Convocatories

“Manuel Menéndez ya la Asturias occidental mediu sieglu depuéis” ye’l títulu de la xornada d’homenaxe a la obra del filólogu asturianu que va celebrase esti vienres 27 de febreru dende les 17 hores na Casa de Cultura de Navelgas (Tinéu) xunta la apertura d’una esposición. L’actividá vieno ampobinada por delles asociaciones ya instituciones, ente les que s’alcuentren la Universidá d’Uviéu, al traviés del Seminariu de Filoloxía Asturiana, el Real Instituto de Estudios Asturianos, l’Aula Valdés-Salas, la Fundación Valdés-Salas y la Fundación Aula de las Metáforas.

El programa d’actividaes entamará coles palabres de bienvenida d’un representante del Conceyu de Tinéu y del director del Aula Universitaria Valdés-Salas, asina como cola intervención de Ramón Rodríguez Álvarez, director del Real Instituto de Estudios Asturianos (RIDEA).

Tres d’eses palabres vendrá la presentación del llibru inéditu de Manuel Menéndez “El Cuarto de los Valles. III. Toponimia, refranes y conjuros”, polos sous editores, Ramón d’Andrés y Taresa Fernández Lorences.

Y darréu la presentación tamién del mapa de toponimia tradicional del Conceyu de Tinéu, por Fernando Álvarez-Balbuena y Andrés Menéndez (miembros de l’asociación «El Teixu»).

L’actividá complétase con un recital de poesía a cuenta de los poetes Xuan Bello, Antón García ya Miguel Rojo.

Nel actu quedará inaugurada tamién la esposición de fotografía “L’Asturias occidental antias ya güei” que podrá visitase durante los 15 díes siguientes.

Organizan:

El fallu del VIII Concursu Semeyes LA SIDRA tendrá llugar esti prósimu 15 xineru nos llocales de la Fundación Asturies XXI (Prendes Pando 11 baxo. Xixón), y comu davezu les sos deliberaciones sedrán abiertes al públicu, que podrá siguir el procesu de seleición y participar nun alderique col xuráu.

El VIII Concursu Semeyes LA SIDRA, cunta col sofitu del Llagar J.R. y la collaboración de la Sidrería La Galana. L’actu entamará a les 20:30 hores, darréu que la participación comu miembros del xuráu de dellos fotoperiodistes obliga a adautase al horariu llaboral de los mesmos.

El mecanismu pol que se conceden los premios ye enforma particular, darréu que les semeyes preseleicionaes (más d’un centenar) sedrán proyeutaes nel actu, y el Xuráu dirá valorándoles una a una, procediendo a esbillar ente elles fasta que s’algamen los premios previstos pal concursu.

L’Academia de la Llingua Asturiana fizo entrega esti vienres 10 d’ochobre, a les 12 la mañana, nel so llar social (cai L’Águila 10, d’Uviéu), de los premios a los ganadores de los Concursos de l’Academia de la Llingua Asturiana 2014 que recueyen toles fasteres investigadores y creatives alrodiu de les que trabaya la institución.

Na entrega de los premios, que presentó la presidenta de l’Academia de la Llingua Asturiana,xunta l’Académicu Pablo Xuan Manzano Rodríguez, falaron dalgunos de los premiaos pa desplicar so trabayu d’investigación. Asina na representación de los trabayos de toponimia entamaron falando sobre la Toponimia de la collación de Caldones (Xixón), Llorían García-Flórez y Xosé García Sánchez, qu’amosaron la so propuesta de respetar los topónimos tradicionales pa “nun permitir el epistemicidiu que tamos sofriendo” y falaron de los 1400 topónimos recoyidos que “son munchos pa esta collación”. Tamién calificaron como “ún de los cambios más importantes el pasu de la sociedá rural de Caldones a convertise nun espaciu periurbanu y el fechu de que traxera “topónimos con visiones más urbanizaes” pero cola peculiridá de que los topónimos nuevos qu’apaecieron tan n’asturianu.

