Documentu

CONCEYU ABIERTU somos un grupu de ciudadanos procedentes de distintos ámbitos políticos, sociales, sindicales, culturales y de movimientos populares de diversu tipu, que conscientes de la ineficacia de les polítiques d’anguañu y de la gravísima crisis permanente que sufre la sociedá asturiana, consideramos que llegó’l momentu de buscar nueves maneres de facer política entamando un movimientu de reconstruición nacional y social dende la base.

Denominamos precisamente al nuesu proyeutu como CONCEYU ABIERTU pa reivindicar esta institución de la tradición comuñal asturiana como una ferramienta coleutiva que nel momentu presente tien que sirvir pa sumar voluntaes, y que nel futuru tendrá de ser la estructura de base d’una Democracia participativa n’Asturies.

Les persones qu’integramos CONCEYU ABIERTU vamos a trabayar pa desbloquiar l’actual situación promoviendo nueves dinámiques d’organización y aición dende l’isquierda soberanista. Nesi sentíu apostamos pol municipalismu participativu como garantía d’una democracia plena y del control popular de la xestión institucional. Dende CONCEYU ABIERTU manifestamos que:

1º- La situación de crisis social, económica, identitaria y política que vivimos n’Asturies ye tan grave que resulta imprescindible que toos y toes faigamos un esfuerzu pa superar el fraccionamientu y la desmovilización esistentes. 2º- Hai una clase política apoltronada que cola so xestión corrupta y clientelar (PSOE, IU y PP) subordina los intereses coleutivos a los sos oxetivos particulares. Desiximos un cambiu n’Asturies protagonizáu necesariamente pol conxuntu de les clases populares.

3º- El paru, la emigración obligada de miles d’asturianos cada añu, l’emprobecimientu y la frustración del pueblu, ta direutamente prevocau pola destruición de los seutores productivos de la nuesa economía, como consecuencia de polítiques planificaes dende fuera d’Asturies. Ye preciso entós l’entamar un procesu de cambiu estructural col enfotu d’algamar un modelu sociu-económicu ecolóxicamente sostenible, realmente productivu, autocentráu na realidá específica d’Asturies y al serviciu de los intereses de la mayoría social.

4º- La ñegación y aniquilación de los ellementos culturales que configuren la nuesa identidá como nación hestórica y la non oficialidá de la llingua asturiana, son la preba del menospreciu al que nos tienen sometios los nuesos gobernantes, cola única fin de que nos avergoñemos de lo que somos. CONCEYU ABIERTU caltién qu’un pueblu ensin autoestima, ye un pueblu ensin voz nin futuru.

5º- Ye perimportante desendolcar un procesu de rearticulación coleutiva dende los conceyos afitando un proyeutu de renovación política p’Asturies al traviés de la creación d’una base social que lu pueda sostener nel tiempu. 6º- Les constantes agresiones al entornu natural (sobreesplotación del territoriu, contaminación, especulación urbanística, usu de elementos cancerixenos, política de cementu…) faen que sea necesario implicase activamente na defensa ecolóxica del nuesu territoriu, lluchando pola recuperanza del mediu ambiente y diendo a la escontra dafechu de cualesquier sistema productivu sofitáu na esplotación irracional de la natura, del xorrecimientu cuantitativu de la produición col únicu finxu d’acumular beneficios económicos y del fomentu del consumu escomanáu. Puxaremos poles tribes de trabayu y produición sofitaes nel respetu de los valores naturales y paisaxísticos, na renovabilidá de los recursos naturales y nel caltenimientu de la calidá de vida comu padrimoniu a tresmitir a les futures xeneraciones.

El movimientu ciudadanu CONCEYU ABIERTU, naguando pola ellaboración dende abaxu de nueves metodoloxíes, dinámiques y ferramientes polítiques a curtiu y llargu plazu, opta por estructurase como una rede de plataformes asamblearies d’ámbitu llocal.

La Tertulia Cultural “El Garrapiellu” acaba espublizar un documentu nel que critica l’inacción de la Conseyería de Cultura na defensa del patrimoniu asturianu, tanto no que cinca a l’etnografía, como arqueoloxía y otres estayes. Denuncien la corrupcion y la “militarización” del departamentu cultural del Gobiernu d’Asturies. Conviden a colectivos y particulaes a impulsar una crítica conxunta pa la que dan como bases el so documentu.

POLÍTICA, O ARQUEOLOXÍA

Dende la Tertulia Cultural “El Garrapiellu” falamos pa la opinión pública, la cultura y la sociedá civil asturiano. Ye vezu de la nuestra asociación pronuncianos a la escontra d’aspeutos que torguen, pa la nuestra manera de ver, l’espoxigue de la cultura asturiana. Facémoslo por un deber de ciudadanía y ciñu pa con Asturies. Al envís d’aldericar unes noticies que cinquen a les rellaciones de la Conseyería de Cultura cola arqueoloxía, prúyenos sopelexar la nuestra posición.

Esmolecemos de ver la burocracia y enclín a la militarización en Cultura, que menacien con mudar el muérganu que tenía de curiar pol patrimoniu cultural en cuartel, onde ye obligao dir “pel conductu reglamentariu” y manden la xerarquía o l’obedecimientu ciegu al mandu, más que la intelixencia, la preparación científica y la honradez.

Paez que la ordenanciosa Conseyería, escaeciendo la so primer función, que ye trabayar pola defensa y caltenimientu del patrimoniu, pierde’l tiempu en castigos llaborales a los que nun tean a la orde o nun traguen cola so ideoloxía política. Un comportamientu autoritariu y represivu que nun alienda res un clima afayadizo pa les xeres arqueolóxiques. Encamentámos-yos a que se centren no que-yos vamos evaluar los ciudadanos y ciudadanes nos vinientes procesos elleutorales: la so propia capacidá de xestión de los nuestros bienes culturales.

