Educación

Esti vienres,29 de mayu, con motivu de la so xubilación, colegues de la Facultá de Filosofía y Lletres de la Universidá d’Uviéu faén-y un homenaxe al profesor José Antonio Martínez, catedráticu de Llingua Española.

Nel actu, que va tar presidíu pol Rector de la Universidá d’Uviéu, presentaránse dos llibros d’homenaxe, onde investigadores de la nuestra universidá y d’otres d’España y del mundu hispánicu dedíquen-y al homenaxáu los trabayos filolóxicos Volume especial “Studium grammaticae” d’investigación gramatical y un númberu especial de la Revista de Filoloxía Asturiana, tituláu “Varia asturlleonesa”, de trabayos del ámbitu asturlleonés.

Amás de colegues de la Universidá d’Uviéu, fadrán intervenciones especiales los profesores Pilar García Mouton (del Conseyu Superior d’Investigaciones Científiques) y Guillermo Rojo (de la Universidá de Santiago de Compostela).

Depués d’un cursu demandando’l so cese, col refugu de tolos sectores de la educación lo facíen énte imposiciones como la xuba de tases universitaries, el recorte de beques o’l llamáu 3+2, SUATEA camienta que les aiciones sindicales dieron frutu criando una crisis política nel PP a pocu tiempu de les elecciones xenerales. y por mor d’ello, darréu del cese de Wert piden que se paralice la LOMCE.

Dende la perspectiva del sindicatu, “el pasu de Wert pel ministeriu supunxo: l’aumentu de les hores llectives, del númberu d’alumnos y la disminución de la plantiya, too ello aplicao con rixu pola nuestra Conseyera Ana González, que mos llevó a unes tases d’interinidá inaceptables, al aumentu de les medies xornaes y una situación de sobresfuerzu xeneralizáu que mina la posibilidá de mantener la calidá educativa que toos y toes queremos”.

No que cinca a la normativa 2más trascendente y agresiva qu’esti ministro fexo escontra la educación pública”, la LOMCE, llei qu’algamó la unanimidá de sindicatos de profesoráu, asociaciones d’estudiantes y confederaciones de les families nes protestes y movilizaciones, fuelga incluyida, SUATEA ye claru: “En plenu procesu d’aplicación d’esta llei, que supón un retrocesu de décades, poniendo en peligru l’accesu a la titulación n’ESO d’aquel alumnáu que s’empobine a los Programes de Meyora del Aprendimientu y el Rendimientu, o’l camín ensin salida nin posibilidá de retornu p’aquellos que se deriven a la FP Básica, dende’l Conseyu Escolar del Principáu solicitóse, por unanimidá, la moratoria per un cursu escolar. Amparándose nesa declaración de la comunidá educativa y aprovechando esti momentu en que’l titular del Ministeriu abandona’l barcu, en plenu proceso d’aplicación de la nueva llei, la Conseyería d’educación debería dar un pasu alantre, desixir esa moratoria y nun proceder a implantala’l próximu cursu”.

Dende SUATEA albidren que “la priesa cola que se quier aplicar el calandariu LOMCE, la dificultá organizativa qu’ello implica pa los centros docentes y les consecuencies que conlleva sobre profesoráu y alumnáu” son motivos abondos pa desixir la paralización de la mesma.

Como cada añu,l’cademia de la LLingua Asturiana organiza en collaboración cola Universidá d’Uviéu los cursos de la Universidá Asturiana de Branu (UABRA) que se celebren en Cangas del 3 al 14 d’agostu. Esti añu hai convocaos, amás de los cursos elemental y avanzáu, el de gallego-asturianu, el cursu de capacitación pala traducción, unu d’averamientu al cine, otru de Xestión curltural y otru más sobre l’emplegu didáuticu d’Internet nes aules.

Los cursos desenvuélvense na Escuela Hogar de Cangas del Narcea en réxime d’internáu y la matrícula entama’l próximu 25 de mayu nel llar de l’Academia n’Uviéu.

Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como «Entidá Organizadora d’Actividaes de Formación Permanente del Profesoráu». Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies.