Inaciu Hevia Llavona foi’l siguiente n’intervenir sobre’l vocabulariu de la sidra, un trabayu de campo que tuvo Faciendo munchos años. Hevia Llavona afitó qee lo que más-y prestaba ye que “esti trabayu espeya que la llingua de la sidra ye l’asturianu que caltiénense mui vivu”. Pidió tamién que la Llingua se tenga en cuenta nesa declaración de patrimonio inmaterial que se ta persiguiendo ahora.

Darrréu falaríen dellos otros de los premiaos como Xuan Santori. qu’afitó’l fechu de que’l trabayu de toponimia cabráliegu “ye una amuesa de la vitalida que tien l’asturianu nel Oriente”, y Damián Barreiro Maceiras sobre la situación del asturianu na televisión, ente otros.

Los premios que s’entregaren esti día son los que correspuenden a les convocatories nesti 2014 de los «Concursos d’Investigación (de recoyida de material toponímico, de léxicu asturianu y d’investigación llingüística)», «Concursu de llectures pa rapazos», «Concursu de creación lliteraria, premiu “Llorienzu Novo Mier”», «Concursu de Teatru» y «Concursu de material lliterario escrito, premiu “Federico González-Fierro Botas”»

Tolos premiaos

El Concursu d’Investigación de Recoyida de material toponímico oral, que tuvo como xuráu a Ana María Cano González ta, Xosé Lluis García Arias y Alfonso Martín Caso, premió con 600 € el trabayu tituláu Toponimia de les parroquies de Lada y La Venta (Conceyu de Llangréu), del que ye autor Xabiel Fernández García, dió un accésit de 300 € al trabayu tituláu Toponimia de la collación de Caldones (Xixón), del que son autores Llorían García-Flórez y Xosé García Sánchez, y otru al trabayu tituláu Toponimia de La Baña. Contribución al estudiu de la llingua asturleonesa, del que ye autor Jonatán Rodríguez Bayo.

El Concursu d’Investigación de Recoyida oral de léxicu asturianu, col mesmu xurán, dio pela so parte un un accésit de 300 € al trabayu tituláu Léxicu asturianu de la sidra con delles desplicaciones etimolóxiques y comentarios, del que ye autor Inaciu Hevia Llavona, y otru de 50 € al trabayu tituláu Contribución al vocabulariu cabraliegu, del que son autores Xuan Santori Vázquez, Juan Vicente Inguazo Prieto y Herminia Mier Mier.

Y el mesmu xuráu premió tamién nel Concursu d’investigación llingüística, el trabayu tituláu La nación televisada: llingua y identidá nos programes n’asturianu de TPA, del que ye autor Damián Barreiro Maceiras., al tiempu que daba dellos accésit a los trabayos «Una traducción filolóxica y crítica de la Història de Jacob Xalabin, novelina anónima catalana del sieglu XV (Siguida de les de la Història de la filla de l’emperador Contasti y la Història de la filla del rey d’Ongria, cuentos anónimos catalanes del mesmu sieglu)», del que ye autor Pablo Suárez García.; Estudiu socio-económicu y xurídicu de les ordenances del Conceyu d’Uviéu, s. XIII, de la que ye autora Ana Álvarez García; y Percepciones dialectales sobre los procesos de normalización y estandarización del asturianu, del que ye autor Xuan Santori Vázquez.

Nesti 2014, el xuráu del Concursu d’investigación sobre lliteratura asturiana, formáu por Xosé Ramón Iglesias Cueva como presidente, Antonio Fernández Insuela como vocal y faciendo de secretaria Marta Mori d’Arriba, apautose’n dexalu ermu, lo mesmo que’l concursu de Concursu de Recoyida de Material Lliterario Oral.

Pela oso parte, el xuráu del Concursu de Llectures pa Rapazos, formáu por Urbano Rodríguez Vázquez como presidente, Vicente García Oliva como vocal Pablo Xuan Manzano Rodríguez como secretariu, premió al trabayu tituláu Tyan, del que ye autor Nel Ricardo Álvarez Morán.