La Conseyera y el Direutor Xeneral debíen facese dalgo autocrítica. Matar al mensaxeru pa quitase de responsabilidaes nun ye’l camín. La so xestión carauterizóse davezu pol conflictu, l’abandonu de bienes y la incapacidá pa defender el patrimoniu arqueolóxicu, hestorico-artísticu y etnográficu. Y si ye qu’esta abegosa represión da nuncies de nomar la direición del Muséu Arqueolóxicu, reclamamos la llibre concurrencia, ensin maturrangues d’esclusión, respetando drechos y currículos profesionales.

Polo que sabemos del trabayu d’Ángel Villa y l’equipu suyu, los llogros algamaos nel Plan arqueolóxicu del Navia-Eo namás que puen calificase de cimeros pa l’arqueoloxía castreña del noroeste peninsular. Jorge Camino y los sos collaboradores en La Carisa anovaron un territoriu arqueolóxico bien granible pa la hestoria romana y altumedieval d’Asturias. La sociedá asturiana tien una delda colos arqueólogos del Chao Samartín, de Curriechos y El Homón de Faro. Y lo mesmo teníemos de dicir d’otros munchos perbonos arqueólogos y arqueólogues. Persones que mos afalaron a conocer y dar a valir la prehistoria asturiana.

Enrraxona ver cómo afustiguen a los arqueólogos que ficieron escavaciones de rellumu y, en cuenta premialos, tórguenlos pa dir a la gueta d’empleaos más fieles. La virtú siempres recompensada n’Asturies manda-y al porgüeyu político qu’unos arqueólogos asturianos dignos seyan separtaos de les sos funciones y espedientaos. Acasu, porque son arqueólogos de campu, non funcionarios de despachu.

Los despachos y tapuxos d’esa Conseyería tienen nel so haber el casu escandalosu de Pepe el Ferreiro, suplantáu pol arqueólogu del zulu La Campa Torres, con conocencia nenguna d’etnografía, pero con fidelidá probada, los aprendices de constructores del remocicamientu d’Abamia, los impautos ambientales de los dólmenes de la sierra Carondio, el vergoñosu abandonu del prerrománicu, o l’estropiciu de los horros y xacimientos de San Andrés de los Tacones.

Na Conseyería sobren burócrates, enchufaos o falagueros ideolóxicos y falten bonos arqueólogos, de los que Villa y Camino son exemplu. Falten persones comprometíes cola cultura asturiana y sobren mandamases, xefatures inútiles y antiasturianes.

Nagüamos porque la política cultural seya más cultura y menos política. Que se mida la capacidá de los investigadores y non los sos apegos al poder políticu. Que les nuestres instituciones culturales trabayen con enfotu pa que podamos tar argullosos y esfrutar del nuestru bayuroso patrimoniu tolos asturianos y asturianes. Non avergonzanos d’unes escures mazmorres kafkianes, onde l’acosu llaboral, la incapacidá o’l barruntu de corrupción afueguen la nuestra cultura.

Como ciudadanos y ciudadanes que pagamos l’arqueoloxía oficial colos nuestros impuestos, dexigimos responsabilidaes polítiques pol espoliu La Campa Torres, el caciplamientu político del futuru Muséu Arqueolóxicu, el camudamientu de campañes d’escavaciones por campañes de persecuciones arqueolóxiques, y enfín, pol desdexamientu de funciones de la Conseyería de Cultura. Denunciamos el desprestixu de la política cultural n’Asturies.

La Tertulia Cultural “El Garrapiellu” espubliza estes reflesiones y llama a persones y asociaciones culturales a facer en xunto una crítica ciudadana a la Conseyería de Cultura, na defensa del patrimoniu asturianu.

Xixón, 29 de xineru de 2011. TERTULIA CULTURAL EL GARRAPIELLU Carlos de la Madrid, «aumentará el interés por la mina, lo que unido a los planes en marcha para su

La estaya de Mocedá del sindicatu asturianu CSI aprobó’l pasáu 27 d’avientu un documentu nel qu’afita les sos bases ideolóxiques y d’acción. Nel documentu desmárquense de los grandes sindicatos “cada vez más burocratizados y centralizaos en Madrid” y falen de convertise en ponte ente la CSI, los nuevos movimientos sociales y los sectores combativos de la nueva xeneración d’asturianos, coles mires “de dir xenerando un movimientu xuvenil de resistencia global frente al esmantelamientu que sufre la sociedá asturiana en tolos sos aspeutos estructurales (económicu, social, ecolóxicu, cultural, llingüísticu, etc.)”.

¿Qué ye CSI-Mocedá?

Documentu aprobáu nel conceyu del 27 d’avientu de 2010.

¿D’onde venimos?

La llamada “Transición democrática” implicó una política de pactos y rindiciones per parte de los partíos tradicionales de la esquierda col consiguiente abandonu de posiciones combatives en defensa de los intereses populares. Entós remaneció un panorama sindicalista caracterizáu pola desmovilización de les bases y la burocratización corporativa de les cúpules directives. Nesi contestu social se funda en Xixón a lo llargo del añu 1982 una nueva organización que, recuperando la tradición asambleria del movimientu obreru, se va empobinar haza la autoorganización y autodefensa de el trabayadores asturianos. Esa organización ye la Corriente Sindical d’Esquierda (CSI).

Frente a los sindicatos mayoritarios, cada vez más burocratizados y centralizaos en Madrid, la CSI foise consolidando a lo llargo d’estos postreros 30 años como una referencia alternativa al traviés de distintes lluches contra la destrucción de los sectores granibles de la economía asturiana. Dalgunes d’estes lluches implicaron conflictos de llarga duración como ye’l casu de Naval Xixón. Anguaño la CSI ta desenvolviendo un procesu d’espansión territorial y social, consolidando la so estructura organizativa fuera de Xixón y estendiéndose a sectores llaborales onde nun tenía presencia enantes.

¿Quién somos?

CSI Mocedá s’estructura como una sección sindical de la CSI, tando asina dafechu integrada dientro de la estructura orgánica d’esti sindicatu. Polo tanto los sos militantes tienen los mesmos derechos y compromisos que cualesquier otru afiliáu de la CSI.

