Educación

El coordinador xeneral d’IX Asturies, Manuel González Orviz, pidió güei que s’estudie la puesta en marcha d’una unidá de bachilleratu en Zarréu, dada la situación xeográfica y la climatoloxía de la zona.

Según la concejala d’IX nel conceyu, Susana Rodríguez Sal, nestos momentos la población escolar que quier realizar estudios de bachilleratu esta obligada a matriculase en Vil.lablinu, yá na Comunidá Autónoma de Castiella y Llión.

Nun duru comunicáu asoleyáu esti día, SUATEA acusa al Ministeriu d’Educación de pretender zarrar la puerte a la creación de la especialidá docente de Llingua Asturiana. Jose Ignacio Wert aconceyó esta selmana cola comunidá educativa dientro de la Conferencia Sectorial onde se trató’l nuevu decretu d’especialidaes docentes y “la redacción d’esti decretu impide cumplir coles aspiraciones de dignificación profesional del colectivu de docentes de llingua asturiana”.

Sigún SUATEA, la redacción d’esti nuevu decretu nun s’axusta al textu de la LOMCE, onde’l ministeriu aceptó añadir la Disposición Adicional 38.6 (*) pa permitir que les comunidaes autónomes con llingües ensin calter d’oficial pudiesen mantener la so ufierta educativa. “Esti ye’l casu d’Asturies, onde la presencia de la llingua asturiana tien presencia curricular en tolos niveles educativos y está regulada por la Lley de Usu y contemplada nel Estatutu d’Autonomía”, apunten dende’l sindicatu asturianu.

La situación anguaño ye complicada, y ye necesaria pa SUATEA “l’actuación urxente de tolos axentes implicaos, Academia, Conseyería, sindicatos educativos, asociaciones d’estudiantes y de madres y padres…. La última posibilidá de modificar y adaptar esti decretu a la demanda de la sociedá asturiana pasa pol Conseyu Escolar del Estául convocáu pal 3 de febreru que vien”.

Hai que recordar que’l Plenu del Conseyu Escolar del Estáu yá se pronunció nel mes de setiembre favorable a la creación d’esta especialidá a instancies de STEs, confederación de la que forma parte SUATEA. Esti muérganu, que representa a tola comunidá educativa del Estáu, recomendó-y al Ministeriu la creación de la Especialidá de LLingua Asturiana. Pero agora el Ministeriu mira pa otru llau y desatiende la desixencia del mayor muérganu consultivu del Estáu en materia educativa.

Esta demanda histórica de la sociedá asturiana nel so conxuntu vien avalada por inumerables peticiones tanto sindicales, sociales como institucionales. La Xunta Xeneral d’Asturies pronuncióse favorable a la so creación na primavera pasada, asina como la Xunta de Personal Docente d’Asturies que se tien manifestao nel mesmu sentíu en delles ocasiones. Asina mesmo, la propia Conseyera d’educación Ana González tien manifestao en reiteraes ocasiones que yera un de los compromisos que quería cumplir enantes d’acabar la presente llexislatura col enfotu de dignificar y normalizar la presencia de la llingua asturiana nel sistema educativu.

SUATEA ya pidió una reunión urxente cola Conseyera d’Educación onde abordar esti asuntu, nel que ye perimportante que tol gobiernu asturianu asuma les sos responsabilidaes de lluchar pola nuesa llingua. SUATEA nun va parar hasta algamar que, a pesar de les torgues puestes dende el Gobiernu Estatal y el pocu puxu amosau pol gobiernu asturianu na defensa del patrimoniu cultural y llingüisticu de nueso, l’asturianu seya una Especialidá docente de plenu drechu nel camín d’algamar la oficialidá.

La Univerisdá d’Uviéu vieno acabante d’algamar un alcuerdu col Executivu que garantiza un marcu de financiamientu estable pa los próximos cuatro años (2015-2018) y que podría suponer 10 millones d’euros adicionales namái nesi periodu según los cálculos del Principá y 7,2 según la Universidá, cuando’l presupuestu asturianu yá recueye 126 millones pa la institución. Asina lo anunciaron ayeri’l conseyeru de Presidencia, Guillermo Martínez, y el mesmu Gotor tres la xunta del Conseyu de Gobiernu, flanqueados pola directora xeneral d’Universidaes, Miriam Cueto, y pol vicerrector de Planificación Económica, Santiago Álvarez.

