Convocatories

Hasta’l 30 de mayu va tar abiertu’l plazu pa presentar obres al concursu del que va salir el cartelu de la próxima edición del XXI Festival de la Sidra de Nava. Esti concursu ta organizáu pola asociación “Amigos de la Sidra Natural”, en collaboración col Conceyu de Nava, y ta dotáu con 700 euros pal trabayu ganador. Los cartelos tienen qu’unviase a la sede de l’asociación “Amisgos de la Sidra en Nava (Museo de la Sidra, Plaza Príncipe de Asturias, S/N, 33520). Equí pue consultar les bases.

Esti martes, 13 de mayu, celebrose un taller-charra tituláu “asturianu-inglés” na Escuela Oficial d’Idiomes de Xixón. L’actu tuvo al cargu del autor del Diccionariu básicu asturianu-inglés/inglés-asturianu, Inaciu Galán.

La charra va consistir nun averamientu a la hestoria y realidá de la llingua asturiana, faciendo comparanza cola situación del inglés. Darréu van trabayase delles tornes ente los idiomes y otres actividaes didáctiques colos alumnos de la Escuela.

Inaciu Galán y González (Xixón, 1986), escritor y presentador de la TPA y la Cadena Ser, espubliza en 2006 el “Diccionariu Básicu asturianu-inglés/inglés-asturianu” cola editorial Trabe y prólogu d’Ana Cano. Esti diba convertise asina nel primer diccionariu del asturianu con otra llingua, nun siendo’l castellán. Galán recibió pol so trabayu nos medios de comunicación el Premiu Enriqueta González Rubín de Periodismu nel añu 2005.

El martes que vien, día 13 de mayu, va celebrase un taller-charra tituláu “asturianu-inglés” na Escuela Oficial d’Idiomes de Xixón. L’actu vas tar al cargu del autor del Diccionariu básicu asturianu-inglés/inglés-asturianu, Inaciu Galán.

La charra va consistir nun averamientu a la hestoria y realidá de la llingua asturiana, faciendo comparanza cola situación del inglés. Darréu van trabayase delles tornes ente los idiomes y otres actividaes didáctiques.

Páxina de la EOI de Xixón

El 6 y 7 de mayu, na facultá de Filosofía y Lletres del campus universitariu de la ciudá de Lleón celebrase’l congresu “El lleonés nel sieglu XXI”, un alcuentru que tien como fin “facer analís de la realidá de la llingua lleonesa anguaño y de la so proyección futura”, según la organización, a cargu de la Univeridá de Lleón y del Institut de la Llingua. Nel actu participen filólogos de tol dominiu llingüísticu ástur y de la Universidá parisina de Diderot.

Xosepe Vega, José Alfredo Hernández Rodríguez y Diego José Hernández, miembros de Facendera pola Llingua, Furmientu y El Fueyu respectivamente, van participar nuna mesa na que va tratase’l tema de la norma o estandarización que la recuperación de la llingua esixe na Asturies cismontana.

El palaciegu Roberto González-Quevedo, escritor, Secretariu de l’ALLA, doctor en filoloxía y antropoloxía y profesor de la Universidá d’Uviéu va abrir el simposium analizando la llingua llariega de Palacios del Sil, L.laciana y Babia, mientres qu’Ana Cano, presidenta de l’Academia de la Llingua Asturiana y Decana de Filoloxía de la Universidá d’Uviéu, el mirandés António Bárbolo Alves, de la lusa Fundación pa la Ciencia y la Tecnoloxía y Ramón Mariño Paz, profesor de la Universidá de Santiago de Compostela, van tratar los “Procesos de normalización llingüística”.

D’otra banda, Nicolás Bartolomé Pérez, autor de “Filandón. Lliteratura Popular Llionesa”, va falar de la tradición oral lleonesa y el filólogu Héctor García Xil y el profesor d’enseñanza media Juan Carlos González Ferrero van falar na conferencia “El lleonés güei”.

José Ramón Morala y María Cristina Egido, de la Universidá de Lleón y Julio Borrego Nieto, per parte de la de Salamanca, fadrán lo propio en “Sobre la normalización del lleonés”. José Carlos Herreras, de la Universidá de Paris Diderot, va zarrar el congresu esponiendo “Del futuru del lleonés y d’otres llingües y dialectos n’España”.