La convocatoria de Creación Lliteraria, premiu “Llorienzu Novo Mier” , que tenía esti añu un xuráu formáu por Marta Mori d’Arriba como presidenta, Roberto González-Quevedo González como vocal y Xosé Ramón Iglesias Cueva de secretariu, al poemariu tituláu Como fueyes na seronda, del que ye autora Yose Álvarez-Mesa.

Y el Xuráu del Concursu de Teatru, formáu por Xosé Ramón Iglesias Cueva como presidente, Antonio Fernández Insuela como vocal, faciendo de secretariu Adolfo Camilo Díaz, premió con 600 € la obra titulada Ondina Llagu, de la que ye autor Sergio Manuel Buelga Casas.

Pa finar la llarga llista de concursos que convoca cada añu l’Academia, nesti 2014 el Concursu de recoyida de material lliterario escrito ufrió un accésit de 150 € al trabayu tituláu Coples d’antroxu y otros testos n’asturianu con Xixón de fondu (1898-1928), del que ye autor Inaciu Galán y González.

Muyeres d’IX inscriben mańana el so cuerpu nel Rexistru d’Uviéu a les 15:45 hores, dientro de la campańa contra la reforma del albuertu, Asina, van inscribir mañana los sos cuerpos nel Rexistru dientro de la campaña “El mio cuerpu, la mio propiedá. Nostres decidimos”, y animen a facelo a toles muyeres asturianes contra la reforma del albuertu promovida pol ministru Alberto Ruiz Gallardón.

La campaña d’inscripción, que yá se realizó n’otros puntos d’España, foi escurrida pola artista visual Yolanda Domínguez. La cita nel rexistru va ser a les 15:45 hores na see de la entidá n’Uviéu (cai Mayorazu nº4).

Esti próximu 14 de marzu finara’l plazu de presentación d’orixinales pal concursu lliterariu col que entamaba Iniciativa pol Asturianu la so collaboración cola asociación “Abierto Hasta el Amanecer”. El concursu lliterariu ¿Qué cuentes…? entamáu por esta entidá y nel qu’Iniciativa pol Asturianu collabora introduciendo l’asturianu na imaxe de la convocatoria, bases, etc, yer la primer collaboración ente les dos asociaciones.

Dende la organización va tiempu que felicitaren a l’asociación xixonesa por animase col usu del asturianu nun ámbitu tan importante como’l de la mocedá, onde ye clave tresmitir l’asturianu a les xeneraciones vinientes.

El concursu, que fai tola so difusión usando l’asturianu y el castellán, tien dos categoríes pa caúna de les llingües. Los rellatos, de tema llibre y estensión hasta trés páxines, han unviase a concursos@abiertohastaelamanecer.com enantes del 14 de marzu de 2014. Pueden presentase autores d’ente 13 y 35 años, cuntando con premios como un llector de llibros lletrónicos, llotes de llibros, llotes de la revista Formientu, y nel casu de los rellatos n’asturianu, la publicación de los testos na revista lliteratura moza yá citada.

El Conceyu Bimenes vieno acabante de convocar el que va ser yá so XVII Concursu de Cuentos pola Oficialidá del Asturianu, que vien convocando dende que se ficiere la primer declaración d’oficialidá de la llingua de nueso nun conceyu, precisamente nel de Bimenes. Los cuentos que se presenten al certame tienen d’escribise dafechamente en llingua asturiana y nun pasar de les diez fueyes, mecanografiaes a doble espaciu y per una sóla cara.

El plazu de presentación de trabayos esti añu fina’l 10 de mayu. L’apertura pliques tendrá llugar el 10 de xunetu y la entrega premios fadráse esi mesmu día, nel trescursu d’una xornada lliteraria. L’importe económicu de los premios ye: 600 € pal primeru, 450 € pal segundu y 300 € pal terceru.

Los cuentos, de los qu’hai que presentar l’orixinal, trés copies y una copia más en versión informática, han d’unviase a la direición que vien darréu: Conceyu de Bimenes. Martimporra, s/n. 33527 – Bimenes.

