Educación

L’alumnáu asturianu salió ayeri pela tarde a la cai en contra del amenorgamientu de los graos de cuatro a tres año y l’ampliación de másteres d’unu a dos y güei volvieron faecolo con una protesta doble , en Xixón, dende la plaza del Institutu, y n’Uviéu, dende la de la Catedral. Con pancartes contra la reforma del ministru Wert, l’alumnáu asturianu calificó d’ésitu la segunda xornada de fuelga convocada pa güei. Según el Sindicatu d’Estudiantes, el paru tuvo un siguimientu del 95% n’ESO y FP, y de un 75% nes facultaes universitaries.

N’Uviéu, na plaza d’España, onde s’alluga la Delegación del Gobiernu, lleéronse manifiestos contra esta reforma universitaria y diversos colectivos amosaron el so sofitu a les movilizaciones estudiantiles.

La fuelga n’Uviéu foi secundada en mayor midida nos campus del Milán y Llamaquique, mientres, como ye vezu, les facultaes allugaes n’El Cristu amosaron menos sofitu al paru convocáu. La organización sorrayó que munchos institutos d’Enseñanza Secundaria Obligatoria amosaron que “les clases quedaron ermes”. Pal alumnáu esti altu siguimientu de la fuelga de los alumnos d’enseñances medies reflexa la so “esmolición” pola incidencia qu’esta reforma va tener nos sos estudios y na economía de les sos families.

Les protestes de güei xúntense a les d’ayeri con una manifestación n’Uviéu qie terminó con 25 alumnos nel Edificiu Históricu de la Universidá d’Uviéu coles mires de “aldericar sobre l’estáu de la institución académica y faer propuestes pa llograr una Universidá meyor”.

La Xunta Estudiantil Asturiana afrontaba esti xueves la so primer convocatoria de fuelga, que coincide cola entamada n’otres naciones del Estáu español, asina como la entamada posteriormente a nivel estatal pol SE. Pa ello, dende la XEA llevaben una selmana de trabayu d’axitación y propaganda.

Amás d’ello, desendolcaron un bloque críticu estudiantil na manifestación entamada pol SE n’Uviéu dende la plaza la catedral a les 12:00 hores, ya que consideren que “los plantegamientos y alternatives, choquen coles posiciones y práutiques de la organización convocante, el Sindicato de Estudiantes, pero ye al mesmu tiempu imprescindible facer ver al estudiantáu les alternatives esistentes”.

Ensin convocar a la mesa sectorial de negociación, el ministru Wert anunció pal próximu cursu un nuevu proyectu pa la contratación como becarios de titulaos universitarios como sofitu en Primaria pa los centros con ncesidaes especiales y SUATEA atalanta que ye “un nuevu engañu qu’implica la falta de soluciones xustes y afayadices a l’actual realidá educativa, dao que nin va aplicase en tolos centros nin los criterios de selección espuestos van garantizar la profesionalidá practicada y demostrada pol profesoráu despidíu, sustituyéndolo por becaries y becarios con empléu precariu”.

Sigún el sindicatu “pal ministru, cualesquier solución barata ye bona pa iguar los problemes educativos nes que la so política de retayos metió a la escuela pública, faciendo de menos y rebaxando otra vuelta más con criterios economicistes y mercantiles la calidá del sistema educativu”. Na so opinión “los 22 millones que va suponer el programa y les 2000 places a ufiertar son un bofetón más pa los más de 36.000 profesores y profesores interinos despidíos de magar l’aplicación del RD 14 de 2012 de midíes urxentes de racionalización del gastu públicu nel ámbitu educativu”.

Esta midida, considerala SUATEA “insuficiente a les clares p’atender de forma integral al alumnáu con necesidaes educatives especiales, ye un nuevu engañu qu’implica la falta de soluciones xustes y afayadices a l’actual realidá educativa, dao que nin va aplicase en tolos centros nin los criterios de selección espuestos van garantizar la profesionalidá practicada y demostrada pol profesoráu despidíu, sustituyéndolo por becaries y becarios con empléu precariu”.