Los cursos que van desenvolvese descríbense darréu:

CURSU ELEMENTAL DE LLINGUA ASTURIANA

De 60 hores llectives y dirixíu a estudiantes que quieran averase a la conocencia práutica de la Llingua Asturiana. Superaes les pruebes afayadices, los participantes llograrán la certificación de Conocencia Básica de la Llingua Asturiana. Esta Certificación pue algamase tamién pente medies de les pruebes añales (de calter escritu y oral) que l’Academia entama nos meses de xineru y mayu y nes que toles persones interesaes puen amosar la so conocencia práutica del idioma asturianu.

CURSU AVANZÁU DE LLINGUA ASTURIANA

De 60 hores llectives y dirixíu a estudiantes que superaren l’anterior Cursu Elemental o que, al traviés de les pruebes de xineru o mayu, algamaren el certificáu de Conocencia Básica de la Llingua Asturiana. El so oxetivu ye que tola xente, al marxe del so nivel d’estudios, titulación o profesión, pueda llograr una más fonda conocencia práutica de la llingua asturiana.

CURSO DE GALLEGO-ASTURIANO (PRIMEIRA FASE)

De 60 horas llectivas. Este curso é a primeira das tres fases das que se compón el Programa de Capacitación en Gallego-Asturiano pra profesores qu’a Conseyeiría d’Educación del Principao d’Asturias encomendóu al Academia de la Llingua Asturiana. Esta é a titulación oficial que s’esixe para impartir el asignatura de Gallego-Asturiano en Educación Primaria y Secundaria.

CURSOS D’AFONDAMIENTU CULTURAL Y LLINGÜÍSTICU

1. Cursu de Capacitación pa la Traducción al Asturianu (del 3 al 8 d’agostu)

De 30 hores llectives y 15 práutiques. Ta dirixíu a estudiantes que tengan una conocencia avanzada de la llingua asturiana. Esti cursu, que dirixe Cristina Valdés Rodríguez, tien como oxetivu presentar sintéticamente los presupuestos teórico-práuticos que rixen la traducción a una llingua minoritaria. Nel programa formativu tamién participen como profesores Ana Ma Cano González, Xosé Antón González Riaño y Marta Mori d’Arriba.

2. Más presees d’aplicación escolar na rede (del 3 al 8 d’agostu)

De 30 hores llectives y d’accesu llibre, completaráse con 15 hores práutiques. El cursu ufierta nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a nuevos recursos qu’ufierta la rede y diseñar, darréu d’ello, xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi Palacio. Nel programa formativu tamién participen como profesores David Guardado Díez y Xandru Armesto Fernández.

3. Xestión cultural n’Asturies: creando cultura a traviés de los medios (del 10 al 14 d’agostu) De 30 hores llectives y d’accesu llibre, completaráse con 15 hores práutiques. L’oxetivu d’esti cursu, empobináu por Isabel Hevia Artime, ye afondar na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averándonos a la conocencia de la situación de la estaya y apurriendo ferramientes básiques pal trabayu nel campu de la xestión cultural n’Asturies, dende un puntu de vista teóricu y práuticu. Nel programa formativu tamién participen como profesores Cristóbal Ruitiña Testa, María Xosé Rodríguez López ya Inaciu Galán y González.

4. Averamientu al cine n’asturianu (del 10 al 14 d’agostu)

De 30 hores llectives, completaráse con 15 hores práutiques. D’accesu llibre y dirixíu por Loreto Díaz Suárez, esti ye un cursu que tien como oxetivu cimeru averase a la realidá de la producción audiovisual n’asturianu al traviés d’un percorríu poles películes y los curtiometraxes fechos na nuesa llingua, asina como conocer (y facer práuticamente) un proyeutu específicu de realización audiovisual. Nel programa formativu tamién participen como profesores l’actriz María Cotiello Pérez y el realizador Pablo A. Quiroga Prendes.

IX apuesta pola educación pública, laica y calidable y refuga el nuevu sistema d’evaluación por “acientíficu”, según anunció esta mañana’l coordinador xeneral de la formación, Manuel González Orviz, tres un alcuentru con SUATEA nel que tamién quiso dexar bien a les clares so defensa de les plantiyes, tantu no relativo a meyores salariales, xornada llaboral y en mecanismos p’amenorgar l’alta tasa de temporalidá, que ta repercutiendo negativamente nel sistema.