Dende la organización del concursu recuerden que ye de destacar el compromisu del Conceyu Bimenes de caltener esti certame lliterariu, y l’esfuerzu qu’ello-y supón, magar qu’esti añu, como nel concursu de 2013 pero a diferiencia de los anteriores, nun va cuntar col sofitu nin de la Conseyería d’Educación, Cultura y Deporte nin de la Obra Social y Cultural de Caxastur”.

Esti próximu 28 de febreru acaba’l plazu de presentación d’orixinales pa los concursos de l’Academia de la Llingua Asturiana, que na so convocatoria de 2014 con los concursos d’Investigación, de Llectures pa Rapazos, el de Creación Lliteraria Premiu “Llorienzu Novo Mier”, el Concursu de Recoyida de Material Lliterario Oral, el Concursu de Teatru y el Concursu de Recoyida de Material Lliterario Escrito Premiu “Federico G.-Fierro Botas”.

La categoria de Concursos d’Investigación tien convocaos cuatro premios. El primer d’ellos ye la recoyida de material toponímicu, ensin asoleyar, qu’abarque la totalidá d’una parroquia, conxuntu de parroquies o Conceyu. Habrá un premiu d’Investigación llingüística, ensin asoleyar, que tenga aspectos llingüísticos o sociollingüísticos d’Asturies como oxetu del estudiu. Un premiu pa la recoyida oral de léxicu asturianu ensin asoleyar. Y un premiu pa un trabayu d’investigación sobre la lliteratura asturiana.

El premiu “Llorienzu Novo Mier” tien por enfotu la creación lliteraria, en prosa, n’asturianu. El Concursu empobináu pa les llectures pa rapazos tien por oxetu algamar una bona lliteratura pa les xeneraciones más nueves. El Concursu de recoyida material lliterario oral enfótase na realización d’un trabayu d’investigación que recueya la lliteratura non escrita. El Premiu “Federico G.-Fierro Botas”, de recoyida de material lliterario escrito, premia los trabayos de recompilación d’escritos n’asturianu enantes de 1970. El Concursu de Teatru complementa esta edición de 2014 d’estos Concursos de l’Academia, cola fin de difundir la llingua asturiana nos sos má estremaos ámbitos.

Los trabayos ganadores de cauna de les categoríes recibirán un premiu de 600€,. Les decisiones del Xuráu van facese públiques nel Lletres Asturianes.

Bases de los concursos de l’Alla

Corvera vive esta selmana, del martes 11 al vienres 14, les Xornaes audiovisuales y culturales de los países celtes con esposiciones, proyeiciones, actuaciones y alderiques que van desendolcase nel Centru Socio-cultural de Les Vegues y nel Teatru El Llar. Amás de delles actividaes de temática asturiana, destaca nesta primer edición la presencia de conteníos irlandeses, gallegos y bretones que van dibuxar el mapa célticu na nuesa cultura. Esti martes abriránse les xornaes cola proyección de Bruxes y los cuentos Celetes qu’ufrirán el Grupu de Mueyeres Mayores de Corvera enantes del Conciertu del gaiteru Bras Rodrigo.

Les Xornaes cuenten amás con dos esposiciones, na Sala d´Arte del Centru Socio-Cultural de Les Vegues pue visitase hasta’l miércoles 19 “MITOLOXÍA FEMENINA”. Amuesa pictórica de Marta Granda. Recorríu peles femes de poder del arcu atlánticu. Na antoxana del TEATRU EL LLAR del 11 al 14 de febreru ta instalada “NA GAITA TRAIGO ASTURIES…” (Muestra de “gaiterinos” de la colección privada de Bras Rodrigo), del 11 al 14 de Febreru.

