Educación

Nun comunicáu asoleyáu hai dellos díes, SUATEA recama-y al nuevu gobiernu asturianu que faiga los deberes pendientes si quier aprebar esta nueva llexislatura. El sindicatu educativu SUATEA recuérda-y a Javier Fernández que ye necesariu un cambiu nes formes y nel conteníu de les polítiques educatives que desenvolvió’l so gobiernu na última llexislatura, si quier mantener un sistema educativu públicu de calidá y al serviciu de les necesidaes de la sociedá asturiana.

Pal sindicatu “esta última llexislatura a manes del gobiernu de la FSA-PSOE tuvo marcada pol escándalu del casu Marea qu’afectaba a l’anterior alministración. Nun se supo, o nun se quiso, aparar nel camín esbrozáu al desastre, a la desorganización, al cortoplacismu y a la improvisación que lleva reinando na Conseyería durante más llexislatures de les deseables pa la bona salú del sistema educativu asturianu”.

El gobiernu de Javier Fernández tien per delantre 4 años,” si acaba la llexislatura, p’aparar, dar marcha atrás y reconducir les más de les polítiques que se desenvolvieron na Conseyería d’Educación de la mano d’Ana González”.

Piden que la relixón tea fuera del currículu escolar

La Área Federal d’Educación d’esta formación considera “un pequenu pasu, pero una meyora importante” la recién sentencia que refuga l’ampliación de les hores de l’asignatura de Relixón como esixe la xerarquía de la Ilesia católica. Izquierda Xunida, al traviés de la so Área Federal d’Educación, reclama que la enseñanza de la relixón quede fuera del currículu escolar, que sala del horariu lectivu, desapaezan los actos y la simboloxía relixosa de los centros escolares y de los espacios públicos educativos, amás de la eliminación de cualquier procedimientu alministrativu qu’obligue a manifestar les creencies o non creencies, en cumplimientu del artículu 16 de la Constitución.

IX repite la necesidá de la derogación del concordatu ente l’Estáu español y el vaticanu, y con cualesquier otra confesión que prime alcuerdos d’estes característiques.

Izquierda Xunida felicítase y considera “un pequenu pasu, pero una meyora importante” el respaldu llegal collecháu pol amenorgamientu al mínimu llegal dexáu de les hores d’enseñanza relixosa aplicáu pol Gobiernu d’Asturies. Esta decisión foi respondida por pol Tribunal Cimeru de Xusticia d’Asturies (TSXA), que refugó’l contenciosu del Arzobispáu d’Uviéu nel que pidía suspender el decretu del Executivu asturianu que regula’l currículu de Bachilleratu.

Nuna nota de prensa asoleyada esti vienres, Izquierda xunida diz que “a xerarquía de la Ilesia católica nesta comunidá quexase de qu’en Secundaria se discriminaba l’asignatura de Relixón con un horariu mínimu en relación col restu de materies, amás de considerar qu’en 1º de Bachilleratu se imposibilita la so “llibre elección” y que en 2º nin siquiera va ufiértase. La Conseyería d’Educación asturiana defende que concedió a esta asignatura’l mínimu dexáu pola LOMCE. Ello ye que en Ceuta y Melilla, territorios nos que la educación depende directamente del ministeriu, la carga horaria de Relixón ye inclusive menor”.

Izquierda Xunida aboga por derogar la LOMCE impuesta pol Gobiernu del PP nesta llexislatura y garantizar “una educación laica que respete la llibertá de conciencia, eduque ensin dogmes y esanicie del currículu escolar toa forma de adoctrinamiento”.

Esti vienres 26 de xunu publicóse nel Boletín Oficial del Principáu d’Asturies (BOPA) la resolución pola que s’aprueba la programación anual de l’Axenda Didáctica Escolar. El plazu pa llevar alantre les actuaciones y actividaes nos centros educativos remata’l 20 de payares del 2015.

La oficina de Política llingüística ufre na so web la posibilidá de consultar les actividades axudicaes a los centros esbillando ente les Actividaes axudicaes a centros d’Educación Primaria y les Actividaes axudicaes a centros d’Educación Secundaria y/o Bachilleratu.

