Convocatories

Esti vienres 29 de payares a les 19:00 la Fundación Belenos presenta nel Botánicu de Xixón el númberu 33 de la revista “Asturies, memoria encesa d’un país”. Nesta nueva edición destaca la espublización d’un bayurosu reportaxe firmáu por Ignacio Abella, y entituláu “El Felechu”, autor que va tar presente na presentación xunto a collaboradores davezu de la revista como Berto Álvarez Peña, Ástur Paredes, Xulio Concepción, Xosé Nel Riesgo, y Jesús Martínez Salvador.

El númberu 33 de la revista Asturies de la Fundación Belenos vieno acabante d’asoleyase no postrero d’esti branu con dellos trabayos d’ente los que destacaba’l descubrimientu d’un nuevu asentamientu castreñu n’Asturies.

Nel segundu númeru de la revista nesti 2013 “Asturies, memoria encesa d’un país” presenta un trabayu col títulu de “Un nuevu asentamientu castreñu n’Asturies: El Castillón d’Antrialgo, Piloña”, que presenta un importante descubrimientu arqueolóxicu y vien robláu polos etnógrafos Xuan Fernández-Piloñeta, Alberto Álvarez Peña y Daniel Cueli Canto. El trabayu sírve-yos a los autores pa documentar un castru que nun yaba catalogáu hasta esti momentu ya que nun apaecía na Carta Arqueolóxica del conceyu.

Amás d’esti trabayu, el númeru 33 de la revista tamién recueye un trabayu sobre “El felechu” d’Ignacio Abella, l’entituláu “Horros beyuscos: nel cantu’l desaniciu” d’Ástur Paredes y Gausón Fernande, “Delles representaciones de sierpes nos retablos asturianos” d’Alberto Álvarez Peña, un repasu “A vueltes col paxellu asturianu: les monteres” por Gausón Fernande Gutierri y un analís de la lleenda “La muyer xabaz qu’echa les mamielles al costín: una lleenda asturiana y los sos pareyos universales” fechu por Jesús Suárez López. Xunta estos trabayos completa el númberu l’estudiu “Siempre de camín, ente la casa y la cabana” de Xulio Concepción Suárez.

Esti próximu sábadu, día 23 de noviembre, va tener llugar l’actividá El próximu sábadu, día 23 de noviembre, va tener llugar l’actividá Visita pol Xixón obreru y rebelde, entamada pol Observatoriu de la Memoria Democrática de la ciudá de Xixón/Xixón.

Esta actividá va consistir nuna visita (a cuerpu) empuesta y conducida por Boni Ortiz, que va dar empiezu a les 12:00 del mediudía nel Espaciu Cultural “La Manzorga” (Cl Carmen, 20) y que va tener una duración envalorada d’hora y media.

La ciudá fainla les persones que les habiten. Les places, los edificios, les esquines, les cais, tán llenes de les hestories y les anécdotes que conformen l’alma d’una ciudá”. va faese un percorríu pel centru de Xixón, parando en dellos llugares, nos que dellos acontecimientos asocedíos nel sieglu XX determinaron bona parte de lo que somos güei. Estos espacios tamién los podremos visionar con semeyes de la dómina.

Una serie d’entidaes y organizaciones punxeron de mancomún los sos principios a favor de la Memoria Democrático y Social, que pueden resumise nel lema Verdá, Xusticia y Arreglu, creando (yá’l pasáu añu 2012) l’Observatoriu de la Memoria Democrática de la ciudá de Xixón. La reivindicación de la memoria caló fondamente na sociedá asturiana, polo xeneral, y na xixonesasobremanera, tantu pol sufrimientu vivíu nos años de la dictadura franquista, como pol calter solidariu que tien el pueblu asturianu. Cola actual situación política abandonóse salvaguardar d’estos principios, que l’Observatoriu de la Memoria Democrática pretende recuperar.

El Conseyu económicu y social del Principáu d’Asturies convoca a la novena edición del premiu d’Investigación del Conseyu económicu y social del principáu d’Asturies, cola collaboración de Cajastur, dirixíu a investigadores residentes en dalgún de los estaos miembros de la Unión Europea. El Principáu ufierta 2 premios, el primer premiu tien un valor de 6.000€, según un diploma acreditativu, y en segundu llugar un accésit de 3.000€ y un diploma.

Pa participar, los comenenciudos tendrán de ser investigadores o conformar un equipu. Puede tratase de persones físiques o xurídiques que tienen de tar comandadas por un investigador principal, que coordine’l trabayu y responsabilícese de tolos efectos.

Va Poder presentase más d’un trabayu d’investigación per persona o grupu d’investigación, sicasí namá se va premiar a unu d’ellos. El trabayu tien de tar redactáu en castellán, ten de ser orixinal ya inéditu y nun va poder recibir nengún premiu primeramente.

Con una estensión mínima de 50 fueyes doble cara, de tamañu A4, mecanografiados a doble espaciu y con fonte 12. Los proyectos nun van poder tener nengún distintivu qu’identifique a los sos autores o institución de la que formen parte.