Amás de les esposiciones, el programa de les xornaes ye’l siguiente:

Martes 11 TEATRU EL LLAR 18h. Proyección de BRUXES (Eire/Asturies) 20´ Un soberbiu recorríu pela maxa dende presupuestos etnográficos y etnolóxicos. 19h. Cuentos celtes (Grupu de Teatru de Muyeres Mayores de Corvera) 19:30h. Conciertín de Bienvenida del Gaiteru BRAS RODRIGO Miércoles 12. Sala d´Arte del CS 18h…. CAMÍN DE CANTARES (Asturies) (60´) Antolóxica del programa de cultu de Ramón Lluis Bande y Ambás. 19h. “EL DIAÑU N´ASTURIES” (45´) de BERTO ÁLVAREZ PEÑA 20h. Charra-coloquiu sobre “CULTURA ASTURIANA; ENANTES Y AGORA”, participen dos de los meyores especialistes de la cultura tradicional n´Asturies: RAMÓN LLUIS BANDE y BERTO ÁLVAREZ PEÑA Xueves 13 Salón d´Actos del CS 18h….Celtivideos (Galiza). (30´). Curtios audiovisuales producíos en Galiza que recueyen cuentos y tradiciones del arcu atlánticu. 18:30h EL SECRETO DE LA ISLA DE LAS FOCAS de John Sayles (Eire) (103 min) John Sayles, ún de los enfants terribles el cine anglosajón, perfizo una maraviosa fábula nel 1993 que sigue siendo exemplu de cine xuvenil. TEATRU EL LLAR 20:30h. Actuación de Jacky Molard & Jean Michel Veillon (Breizh) Dos de les referencies de la música bretona, lo que ye lo mesmo que decir que tamos énte un dúu que representa lo meyor de la música celta.

Ixuxú entama un mercadín ambulante de música asturiana enmarcáu na so campaña de socios 2014 y que va desenvolvese del 2 al 5 de xineru, en dellos locales d’Asturies con más de 50 discos a la venta y fueyes p’asociase al proyectu.

Fomentar el consumu de música asturiana y sumar sofitos pa l’asociación. Esos son los dos oxetivos colos qu’Ixuxú Asturies-Euskal Herria elkartea entama’l “Mercadín de música asturiana”. L’actu ta enmarcáu dientro de la campaña de socios y socies 2014 colos que l’asociación busca algamar sofitos y sumar fuerces pa poder siguir realizando les sos actividaes nunes condiciones dignes.

Coincidiendo coles feches de reis, la campaña va salir a la cai. Distintos locales repartíos ente L’Entregu, Avilés, La Pola Siero y Xixón van dar espaciu a la venta de más de 50 discos nel “Mercadín de música asturiana” y a la posibilidá d’asociase in situ a esti proyectu intercultural que lleva yá un añu visibilizando Asturies en Euskal Herria.

Por una cuota de 1, 5 ó 10 euros mensuales (depende de si ye persona individual o un axente cultural), pue formase parte de l’asociación y tener amás otres ventaxes como descuentos nel catálogu, regalu de discos de música y  usar tolos servicios qu’ufierta’l proyectu pa grupos de música y otros axentes culturales.

Feches y llugares del “Mercadín de música asturiana” son les que vienen darréu: xueves 2 // l’entregu // CSA LA SEMIENTE // de 18.00 a 20.30 vienres 3 // avilés // EL CAFETÓN // de 19.00 a 22.30 sábadu 4 // ciares // CAMPU LA CRUZ // de 15.30 a 17.00 sábadu 4 // la pola siero // JUDÁ // de 19.00 a 22.00 domingu 5 // xixón // LA MANZORGA // de 17.30 a 21.00.

Les Xornaes de Ñatura y Montaña de Teberga van desendolvese ente’l vienres 6 y el domingu 8 nel salón d’actos de la Casa de Cultura de SaMartin de Teberga entamando’l vienres a les 4 la tarde con una exhibición de tiro con arco con la campeona d’Asturies y subcampeona d’España en categoría infanil nel polideportivu municipal y una muestray exhibición d’un águila de Harris a cargo de Micki Gallardo.

A les seis ta prevista una charra-coloquiu de Camilo Sousa de Mochileros, sobre “El relevu xeneracional na montaña” y el sábado 7 otra a la mesma hora d’Indalecio Blanco sobre la so próxima espedición al Aconcagua.

Les xornaes finen el domingu 8 con una ruta a los Puertos de Marabio.