Conceyos

Con esi lema “Nós respetamos el mediu ambiente n’asturianu” el Conceyu de Cangas del Narcea, al traviés del so Serviciu de Normalización Llingüística, va llevar alantre una campaña n’asturianu de sensibilización col medioambiente, a partir de güei, 24 de xunu. La mesma consiste nuna tirada de bolses de papel reciclao col logu ¿Tu qué faes pa cuidar el mundu? Reduz, recicla, reutiliza.

Los comercios interesaos puen pasar a poles bolses pel Serviciu de Normalización, asitiáu na Axencia de Desenrrollu del Conceyu, na cai Uría, 18, baxu. De la mesma manera, tamién pueden solicitase nel teléfonu 985 819 560.

Esta campaña ta llevándose alantre a comuña colos conceyos de Mieres, Avilés y L.lena, toos dientro de la Rede de Normalización Llingüística nos Conceyos.

El Partíu Asturianista celebró esta fin de selmana pasada’l V Congresu/Conceyu de l’Agrupación de Xixón. Na mesma, renovaron la executiva y los muerganos de direición, agora que según recuerden “el Partíu Asturianista (PAS), ta a piques de cumplir los primeros 25 años d’esistencia” col enfotu “tolos militantes y dexuru tamién de munchos asturianos de caltener la «bandera del asturianismu» a lo llargu’l tiempu y más nestes domines tan abegoses pa cola «vindicación identitaria» nun mundiu ca vegá más «uniformáu y más homoxeneizáu» poro con «torgues asgaya» pa que los ciudadanos y los pueblos puedan «desendolcase llibremente» y algamar el «potencial» pol que nagüen”.

Nel congresu salió escoyíu Secretariu Xeneral: Xesús Cañedo Valle; Secr. D’Organización: José Antonio Fernández Alonso, Secr. Rellaciones Institucionales: María Jesús Suárez de la Villa; Secr. d’Estayes Culturales: María Antonia Antón Fernández; Secr. d’Estayes Sociales: Xulio Vigil Parajón; Secretariu d’Estayes Económiques: Xuan Pandiella Sánchez y Secr. d’Estayes Urbanístiques: Lluis Antón González Fernandez.

La mancomunidá de la Comarca’l Sueve, formada polos conceyos de Piloña, Parres y Caravia, va cuntar en pocos meses con un nuevu serviciu de normalización llingüística que va xestionar toos aquellos aspectos rellacionaos cola promoción y usu de la llingua asturiana.

Según anunciaron la directora xeneral de Política Llingüística, Consuelo Vega, y l’alcalde de Piloña, Camilo Montes, nun actu celebráu esta selmana, “el serviciu va ponese en marcha na seronda” y cunta con una partida económica yá aprobada, de 12.000 euros.

Consuelo Vega recordó que’l Serviciu va xunise a la Rede de Normalización Llingüística “que yá llega a 664.500 asturianos”.

La sede va asitiasa nel pisu cuartu de la Casa Cultura de L’Infiestu y va complementar, según comentó l’alcalde, a otres actividaes como les Xornaes de Lliteratura Infantil en Llingua Asturiana o’l concursu de narraciones qu’esti añu llegó a la so segunda edición.

Embaxo’l lema “En Xixón, cada vez más necesarios”, l’agrupación xixonesa del Paríu Asturianista entama’l Congresu/Conceyu de l’Agrupación de Xixón a partir de les cinco la tarde nel salón d’actos de la Biblioteca Pública Xovellanos, asitiada na cai Xovellanos, 23. Nel congresu va renovase la dirección y van marcase les llinies d’actuación futures.

El Conceyu de Piloña abrió’l plazu pa presentar orixinales al II Concursu de Narraciones Curties n’asturianu. Los trabayos han d’unviase enantes del 12 de xunu a la Conceyalía de Cultura, asitiada na cai Cuadonga, 9, de L’Infiestu. Los cuentos nun puen tar espublizaos nin premiaos n’otros concursos. El llargor d’ellos nun sedrá menos de trés fueyes nin más de cinco, escrites per un llau namás, en lletra de cuerpu 12.

El primer premiu ta dotáu con 1.000 euros y el segundu con 700 euros. El periódicu El Fielato espublizará’l trabayu premiáu cuando lo xulgue oportunu, y queda atrocáu pol Conceyu de Piloña’l derechu d’espublizar los trabayos que resulten premiaos; tamién podrá asoleyar les obres non premiaes, siempre col alcuerdu de los sos autores. El fallu del xuráu va dase a conocer nos medios de comunicación la selmana del 12 al 19 de xunetu de 2009; los premios van entregase nun actu na Casa de la Cultura’l día 24 de xunetu, onde los premiaos tán obligaos a lleer la so obra en públicu.