Dada la so naturaleza como organización especifica de mozos y moces dientro del sindicatu CSI Mocedá tien un calter tresversal a otres secciones y estructures de la CSI.

CSI Mocedá pretende ser una ponte ente la CSI, los nuevos movimientos sociales y los sectores combativos de la nueva xeneración d’asturianos, coles mires de dir xenerando un movimientu xuvenil de resistencia global frente al esmantelamientu que sufre la sociedá asturiana en tolos sos aspeutos estructurales (económicu, social, ecolóxicu, cultural, llingüísticu, etc.).

¿Ye necesaria la llucha?

El paru, la precariedá, la sobresplotación llaboral y la crisis económica polo xeneral nun son fenómenos que puedan analizase de forma aisllada del marco sociu-históricu en que se producen, sinón que son la resultancia de l’aplicación de polítiques concretes que tienen responsables gubernamentales y empresariales concretos.

La destrucción del texíu granible asturianu (agricultura, ganadería, pesca, minería, industria, etc.) ensin crear nel so llugar nueves actividaes económiques, que respondió a una política planiada en función d’intereses esternos al pueblu asturianu, ye lo que construyó’l murniu presente que vivimos anguaño los mozos asturianos. Asina l’actual crisis global vieno a sumase y a afondar la crisis específicamente asturiana.

L’esmantelamientu de la economía asturiana ta acompañáu d’una política de palu y cenahoria, que combina la represión con falses salíes individuales al curtiu plazu. Y cuando la realidá ye qu’añalmente se ven obligaos miles de mozos asturianos a pasar pol trauma d’emigrar fora del territoriu asturianu en busca d’un empléu, a los mozos asturianos si realmente queremos tener dalguna posibilidá de vivir y trabayar dignamente nel nuesu País mos correspuende entamanos y movilizanos. Pos si la naturaleza de los nuesos problemes ye colectiva y política, a éstos vamos deber de dar respuestes igualmente colectives y polítiques.

Una alternativa de llucha pa la mocedá asturiana

L’alternativa sindical qu’ufiertamos a los mozos y moces de Asturies caracterizase por ser un proyectu sociu-políticu de clase, autoxestionariu y asturianu.

Como organización de clase, defendemos un sindicalismu de proyección unitaria y anticapitalista. Entendemos que na sociedá actual les distintes posiciones sociales qu’ocupen les persones en rellación a los procesos de producción y distribución de la riqueza les asitien en clases sociales con intereses distintos y contradictorios ente si. Y frente a la desmovilización social esistente y los modelos corporativos d’organización aisllada de el trabayadores en base namás a la so empresa o la so categoría profesional, apostamos sindicalmente pola organización unitaria del conxuntu de los trabayadores pa la defensa de los sos intereses comunes frente a la esplotación capitalista.

Como organización autoxestionaria lluchamos pola restauración de les asamblees como centros de decisión del movimientu obreru. Igualmente sostenemos internamente un marcu organizativu que promociona la participación de tola afiliación nel proyectu colectivu de la nuesa organización, cuidao qu’entendemos que la Democracia ye una práctica social que se tien qu’afirmar na cotidianidá. Por eso optamos pola responsabilización colectiva y refugamos la figura del militante “lliberáu”. Igualmente apostamos pola independencia económica al respective de les Alministraciones públiques, pos el PSOE utilizó les subvenciones pa construyir una rede clientelar mercando voluntaes y adomando asociaciones.

Como organización socio-política proponemos superar el modelu clásicu de sindicalismu, identificáu puramente cola redolada llaboral, construyendo un proyectu qu’integre los intereses globales de la clase trabayadora asturiana dientro y fora de los centros de trabayu. Asina la nuesa alternativa sindical ye incluyente tantu de la defensa de los derechos llaborales, sociales y civiles como d’unes condiciones dignes de vida pa toos. Temes tan distintes como la situación de la vivienda, la redolada ecolóxica o la llingua asturiana son elementos a trabayar dende’l nuesu proyectu.

Como organización asturiana, frente a la situación de subordinación de los intereses d’Asturies como sociedá especifica al respective de les polítiques gubernamentales de Madrid y Bruxeles, que tán planiaes en función de los intereses de la gran burguesía internacional, apostamos pola reconstrucción comuñal y ciudadana del Pueblu Trabayador Asturianu como suxetu políticu activu nuna llucha empobinada estratéxicamente haza la construcción d’una sociedá más xusta, más igualitaria y más llibre.

Xuventú Asturianista, mocedá del Partíu Asturianista (PAS), espublizó esti 18 d’avientu “Día Internacional del Migrante” (declaráu pola ONU) un documentu nel que denuncien “les polítiques económico-sociales regresives socesives p’Asturies feches nestos 30 años pol Gobiernu Central y Autonómicu de la mano de los partíos centraliegos PSOE-IU y PP”. Asoleyamos el testu darréu:

La emigración d’asturianos pel mundu ye daqué histórico y bultable nos sieglos XIX y XX (n’América, Francia, Alemaña y Suiza sobre too), y parez que talamente va ser tamién ansí nel XXI. Ún pue mirar el númberu de centros asturianos qu’hai yá pel mundu. Nós, como organización asturiana de mocedá, tamos fartos de la consideranza que faen dende PSOE-IU de la emigración d’anguaño de mozos a fuera del Estáu y a otres partes d’ésti, falando con hipocresía qu’esto ye una “lleenda urbana” o ye “movilidá llaboral”. Eufemismos pa nun llamalo pol so nome “Emigración” de la mocedá, y poro “Avieyamientu” de la sociedá.

