Convocatories

La Sociedá de Fiestes de San Pedrín de la Cueva, en Sariegu, buscar cartelu pa les sos fiestes pente medies d’un concursu al que pueden presentase cartelos n’asturianu hasta’l 31 de mayu. El premiu ye de quinientos euros. Nel cartelu han apaecer la Misa n’asturianu na Cueva y otres actividaes de les fiestes.

Bases completes del concursu

Una mesa redonda embaxo’l títulu “La esperiencia hestórica de la Plataforma contra la Represión y poles Llibertaes y la necesidá de la Unidá d’Acción equí y agora” va tener llugar el xueves 18 d’abril a les 19.30 hores nel llocal de la Sociedá Cultural Xixonesa, allugáu na cai Balmonte de Miranda, númberu 4.

Como ponentes tarán Cándido González Carnero, María Jesús Suárez García, Miguel Ángel Llana y Javier Cubero de Vicente.

Acaben d’abrir el plazu pa presentase al III Concursu de Poesía Miguel G. Teijeiro. El concursu ta abiertu a cualesquier persona interesada en participar, con independencia de la so edá y procedencia, concursando en dos estayes, educativa, pa neños de centros educativos y hasta 12 años y otra pa mayores de 18 años. En dambes pueden presentase obres en gallego-asturianu y castellán.

Les obres presentaes tendrán de ser orixinales ya inédites. Un mesmu participante va poder allegar, si asina lu deseya, en dambes categoríes (castellán y/o gallego-asturianu).

La temática y l’estensión de los trabayos presentaos va ser llibre. Los trabayos van presentase embaxo nomatu, nun sobre zarráu, faciendo constar nel esterior “III Concursu de Poesía BPM “Miguel G. Teijeiro”. Nel interior va acompañase asina mesmu d’otru sobre zarráu nel que conste’l nomatu y nel interior los datos del participante: nome, apellíos, edá, casa, teléfonu de contactu, corréu lletrónicu y, nel so casu, nome y datos del colexu participante. Los trabayos ensin premiar van pasar a ser propiedá de la Biblioteca.

Los trabayos van apurrise a la Biblioteca Pública “Miguel G. Teijeiro” de Figueres, n’horariu de Biblioteca de 11 a 13 o de 17 a 19.30 hasta’l 19 d’abril. Tamién van poder unviase per corréu ordinariu a la siguiente dirección: Biblioteca Pública “Miguel G. Teijeiro” Avda de Trénor, e/n Edificio Torre del Reló 33794. Figueiras, Asturies.

En caúna de les categoríes va facese entrega d’un llote de publicaciones y regalos pal primera clasificáu, amás d’un diploma de participación pa tolos participantes.

El BOPA asoleyó güei la convocatoria de sovenciones de la Fundación Municipal de Cultura, Educación y Universidá Popular del Conceyu de Xixón, que cunta con 9 llínees d’acción: Asociacionismo cultural, producciones artístiques, teatru y danza, centros d’enseñanza y entidaes educatives, cultura tradicional y llingua asturiana, xuegos y deportes tradicionales asturianos, asociaciones de vecinos de la zuna rural, pal espardimientu de la cultura tradicional asturiana nos centros educativos y p’asociaciones y colectivos xuveniles.

El plazu de presentación de la solicitúes ye de 30 díes arteros a partir de güei, 25 de marzu.

El CMX ufre asesoramientu.

El Conseyu de Mocedá de Xixón va ufrir nos próximos díes un resume de les bases correspondientes a la llínea destinada a asociaciones y colectivos xuveniles.