El grupu parlamentariu d’IX vieno acabante repetir el sofitu a l’Asociación de Madres y Padres de Zarréu que demanden la implantación del primer cursu de bachilleratu pal próximu cursu escolar. María José Miranda, vicepresidenta de la Xunta, y la diputada Concha Masa caltuvieron un alcuentru esta mañana con una representación de los padres, encabezada pola presidenta de la AMPA, Susana Marentes, acompañaos de representantes de la’AMPA de Boal, que conxuntamente con otres asociaciones pretenden formar una AMPA de colexos rurales en toa Asturies.

María José Miranda recordó qu’IX yá sofitó a los padres de Zarréu al traviés d’una Proposición Non de Llei que s’aprobó na llexislatura apocayá rematada y va recuperar esa iniciativa de manera urxente, que foi votada por tolos grupos salvu pol PSOE.

Na opinión d’IX “la Conseyería niega la implantación del bachilleratu en Zarréu por una cuestión económica, amontar la plantiya en dos profesores a media xornada y unu de matemátiques a xornada entera, cuando’l beneficiu pal conceyu de Degaña ya Ibias sería enforma mayor, y evitaría a los neños tener que treslladase tolos díes hasta l’institutu de Vil.lablinu, cruciando un puertu de monte de 1.400 metros, qu’en dómines ivernices fai que los neños pierdan ente 1 y 2 meses al añu de clases. Esti pidimientu, que Marentes xulga nada escabarriáu beneficiaría a ente 10 y 12 alumnos mientres el cursu próximu, d’un total de 100 neños qu’agora estudien en Zarréu”.

Cuidando que’l MEC sigue ensin dar respuesta a les esixencies de paralización de la LOMCE que se tán produciendo en tol Estáu y dende tolos ámbitos, SUATEA y la Confederación de STEs-i piden a los gobiernos autonómicos que dean respuesta urxente a la gran incertidume esistente nos colexos ya institutos y anuncien la paralización de la implantación d’esta llei, como pasu previu a la derogación d’esta llei.

Tres les elecciones del 24 de marzu, 12 de les 17 comunidaes autónomes tán gobernaes por partíos qu’espresaron el so refugu a la LOMCE, y estos gobiernos tienen de dar respuesta inmediata, sigún SUATEA, “a les mires que llevantó la so oposición a esta llei, lo qu’ensin dulda-yos apurrió sofitu electoral”.

La gran mayoría de les comunidaes, ente elles l’asturiana, “siguen ensin publicar los decretos de currículum d’ESO y Bachilleraro y, por tanto, sígense ensin conocer de manera definitiva los horarios que van tener les distintes asignatures en 1º y 3º d’ESO y en 1º de Bachilleratu, a escasos díes de que l’alumnáu tenga que matriculase nestos cursos”. Esto afecta, sigún SUATEA, “a los cupos del Profesoráu que tien d’haber en cada centru, cupos que yá tendríen de tar aprobaos pa proceder en pocos díes al nomamientu de les persones que correspuenda”.

N’Asturies los centros educativos entá nun conocen la respuesta de la Conseyería a los cientos d’allegamientos presentaos polos equipos directivos.

Izquierda Xunida cuestiona la repetición de cursu que fomenta la LOMCE y sofita les propuestes por que sía una práctica “escepcional”. Asina lo recueye nuna nota de prensa l’Área Federal d’Educación d’IX que “sofita la propuesta recoyida nel Documentu de bases pa una nueva Llei d’Educación’ y recuerda que la comunidá educativa cuestiona’l sistema actual impulsáu pol PP”.

Izquierda Xunida, al traviés de la so Área Federal d’Educación, propón un alderique “seriu” sobre la práctica abusiva del denomináu ‘mal francés’, país d’onde’l nuesu sistema educativu adoptó la repetición de cursu jai cuantayá. IX sofita la propuesta recoyida nel Documentu de bases pa una nueva Llei d’Educación, Alcuerdu social y políticu educativu’, onde s’establez que namái en condiciones bien escepcionales va recurrir a la repetición de cursu na enseñanza obligatoria.