La Sociedá Cultural Clarín, de Quintes, ta acabante anuncia que a lo llargo de la XXI edición del Festival Gastronómicu de la Llámpara, que se fai cada añu en Quintueles y anunció yá la entrega del so galardón más importante, la Llámpara d’Oru, que dan cada dos años, David M. Rivas Infante, miembru de l’Academia de la Llingua Asturiana, doctor en Ciencies Económiques de la Universidá Autónoma de Madrid, miembru de l’Asociación l’Arribada.

David Rivas tuvo siempres venceyáu a esta sociedá, siendo pregoneru de la mesma y delles vegaes presentador de los sos actos.

El gallardón busca premiar a personalidaes qu’engrandezan el nome de Villaviciosa y d’Asturies. Ente los premiaos d’otres ediciones tán Francisco Grande Covián, Joaquín Rubio Camín, Ángeles Caso, José Ángel Hevia, Manolo Busto y Víctor García de la Concha, ente otros.

La entrega del gallardón va celebrase’l próximu 24 de mayu.

La Conseyería de Cultura abrió’l plazu, hasta’l 30 de xunu) pa presentar trabayos al XXIX Premiu Juan Uría Ríu d’investigación sobre cultura asturiana. El premiu pal ganador nesta nueva edición del certame ye de 6.000 euros. Les obres puen presentase n’asturianu o en castellanu pero nun puen tener una estensión menor de 200 folios mecanografiaos a dos espacion per una cara.

El llugar de presentación de les obres ye’l rexistru de la Conseyería de Cultura y Turismu (c/ Eduardo Herrera «Herrerita», s/n, 33006-Uvieu). Habrán de dir firmaos nun sobre onde indique Premiu Juan Uría 2008, amás del títulu del trabayu y el nomatu del autor.

El xuráu de la XVI Edición del Premiu Padre Patac, que convoca la Conseyería de Cultura y Turismu y l’Ayuntamientu de Xixón, alcordó por unanimidá entregar ex-aequo esti galardón a los trabayos d’investigación “Álvaro Fernández Suárez. Bio-Bibliografía de un escritor eficazmente olvidado”, del filólogu Luis Casteleiro, y “Los Valdés en el Gijón de los siglos XVI y XVII”, de la historiadora Lucía Fernández Secades.

Luis Casteleiro Oliveros ñació n’A Veiga fai 34 años, y dende l’añu 2003 trabaya como filólogu na Conseyería de Cultura y Turismu del Principáu d’Asturies, al traviés de la Oficina de Política Llingüística. Llicenciáu en Filoloxía pola Universidá d’Uviéu, ye autor de cuatro llibros y decenes d’artículos sobre historia, llingüística y lliteratura, amás d’un bon garapiellu de crítiques lliteraries espublizaes en revistes y suplementos culturales. El trabayu “La revolución en lingüística. Ferdinand de Saussure” ganó nel añu 2000 el Premiu “Dámaso Alonso” d’investigación filolóxica que convoca la Universidá de Santiago de Compostela.

D’otru llau, Lucía Fernández Secades nació n’Uviéu en 1982. Llicenciada n’Historia, trabaya como becaria na Universidá d’Uviéu nel Plan I+D+I del Principáu d’Asturies, al traviés del programa Severo Ochoa d’ayudes predoctorales pa la formación n’investigación y docencia, y miembru del grupu d’investigación “Patrimonio y Poder de la Nobleza en la Asturias del Antiguo Régimen” entamáu pola historiadora María Ángeles Faya Díaz. Anguaño ta faciendo una tesis doctoral sobre’l Xixón del sieglu XVIII que lleva’l títulu “La oligarquía gijonesa y el gobierno de la villa en el siglo XVIII”.

Ayeri entamaron na Facultá de Xeografía y Hestoria de la Universidá d’Uviéu la XVI Selmana Cultural, qu’esti añu ta centrada nos cuatrocientos años de la universidá asturiana, cuntando cola presencia de dellos actos nos que la llingua asturiana va ser protagonista, como la presentación del ensayu sobre 1808 de Faustino Zapico y un alderique sobre revistes n’asturianu nel que van participar los responsables de les revistes “N’ast, cartafueyos d’ensayu” y “Formientu”, de lliteratura moza.

Los actos de güei van entamar a les doce la mañana nel Salón d’Actos de la Facultá de Xeografía y Hestoria, llugar de celebración de tolos actos, cola comunicación “Cultura y economía na Asturies d’entamos del sieglu XVIII”, por Álvaro Ruiz de la Peña y Joaquín Ocampo. A la una la tarde va celebrase un “Conciertu barrocu alredor de 1708” pol grupu Forma Antiqva.