Recuerden que tán disponibles “pa resolver cualquier dulda o por que vos echar un gabitu a la de preparar la documentación y el proyectu”. Los intereaos pueden allegase l’Asesoría p’Asociaciones del CMX, asitiada na Avda. Manuel Llaneza, 68, llamar al teléfonu 985 15 50 72 o escribi-yos a info@cmx.es

Bases completes

La Revista de Filoloxía Asturiana publicar añalmente dende l’añu 2001, impulsada pol Seminariu de Filoloxía Asturiana, grupu d’investigación de la Universidá d’Uviéu. Como’l so nome indica, RFA ye una publicación especializada n’estudios llingüísticos y lliterarios relativos al dominiu románicu asturianu-lleonés, dende cualesquier perspectiva y orientación metodolóxica. Sicasí, ta abierta igualmente a conteníos más amplios del ámbitu de la hispanística, la romanística o la llingüística xeneral. El plazu d’unvíu de propuestes ta abiertu hasta’l 30 de xunu de 2013, notificando les aceptaes l’1 de setiembre.

Ta indexada en Latindex. Dende 2010 espublízase tantu en papel como en llinia, al traviés de la plataforma de revistes científiques de la Universidá d’Uviéu. Amás, cuenta con comité científicu esternu de calter internacional, formáu por profesores como Rosario Álvarez, de la Universidá de Santiago de Compostela-Instituto da Lingua Galega, Antonio Bárbolo Alves, del CEL-Universidá de Trás-os-Montes e Alto Douro, Portugal, Eduardo Blasco Ferrer, de la Universidá de Cagliari, Cerdeña, Inés Fernández Ordóñez, de la Universidá Autónoma de Madrid-Real Academia Española o Graciela Reyes, de la Universidá d’Illinois en Chicago, EE.XX.

Polo xeneral, los distintos conteníos de RFA dixébrense en distintes secciones bien establecíes: artículos (investigaciones d’hasta 20 páxines), notes (hasta 10 páxines), reseñes (recensiones crítiques actualizaes d’otres publicaciones), revisiones (reedición d’artículos clásicos de la Filoloxía Asturiana, pocu conocíos o pocu accesibles na actualidá), documentos (documentos llingüísticos inéditos o pocu conocíos), alderique (discutinios abiertos sobre distintes cuestiones filolóxiques) ya información (noticies sobre proyectos d’investigaciones, tesis, eventos diversos, etc…)

El Conceyu de Nava, al traviés de la Conceyalía de la Muyer, convoca’l Premiu de rellatu curtiu Navactá, pa rellatos venceyaos al problema de la violencia de xéneru. Convócase con dos categoríes, “Promeses”, pa menores de 17 años, y “Lliteratos”, de magar los 18 años. El ganador de la categoría Promeses va recibir un llote de llibros, el de la categoría Lliteratos tará dotáu con 575 euros. Los rellatos pueden presentase n’asturianu o en castellán, hasta’l 5 d’abril de 2013.

Bases completes del concursu

Dende esta selmana y hasta’l 13 de marzu, ábrese’l plazu pa inscribise nel “Cursu Básicu de Llingua Asturiana” que, igual que n’ediciones anteriores, quier ser un mecanismu de deprendimientu de les normes básiques d’escritura del idioma, pero tamién una manera d’acercase a tantos d’aspectos de la cultura asturiana.

El cursu, de carácter gratuitu, va ser impartíu pol técnicu responsable del Serviciu de Normalización Llingüística de Corvera. L’horariu del mesmu va ser tolos miércoles de 18 a 20 hores, siendo la primer sesión el próximu miércoles 13 de marzu nel Centru Sociocultural de Les Vegues.

Los conteníos d’esti cursu inclúi conteníos alredor de la hestoria de la llingua asturiana; la llingua asturiana: léxicu, sintaxis y morfoloxía; normes ortográfiques; introducción a la toponimia de Corvera; cine, lliteratura y música n’asturianu, ya inscripciones nel Centru Sociocultural de Les Vegues.

