu nes condiciones llaborales d’esti profesoráu. La esperiencia docente ve amenorgáu’l so pesu a favor de la nota d’oposición quedando anulaos derechos que taben adquiríos y que son reconocíos pa el trabayadores d’otros ámbitos llaborales.

Sigún los dos sindicatos, “perdióse tamién la oportunidá d’establecer midíes que protexan a el profesores d’Asturies al igual qu’asocede nel restu d’alministraciones educatives. Al traviés de les movilizaciones consiguióse que l’amenaza d’un resolvimientu unillateral y tremendamente agresiva per parte de la Conseyería nun saliera alantre. Consideramos que sigue siendo necesaria la denuncia na cai y reivindicar la defensa de la estabilidá de los docentes interinos, non solo por xusticia sinón tamién pola implicación que tien pa’l mesmu sistema educativu. La precariedá va en contra de la calidá y, nun contestu xeneral de retayos, la defensa de la situación del profesoráu supon evitar un progresivu deterioru d’un serviciu públicu fundamental como ye l’educativu”.

Otru elementu más de la política que se ta aplicando contra’l colectivu interín “evidenciase nes condiciones nes que se produz la ufierta d’empléu públicu d’anguaño. L’alministración empeñar na execución de la oposición cuando yá se confirmó la non convocatoria nel restu de CCAA. La normativa dexa l’aplazamientu hasta tres años y amás hai precedentes d’ello. Esta constitúi otra de les reivindicaciones en defensa de la dignidá y contra la precariedá d’esti profesoráu”.

Los dos sindicatos, por mor de too esto convoquen, pola estabilidá d’interinos ya interines y contra l’actual alcuerdu que regula les llistes y por l’aplazamientu na execución de les oposiciones, una concentración esti próximu martes 29 d’abril a les 18 hores na Plaza d’España ante la Conseyería d’Educación.

Nuna nota de prensa asoleyada el llunes pela tardi, SUATEA denuncia que la Conseyería d’Educación da un paso más na precarización del colectivu interín y yera en forma dura con delles otres organizaciones sindicales: “Como temíemos dende SUATEA la Conseyería perpetró una performance esta mañana coles organizaciones sindicales qu’aceptaron entrar nel so xuegu. Baxo l’amenaza d’una resolución apocalíptica pal colectivu interín, volvió a presentar el cuartu borrador del alcuerdu con unes ruines modificaciones, les xustes pa que dellos, FETE y ANPE, tuvieren una mínima coartada pa roblar”.

Pa SUATEA, na práctica, esti alcuerdu supón dexar albentestate el futuru de los y les trabayadores de la enseñanza interinos: “Todo ello fáise xustificándose cola falacia de qu’asina dará opción de trabayar a aquelles persones que tán fuera del sistema. Sicasí lo que va pasar en realidá ye que va imponese una rotación continua de personal interín que nun favorez a naide: nin a los centros nin al alumnáu col contínuu cambiu de plantiyes qu’han de garrar esperiencia docente, nin muncho menos a quien s’enfrenten a una inestabilidá llaboral continua cola imposibilidá de facer los sos planes vitales”.

Nel comunicau, SUATEA diz que xustifícase la Conseyería na necesidá d’equilibrar el pesu de la esperiencia docente y les notes d’oposición, pero “esta afirmación nun ye cierta yá que la balanza desequilíbrase nel momentu en que se sobrevalora tener superao les dos pruebes de la oposición de cara al baremu de les llistes d’interinidá, metiendo amás empates inxustos onde hai una diferencia de calificaciones curiosa”.

Pequeñes concesiones, diz SUATEZ, “que nun despreciamos y que son namás que resultáu de la presión y movilización del colectivu interín, mazcaren la idea fundamental: meter la rotación nel empléu, endelgazando asina los xornales al torgar l’acumulación d’antigüedá y aumentando la precariedá llaboral”.

SUATEA oponse a esta nueva agresión de la Conseyería y va siguir apoyando y entamando movilizaciones del profesoráu interín pa denunciar esta actitú de los nuestros gobernantes que dicen ser d’izquierdes.

La Universidá d’Uviéu va dar accesu directu a los estudios de doctoráu a aquellos titulaos con planes d’estudiu que cunten con, siquier, 300 creitos ECTS. Esta midida, aprobada ayeri pola Comisión de Doctoráu, va dexar que los titulaos cimeros que remataron les sos carreres antes de la implantación del plan Bolonia puedan cursar un programa de doctoráu ensin tener que completar antes estudios de máster, un requisitu que la puesta en marcha del Espaciu Européu d’Educación Superior estableció como pasu imprescindible previu al doctoráu.

El pasáu mes de marzu, el Ministeriu d’Educación dexó en manos de les universidaes la interpretación de les condiciones d’accesu a los estudios de doctoráu pa los titulaos de los vieyos planes de segundu ciclu o ciclu llargu.