Dende SUATEA esixen al ministru d’Educación “la retirada d’esti proyectu xunta los retayos educativos puestos en marcha nesta llexislatura, la recuperación de los puestos de trabayu suprimíos, que se paralice l’aplicación de la LOMCE ensin complicar entá más el presente y el futuru de la educación pública nesti añu electoral y que convoque con urxencia la mesa sectorial de negociación”.

Esixen coles mesmes a la Conseyera asturiana d’Educación que nun aplique esta midida y qu’invierta el presupuestu amañosu p’atender a la diversidá d’alumnáu con criterios d’igualdá y equidá, tomando como referente al profesoráu espulsáu del sistema de resultes de los retayos educativos y nun xenerando empleos precarios mazcaraos de beques formatives.

Izquierda Xunida amuesa’l so “total sofitu” a les movilizaciones y fuelga estudiantil de la próxima selmana nun comunicáu qu’asoleyaba esti día na so web y na que se llantaba contra’l Decretu 3+2’ y la reforma universitaria de wert. Nesi comunicáu Enrique Díez, coordinador de la Área Federal d’Educación, señala que “IX denunció dende antes mesmu de la so aprobación esta norma porque, ente otros motivos, l’accesu a la formación cimera va suponer costos inasumibles pa la gran mayoría de les families ante l’eleváu costu de los másteres, van esaniciase carreres y va despidise profesoráu”.

Izquierda Xunida, al traviés de la so Área Federal d’Educación, amuesa nesti comunicáu’l so “total sofitu” a la convocatoria de movilizaciones y fuelga estudiantil pa los próximos díes 25 y 26 contra’l Decretu 3+2’, de la que “secunda’l llamamientu a tola comunidá universitaria, movimientos sociales y ciudadanía pa esixir la derogación d’esti decretu de supuesta ‘ordenación’ de los estudios universitarios”.

Enrique Díez señala tamién que “IX denunció dende antes mesmu de la so aprobación esti Decretu 3+2’ porque, ente otros motivos, l’accesu a la formación cimera va suponer costos inasumibles pa la gran mayoría de les families ante l’eleváu costu de los másteres. Esta norma supon, amás, la eliminación de carreres, la devaluación del títulu de grau y el despidu de profesoráu universitariu”.

Como despliquen n’IX el mentáu decretu pol que se modifiquen les enseñances universitaries y les enseñances oficiales de doctoráu, “va dexar a les universidaes enllantar carreres de 3+2 -tres años de grau y dos de máster, frente al sistema actual de 4+1- lo que supon una nueva imposición de José Ignacio Wert. El Gobiernu dio-y vía llibre pol empinamiento del ministru, pese al varapalo al so conteníu per parte del Conseyu d’Estáu, magar la manifiesta oposición de la Conferencia de Rectores y Rectores (CRUE) y ensin qu’hubiera un alderique cola comunidá universitaria. Tampoco lo hubo a nivel políticu nin social y nun esiste una evaluación de la implantación d’esti cambéu lexislativu de los nuevos graos y una xustificación creíble de les propuestes”.

Esta fin de selmana, SUATEA vieno acabante d’asoleyar un comunicáu nel que diocen considerar a tolos efectos la ufierta de places convocaes nes oposiones docentes d’esti 2015 como “insuficiente, en cuantes que nun respuende a les necesidaes reales teniendo en cuenta que se superen les 300 xubilaciones a lo llargo del 2014. Aumentáronse 30 places con respecto de la propuesta inicial pero esto nun igua’l problema real de les plantiyes. Con esta ufierta sigue afondándose na precariedá de la plantiya asturiana de docentes, una y bones la tasa d’interinidá global va siguir aumentando”.

Dende SUATEA esixen “que se cubran el 100% de les places y demandemos nuevamente facer una xunta onde tratar toes aquelles cuestiones rellacionaes col desenvolvimientu de les oposiciones qu’esmolecen al colectivu interín. L’alministración va imponer finalmente’l so criteriu cola oposición de toles organizaciones sindicales. Ye esta una forma d’actuar que se ta convirtiendo en vezu y que nun creemos que favoreza’l clima de necesariu consensu pa caltener con dignidá la calidá del sistema educativu asturianu nun contestu de crisis”.