Na nota de prensa asoleyada esti día, IX diz camentar “qu’esta práctica namái sirve p’aumentar les tases d’abandonu escolar, ente que s’abandonó un apueste claru pola atención a la diversidá y el sofitu educativu al alumnáu que presenta dificultaes d’aprendizaxe”, sigún señalaba tamién esti día Enrique Díez, coordinador de l’Área Federal d’Educación.

Díez recuerda que la llei educativa impuesta pol PP, la LOMCE, fomenta la repetición yá non nel ciclu, sinón por cursu, polo que la capacidá de trabayar individualmente colos estudiantes o’l desdoblamientu de les clases, en cuenta de solucionar el problema “lo que lleva ye al aumentu del fracasu escolar, un índiz que correlaciona directamente cola repetición. Lo que se consiguió per esti mediu ye qu’un terciu de los estudiantes repita siquier un cursu demientres la educación obligatoria y que casi cuatro de cada diez nun tean nel cursu que debieren”.

Sigún IX “n’Alemaña, Italia, Austria y Países Baxos la repetición ye un fenómenu prácticamente inesistente; ye escepcional n’Australia o Nueva Zelanda, ente que en Dinamarca, Grecia, Irlanda, Chipre, Suecia, Reinu Uníu, Islandia y Noruega los alumnos y alumnes pasen automáticamente al cursu siguiente na educación obligatoria, y reciben sofitu complementariu los que tienen dificultaes”.

Hai países onde inclusive la repetición de cursu nun se permite, como Xapón, Coria y los países escandinavos, precisamente los qu’ocupen los primeros puestos nes evaluaciones internacionales sobre resultaos educativos.

Como tolos años por estes feches, la Conseyería d’Educación, Cultura y Deporte del Principáu entama una campaña col nomatu y hashtag #yoapuntome que quier visibilizar la llinga asturiana na educación de nueso y espader que los escolinos y escolines escueyan llingua asturiana nos colexos. La campaña refuérzase col lema: “Porque falar asturianu ye saber muncho más” y vieno acompaña estos años d’atrás pol cartelu que fai compaña a estes llínies.

La Conseyería d’Educación, Cultura y Deporte pon en marcha, el llunes 10 de xunu, una campaña informativa pa impulsar la matriculación en Llingua asturiana y Gallego-asturianu, col lema #yoapúntome, porque lo llevamos dientro / #euapúntome, porque lo levamos dentro. La difusión d’esta campaña fadráse gracies a dellos materiales que pueden descargase na so páxina web. A lo llargo de los próximos díes ta abiertu’l plazu pa matriculase, anque munchos centros ponen dificultaes na matriculación, como denuncia tolos años SUATEA.

La enseñanza de la llingua asturiana entamó a impartise oficialmente en 1984, nuna serie de centros educativos públicos, aumentando’l númberu d’ellos nos años sucesivos. Estes enseñances impártense anguaño en 331 centros educativos. La matriculación dende l’añu 2013 pue facese alrodiu los dies 10 y 21 de xunu (pa Educación Primaria) y ente’l 2 y el 15 de xunetu (ESO y Bachilleratu).

La Llingua asturiana y el Galllego-asturiau son materies de currículum que se pueden estudiar en tolos centros públicos d’Enseñanza Primaria y Secundaria. Col envís de llograr qu’esti fechu lu conozan la mayor cantidá posible de padres y d’alumnos/es, “ye polo la Conseyería pon en marcha una Campaña Informativa de Matriculación en Llingua asturiana/Galego-asturiano. Con ella, el Gobiernu d’Asturies quiera mosar el so apoyu a la enseñanza del asturianu, promover la conocencia d’un fechu cultural arriquecedor que forma parte de la nuesa identidá y que contribúi a la formación integral del alumnáu, respetando siempre la llibre opción y la voluntariedá del so deprendimientu”, espliquen dende Política Llingüística.