Convocatories

La selmana anterior a la del Conciertu pola Oficialidá, que va celebrase l’8 de xunu en Xixón, la Xunta pola Defensa de la Llingua Asturiana va entamar n’Uviéu, na Plaza’l Pescao, una esposición onde van axuntar los cartelos y otros materiales de les 25 ediciones del Conciertu.

La inauguración va ser el martes 4 de xunu, a les ocho de la tarde, y tán convidaes toles persones músiques de los cuasi 70 grupos que participaron nestos 25 años del Conciertu.

El dibuxante y músicu Ruma Barbero, miembru del grupu de folk Felpeyu, Presenta esti xueves 16 de mayu nel Centru Social Autoxestionáu La Semiente la so nueva novela gráfica: La Chelita. El Salvador 1992. Na presentación va faese una proyeción de material graficu sobre El Salvador y tamien habra firma d’exemplares. La actividá tará presentada por Javier Arjona, miembru de Soldepaz Pachakuti y conocíu cooperante internacional, que compartirá coles asistentes la situación en El salvador antes y depués de la paz.

Barbero, que ganara’l premiu Alfonso Iglesias de Cómic en Llingua Asturiana na so edición de 2009 por Manzajú, vuelve ofrecenos una nueva narración gráfica na que exhibe’l so dominiu técnicu de tolos recursos propios del cómic. L’apaición d’esta nueva publicación cobra una especial importancia pos nun son munches les posibilidaes d’atopanos con esti xéneru lliterariu na lliteratura asturiana. Editá n’asturiano por Tierra Llibros, La Chelita ye una novela gráfica de 160 páxines que fala de les vivencies y testimonios de los cooperantes internacionales y veteranos de la guerrilla salvadoreña. Asina, el cómic ye un viaxe personal pela historia más tráxica d’El Pulgarcito d’América Llatina, con testimonios autobiográficos y esperiencies humanes cola guerra y cola paz.

La Llaboral Ciudá de la Cultura consolidóse yá como unu de los centros cultural y turísticu más importantes d’Asturies. Pa conmemorar el so sestu aniversariu trés díes de puertes abiertes pa percorrer los múltiples espacios qu’alluga esti gran complexu. Dende’l Teatru, la Ilesia, los Talleres del Centru de Formación Profesional La Llaboral, el Paraninfu, la Biblioteca de la Facultá de Comerciu, Turismu y Ciencies Sociales “Xovellanos”, el Patiu Corintiu y la Plaza, ensin escaecer la Torre, los Xardinos, el Centru d’Arte y Creación Industrial y les instalaciones de la Radiotelevisión del Principáu d’Asturies.

Los díes 24, 25 y 26 de mayu podrá visitase con guía y de baldre, a diferencia del restu l’añu, y conocer tolos espacios qu’atesora La Llaboral Ciudá de la Cultura.

Esti xueves, 16 de mayu, nel Club La Nueva España de Xixón, a les 8 la tarde, va presentase “El Picu Pienzu”, l’últimu llibru de Xuan Xosé Sánchez Vicente, que recueye artículos asoleyaos na prensa asturiana nos dos caberos años.

Editáu pola Fundación Nueva Asturies, va regaláse-yos a los asistentes a la presentación un exemplar del llibru, como se fai davezu nos actos de la Fundación Nueva Asturies.

El Club La Nueva España de Xixón ta na Plaza del Monte de Piedad, nº 2. Nel edificiu onde taba l’anicial Caxa d’Aforros y Monte de Piedá, ente les cais San Antonio y Xovellanos.

El concursu convócalu’l Conceyu de Xixón al traviés de la Conceyalía d’Educación, Cultura, Xuventú y Fiestes. L’almisión d’orixinales acaba’l día 13 de setiembre de 2013 inclusive.

Concederáse un premiu de 3.000 € y la publicación del ensayu. Pue participase con obres d’ensayu o trabayos d’investigación nos que se recueyan los siguientes ámbitos: investigación sobre la cultura asturiana; investigación sobre la cultura rusa o eslava; la memoria social y colectiva de los pueblos rusu y asturianu; la memoria social y colectiva de Xixón.

Bases completes del concursu

Esta Selmana de les Lletres Asturianes organícense dos presentaciones del númberu 11 de la revista Formientu. La primera sedrá esti xueves 2, a les 20 hores, nel Centru Sociocultural de Les Vegues (Corvera). El sábadu 4, a les 18 hores, celebraráse otra presentación na Feria del Llibru y del Discu n’asturianu n’Avilés, na Antigua Pescadería Municipal. Plaza de Santiago López, númberu 1.