N’Iniciativa pol Asturianu organicen el so primer Cursu d’Asturianu n’Uviéu y ufren la posibilidá de facelo en llinia pa toos aquellos que nun viven n’Asturies o nun pueden acudir por otros motivos. El cursu tien una duración de 35 hores y acredítase con un diploma otorgáu pola Academia de la Llingua Asturiana, entidá reconocida pola Conseyería d’Educación pa la formación del profesoráu.

El plazu de matriculación ta acabando, l’últimu día ye’l vienres 1 de marzu y el corréu de contautu ye: contacto@vitorsuarez.com

El preciu de la inscripción ye de 50€, incluyendo los materiales necesarios pa llevar alantre’l cursu, como’l manual “Xeitu” y otros llibros.

Iniciativa pol Asturianu axunta a los asociaos esti sábadu 23 de febreru de 2013, pa celebrar la primer Xunta Xeneral añal de la organización. Esti muérganu ye’l que tien les máximes competencies ente Congresos, que se faen cada trés años, y nél, según espliquen na so web “van discutise y votase dalgunes propuestes d’importancia, asina como les llinies de trabayu pal añu viniente.” L’actu va celebrase a partir de les 17 hores y hasta les 20, nuna sala del Auditoriu Príncipe d’Asturies d’Uviéu.

Dende la organización recuerden que na Xunta Xeneral pueden participar tolos asociaos, collaboradores de la organización y persones interesaes en sumar el so sofitu, cuntando con votu los socios miembru de la organización, asina como que “pueden presentase propuestes de trabayu, suxerencies y otres iniciatives”.

Na Xunta Xeneral la direutiva de la organización va presentar l’Informe de Xestión 2012, “onde dará cuenta de l’actividá d’Iniciativa pol Asturianu, les cuentes y demás cuestiones qu’afecten a l’asociación”. Amás, propondráse y discutiráse una fueya de ruta col llabor pa los vinientes doce meses, “col envís d’organizar el llabor de la organización”.

Dempués de los actos, hacia les 21:30 hores, celebráse una espicha na Sidrería La Pumarada, asitiada na cai Gascona, el bulevar de la sidra d’Uviéu. Sedrá de magar les 21:30 hores. P’apuntase a la mesma han ingresase 18 euros na cuenta de la organización, nel Bancu Herrero 0081-5657-41-0001063111, conseñando’l nome del inscritu, y dando avisu darréu al corréu contautu@iniciativapolasturianu.org

La espicha inclúi: Tortielles de pataca, chorizos a la sidra, croquetes de xamón, picadiellu con pataques, calamares a la romana, llacón con cachelos, pan y postres asturianos de la casa. Amás, con sidra, cerveza, vinu y agua incluyíos.

L’I.E.S. “Rosario Acuña” de Xixón tien abiertu’l plazu pal decimoquintu premiu d’investigación y divulgación, pal que pueden presentase trabayos hasta’l 15 de marzu de 2013, qu’han ser apurríos o unviaos per corréu (en papel, discu o CDROM) a la Secretaría del Centru: IES “Rosario d’Acuña”, Cai Puertu Vegarada e/n, 33207, Xixón. Pal premiu esisten trés categoríes, una p’alumnos del centru, y dos pa investigadores en xeneral, con categoría temática sobre Xixón y sobre Asturies, y con premios de 2.000 euros.

Los premios van poder ser declaraos desiertos o concedese “ex-aequo” a pidimientu del Xuráu. Aparte del testu, cada trabayu va acompañar de la documentación gráfica (semeyes, ilustraciones y gráficos) que cada participante considere oportunu. Tolos trabayos van quedar a disposición del IES “Rosario Acuña” que s’acuta tolos drechos de publicación de los premiaos, pudiendo editalos y comercializalos pola so cuenta o por aciu conveniu con otra entidá o editorial. Nel casu de que finalmente se realice la edición, l’importe del premiu va considerase como pagu a tantu alzáu de los drechos d’autor correspondientes.

El fallu del Xuráu va faese públicu’l 2 de mayu de 2013 y va ser inapellable.

Bases completes del Premiu