“Tenemos aprosimao 1.000 profesores que tán a media xornada nunes condiciones llaborales y de destín que, dende’l nuesu puntu de vista, nun son xustificables y tenemos una tasa de temporalidá del 27%, esto ye, unu de cada 4 profesores son interinos”, dizo’l coordinador d’IX.

González Orviz reivindicó tamién la escolarización n’asturianu, polo qu’esixó que se trate de garantizar la enseñanza y cultura asturiana, removiendo toles torgues que, nestos momentos, se ponen.

Al respective de la evaluación de los alumnos, el coordinador xeneral d’IX, refugó’l modelu qu’empezó a aplicase yá que, dixo, la evaluación tien que ser continua, daqué qu’hasta agora taba perfectamente plantegáu y qu’agora deriva escontra un sistema de “segregación”.

La 36 Selmana de les Lletres, qu’organiza la Conseyería d’Educación, Cultura y deporte del Principáu entamará’l 2 de mayu con visites guiaes al Muséu de Belles Artes dende les 12 de la mañana y un homenaxe “a nosas lletras” que se va desenvolver a lo llargo de la tarde en A Caridá. El lema Semar palabres, texer futuru va presidir los actos institucionales, conciertos, recitales, presentaciones de llibros y actividaes infantiles.

La Selmana de les Lletres, ye una de les cites más importantes del calendariu cultural asturianu, creada hai tres décades pol Gobiernu del Principáu pa complementar el Día de les Lletres Asturianes que se celebra’l primer vienres de cada mes de Mayu. Llega anguaño con un programa d’actos centráu na lliteratura escolar y que tien l’oxetivu d’axuntar presente y porvenir lliterariu. El lema Semar palabres, texer futuru va presidir los actos institucionales, conciertos, recitales, presentaciones de llibros y actividaes infantiles que s’entamen con esti motivu ente’l 2 y el 10 de mayu-

Les actividaes entamen el sábadu 2 de Mayu con visites guiaes n’asturianu al Muséu de Belles Artes que van desenvolvese esi sábadu pela mañana y pela tarde. Y a les 7 de la tarde con un Homenaxe “ás nosas lletras” que va desenvolvese nel Auditorio da Casa das Quintas y que va consistir na presentación del sestu númeru de “Trabatel. Revista eonaviega de lliteratura”, la llectura pública institucional de textos lliterarios en gallego-asturiano y l’actuación de la Banda de Gaites El Trasno.

El llunes 4 les actividaes treslládense a Grau, a la Capiella de los Dolores, cola presentación del Premiu “Xuan María Acebal de Poesía” de 2014 y la entrega de diplomes del II Premiu de Poesía Selmana de les LLetres pa escolinos de primaria y secundaria. L’actu tará amenizáu pola actuación musical de Mapi Quintana y Elías García.

El martes 5, les actividades desenvolveránse n’Uviéu, na Xunta Xeneral del Principáu con visites escolares y l’actu institucional, y Xixón, con un espectáuculu en Llaboral a les 11 de la mañana de Petit Pop en conciertu y la presentación del Premiu María Josefa Canellada a les 19:30 hores nel Centru Municipal Integráu Atenéu de La Calzada.

El miércoles n’Uviéu desenvolverase nel Paraninfu de la Universidá una llectura siguida del Quixote recién asoleyáu na so versión en llingua asturiana. Y pela tarde, a les 7, na Biblioteca d’Asturies en El Fontán habrá una mera redonda sobre “El Cómic n’Asturianu güei” y la presentación del Premiu 2014 Alfonso Iglesias de Cómic.

El xueves 7 inauguraráse na Antigua Pescadería Municipal d’Avilés la II Feria del Llibru y el Discu n’Asturianu que tará habierta hasta domingu día 10 y en Tuña (Tinéu) presentaráse pola tarde’l Premiu Xosefa Xovellanos de 2014.

EL sábadu será en Xixón el Día de les Lletres, con actu escolar na Escuela Pública Manuel Martínez Blanco pela mañana.