La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. Con esta nueva entrega ábrese una etapa nueva, pasando de dos a un solu númberu al añu, pero con más páxines, de 30 a más de 70, y con una edición más curiada.

Esti númberu cunta con testos de Denis Soria, Vítor Suárez, Cristina Menéndez, Belarmino Álvarez, Noemí Rodríguez, Alfredo Huergo, Blanca Fernández, Daniel Fernández, Abel Aparicio, Xurde Álvarez, Ismael Carmona, Félix Iglesias, Xosé B. Álvarez, Laura Marcos, Andrés Astur y una crítica lliteraria de Javier Cubero.

Amás estrénase la sección “Cuando… yera autor mozu” dedicada nesti casu a Pin de Pría. Na sección búscase dar la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión ye “Llibertá”, asoleyáu por Pin de Pría con 23 años.

Amás, el vienres 10 a les siete la tarde, Colunga va acoyer otra presentación de la revista, a la que van sumase otres dos, nel mes de xunetu, nel Centru Asturianu de Madrid y en Bimenes.

La organización Iniciativa pol Asturianu celebra estos díes el Día del Llibru y la Selmana de les Lletres Asturianes. Por ello toles persones que se faigan socios dende’l 23 d’abril, Día del Llibru y hasta’l 3 de mayu, Día de les Lletres Asturianes, van recibir un llibru n’asturianu de regalu nel casu de los socios simpatizantes y trés llibros pa los socios miembru. Amás, coinciendo col Día del Llibru Asturianu, el 3 de mayu, van sortear un llote de llibros y revistes n’asturianu ente los sos socios.

Les persones interesaes en facese socios pueden escribir a contautu@iniciativapolasturianu.org Dende la organización animen a “echar un gabitu nel nuesu trabayu pol futuru del idioma asturianu”.

Les persones que se faigan sociu simpatizante (20 euros al añu) van recibir un llibru a escoyer ente los qu’ufre la organización, mientres que los que se faigan sociu miembru (dende 60 euros al añu), recibirán un llote de trés llibros.

http://es.scribd.com/doc/118363788/Fueya-d-inscripcion-docx

Güei, vienres 26 d’abril, va celebrase una presentación del llibru “Les gaites”, de Daniel García de la Cuesta nel Auditoriu d’A Veiga y de magar les ocho la tarde.

“Les gaites” ye un llibru que reflexa’l resultáu d’un trabayu d’investigación, realizáu por esti autor sobre un preséu tradicional usáu n’Asturies y otros munchos llugares, la gaita. Amás d’afondar na conocencia y usu d’esti preséu, y d’otros utilizaos yá dende la prehistoria ástur, nesta obra, d’edición billingüe asturianu y castellán, d’esquizar nel orixe y desenvolvimientu de los preseos que lleven el nome de gaita, y d’otros colos que tán venceyaos a lo llargo de la hestoria musical, tantu de los que lleven un fuelle como de los que non, como los auloi, launeddas, albokak, etc.

L’espertu en mitoloxía tradicional asturiana ya ilustrador xixonés Alberto Álvarez Peña, va presentar esta tarde a les ocho, nel Club de La Nueva España de Xixón, el so llibru tituláu «El llobu na tradición oral asturiana», tercer publicación de la colección «Testos de recoyida oral» qu’edita l’Academia de la Llingua Asturiana. L’actu va tener llugar na Sala Cultural de Caxastur, na Plaza del Monte de Piedá. Va proyectase un documental sobre’l llobu n’Asturies, presentando l’actu’l secretariu de l’Academia de la Llingua Asturiana, Roberto González-Quevedo.

Esti sábadu 20 d’abril a les 11:30 hores va celebrase un cuentacuentos pa neños del actor Carlos Alba “Cellero”. L’actividá ta coorganizada por Reciella y Xunta Moza.

Dende Xunta Moza comparten con Reciella “la esmolición pola falta d’iniciatives y actividaes pa la xente menudo nes que l’asturianu seya la llingua vehicular de les mesmes” y por ello paez-yos “mui necesario organizar actividaes pa la reciella nes que se faiga un usu natural y normal del asturianu”.

Conviden a grandes y pequeñes a participar d’esta actividá tan prestosa, “siempre que los adultos vaigan acompañaos d’un menor que se responsabilice d’ellos”, bromeen.