Amás, añeden nel comunicáu que, “en defensa de colectivu de profesoráu interín, en SUATEA esmolécennos amás les consecuencies que va tener l’aplicación del nuevu alcuerdu d’interinos, col que nun va ser posible aportar a llistes de nueves especialidaes o onde nun se tomen midíes de protección que sí se dan n’otres Comunidaes Autónomes. Vamos siguir esixendo la eliminación d’esos requisitos que los ponen en posición de desventaxa y desigualdá frente al restu”.

El Gobiernu asturianu y la Universidá d’Uviéu roblaron güei el conveniu marco de financiamientu estable pa los próximos cuatro años (2015-2018) que va suponer 10 millones más de sofitu económicu hata 2018 y va dexar l’afitamientu la plantiya de la institución académica, qu’anunció la convocatoria de quince places pa nuevos docentes. El presidente del Principáu, Javier Fernández, y el rector de la Universidá d’Uviéu, Vicente Gotor, roblaron esti alcuerdu nun actu nel que’l xefe del Executivu asturianu anunció la so voluntá de caltener “conxelaos los precios públicos na primer matrícula”.

El Conseyu de Gobiernu aprobó’l pasáu 14 de xineru l’aportación de diez millones d’euros pa los cuatro próximos años pa que la Universidá faiga frente a los sos pagos al personal y beques, principalmente.

Dientro del alcuerdu hai una aportación de 1,2 millones con cargu a 2014 pa que la Universidá reponga’l 50 per cientu de los profesores que se xubilen, lo que la dexará la contratación de quince nuevos docentes nuna convocatoria anunciá por Gotor pa dempués de Selmana Santa.

“Un alcuerdu bien importante que, anque nun cumple toes los prestos del equipu rectoral a lo menos salva la nuesa mayor prioridá, el relevu xeneracional y l’afitamientu de la plantiya”, sorrayó Gotor.

Pela so parte, el presidente del Principáu destacó que mientres el so mandatu cumplió col so compromisu de buscar una solución estable pa garantizar el financiamientu de la Universidá d’Uviéu nunos momentos, según aprofió, “d’escasez presupuestaria”.

“Toi convencíu de qu’esti alcuerdu, magar les sos llimitaciones, respuende al oxetivu deseyáu. Va Ser bonu pa la Universidá, pa los sos profesionales y los sos estudiantes y, por tanto, positivu pa tolos asturianos”, dixo’l rector.

Al so xuiciu, el conveniu “ufierta seguridá económica a la Universidá, ameyora la planificación del funcionamientu de la educación cimera y amonta les partíes destinaes a les beques y ayudes pa los estudiantes, na midida na que s’alce la capacidá de gastu de los presupuestos del Principáu”.

Fernández resaltó qu’esti alcuerdu añede “un nuevu finxu, porque refuerza l’apueste materializáu nos presupuestos p’anguaño, qu’inclúin, namá nel ámbitu de la conseyería d’Educación, más de 126 millones pa la Institución”.

El sindicatu educativu SUATEA, asoleyaba esti día so convencimientu de qu’otra vuelta la Conseyería d’Educación “actúa de forma inaceptable nel diseñu de les plantiyes de los centros”. Depués de face-y llegar a los centros educativos una propuesta de plantiyes pal próximu cursu con namás 48 horas pa presentar alegaciones, daqué yá inalmisible, “agora éstos tópense con respuestes que dexen plasmaos a un bon númberu d’equipos directivos”.

Dende SUATEA, como tolos años, “punxímonos en contactu coles direcciones de los centros pa que mos fagan llegar copia de les sos alegaciones. Pues bien, esti añu, amás, tamos recibiendo la respuesta que-yos dieron dende la Conseyería. Ésta déxamos plasmaos yá qu’amuesa les formes inaceptables que determinaos cargos de la Conseyería usen como métodu de trabayu. Delles direcciones de centros educativos tán recibiendo como respuesta, depués de facer les alegaciones pertinentes nel plazu tan ruinu marcáu pola Alministración, que non sólo NUN atienden les sos peticiones en munchos casos, sinón que, nuna “segunda ronda” modifícase la propuesta inicial fecha pola administración y comunicada oficialmente a los centros”.