El Boletín Oficial del Principáu d’Asturies espublizaba ayeri, 12 de mayu del 2009, el llistáu de los topónimos del conceyu de Degaña, talo que s’aprobaren nel Conseyu de Gobiernu del Principáu d’Asturies na so sesión del 22 d’abril.

Degaña conviértese asina nel conceyu númberu 38 cola toponimia oficializada.

Descarga l’espediente completu

L’Ayuntamientu de Colunga ta acabante convocar esti concursu nel marcu de les XII Xornaes del Sueve que se celebren en xunu. Les semeyes han reflexar cualesquier aspectu venceyáu col cordal del Sueve.

Los participantes han mandar les semeyes a la Casa Cultura solliñando nel sobre “Concursu FotoSueve´09”, a la carretera xeneral, s/n. Colunga, hasta l’1 de xunu próximu.

Los premios establecíos son de 150 y placa pal primeru; y100 € pal segundu, amás de cuatro accesits pa les meyores semeyes presentaes por residentes nos conceyos del cordal, Caravia, Colunga, Parres y Piloña.

Dempués del anunciu de los miembros nuevos del Conseyu Asesor de la Llingua Asturiana, que preside’l conceyal d’IX Jesús Montes Estrada, esta tarde a les siete y media, na Pescadería Municipal, va producise’l primer conceyu.

El llistáu de conseyeros inclúi a Xulio Ramos (Julia Moreira como suplente) pol PSOE, Humberto Gonzali (Manuel Pecharromán) pol PP, Roberto Colunga (Carmen Rúa) por IX-BA-Los Verdes, Consuelo Vega (María Antonia Pedregal) pol Principáu, Jordán Suárez (Santos Noguerol) pol Conseyu de la Mocedá de Xixón, Urbano Rodríguez (Vicente García Oliva) pola Academia de la Llingua Asturiana, Sabel Tuñón (Raúl Cachero) pola Federación d’Asociaciones de Vecinos, Xosé M.ª García (Xesús Cañedo) pola Federación «Les Caseríes» de la zona rural, Jorge Espina (Marcos Muñiz) por CC.OO., José Luis Llera (Begoña Díaz) por USO, Berto Cabreros (Alonso Martín) por SUATEA, Carmen Moreno (Lucía Roales) pola Unión de Comerciantes y Ricardo Álvarez (Inés Álvarez) pola Asociación d’Hostelería. Súmase tamién Ramón D’Andrés como espertu designáu pola Universidá d’Uviéu.

El Conceyal de Cultura Tradicional y Llingua Asturiana, Jesús Montes Estrada “Churruca”, va presentar güei xueves, a les 13:00 hores, na Sala de Prensa del Aytuntamientu de Xixón los materiales didácticos “Un día na zona rural de Xixón”.

Na presentación van participar Carmen Rúa Morán y Roberto Colunga, asesores de la Conceyalía.

La organización política Andecha Astur ta acabante de presentar nel Rexistru del Conceyu L.lena un escritu empobináu al Alcalde nel que-y da la norabona “por siguir l’exemplu del Conceyu de Cangas del Narcea y tomar el determín de valorar como méritu los conocimientos de llingua asturiana nes pruebes d’accesu a los puestos de trabayu que s’ufierten dende l’Ayuntamientu”. Y ye qu’esta organización política, comenten dende la mesma, “critica y denuncia les coses que se faen mal dende l’equipu gobiernu del Conceyu L.lena, pero tamién sabe reconocer y aplaudir les que se faen bien”.

P’Andecha Astur ye lóxico y normal que se valore positivamente la conocencia de la llingua asturiana a la hora de trabayar nuna Casa Conceyu dende la que se tien qu’atender a ciudadanos y ciudadanes que, según afita la llexislación vixente, “pero sobre too el sentíu común, tienen el drechu de rellacionase cola Alministración pública n’asturianu, si asina-yos peta”.

Nel escritu, amás de da-y la norabona al Alcalde y al so equipu de gobiernu, pídese-y “que nun ceda a les presiones, que son munches y siguirán siéndolo, y tire p’alantre col determín tomáu de valorar positivamente los conocimientos de llingua asturiana a la hora d’acceder a un puestu de trabayu na Casa Conceyu”.