Tamién tamos ablucaos ente les polítiques de nun querer ver la realidá hacia les sides de l’avieyamientu de la población del mundu rural. Esto asocede nun solo pol fechu de la medra na “esperanza de vida” de la xente vieyo, sinón en primer llugar pola emigración de la mocedá asturiano de los pueblos a les ciudaes na búsqueda d’un futuru que nun puen atopar nel mundu rural, por falta de ayudes, d’ufiertes y planes reales y pola educación na que lo de pueblo ye daqué “non cosmopolita y de paletos”, colo qu’hai una minusvaloración del trabayu nel campu. Ensin falar de la soledá de los conceyos pa ufiertar servicios a los vecinos cuando nun son del mesmu color qu’el Gobiernu de turnu.

Dende Xuventú Asturianista pidimos que viendo la realidá entamen a facer polítiques tresversales de verdá dende la educación a la economía (pasando pelo social), faciendo daveres eso que llamen “economía sostenible” colo que se-yos llena la boca. Lo que parez ye que siguen ensin saber que significa eso: futuru económicu pa que la xente pueda vivir nel mundu rural y protección d’esi entornu (dambes coses).

La intervención de Vicente Álvarez Areces, Presidente d’Asturies, na inauguración del llar nuevu de l’Academia de la Llingua Asturiana foi en castellán, con namás una frase “Presidenta de la Academia, académicos: deseo que disfruten de esta nueva sede y que la sociedá asturiana siga contando col frutu del so trabayu” y un “Munches gracies” n’asturianu a la fin del mesmu.

El discursu pue descargase:

Discursu completu d’Areces

• Pueden participar tódalas personas que sean mayores de 16 años. Cada participante puede presentar una obra namái, n’asturianu estándar ou na súa variante occidental.
• Ha premiase aquel.la obra inédita qu’a xuiciu del xuráu sea d’un valir literariu mayor.
• La temática ía l.libre ya’l relatu ha tener d’extensión cinco fueyas cumo mínimo ya venti a lo máximo, con una presentación en DIN A4 a espaciu doble.
• Las obras nun se van volver a los/as autores/as.
• Ha premiase con 400 euros al trabayu ganador de la categoría d’asturianu estándar.
• Ha premiase al meyor trabayu escritu n’asturianu occidental con outros 400 euros.
• Los trabayos han presentase por cuatriplicáu no Serviciu de Normalización l.lingüística (La Plaza la Oliva, s/n, 33800, Cangas de Narcea), yá seya presencialmente ou por corréu certificáu na mesma dirección, nun sobre sin remite ou baxo pseudónimu, qu’axunte dientro la plica na que se dean a conocer los datos riales del autor/a.
• Las obras han presentase primeiro del 13 del mes muertu (13/XII/2010).
• El xuráu ta formáu por varias personas: representantes de la Conceyalía de Cultura, un/a representante de l’Academia de la Llingua Asturiana, maestros/as ya escritores/as en l.lingua asturiana.
• Del resultáu del xuráu ha comunicase a los interesaos/adas por carta ya/ou teléfonu.
• Participar nesta convocatoria supón l’aceptación de las bases.

Aconceyada la militancia de Fai! n’Asamblea Xeneral Ordinaria, y no cincante a la propuesta d’aconceyamientu con esta organización recibida per parte de “Mocedaes Socialistes d’Uviéu” al traviés del so secretariu xeneral, Diego Asenjo, y la secretaria de MMSS, Aránzazu Pecharromán, pa tratar delles problemátiques del conceyu como les polítiques de mocedá, l’aprobación de la “ordenanza cívica” o’l conflictu pol pagu de Villa Madalena y COMAMSA, alcuérdase expresar lo viniente:

1) Fai!, organización d’esquierda soberanista asturiana, tien afitao nes sos ponencies estratéxiques, roblaes nes Asamblées Xenerales Estraordinaries, la participación a comuña con organizaciones de la redolada ideolóxica dende la esquierda, el soberanismu, l’ecoloxismu y la rede de movimientos sociales asturianos. Asina, tiénse participao xunto con munchos otros coleutivos políticos, sociales, vecinales, culturales nuna bayura de movilizaciones a la escontra de la citada “ordenanza cívica”, el racismu, la ocupación d’Iraq, Afganistán y el conflictu palestín etc. porque entiende que namás dende l’acumulación de fuercies de les organizaciones alternatives se puede dar rempuesta con puxu a estes problemátiques.

2) Fai!, arriendes del analís de la realidá política y social nel contestu nacional asturianu y del estáu español, interpreta de manera percrítica les posiciones ideolóxiques del Partido Socialista Obrero Español, teniéndoles siempres como enemigues declaraes dafechu de los intereses nacionales d’Asturies al tiempu que tamién de los derechos sociales de los y les trabayadores. Asina, como executores del postfranquismu monárquicu n’Asturies, la FSA/PSOE tien responsabilidá direuta na situación de crisis económica y social d’Asturies, col afitamientu d’una rede clientelar caciquil en comnivencia col sindicalismu vertical perfeutamente allancada en toles estayes del país. De la mesma manera, la FSA/PSOE vien agospiando, xunto col PP, les postures más antiasturianes no que cinca a la identidá d’esti pueblu. El so odiu a lo asturiano, la so llingua, la so cultura, la so historia…y los posicionamientos xeneraos d’esti ultraespañolismu xabaz son una costante na vida política y social diaria asturiana que nos toca carecer. Al tiempu, podríemos facer estensives estes crítiques a los posicionamientos del PSOE tamién nel estáu español onde tien una vergoñosa historia reciente de corrupción, opresión nacional, estroza ambiental, sumisión a los mandaos de la OTAN y ONU, illegalización d’idées, represión y desmantelamientu de los servicios públicos…qu’anguaño completen con una presencia imperialista n’Afganistán, coles rebaxes de los sueldos y les reformes llaborales que suprimen derechos de los y les trabayadores ente otros.