Y el sábadu 9 de mayu finará con otra xornada de visites guiaes al Muséu de Belles Artes.

El programa completu pues

Los centros interesaos en participar na Axenda Didáctica Escolar d’anguaño van poder formalizar les sos solicitúes hasta’l día 5 de mayu del 2015, inclusive; han presentar modelu de solicitú debida­mente cubiertu según figura nel Anexu I de les normes de participación (Resolución de 28 de xineru del 2013, de la Conseyería d’Educación, Cultura y Deporte, pola que s’establecen les normes de participación na Axenda Didáctica Escolar (BOPA de 12-II-2013), modificada por Resolución de 24 de setiembre del 2014, de la Conseyería d’Educación, Cultura y Deporte. Cada centru ha solicitar siempre 4 proyectos, marcando un orde de preferencia (con calter escepcional, cuando nun s’ufierten proyectos suficientes pal grupu d’etapes o variedá llingüística podrán solicitase menos proyectos, siendo valorada la mentada solicitú pola comisión).

La solictú tien que la facer el director/a, xefe/a d’estudios o secretariu/a del centru y la fecha de cada actuación ha alcordase ente la entidá participante y el centru educactivu. Ha cuntar col preste de la Dirección Xeneral de Política Llingüística.

Énte la posibilidá de que’l númberu de solicitúes supere la ufierta, aconséyase que los centros d’una mesma zona alcuerden solicitar de forma conxunta l’asistencia a una de les actividaes, axuntando a la solicitú l’alcuerdu por escrito de tolos centros participantes (cola firma de los sos directores).

L’Anexu I y les fiches de cada proyectu van poder descargase na páxina web www.educastur.es.

Representantes de SUATEA reuniéronse esti día con Emilio León, candidatu de Podemos a la Presidencia de la Xunta Xeneral, dientro de los contactos qu’esta organización sindical ta faciendo con toles fuercies polítiques que se presenten al Parlamentu asturianu nes elecciones del 24 de mayu pa reivindicar la recuperación de les condiciones llaborales de los docentes anteriores a los recortes, la esixencia de paralizar la implantación de la LOMCE y la oficialidá de la llingua asturiana, que se-y plantegço al candidatu como vital ensin respuesta concreta.

Nesta reunión abordáronse por tanto temes eucativos de la mayor importancia, como la esixencia de la paralización de la implantación de la LOMCE pal cursu que vien. Analizáronse les graves consecuencies que tendría pal alumnáu tanto la puesta en marcha de les reválides como la segregación temprana del alumnáu ya dende segundu d’ESO, cola so incorporación a los llamaos Programes de Meyora del Aprendizaxe y el Rendimientu. Mostróse la preocupación de dambes organizaciones polos currícula que deberíen aplicase con cambios sustanciales como’l calter evaluable de la relixión, la ufierta de optatives y la perda horaria que supón dicha ufierta, o la situación de la llingua asturiana.

SUATEA propunxo que la moratoria na aplicación de la LOMCE fora una de les primeres medíes a adoptar pol nuevu gobiernu que salga de les urnes, como tien pedío’l Conseyu Escolar d’Asturies y como probablemente faga’l Conseyo Escolar del Estáu la selmana que vien de dir p’alantre la iniciativa de SUATEA y la confederación de STES ente otres fuercies estatales.

La situación del asturianu foi abordada ampliamente, ya informóse al candidatu de la negativa del Ministeriu d’Educación a poner en marcha la especialidá de Llingua Asturiana. La creación de la especialidá, dalgo a lo que se comprometiera l’actual gobiernu, tien que ser otra de les primeres medíes del nuevu gobiernu, plantegó SUATEA, al tiempu que recordó la importancia d’algamar la oficialidá na llexislatura entrante.

Debatióse ampliamente la necesidá de meyorar les condiciones llaborales del profesoráu: acabar cola precariedá que suponen les casi 1.000 medies xornaes y la so conversión en puestos a tiempu completu, acabar coles insoportables tases d’interinidá (27%) mediante amplies ufiertes d’emplegu públicu, reducción horaria pal profesoráu mayor de 55 años, recuperación de les condiciones llaborales anteriores al RD14/2012, dotación suficiente de personal p’atender a la diversidá, dedicar especial atención a la escuela rural, xuba salarial llineal pa tol profesoráu.