Cola decisión, la d’Uviéu va asitiase nel ranking más baxu de desixencia curricular palos futuros doctores lo que podría ser una decisión estratéxica permala a llargu plazu, anque seya económicamente rentable a curtiu plazu.

El Centru Internacional de Posgráu de la Universidá d’Uviéu va ufiertar pal próximu cursu 24 programes de doctoráu, diez d’ellos con una Mención escontra la Excelencia, en toles cañes de conocencia. Más de 800 alumnos tán cursando yá estos estudios. La midida va ser aplicable a partir del próximu cursu, nel que’l Centru Internacional de Posgráu de la Universidá d’Uviéu va ufiertar un total de 24 programes de doctoráu, diez d’ellos con una Mención escontra la Excelencia, en toles cañes de conocencia.

Anguaño, más de 800 alumnos tán cursando estos estudios que se distribúin en cinco grandes árees: arte y humanidaes, ciencies, ciencies de la salú, ciencies sociales y xurídiques ya inxeniería y arquitectura.

La decisión de la Universidá remata una vieya reivindicación de los estudiantes de los planes vieyos, que llevaben tiempu reclamando la nueva adaptación. La situación esistente hasta agora obligaba a los titulaos a siguir el camín marcáu dientro de l’adaptación de los estudios cimeros al Espaciu Européu de la Educación Cimera: el grau, de cuatro años; el máster d’unu o dos cursos más, xunto col doctoráu, lo qu’obligaría a un percorríu académicu de non menos d’ocho años.

El PSOE vieno acabante denunciar lo qu’atalante ye un permal funcionamientu de la Plataforma “Aula Internacional pa neños españoles nel esterior”, onde denuncien l’apaición d’anuncios de conteníu pornográfico. Darréu d’ello encamienten al Gobiernu a tomar midíes pa garantizar que los menores d’ente 7 y 10 años, alumnos d’estes aules virtuales de llingua y cultura españoles, puean aportar a materiales afayadizos y calidables.

Nuna entruga parlamentaria presentada esti día pola diputada per Pontevedra y secretaria d’Emigración del PSOE, Carmela Silva, espeyase la denuncia que plantegaron les madres y padres d’orixe español d’Alemaña, sollertando de la “inseguridá de la Plataforma Aula Internacional” a la que s’enfrenten los sos fíos d’ente siete y diez años.

Los menores a los que cinca la noticia son los alumnos de les Aules de Llingua y Cultura Españoles (ALCE) que vienen obligaos a usar esta ferramienta online, “yá que si nun lu faen son espulsaos del programa”, sigún la denuncia.

El PSOE esparde lo denunciao polos pás, que según desplica la diputada socialista na esposición de motivos de la so entruga, allugase ente ortres munches deficiencies en que demientres la realización de les actividaes “apaecen anuncios de conteníu pornográfico o de videxuegos”. Amás, “ta llena d’americanismos, vídeos que nun funcionen, enllaces que yá nun tán n’usu, exercicios que se bloquien o erros gramaticales”.

Izquierda Xunida y CC.OO coinciden en resabiar de qu’aumentara’l númberu d’universitarios con beca xeneral tal que aseguren dende’l ministeriu de Wert Demientres una xornada nel Congresu pa presentar l’Estudiu sobre la evaluación de los presupuestos de les Universidaes Públiques’, ellaboráu pol sindicatu, la diputada d’IX y vocera d’Educación, Caridad García Álvarez, diz que’l ministru y la so secretaria d’Estáu, Montserrat Gomendio, tienen de dimitir en culpando al profesoráu de les postreres y permales resultancies conocíes del Informe Pisa. La diputada d’Izquierda Xunida y vocera na Comisión d’Educación del Congresu, Caridad García Álvarez, amosó güei “series duldes” no que cinca al aumentu nel númberu d’universitarios con una beca xeneral nel presente curso, medría que, según los datos que diz remanar el Ministeriu d’Educación, taría en redol al 8%. Pela so parte, el secretariu xeneral de la Federación d’Enseñanza de CC.OO, Francisco García, afirmó sobre esti mesmu asuntu que “lo que nós constatamos y tamién nos constaten los rectores ye que’l númberu d’alumnos nes universidaes ta amenorgándose”, asina que “vamos oldear los nuesos datos colos del ministeriu, que nos tien bien acostumaos a rectificar”. La parllamentaria d’IX y el dirixente sindical fixeron estes valoraciones a los periodistes mientres un receso de la xornada entamada nel Congresu pol Grupu Parlamentariu d’IX, ICV-EUiA, CHA pa presentar l’informe de Comisiones Obreres sobre la evolución de los presupuestos de les Universidaes Públiques de 2010 a 2013. García Álvarez abondó na so rocea sobre los datos oficiales de les beques y señaló que’l ministeriu del que ye responsable José Ignacio Wert “tiennos descomanadamente acostumaos a ufiertar unos datos y depués tener que rectificalos porque resulta que son absolutamente falsos o, nel meyor de los casos, equivocaos”.