El programa d’actividaes “Vamos!” aporta esti mes a la Llaboral, con actividaes dirixíes a neños y neñes y con precios que van dende los 4 a los 20€ y que comprenden teatru, cine, talleres, llectures, danza, música y actividaes medioambientales. El 13 d’ochobre entama la programación con “Vamos al cine! Pérez, el ratonín de los tos suaños”. El 19 prográmase “Vamos a imaxinar! Píntalo y pásalo”. Tamién el 19, el taller “Vamos a imaxinar! L’antroxu de los animales”. Y esi mesmu día, l’empiezu del taller de llectura “Vamos a imaxinar! Clube de Llectura”, una acrtividá destinada a crear un espaciu estable de promoción de la llectura y contactu pa neños y neñes ente 6 y 10 años.

El 20 d’ochobre siguirán les actividaes con “Vamos a la danza! Una ciudá encesa”, espectáculu rellacionáu cola danza y na que los baillarines recreen estremaos paisaxes interiores que sirven de metáfora de la nuestra existencia y de les nuestres emociones.

“Vamos a imaxinar! El clube de los poetes muertos de risa” entamará’l 26 d’ochobre y propondrá a los sos alumnos trabayos rellacionaos cola poesía. Tamién esti día 26 arrancará “Vamos a imaxinar! El nuestru granu d’arena nel efectu invernaderu”, un taller pa comprender los grandes cambios climáticos polos que tien pasao la Tierra dende los sos nicios.

Pa finar la programación el 27 d’ochobreta previsto “Vamos a imaxinar! Alondra Bentley sings for children”, un espectáculu dafecho dedicáu a los neños que combina cantares con xuegos y cuentos. Alternando l’inglés y l’español nos sos cantares.

La esposición de los 25 años de cartelos del Conciertu pola Oficialidá va tar hasta’l 30 de xunetu nel chigre “El Olivar” (cai Escura 1) d’Uviéu. L’amuesa recueye los cartelos d’esti conciertu entamáu pola Xunta pola Defensa de la Llingua Asturiana.

Pal próximu vienres, 12 de xunetu, taba prevista la cellebración d’una Xornada Lliteraria na Casa la Cultura de Santuyano (Bimenes). Na mesma diben entregase los premios del XVI Concursu de Cuentos pola Oficialidá del Asturianu y presentáse’l númberu 11 de la revista lliteraria “Formientu”. Por embargu, el Conceyu Bimenes decidió suspender los actos previstos pa esi día al nun poder asistir, por estremaos motivos, nengún de los trés premiaos nel concursu lliterariu, dexando la puerta abierta a la cellebración de la mesma pa más alantre.

La organización Iniciativa pol Asturianu va tener puestu informativu na xornada organizada pol Colectivo Interferencias nel Muséu del Pueblu d’Asturies, en Xixón esti sábadu 29 de xunu de magar les cinco la tarde. Nel puestu van poder mercase llibros y otros productos de la organización, amás de facese sociu o informase de les acciones entamaes por Iniciativa pol Asturianu.

Amás, a les siete la tarde va ufrise un taller d’iniciación a la llingua asturiana pa les persones interesaes n’averase al conocimientu de la nuesa llingua. Xunto a estes, otres actividaes como xuegos tradicionales, amuesa d’acebache o un recital poéticu con presentación de la revista Formientu, van tar ente les actividaes venceyaes a la llingua y la cultura asturianes preparaes pa esti sábadu. Dempués d’esta primer parte del actu fadráse una presentación del proyectu d’Iniciativa pol Asturianu.

Les actividaes van durar hasta les diez de la nueche, hora prevista de pieslle d’esta xornada a la que pue accedese de baldre y que va celebrase nel Tendayu del Muséu del Pueblu d’Asturies, en Xixón.

Ediciones Trabe celebra la presentación del llibru “Trubia ayer y hoy”, de Manuel Antonio Huerta Nuño, que tendrá llugar mañana martes 18 de xunetu a les 20 hores nel Casinu de Trubia. Nel actu van intervenir, amás del autor, Ana Herrero, archivera del Conceyu d’Uviéu, María Jesús Sánchez Barral, responsable de la Fototeca del Muséu del Pueblu d’Asturies, Javier Fernández, director del Muséu del Ferrocarril d’Asturies, y Esther Prieto, codirectora d’Ediciones Trabe.

Esti xueves 13 de xunu, de 20:00 a 22:00 h, Milio’l del Nido va cuntar los sos cuentos nos xueves lliterarios del chigre La Consistorial, allugáu na Plaza’l Sol d’Uviéu.

Un añu más, la Conceyalía de Festexos de Grau pon en marcha l’IV Concursu de Xarrés y Camisetes de Santa Ana, que va tener llugar el próximu 26 de xunetu de 2013. Col envís d’afalar la participación ciudadana preséntense delles novedaes con al respective de años precedentes, que pueden consultase les bases de participación.

El periodu d’inscripción pa participar nel desfile de xarrés y camisetes de Santa Ana abre’l 10 de xunu de 2013, y va tar abiertu hasta’l 22 de xunetu pal casu d’asociaciones y colectivos y hasta el 26 de xunetu pa chigres y peñes.

Bases completes