3) Per otru llau, Fai! analiza esta propuesta d’averamientu a coleutivos sociales y políticos d’Uviéu per parte de MSU como un intentu por facer un llaváu de cara enantes de les eleiciones nel conceyu al tar na oposición. Ye chocante, nesti sen, qu’esta bona disposición a escuchar el sintir de los movimientos sociales alternativos nun se dea n’otros conceyos nos que gobiernen o mesmamente a nivel del gobiernu asturianu. Tamién ye d’estrañar que MSU tenga enfotu por falar de les nules polítiques de mocedá existentes n’Uviéu cuando’l Conseyu de la Mocedá d’Uviéu ta xestionáu por una permanente de concentración ente’l PSOE y el PP al traviés de les sos organizaciones moces satélite, pa torgar la presencia nesti muérganu d’organizaciones sociales alternatives y non vinculaes políticamente ente les que taba Fai!. D’esta manera, MSU punxo’l so sofitu, ente otres llaceries, pa que güei n’Uviéu tengamos un presidente del CMU que tuvo sentáu demientres la so conferencia, col expresidente Aznar, nel día qu’insultó a los y les estudiantes de la Universidá d’Uviéu que protestaben pola so presencia na universidá asturiana.

Por tolo espuesto, dende l’Asamblea Xeneral Ordinaria de Fai! entiéndese que nun se dan les condiciones mínimes necesaries pa entamar nengún tipu de contautu con MSU mentres qu’esta organización tea vinculada al PSOE y siga los sos entamos ideolóxicos, polo que se resolvió per unanimidá’l refugar cualesquier tipu de collaboración cola estaya moza del PSOE d’Uviéu, animando a la so militancia a que si de verdá tienen interés n’afondar na oposición a estos proyeutos faiga un apueste seriu y valiente pola ruptura col so partíu pa trabayar dende un bloque social alternativu al malgobiernu d’Asturies y d’Uviéu.

Pa finar, alcordóse treslladar públicamente esti posicionamientu énte los medios de comunicación.

VIENRES 16

12:00 h. Programa radio en directu Estudiu-2000-COPE, dende‘l Parque Xovellanos pa too Asturies, sobre “La Folixa”.

18:45 h. Pasucais y darréu actuación del Grupu Folclóricu “Xorrecer”.

NEL PARQUE XOVELLANOS:

20:00 h. Pregón y presentación oficial de la Folixa. Pregoneru: Celso Fernández, COPE-Mieres.

20:15 h. Entrega del X Distintivu a la Investigación Folclórica “Fini Suárez” al artesanu Alberto.

20:30 h. Espiche de les pipes de sidra.

20:30 h. Alcuentros con folclor :
– Actuación Banda de Gaites “Villa de Mieres”.
– Actuación Grupu de Baille “Xorrecer”.

Grupos de música folk:

23:00 h. Actuación “PATRIBAND FOLK ORLLESTRA”.

01:00 h. Actuación “SESSION A 9”.

SÁBADU, 17

NEL PARQUE XOVELLANOS:

11:30 h. Actuación del Grupu Folclóricu “Ruxidera”.

12:00 h. Espiche de les pipes de sidra.

12 :00 h. Programa radio en directu «Asturias hoy por hoy, especial folixa » de la Cadena Ser, dende la cai Ayer, al llau la cafetería Xovellanos.

13:00 h. Conciertu nel auditoriu del Parque Xovellanos de la Banda de Música “Mieres del Camín”.

17:00 h. “Esquisa”, taller de xuegos y deportes tradicionales asturianos pa neños/es, pola A. C. Retueyu.
– Xuegos: la llave, baltu, los bolos, la rana, el tiru al palu, los aros y los zancos.
– Llugar: Parque Xovellanos.

18:30 h. “Enguedeyu na Cai”: (Grupos de baille y música pala animación al baille tradicional per Mieres)

-Na cai Jerónimo Ibrán, miembros de “Xorrecer”.
-Na cai Fuente les Xanes, miembros de “L’Artusu”.
-Na cai F. Cabezas, miembros de “Ruxidera”.
-Na cai Manuel Llaneza-C.P. Llicéu, miembros de “Prau Llerón”.

NEL PARQUE XOVELLANOS:

19:00 h. Espiche de les pipes de sidra.

19:05 h. Fertival de tonada:

-Intérpretes: Lorena Corripio, El Che de Cabaños y José Manuel García.
-Gaiteru: Alfonsín, El de Les Regueres.
-Presenta: Vital Noval.

20:00 h. Clásicos de la tonada: Dº Avelino Fernández Corte.

20:30 h. Alcuentros col folclor:

-Actuación Banda de Gaites “Mieres del Camín”.
-Actuación Grupu Folclóricu “L’Artusu”.
-Actuación Grupu Folclóricu “Veiga do Cotou “, Negreira – A Coruña.

Grupos música folk:

23:00 h. Actuación “ SPANTA LA XENTE”.

01:00 h. Actuación “YVES LAMBERT – LE BERBERT ORCHESTRA”.

02:30 h. Quema falla de la “Folixa”.

02:45 h. Interpretación danza de Oñón.

DOMINGU, 18

09:00 h. Venta de la “BOLLA” de la Folixa na Plaza d’Abastos, Requexu y Parque Xovellanos.

NEL PARQUE XOVELLANOS:

11:30 h. Actuación del Grupu Folclóricu “Prau Llerón”.

12:00 h. Espiche de les pipes de sidra.

13 :00 h. “CALEYANDO”, teatru na cai, cola Compañía “Trapu Zaharra”, cola obra “ Camping Renove”.

13 :15 h. Enguedeyu na Cai :
(Grupos de baille y música pa l’animación al baile tradicional per Mieres)

-Na cai F. Cabezas, miembros de “Xorrecer”.
-Na cai Jerónimo Ibrán, miembros de “L’Artusu”.
-Na cai Manuel Llaneza, miembros de “Ruxidera”.
-Na plaza San Xuan (Requexu), miembros de “Prau Llerón”.

18:00 h. Amuesa-desfile individual a lo llargo de la cai Manuel Llaneza de les bandes de gaites “Villa de Mieres” y “Mieres del Camín”, en xunto colos grupos de baille, “L’Artusu”, “Ruxidera”, “Prau Llerón” y “Xorrecer”.
Llugar: Cai Manuel Llaneza.