P’acabar, dende SUATEA plantegose la necesidá de que la relixión salga de la escuela y que les polítiques de conciertos educativos nun pueden continuar mientres se detraen fondos pa la escuela pública y mientres heba alumnáu que tá pasando situaciones de probeza estremo. Emilio León plantegó que munches d’estas propuestes contémplense nel programa electoral de la so formación y que ta abiertu al diálogu y a les propuestes de quienes conocen la realidá educativa d’Asturies.

El Ministeriu d’Educación vieno acabante manifestar, tal y como recueyen los medios de comunicación, l’interés por parte de la Conseyería qu’encabeza Ana González na contratación de becarios pa sustituir al profesoráu interín nel sistema educativu y darréu de conocese, SUATEA quier afitar otra vuelta que rechaza dafechu esa contratación de becarios que plantega’l Ministeriu d’Educación. Nuna nota de prensa asoleyada esti día, el sindicatu camienta que la introducción d’estos becarios “ye una solución barata pa iguar los problemes educativos nos que tanto’l Ministeriu como la Conseyería metieron a la Escuela Pública a base de recortes, precarización y de primar criterios economicistes y mercantilistes sobre la calidá del sistema educativu”.

Na opinión de SUATEA, “la sola idega de plantegar la presencia d’estos becarios dientro de los centros educativos ye una bofetada a los docentes interinos despidíos dende l’aplicación RD 14 del 2012 de midíes urxentes de racionalización del gastu públicu nel ámbitu educativu”.

Dende SUATEA consideren qu’esta nun ye de nenguna de les maneres la solución p’atender de forma integral al alumnáu con necesidaes educatives especiales: “esta iniciativa ministerial un engañu más a los que nos tienen avezaos Jose Ignacio Wert y Ana González. Esti tipu d’ocurrencies nun atienden a l’actual realidá educativa que nun ye otra qu’unes plantiyes claramente insuficientes y la saturación de trabayu por parte de los docentes presentes nes escueles y institutos”. Dende SUATEA esixen al ministru d’Educación la retirada d’esti proyectu xunta los recortes educativos puestos en marcha nesta llexislatura, la recuperación de los puestos de trabayu suprimíos, que se paralice l’aplicación de la LOMCE ensin complicar entá más el presente y el futuru de la educación pública nesti añu electoral y que convoque con urxencia la mesa sectorial de negociación. Y coles mesmes esixen tamién “a la Conseyera asturiana d’Educación que nun aplique esta midida y qu’invierta el presupuestu amañosu p’atender a la diversidá d’alumnáu con criterios d’igualdá y equidá, tomando como referente al profesoráu espulsáu del sistema de resultes de los recortes educativos y nun xenerando empleos precarios mazcaraos de beques formatives”.

El Asociación Mezá vei impartir entre os meses d’abril y de mayo de 2015 un curso de gallego-asturiano de nivel básico en Uvieo, nel local Cambalache (La Cuesta la Noceda, 30). Este curso vei presentarse el día 9 d’abril ás 19:00 y ten úas tasas de matriculación de 20€, qu’incluyen os materiales y as 16 horas de clases nas que vei tar dividida el actividá: dúas horas al día, un día por semana.

El curso ten el fin d’acercar á xente del Navia-Eo que vive nel centro d’Asturias á súa llingua y d’aveirar a os que nun son falantes de gallego-asturiano á realidá llingüística del occidente máis estremo del país. Tamén, ha a servir pr’aquellas personas que desíen perfeccionar el sou conocimento sobre esta variedá llingüística.

A xente que quira matricularse namáis ten que mandar os sous datos (nome y apellidos, DNI, dirección de correo electrónico y númaro de teléfono) a mezabual@gmail.com ou chamar al 686 757 797 pra reservar praza.

El prazo d’inscripción nun s’ha a pechar hasta ben avanzadas as clases, así que sempre hai tempo pra empezar. El Asociación Mezá ha a dar a os alumnos un diploma mediante el que s’acredita estraoficialmente el asistencia y aprovetamento del curso de gallego-asturiano.