El pactu, algamáu tres dos meses de bayuroses negociaciones, garantiza esa estabilidá financiera de la institución, pero nun ye más que “un puntu de partida por que una comisión mista de siguimientu trabaye d’equí p’arriba pa cerrar un contratu-programa y enllantar un modelu de financiamientu por oxetivos que tenga en cuenta la fuerza académico de la Universidá y el so llabor investigador pa llograr una mayor eficiencia nel gastu”, precisó Martínez. Colo que’l Principáu va incentivar los ésitos de los investigadores asturianos.

Pero hasta qu’esa antigua reclamación vaya concretándose, lo único seguro ye que se va realizar una aportación estraordinaria de 1,2 millones que va dexar a la Universidá concluyir l’exerciciu ensin remanente negativu de tesorería y, poro, “encarar los deslizamientos de gastos derivaos de l’antigüedá y productividá del personal de la institución a lo llargo d’anguaño”.

La Secretaría de la Muyer de SUATEA facía esti miércoles la presentación de la edición númberu 11 del calandariu “Tiempu de muyeres y muyeres nel tiempu” dedicáu esta vegada a les creadores d’opinión. Esti calandariu da encontu a una propuesta educativa pa trabayar la coeducación nos centros educativos de tol estáu que surdió con un oxetivu y un envís concretu: “Reconstruyir la historia incompleta conocía y tresmitida tanto en llibros de testu, curriculum educativu, formación personal del profesoráu y alumnáu pa, a partir d’ella, visibilizar énte la comunidá educativa les aportaciones de les muyeres de tolos tiempos a la historia, l’arte, la ciencia, el conocimientu, la xusticia social, les cuales se-yos negaron y se les privó del reconocimiento que merecen pol saber androcéntricu de la nuestra cultura”.

Por eso, “recuperamos los sos nombes, les sos vides, les sos histories y les sos aportaciones, y a partir d’estes, proponemos una necesaria reflexón critica que contribuya a la tresformación del imaxinariu colectivo, del formatu d’estereotipos de xénero que tovía güei siguen asitiando a les muyeres fundamentalmente nel ámbitu de la dependencia y na subordinación y que perpetúen llaceries como la violencia de xéneru na nuestra sociedá”.

Na presentación amosose qu’esti calandariu “siguiendo les pautes confederales de respetu a la diversidá llingüística, edítase en toles llingües oficiales na Confederación Intersindical, incluyendo l’asturianu, y anque per dellos años, aquellos onde la coeducación y la igualdá de xéneru yeren valoraes pol gobiernu, recibió ayuda económica del Institutu de la Muyer, desde hai dellos años finánciase dafechu pola Confederación Intersindical a la que pertenez SUATEA y espárdese per tolos centros educativos del estáu de baldre, y nes últimes ediciones amás en múltiples centros de trabayu, qu’en conociéndolu, quiérenlu”.

Una parte fundamental del calandariu son les actividaes propuestes, organizaes por etapes y ciclos y dándo-y siempre atención a la diversidá del alumnáu. Por eso, sicen en SUATEA “trabayamos con distintos materiales, recursos y metodoloxíes”. Esti calandariu permite trabayar nel aula a lo llargo d’un añu coles efemérides, polo menos, de 365 muyeres distintes y les sos aportaciones de muyeres. Da pie a conocer y conmemorar fechos y díis que fueron enforma significativos na llucha pola igualdad, el respetu a la diversidá sexual y la identidá de xéneru, y “foméntanos l’apreciu pola paz, la solidariedá, los derechos humanos, y el refugu a la violencia contra les muyeres, de toa triba, d’donde venga”.

Tiempu de muyeres, mujeres nel tiempu 2015, recueye les aportaciones de 36 muyeres que formen parte del mundu de la comunicación y de la información, un ámbitu esti especialmente masculinizáu pero nel que y dende distintos medios elles comparten y participen nesi llamáu 4º poder que tien la capacidá de mover mases, tresformar conciencies, y crear opinión, daqué tremendamente importante.

Les comunidaes autónomes d’Andalucía, Canaries y Asturies volverán pidir al ministru d’Educación, Cultura y Deporte, José Ignacio Wert, na Conferencia Sectorial d’Educación que se celebra esti miércoles, que retarde la implantación de la Llei Orgánica de Meyora de la Calidá de la Educación (LOMCE) na Educación Secundaria y en Bachilleratu porque consideren que nun hai tiempu nin dineru abondo p’aplicala y qu’esisten una serie de “llagunes”. Y Asturies va xuntar a esi pidimientu la desixencia de que nel real decretu d’especialidaes del oficiu docente pueda definise como especialidá l’asturianu.