18:30 h. Amuesa deporte tradicional asturianu.
Amuesa y competiciones deportes tradicionales, a cargu l’Asociación Seis Conceyos: taya horizontal y vertical, xabolu, tiru de cuerda, tiru al palu y llevantamientu de llecheres.
Llugar: Parque Xovellanos.

Sra Alcaldesa d’Avilés,

Xana, Xanina y Dames d’honor,

Autoridaes del Conceyu,

Avilesines, Avilesinos,

Amigos y Collacios toos.

La verdaera patria ye la infancia. Nel desván del nuestru pensamientu atópense los recuerdos más emotivos de la neñez. Ehí tán, cubiertes de sagraes povises, les imaxes de Les Navidaes, la nueche de Reis, el primer llibru de llectura o’l golor tienru y evocador de la mañana de Pascua, mezclienda del salitre que trai’l vientu, d’arumes de primavera nuvatina y de bollos pascuales recién salíos del fornu.

Un añu más, y con ésti son yá 117, saludamos a les Fiestes d’El Bollo, y un añu más, tornamos a la patria más íntima, la que tenemos preñada d’escenes de señardá, la nuestra infancia. Un añu más, como viaxeros infrayables del tiempu, aportamos pa gociar de la siempre afayadiza Primavera. Y con ella, la Pascua; la Lluna llena equinoccial; el nordés xeláu d’abril y el tímidu rebiltar de la Natura tempranera.

Asina, como manden los cánones del ciclu de la vida. Asina, tornando a la infancia, a la nuestra patria primera.

* * *

La Fiesta’l Bollo tien rexistru de nacencia y non sólo eso, el so partu vieno venceyáu a una declaración de principios. Como popularmente se diz, truxo un pan embaxo’l brazu, un espíritu que trescendió perende acullá lo cenciellamente folixero… Esi espíritu ye la reconciliación, la fraternidá y la concordia.

Permítanme que faigamos alcordanza al mirar les fotos marielles pol tiempu y viaxemos al Avilés indianu, al Avilés de finales del sieglu XIX. Una de les edaes más apasionantes y apasionaes peles que pasó’l nuestru milenariu pueblu. Daquélla, los capitales astur-cubanos cruciaben l’océanu en viaxe de vuelta pa da-y a la Villa un calter nuevu y destorgala de les llagañes d’un abegosu suañu d’atrasu secular. Foi la postrera década del XIX cuando vieno la lluz llétrica, el teléfonu, se proyeutaron los enanches urbanísticos, s’industrializó la ciudá, s’abrió al tráficu marín la dársena de San Xuan y llegó’l tren, que, como vena vital, truxo enerxía xoven cola qu’entrar na modernidá a ritmu de llocomotora.

Pero paradóxicamente, foi’l ferrocarril, el pregoneru de los nuevos tiempos, la mazana la discordia qu’allevantó una postiella qu’amosaba’l pueblu d’Avilés nos sos adientros.

Naquélla dómina, Avilés atopábase dixebráu en dos bandos: el lliberal, abiertu al progresu, y el conservador, más enraigonáu en vieyos plantegamientos. La tensión ideolóxica alquirió forma desproporcionada nun debate bizantinu, nun alderique aparentemente irrelevante, que yera ónde asitiar la nueva estación ferroviaria. Los lliberales -capitaneaos pol marqués de Teberga, trunfador políticu del momentu- escoyeron el final del barriu Sabugo, en Cantos –onde s’atopa güei-, los conservadores, na cai La Industria, el tarrén qu’anguaño ocupa la estación de FEVE, agües enriba de la ponte San Sebastián.

El debate acabó en conmoción pueblerina, naide nun quería dar el brazu a torcer nes sos tesis. Asina, industriales y cantistes, que yera como llamaben a los dos bandos, entamaron cavar dos trincheres ensin fondu nun Avilés que malpenes trespasiaba los diez mil habitantes.

La mitá de la villa vivía d’espaldes a la otra y con éstes entró n’escena un médicu municipal, nacíu en Castripol, el pueblu, que na llende del Eo, foi capital de l’Asturies rebelde cuando la francesada. Esti galenu, don Claudio Luanco, ensin resabios llocalistes, apautóse’l Miércoles Santu de 1893 con otros filántropos del momentu, y toos xuntos, oficiaron de parteros al traer al mundiu una xenial idega cola que zarrar les antigües ferides que nun cicatrizaben col tiempu: La idega foi facer una fiesta de fraternidá y folixa que reconciliara a tolos avilesinos. Acababa de nacer la Fiesta’l Bollo.

El domingu Pascua de 1893, un volador mañaneru fizo los honores a esi gran proyeutu de xermandá. Un pregón d’Antonio María Valdés, una carroza y malpenes una trentena músicos foron los humildosos anicios de la nuestra fiesta.

Tamién el bollu escarcháu tomó partíu, como maraviosa disculpa, pal acercamientu ente los vecinos de la villa. Les agües bautismales punxéronles les ñubes, pues esi día abriéronse los cielos pa dexar cayer un bastiazu diluvial percima los nuestros güelos. El vientu cafiante y reciu rubricó l’acta de nacimientu.

El Bollo taba servíu.

* * *

L’espritu d’esta fiesta, que ye n’esencia la fraternidá y l’entendimientu de los avilesinos, ha ser el leit-motiv que nun hemos escaecer, que nun hemos perder de vista añu tres añu, como una reafirmación, como un filu conductor que, pasando de xeneración en xeneración, confirme’l nuestru avilesinismu.

Y… ¿qué ye l’avilesinismu? Ye sintise miembru d’un organismu vital nomáu Avilés, ye sumase con bon rixu al progresu del conceyu, ye querer la so Hestoria, costumes y vezos, ye ser conscientes de formar parte integral d’un ecosistema, que funciona sigún el nuestru compás biolóxicu… Asina lo espresaron hai cuasi milenta años los qu’entós redautaron el Fueru, la nuestra más grande carta d’identidá coleutiva, el nuestru manifiestu de constitucionalidá como villa llibre frente al poder arbitrariu de los señores de forca y cuchiellu y sancionáu pol Rei más d’un sieglu enantes que la Carta Magna inglesa.