El miércoles a doce la tarde Faustino Zapico va falar de l’Asturies de 1808, de la que ta acabante espublizar un ensayu cola editorial Trabe. Darréu, a la una la tarde, “La guitarra romántica: los maestros del sieglu XIX” va tar al cargu de José Antonio García Fuertes.

Pal xueves los actos van entamar a les 12 con una mesa redonda-presentación de les revistes Formientu, de lliteratura moza n’asturianu y N’ast, d’ensayu na mesma llingua. Nel actu van tar presentes los directores de les publicaciones, Inaciu Galán y Xabel de Cea respectivamente, amás d’un representante de la Comisión de Cultura de la Facultá de Xeografía y Hestoria, Javier Cuberu. L’actu va incluyir un pequeñu recital poéticu. Darréu, p’hacia la una la tarde, van entregase los premios naranxa y llimón a los profesores. A les dos los actos van completase con una espicha.

Los actos van siguir la selmana que vien, de llunes a miércoles y complétense con delles esposiciones.

Programa completu de la XVI Selmana Cultural

Ta acabante d’entamar el plazu pa presentar obres al decimutercer premiu “Alfredo Quirós Fernández” qu’organiza la llibrería Cervantes d’Uvieu. El tema ye llibre pero tien que referiese al Principáu d’Asturies, quedando escluyies los trabayos lliterarios (poesía y narrativa). Hai que presentar los trabayos por triplicao na llibrería (Doctor Casal 9, 33001 Uvieu) xunta’l DNI, les señes y un telefonu de contactu. El premiu va consistir na publicación de la obra ganadora y un importe en metálicu de 6.000 euros.

El Premiu Alfredo Quirós Fernández ñació en setiembre de 1996 poa librería Cervantes, pa cellebrar el so 75 aniversariu y homenaxear d’esta forma al fundador de la llibrería. La librería Cervantes quier contriubuir con esti certame a la difusión d’obres que tengan la investigación sobre Asturies como oxetivu cimeru.

Güei, llunes 14 d’abril, los grupos parllamentarios representaos na Xunta Xeneral van aconceyar pa tratar sobre la reforma del Estatutu d’Autonomía d’Asturies y el Conceyu Abiertu pola Oficialidá convoca una concentración al pensar qu’“esta nueva reforma ye posiblemente la última oportunidá de poder cuntar, por fin, con un estatutu que s’axuste a la nuesa realidá cultural y llingüística, y que reconoza los mesmos derechos a tolos ciudadanos, falen la llingua que falen”.

La organización va recordar a los grupos que “la Constitución española recueye nel so artículu 3u, “Les demás llingües españoles (amás del castellanu) serán tamién oficiales nes respectives Comunidaes Autónomes d’alcuerdu colos sos Estatutos”. Por eso, va más de 25 años, los parllamentos de Galicia, País Vascu, Navarra, Cataluña, Valencia y Les Isles Baleares aprebaron los sos estatutos reconociendo les sos llingües propies como oficiales, garantizando asina la protección del so patrimoniu llingüísticu y el respetu a los derechos de los sos ciudadanos”.

La convocatoria quier recroda a los políticos asturianos qu’Asturies foi la excepción, “la única comunidá con llingua propia que nun la reconoció como oficial” y nesti tiempu evidencióse que mientres el restu comunidaes supieron dar valor al so patrimoniu llingüísticu, convirtiéndolu nun potente dinamizador social y económinu; n’Asturies siguimos despreciando esi potencial, día tres día la nuesa llingua ta perdiendo falantes y ámbitos d’usu, y sigue siendo motivu de discriminación y vergüenza.

Agora, sigue’l comunicáu del COA, “vuelve abrise la oportunidá de tornar esta situación. Esta reforma del Estatutu d’Autonomía tien que recoyer la única reivindicación ciudadana n’Asturies que se vien manteniendo constante nos últimos trenta años. Nun podemos dexar que por culpa d’intereses partidistes irresponsables condenen a muerte a una llingua que pertenez al pueblu asturianu dende va más de mil años”.

El CAO convida a tolos asturianos a participar el güei a les 9:30 la mañana cabo la Xunta Xeneral y embaxo’l lema “¡Na reforma l’Estatutu, L’Asturianu Llingua Oficial!”.