Nuna rueda de prensa conxunta, el conseyeru d’Educación y Cultura de la Xunta d’Andalucía, Luciano Alonso, afirmó que’l ministru puede escoyer ente “faer les coses bien y de forma consensuada” coles comunidaes o “siguir ampliando la sienda de los disparates”, tres empecipiase la implantación en tres cursos d’Educación Primaria y na Formación Profesional Básica nel cursu 2014-2015.

Alonso criticó la “azotada” puesta en marcha nel actual cursu académicu en Primaria y la desigualdá que, na so opinión, favoreció la llei ente los alumnos. Sobre la FP Básica, dixo que fracasó ” nos sos oxetivos”, porque esti cursu quedaron vacantes “miles de places”, y que les autonomíes nun vieron “nin un solu euru” de los prometíos pol Ministeriu pal so financiamientu. Nesti contestu, apuntó que la LOMCE ye la primer llei d’educación que s’aprueba n’España “ensin memoria económica”.

Pela so parte, la directora xeneral de Formación Profesional, Desenvolvimientu Curricular ya Innovación Educativa del Principáu, Victorina Fernández, afirmó que n’Asturies tán “trabayando a estazón” nos desenvolvimientos curriculares pero nun lleguen a tiempu.

Igualmente, aseguró que la llei tien “serios defectos” técnicos y que ente los centros educativos y les families xeneróse “muncha molición”, a lo que se suma que’l financiamientu “nun ta clara” porque la fórmula ufiertada pol Ministeriu, usar el Fondu Social Européu, ye una solución “coyuntural”.

Per otru llau, Fernández dixo que va solicitar de nuevu a Wert que nel real decretu d’especialidaes del oficiu docente pueda definise como especialidá l’asturianu. “Tenemos la ufierta de la llingua en tola comunidá autónoma y los profesores que lu imparten precisen estabilidá”, comentó.

Los estudiantes de les universidaes navarres fueron los que más creitos matriculaos aprobaron el cursu 2011-2012 (el 83,1%) nos estudios de Grau de les universidaes presenciales mentantu que, los que realicen los sos estudios nes Isles Canaries y n’Asturies fueron los qu’aprobaron un menor porcentaxe de creitos matriculaos (64,5% y 67,3%).

En xunto, los universitarios españoles aprobaron trés de cada cuatro creitos matriculaos n’universidaes presenciales (75,2%), ente que la tasa de creitos aprobaos nes universidaes non presenciales ye del 45,8 per ciento.

Los datos correspuenden al informe añal ‘Les universidaes españoles. Una perspectiva autonómica. 2014’ publicáu pola Fundación Conocencia y Desenvolvimientu (CYD), qu’analiza los datos sobre los últimos cursos del Ministeriu d’Educación, Cultura y Deporte xunto colos d’otres fontes, ente les que figuren el INE, el Serviciu Públicu d’Empléu Estatal, la Oficina Española de Patentes y Marques (OEPM) y el grupu SCImago.

La media de “rendimientu” de los estudiantes de grau n’universidaes presenciales foi del 75,2 per cientu. Tres les universidaes navarres, aquelles que los sos alumnos llogren un mayor índiz d’aprobaos son el catalanes (80,2%), valencianes (78,2%) y les madrilanes (77,9%), siguíes de les del País Vascu (77,4%) y Castiella y Llión (77,2).

Sicasí, nel llau opuestu de la llista, amás de les universidaes non presenciales y les de les Isles Canaries, figuren les d’Asturies (67,3%), Andalucía (69,2%) y Murcia (70,7%).

Per otra parte, xuntu coles universidaes non presenciales (37,4%), les úniques universidaes que superen la media d’abandonu d’estudios del 19% son les de les Isles Baleares (19,9%), anque les de La Rioxa (18,3%) son les siguientes colos valores más altos.

Les universidaes navarres, per otra parte, son les que presenten un menor índiz d’abandonu (8,8%) xuntu coles de Castiella-La Mancha (9%), Castiella y Llión (9,7%) y Cantabria (9,8%).

Dende va unos díes yá puede vese na páxina web del Ministeriu d’Educación el proyectu del Real Decretu qu’establez les especialidaes de los cuerpos docentes d’ESO y onde nun se ponen torgues a la especialidá d’asturianu. Ye’l nuevu dempués de que l’anterior fuera anuláu pol departamentu de José Ignacio Wert ante’l fuerte refugu amenáu porque proponía que el profesores impartieren asignatures distintes a les de la so especialidá.