Avilés -aquel Abillés como entós se llamaba-, yera un oasis de llibertá metanes el paisaxe feudal, yera una islla de homes llibres mirando al Cantábricu.

Gracies a esti xestu, a esta conxunción de preeminencies, Abillés llegó ser un territoriu d’iguales favoratible al esporpolle comercial. Darréu, la villa convirtióse nún de los puertos de mayor sonadía dende Portugal a Francia, o como entós se dicía, de Bayona a Bayona.

A lo llargo de la Edá Media, munchos foron los que recalaron n’Abillés, atrayíos polos privilexos que lu adornaben. Sigún nos cuenta la Hestoria, por mediu de la Diplomática, los foriatos o estranxeros que deseaben avecindase nos nuestros llares, amás de xustificar la so residencia na villa amurallada, teníen qu’algamar la Carta de Vecindá, cartafueyu qu’una vegada alquiríu por ser bon poblador, daba tolos drechos del Fueru al nuevu vecín. Asina, amás de con asturianos llegaos de los montes, los valles y la mariña, Abillés abrióse a francos, gascones, xudíos, gallegos, vascos, castellanos y más xentes que nel crisol del tiempu enriquecieron el solar y dieron llugar a lo que nós anguaño somos.

Acabantes d’avecindase, tres algamar el privilexu de la Carta, el nuevu avilesín daba una convidada a los sos vecinos. D’esta manera, con esti ritu iniciáticu, arroblaba’l pautu d’amistá. Hermanábense toos al rodiu d’una mesa enllena d’un bon xintar y regada con un vinu de confraternidá. De la Llingua Griega viennos la pallabra ágape, que significa llacuada, xinta o comida de xermandá. Ye mui significativo, la raíz d’esi términu tien el mesmu aniciu que la pallabra amor.

Podría diseñase una simetría ñidia ente la convidada medieval al avecindase na Villa y la popular Comida na Cai del Llunes de Pascua d’anguaño.

Hai un claru paralelismu ente elles. En dambes la finalidá ye idéntica, esaltar l’espíritu de fraternidá al pertenecer a una mesma colectividá, a una xera conxunta. En dambes l’escenariu ye bien paecíu, una mesa horizontal, igualitaria y fraternal, escenariu d’un xintar, d’un ágape que n’esencia ye un actu d’amistá, d’amor y xermandá. La Comida na Cai nun ye más qu’un capítulu non escritu del Fueru, la firma folixera, con un tresfondu de reafirmación popular d’avilesinismu militante.

* * *

Otru de los ingredientes fundamentales y fundacionales de la nuestra fiesta de Primavera ye la Música. Ye imposible camentar cómo sedría’l Bollo ensin los pasucais, les muñeires, los xiringüelos y ensin los acordes de la nuestra música tradicional enllenando l’almósfera xaranera de la Pascua.

La primer fiesta d’El Bollo, la de 1893, pesiar la bastiada d’agua que moyó los festexos d’aquella xornada, nun foi a torgar que la banda municipal diera un conciertu de tres hores nos arcos de la Plaza les Aceñes. Too un flechazu que daba pasu al noviazgu de la Fiesta cola Música.

Dicir Música ye facer una feliz sinonimia col ser avilesín.

Cinxéndonos a la Hestoria, relataba Solís de Merás, el cronista de Pedro Menéndez, que na campaña de La Florida escontra los hugonotes, los pocos contrincantes prisioneros que llibraben de la espada del Adelantráu yeren los músicos. L’amnistía llevábenla implícita nes sos flautes, nes trompetes, nes xiblates y nos violinos. Quiciabes un puntu de sensibilidá de don Pedro pa colos sos enemigos.

El binomiu Música-Avilés tien dos nomes que resplanden con lluz propia.

Ún d’ellos ye conocíu por toos, Julián Orbón, fíu de Benjamín, musicólogu de prestixu. Julián bien ceu dexó’l so pueblu pa dir cola so familia a Cuba, a L’Habana, la ciudá que bien merez el nome de segundu Avilés. La capital caribeña onde se forxó’l drama de la Modernidá avilesina, el ñeru de los capitales indianos que revirtieron na primer industrialización seria de la nuestra villa. Ellí, al otru llau del océanu, perende acullá de la llinia l’horizonte, el xoven Orbón punxo en pentagrama les idegues que de siempre cantáben-y al oyíu del so maxín d’artista. La so música orquestal, les sos composiciones de cámara valiéron-y un puestu ente los grandes de la música clásica iberoamericana.

El segundu músicu con nome propiu ye un sabugueru, hasta agora poco conocíu. Ramón Fernando de Garay, nacíu en barriu marineru hai cuasi 250 años, un cuartu mileniu. Vieno al mundiu esautamente’l día que’n Saltzburgu el prodixosu Mozart apagaba les velines del so quintu cumpleaños. Toa una premonición.

Afirma’l el musicólogu y direutor, José Luis Temes, que Garay, ensin duldes ye’l padre del sinfonismu español. Esti añu, tovimos la suerte d’oyer a Garay n’Avilés, na Selmana de Música Relixosa. La orquesta Julián Orbón interpretó la so 10ª Sinfonía, d’aire inequívocamente haydinianu. Amás l’estrenu cellebróse na ilesia nueva de Sabugo, qu’ocupa’l mesmu llugar nel que sieglos atrás s’allevantara’l Conventu la Mercé, onde’l padre de Garay taba emplegáu como organista polos flaires mercedarios, a cambiu de comida y vestíu.

Con estos dos puntales, Orbón y Garay, bien merez el nuestru pueblu tar asociáu a les corchees y a les claves de sol, “in aeterno”.