Nesta “segunda ronda” vía corréu llectrónicu, elimínense places que nun fueren oxetu de discutiniu na primer propuesta de l’alministración y que polo tanto son necesaries pal funcionamientu del centru, según despliquen dende SUATEA.

Amás, n’otros casos, hai centros educativos nos que l’Alministración ta creando places nesta “segunda ronda” que nin el centru solicita, nin quier, por nun haber horariu pa esti profesoráu.

L’Alministración depués de publicar una propuesta de plantiyes y zarrar el plazu d’alegaciones ta criando o eliminando places ensin atender les necesidaes reales de los centros educativos plantegaes dende les direcciones: “Nun fai falta dicir que la negociación colos sindicatos brilla pola so ausencia, yá que tovía nun recibimos comunicación nenguna d’esti procesu per parte de la Conseyería”.

SUATEA denuncia públicamente la forma de trabayu de determinaos cargos de la Conseyería d’Educación pa los que nun existen plazos, nin formes, que crean o destrúin places como o cuando-yos paez ensin atender a nengún criteriu pedagóxico xustificáu dende los centros educativos, que son los que realmente conocen les necesidaes del centru. Los criterios qu’usen son desconocíos y el diálogo dase namás al traviés del corréu llectrónicu, ensin dar posibilidá a los centros de defender cara a cara los sos plantegamientos.

SUATEA desixe’l cese de la destrucción d’empléu estable n’Asturies, que se sienta a los equipos directivos y s’abra una verdadera negociación sindical qu’acabe con una situación inédita que namás perxudica a la escuela pública y a les plantiyes docentes.

SUATEA vieno acabante denunciar la etenra incertidume na que la Conseyería d’Educación asitia tolo que cinca a les oposiciones, tres de la reunión fecha güei cola Alministración respecto a la convocatoria d’emplegu públicu porque “comunícasenos que la intención pela so parte ye convocar un total de 158 places pa les especialidaes de Primaria, Infantil, Pedagoxía Terapéutica, Audición y Llinguax ya Inglés.

Sigún diz SUATEA, “tanto’l númberu de places como les especialidaes mentaes puen ser oxetu de modificaciones en función del procesu negociador que tienen intención d’abrir d’equí a poco”.

Anuncióse tamién la intención de convocar places pal Cuerpu d’Inspección anque la so execución nun podia facese esti cursu. Y dende SUATEA llamenten “nun poder ufrir a los opositores una información más detallada o definitiva pesie a les feches nes que mos topamos. Pensamos que prorrogar esta situación sigue causando un perxuiciu a les persones que tán estudiando cola incertidume de si saldrá la so especialidá o non y el númberu de places. Llamentamos tamién que’l númberu de places totales que se convoquen nun atiendan a les necesidaes reales de les plantiyes nes que’l porcentaxe d’interinidá ta alredol del 25%. La tasa de reposición del 50% que s’impón nun permite, nin siquier, cubrir les xubilaciones producíes en Primaria esti últimu añu, colo que siguen acumulándose recortes y mengua d’empléu estable”.

Na reunión SUATEA faló de la necesidá d’abordar una serie de peticiones sobre la realización de les pruebes ya iguar una serie de duldes que los interesaos mos faen llegar: “L’alministración comprométese a convocar próximamente una reunión onde atender estes demandes”.

En SUATEA esperen que’l procesu de negociación sirva polo menos pa poder subsanar dellos problemes vivíos na última convocatoria d’oposiciones y se llogren delles reivindicaciones que davezu se-y planteguen a l’alministración”.

Nun comunicáu conxuntu asoleyáu esta mañana, los sindicatos mayoritarios na educación asturiana, CCOO, FETE-UGT y SUATEA, salen en comuña a defender la especialidá docente d’asturianu ensin dexar espaciu a la dulda, al tiempu que soliciten, con carácter urxente, una reunión cola Conseyera, Ana González. El comunicáu entama faciendo alcordanza de que “el Ministeriu d’Educación punxo enriba la mesa un proyectu de Real Decreto onde se regulen les especialidaes del profesoráu de la enseñanza Secundaria” nun documento de calter técnicu “nel que s’afaya normativa anterior a la LOMCE a les nueves materias que se meten nos nuevos currículos”

.