Una de les actividaes formatives de mayor interés pal profesoráu d’asturianu xunto colos cursos de branu de l’Academia de la LLingua ye la Sestaferia del Profesoráu que dende hai seis convocatories entama la Conseyería d’Educación y que se empobina cada añu a conocer propuestes metodolóxiques que favorecen el trabayu de les competencies llingüístiques y que nesta edición que va celebrase’l 25 d’abril quier ufrir una visión xeneral de los recursos TIC que puen usase p’ameyorar les competencies llingüístiques, al tiempu que practicar con ferramientes TIC que puen aplicase nes clases de Llingua Asturiana y Gallego-asturianu.

Los contenidos d’esta convocatoria van tener de ver coles estratexes pa desenvolver la competencia llingüística, recursos TIC pa trabayar competencies llingüístiques y dellos talleres de ferramientes TIC pal fomentu de la llectura, y pa trabayar la espresión oral y la espresión escrita.

El programa del cursu va ser el que vien darréu: 9:00 Recoyida de documentación 9:15 Inauguración de la Sestaferia 9:30 – 11:00. Ponencia: “Estratexes pa desenvolver la competencia llingüística”. Ana Basterra Cossío. Asesora del Berritzeguneak Leioa (Euskadi) 11:00 – 12:30. Ponencia: “Recursos TIC pa trabayar competencies llingüístiques”. Alberto García. Profesor del CPEB “ Pola de Allande” 12:30 – 13:00. Descansu 13:00 – 14:30. Taller 14:30 – 16:30. Xinta 16:30 – 18:00. Taller 18:00 – 19:30. Taller.

La recoyida de la documentación, la inauguración y les ponencies van tener llugar na Sala 2 de Llaboral Ciudá de la Cultura (entrada del Teatru de la Llaboral). Los talleres van realizase nel CIFP de la Llaboral, de forma simultánea, de mou que los y les asistentes puean rotar pente los tres a lo llargo’l cursu.

Los talleres van ser los que vienen darréu:

• Taller de ferramientes TIC pal fomentu de la llectura. Xulio Berros Reinoso. Profesor CP “El Lloréu”. Xixón.

• Taller de ferramientes audiovisuales y TIC pa trabayar la espresión oral. Pablo A. Quiroga Prendes. CP Manuel Martínez Blanco. Xixón.

• Taller de ferramientes TIC pa trabayar la espresión escrita. Pablo Rodríguez Medina. Profesor IES “David Vázquez”. La Pola Llaviana.

La 2ª xornada de la VI Sestaferia 2014 fadráse’l miércoles 25 de xunu.

Les Asamblees d’Estudiantes y el Conseyu d’Estudiantes de la Universidá d’Uviéu entamen esti xueves de magar les 12:00 una manifestación con entamu na Plaza América d’Uviéu, con un llema qu’amuesa nidiamente la situación na que s’alcuentra la reivindicación estudiantil nesti momentu: “La gota qu’apinó’l vasu”. L’envís de la mesma ye refugar los numberosos retayos que vien sufriendo la institución académica, y la correspondiente perda de servicios no cualitativo y cuantitativo.

Les beques o’l zarru de servicios como les biblioteques, la perda de puestos de trabayu en cuantes a personal alministrativu y de servicios, o nel tarren docente l’avieyamientu de la plantiya, l’aumentu de carga docente, perda de poder alquisitivu, o esaniciu de places son delles de les causes de la convocatoria.

L’alumnáu desixe una Universidá d’Uviéu abierta, accesible a tol pueblu asturianu y de calidá, “na que tanto trabayadores como estudiantes tengamos voz y votu a la hora de tomar decisiones”. Poro, llamen a siguir lluchando escontra l’esmantelamientu d’UniOvi, y por un modelu educativu de y pal pueblu.

La Xunta Pola Defensa de la Llingua Asturiana sigue apostando pola organización de cursos empobinaos al deprendizaxe de la llingua asturiana y tres del cursu entamáu selmanes atrás nel CS Sestaferia de Xixón, dirixíu al deprendizaxe de la llingua asturiana dende un nivel básicu, acaba empobinase a la convocatoria d’otru pa la enseñanza dende una perspeutiva avanzada.

L’entamu del nuevu cursu ta previstu pal martes 8 d’abril., con una duración de 40 hores, desenvolviéndose los martes y xueves de 19 a 21 hores. El llugar escoyíu ye’l Conceyu Abiertu, asitiáu na Cai La Gascona 12, baxu. Uviéu. El preciu matrícula+materiales ye de 20€ pa socios y 30€ non socios. La Xunta pola Defensa de la Llingua Asturiana ye una entidá acreitada pola Conseyería d’Educación pa la formación permanente del profesoráu.