El nuevu proyectu va tar a información pública hasta’l 13 de xineru, víspora de la Conferencia Sectorial d’Educación y esti día SUATEA alvertía de que’l documentu “nun foi consultáu coles comunidaes nin unviáu. Tampoco pasó pol Conseyu Escolar del Estáu nin se compartió colos sindicatos”. UXT que ta analizando’l proyectu tamién faló de falta d’información a los medios de comunicación.

SUATEA nomó esta forma d’actuar de «escandalosa» y señaló que 2l’anterior yera tal disparate, que cualquier cambéu ye meyor”. La nueva materia de Cultura Científica va ser asignada a los docentes de Bioloxía, Xeoloxía, Física y Química, “polo que sigue la lóxica de les especialidaes de Ciencies”. Coles mesmes, “profesores d’idiomes nun van dar Llingua y Lliteratura, sinón la so especialidá, y caltienense les asignatures de Llatín y Griegu, suprimíes na primer propuesta del Real Decretu. SUATEA deduz, tamién, que nun se ponen torgues a la especialidá d’asturianu, polo que se dexa’l camín abiertu a que’l Principáu tome por fin una decisión al respective.

Iniciativa pol Asturianu, en collaboración col Conceyu Universitariu pol Asturianu (CUPA) abre’l plazu p’apuntase a la sesta edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y el Conseyu de Mocedá de Xixón. Los cursos que se van facer una edición más na sede del Conseyu de la Mocedá de Xixón (Avda. Manuel Llaneza, 68), van entamar a partir del 26 de xineru, cuntando con 36 hores llectives cada nivel.

El cursu va celebrase los llunes y miércoles, de 17 a 19 hores nel casu del nivel inicial, y de 19 a 21 hores pal nivel II, acabando’l 25 de marzu de 2015. El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El nivel II ta empobináu a persones con una conocencia más fonda del idioma, que yá ficieren dalgún cursu enantes. El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu. Les persones que nun puedan asistir por tar fuera d’Asturies o por razones d’otru tipu van poder siguir el cursu a distancia.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, yá seya llamando o al traviés de Whatsapp o Telegram, hasta’l 25 de xineru de 2015.

Dende Iniciativa pol Asturianu animen a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.

Amás, hai delles novedaes nos cursos a distancia, porque nesta sesta edición de los cursos abrese una plataforma d’enseñu na rede, empobinada a los alumnos y alumnes que siguen los cursos en llinia. Un preséu que va permitir, sigún l’asociación, ameyorar abondo los procesos de deprendizaxe, adaptándolos meyor a les nueves tecnoloxíes.

L’Asociación Iniciativa pol Asturiano denuncia esti día lo que se pue comprobar acabante facese públicu’l currículu aprobáu pa les enseñaces de 0 a 3 años n’Asturies: “el testu ye, a xuiciu d’Iniciativa pol Asturianu, una amuesa más de cómo l’alministración asturiana fai tolos posibles por espulsar a la llingua asturiana del sistema educativu” y responsabiliza d’ello a la COnseyera d’Educación. Esti fechu ye bien grave precisamente porque nel primer nivel de les enseñances, cuando los neños lleguen de casa en munchos casos cola llingua asturiana como primer llingua, ye cuando la escuela tien un efectu más perxudicial pa que los rapacinos caltengan l’usu de la llingua asturiana”.

El testu cita a la cultura asturiana d’una forma indigna, asitiándola no anecdótico y na “curiosidad”, evitando facer un tratamientu tresversal de les competencies llingüístiques de los neños y les neñes. Dende Iniciativa pol Asturianu solicitamos la inmediata rectificación d’esti testu, sustituyéndolu por unu nuevu nel que la llingua asturiana tenga un tratamientu dignu y acordies colo que marca la llexislación asturiana, que precisa la necesidá d’incluyir al asturianu en tolos niveles del enseñu. Dellos de los párrafos del currículu: “Aproximación y curiosidad a los acontecimientos sociales y culturales que suceden a su alrededor haciendo hin­capié en alguna manifestación propia de la cultura asturiana” “Interés y disfrute con la escucha de cuentos, relatos, leyendas, poesías, rimas, canciones, refranes, trabalenguas o adivinanzas, también de la tradición cultural asturiana, participando activamente en juegos lingüísticos.”