Pa la comunidá educativa asturiana “ye un momentu de gran trascendencia en tanto que xugámonos la creación de la especialidá d’asturianu y gallego-asturiano. Ésta ye una reivindicación histórica que supón dignificar l’enseñu d’estes asignatures y igualar les condiciones llaborales del profesoráu que les imparte a les del restu de docentes. Énte una primer negativa per parte del Gobiernu na acabante de celebrase Conferencia Sectorial de Educación, munches de les organizaciones que tenemos presencia na Permanente del Conseyu Escolar del Estáu decidimos presentar conxuntamente delles enmiendes pa la próxima sesión que va ser el 3 de febreru onde va debatise la propuesta del Ministeriu”.

Dende CCOO d’Enseñanza, FETE-UGT y SUATEA consideren “qu’ésta ye una oportunidá única pa pañar apoyos qu’algamen que’l Gobiernu atienda esta demanda. Consideramos que la nuestra responsabilidá ye poner tolos medios que podamos pa sacar alantre esi oxetivu. Ye por ello que tamién solicitamos, con carácter urxente, una reunión cola Señora Conseyera Ana González. Ye imprescindible que paralelamente a les xestiones que fagamos miembros de la comunidá educativa, el gobiernu asturiano y especialmente la Conseyería d’Educación actúen cola contundencia y dilixencia necesaries que rique esta cuestión”.

El sindicatu de la enseñanza SUATEA vieno acabante otra vuelta de denunciar esti martes que la Conseyería “actúa de forma inaceptable apurriendo a los centros educativos la propuesta de plantiyes pal próximu cursu con namás 48 hores pa presentar alegaciones a les mesmes. D’esta forma les direcciones de los centros atópense ensin capacidá de reacción pa estudiar con detalle les necesidaes del so centru y alegar correctamente a la propuesta de l’Alministración”.

Estes son les formes qu’usa l’Alministración nos últimos años pa esti y otros munchos procesos, sigún denuncia SUATEA, polo que “un añu más, tamos falando de decenes de puestos de trabayu destruyíos por un Gobiernu que fala de criación d’empleu de calidá mientres achuquina tolos años cientos de puestos de trabayu estables en distintos ámbitos de l’Alministración Asturiana”.

Esta ye la doble moral del partíu que gobierna Asturies según el sindicatu: “d’un llau dizse defensor del enseñu públicu y d’otru dedícase a esmantelalu. Cursu tres cursu destrúin empléu en daqué tan fundamental pal desenrrollu d’un país como ye la educación pública”.

Nuna nota de prensa asoleyada esti día, SUATEA presenta un cuadru nel que se ven los 87 puestos “barríos” de les plantiyes, apuntando que “namás hai un centru n’Asturies nel que se cría una plaza, concretamente d’inglés (esta ye la escepción que confirma la riegla de los recortes) y esto pesie a qu’hubo exactamente 317 xubilaciones l’otru cursu”. El recorte denunciáu ye de 38 puestos en primaria y 49 en secundaria.

SUATEA denuncia tamién que “nestos meses veremos a Javier Fernández faciendo campaña electoral y contándonos les sos propuestes sobre empléu de calidá, prestaciones sociales, meyoras en sanidá, n’educación y un llargu etc. Seyamos conscientes de que ye too puru cuentu. Asturies ye la sesta comunidá que más baxó’l so gastu n’Educación ente 2009 y 2012, siendo la reducción d’un 15%, tres puntos más que la media estatal”.

Por mor d’ello, dende SUATEA desixen a la Conseyera d’Educación “que nun recorte otra vuelta les plantiyes docentes de los centros educativos asturianos que yá sufrieron un recorte brutal n’años anteriores. Qu’atienda les alegaciones plantegaes dende los centros educativos que son los realmente conocedores de les sos verdaderes necesidaes, argumentu que la Conseyería alega mui a menudo cuando y pa lo que-y interesa”.

<

Les dclaraciones esactes de la Conseyera, que recoyía esti día el diariu asturianu El Comercio afitaben que dende’l gobiernu del Principáu van siguir con delles estratexes: “La primer d’elles ye que si ellos nun la reconocen, teniendo como tienen la competencia, que me digan que d’alcuerdu con qué llexislación pue facelo la conseyería”.