Faláremos enantes de la vinculación d’Avilés a Cuba. Ellí remansara Orbón, y d’ellí tornaren los emigrantes avilesinos tresformiaos n’americanos, n’indianos, cantando los aires cadenciosos, murnios y enllenos de señardá de la Cuba perdida, tarareando les habaneres de los atapeceres equinocciales mudaes en tonos buxos d’apasionáu dramatismu.

En fin, les habaneres de la tan llonxana y cercana Cuba, la música recuperada de los nuestros clásicos, los vibrantes ritmos rockeros, los célticos floreaos de les gaites y l’atávica tonada astur tienen un singular puntu d’alcuentru n’El Bollo nun sincretismu mui nuestru, con sellu d’inconfundible asturianismu.

Faciendo’l contrapuntu musical a estos sones pascuales, esti añu habremos añadir una ritmu más: la samba brasileira, materializada en xeniales llinies arquiteutóniques de fierru y cementu que se reflexen nes agües de la ría: El Cientru Niemeyer, fíu del arte d’un xoven arquiteutu de cien años d’edá.

Otra vez, la vocación tresoceánica d’Avilés surde pelos poros del so vieyu pelleyu. Too un luxu: al llau de la nuestra casa allevántase‘l Niemeyer, un trozu de Brasilia, la capital que suañó don Óscar y surdió delantre los nuestros güeyos en 1956, d’igual edá qu’Ensidesa y, que por una casualidá hestórica, toma’l relevu nel mesmu solar onde una xeneración d’avilesinos escribieron una de les páxines más significatives de la cronoloxía llocal, convirtiendo la Villa del Fueru na Capital del Aceru.

Cientru Niemeyer, arguyosu y gayasperu, cola so figura hemisférica y blanca, avilesín singular que ta acabantes d’avecindase a la solombra’l vieyu Fueru, embaxador del país del Amazones na nuestra ría…

La ría, l’exe del antiguu alfoz de Gozón, columna vertebral de la nuestra Hestoria dictada nel agua por Rui Pérez, Pedro Menéndez, Martín de las Alas, los mareantes sabugueros, los emigrantes a Cuba…. y tamién arteria onde muerren los nuestros ríos, pequeños, de curtia xeografía, pero cargaos de lleendes y mitos, como’l Tuluergo, árbitru que marcó secularmente la frontera ente dos mundios sociales bien estremaos, La Villa y el pueblu de Sabugo. De xuro que’l Tuluergo, como tolos regatos y fontes astures, tien les sos dioses proteutores, les sos xanes filando cadexos d’oru les nueches de Lluna llena.

Como nun podría ser d’otru xeitu n’Asturies, el país del agua, dos d’elles, Xana y Xanina, presiden la Fiesta, dándo-y cara xoven, como xestu de feliz sinécdoque. Elles, más que naide, representen güei lo avilesino. Son el símbolu de la Villa. Nelles espeyámonos toos, pues son les garantes y la garantía de la Fiesta. Saludando dende la so carroza real supervisarán la folixa xeneral, pa que siga la tradición, pa que seya una realidá un añu más.

L’otru símbolu ye’l Bollo, el nome propiu col que bautizó don Claudio Luanco esta conmemoración primaveral. Formalmente llama l’atención el so diseñu. Ye tetraméricu, tien muncho de rosa los vientos; ye sinuosu, con cabos y golfos –como un mapa d’islla con tesoru-, plásticamente perfeutu, tien silueta armoniosa y nació con vocación d’iconu

ensin sabelo; pero percima de too esto, tien el noble oficiu de servir de pan común de fraternidá ente los avilesinos de paz, que -tornando a la patria de la nuestra infancia- güei somos toos nesti milenariu pueblu.

¡Qu’entame la Folixa!

¡Puxa Avilés!

¡Puxa la Fiesta d’El Bollo!

Entrevista a Miguel Solís Santos n’Asturnews

Les campañes entamaes por un mediu de comunicación contra’l procesu de recuperación toponímica piden una respuesta clara de les autoridaes correspondientes: el Gobiernu asturianu o, nel so casu, la Conseyería de Cultura y Turismu, y la Dirección Xeneral de Política Llingüística.

El llabor recuperador de la Xunta de Toponimia faise con unos criterios claros que se basen no recoyío na llei: recuperar les formes teníes por tradicionales. Los trabayos de campu fechos por especialistes y les xuntes celebraes con espertos na materia, depués d’oyer a toles partes (incluíes asociaciones vecinales), acaben con un alcuerdu que refrenda’l Conseyu de Gobiernu y que se remata cola publicación nel Boletín Oficial del Principáu d’Asturies. Esi llabor de tantos meses, inclusive años, merez tol respetu y consideración y nun pue volvese atrás por una campaña mediática preparada a costafecha dende la dirección d’un mediu de comunicación. Cuando se tien el poder mediáticu ye fácil mover los filos pa poner un pueblu enteru en contra del topónimu qu’ellos mesmos usen. Nun ye más que la demostración de lo muncho que falta por recorrer pa que los prexuicios llingüísticos contra lo propio vaigan desapareciendo.

El procesu de recuperación toponímica tien que se basar non solo na oficialización de les formes tradicionales sinón tamién en poner les bases pa que la xente nun s’avergüence d’elles. De poco val facer campañes de concienciación si’l mesmu Gobiernu asturianu o la RTPA nun usen esos topónimos oficiales.

Un topónimu tradicional ye’l que ye y el llabor de la Xunta de Toponimia ye recuperalu y oficializalo porque asina lo manda la llei. Sería gravísimo qu’una entidá que se tien que basar en criterios científicos y rigorosos tuviera que desdicise y empezara a volvese atrás de los alcuerdos tomaos cada vez que sal un titular de periódicu. Evidentemente, la recuperación toponímica nun se basa nes votaciones. Nuna votación podrán escoyese los topónimos que se quieran, pero la forma tradicional nun la cambien les votaciones. Esiximos a la Directora Xeneral de Política Llingüística que salga al pasu d’estos movimientos que quieren valtar el procesu de recuperación toponímica y qu’aclarie públicamente toles veces que faiga falta cómo ye esti procesu y qué criterios se manexen.