Conceyos

El vienres que vien, 21 de mayu, va celebrase na sala polivalente del Teatru Riera la IIª Arribada. A les 17’30 hores presentaráse un documental d’Alberto Álvarez Peña sobre los Últimos chalgueiros. A les 18’30 hores presentaráse la revista Atlántica XXII. Darréu realizaráse un homenaxe a Antonio Lozano, el Gaiteru de Vallinaoscura, fallecíu apocayá, cola proyección d’imáxenes del entreñable músicu, y dalguna otra sorpresa.

La xornada ye la segunda qu’organicen L’Arribada y la entidá maliayesa El Ronchel en Villaviciosa, la primera foi’l pasáu mes de setiembre de 2009, dedicada a la ría y el puertu de Tazones; la próxima va coincidir nuevamente coles Fiestes del Portal, según anuncien dende la organización.

Andecha Astur de Siero quixo señalar al nuevu equipu de gobiernu del conceyu, que namás destinó “4.000 euros del so presupuestos a subvencionar les actividaes de quien de verdá tien tomáu’l pulsu a les necesidaes de los nuesos pueblos, a les asociaciones”, lo que denuncia AA, equivaldría “a 20 euro/asociación”, polo que s’entruga, “¿En qué se basaron nel so momentu pa esto?, ¿falta de lliquidez tocantes a cultura?”.

Denuncien que la partida de cultura yá sufrió los retayos “más severos n’anteriores partíes presupuestaries, siquier basándonos nel nuesu puntu de vista d’importancia de la cultura na vida sierense”, y que mientres se retaya’l dineru a asociaciones, “ente que s’emprobez entá más y déxase morrer amodo al texíu asociativo y en consecuencia la cultura en Siero, los mesmos culpables, se empecinaron (col beneplácitu y palmaditnes de los demás) en faer un auditoriu y una casa de la música nuevos en La Pola, colos sos consiguientes gastos y la so dudosa necesidá”.

Andecha Astur propón pa meyorar la vida cultural del conceyu: “La rehabilitación del antiguu cine, da-y más actividaes a la remocicada plaza d’abastos, recuperar la idega del Llar de la Mocedá, dexase d’especulación col antiguu mataderu y faese con edificios en desusu que tolos sierenses conocemos y munchos reclamamos”.

El conceyu de Samartín del Rei Aurelio va distribuyir unos 70 llibros n’asturianu per tol conceyu. Al traviés de la páxina web del Ayuntamientu van poder llocalizase ya introducir el llugar onde se posen dempués de lleelos.

El proyectu, que se fizo con gran ésitu en dellos conceyos del Eo-Navia va poques selmanes, quiere averar la lliteratura a los vecinos y afalar la llecutra.

Cualesquier persona pue usar la web del conceyu pa dar anuncia de la suelta d’otru llibru, unviando un corréu a llingua@smra.org, col títulu del llibru, l’autor, y la hora y el llugar onde va posalu’l vienres 7.

Páxina web del Ayuntamientu de SMRA

L’Ayuntamientu d’esti conceyu del oriente asturianu convoca al traviés del so Centru de Dinamización Tecnolóxica y con motivu de los eventos de celebración del Día d’Internet, el I Concursu de Semeyes Dixitales “Conceyu d’Onís” pal que pueden consultase les bases completes en www.concejodeonis.com

El tema de les obres ha centrase n’Onís, y especialmente, na so arquitectura tradicional, con namás una categoría, pa mayores de 18 años y con premios de 200, 150 y 75 euros respectivamente.

Les semeyes han mandas al Centru Municipal Polivalente “Hnos. Álvarez Marcos” de Benia d’Onís, hasta’l viniente 10 de mayu.

Dende la organización política Andecha Astur creen que “l’entamu de la Feria d’Abril de Sevilla en L’Infiestu nun ye casual, nin muncho menos deriváu d’una demanda popular, sinón qu’obedez a una determinada concepción ideolóxica, de marcáu calter españoliegu”. P’AA la celebración busca sofitar un “procesu d’homoxeneización cultural” que va suponer p’Asturies “consecuencies pergraves, a mediu o llargu plazu, consistentes na perda d’identidá comu pueblu y desapaición de les tradiciones culturales asturianes”.

N’Andecha Astur tamién opinen que la cellebración d’una Feria d’Abril en L’Infiestu “ye’l determín políticu más vergoñosu, ablucante y antiasturianu, tomáu pol Ayuntamientu Piloña, a lo menos no que cinca a la estaya cultural”.

P’afitar la so protesta y facela llegar al Ayuntamientu, Andecha Astur presentó una moción, con fecha 16-04-2010 y númberu de rexistru d’entrada 1.503, na que se pide al Plenu Municipal qu’apruebe “la supresión, yá, de la Feria d’Abril de Sevilla en L’Infiestu” y que-y “dea vuelta a la situación aniciada convirtiendo al conceyu de Piloña en capital d’asturianía sostituyendo la Feria d’Abril de Sevilla por una Feria de l’Asturianía y Festival Intercélticu, de forma que se faga mediante un reequilibriu territorial en llugares estratéxicos del conceyu (non sólo en L’Infiestu, sinon tamién en Villamayor, Sevares, etc.) col enfotu de xenerar beneficios de forma equilibrada ente tolos habitantes. Ente otres munches actividaes podríen desendolcase les que vienen darréu: charres y esposiciones sobre cultura, hestoria y lliteratura d’Asturies; amuesa y/o competición de deportes autóctonos; amueses de la nuestra gastronomía y de les races d’animales autóctones; conciertos de música tradicional asturiana, etc”.

Pa sofitar la presentación d’esta moción, y pidir la so aprebación, Andecha Astur va llevar alantre nos prósimos díes una campaña de recoyía de firmes ente los vecinos y vecines del conceyu, firmes que tamién se presentarán nel Ayuntamientu Piloña.

El Conceyu Piloña convocó una plaza pel sistema de concursu-oposición, en réxime de contratación llaboral por obra o serviciu determináu y per 12 meses. Pídise tar en posesión de Titulación Universitaria de Grau Mediu o Superior, amás de tener dalgún d’estos títulos: Especialista o Espertu en Filoloxía Asturiana, Certificáu de los trés niveles (entamu, mediu y superior) de l’Academia de la Llingua Asturiana; títulu Llingua Asturiana pa Enseñantes, o superar los trés cursos del Vicerrectoráu d’Estensión Universitaria de la Universidá d’Uviéu “Elemental de Llingua Asturiana”, “Capacitación pa la traducción al asturianu” (Torna) y “Avanzáu de Llingua Asturiana”.

Ye preciso, amás, cuntar col permisu de conducir clase B-1. El plazu pa presentase ta abiertu hasta’l 3 d’abril. Les bases completes pueden consultase nel BOPA de 23 de marzu.

L’Ayuntamientu de Samartín del Rei Aurelio entama una campaña p’afalar l’usu del asturianu y el respetu del mediu ambiente. Los establecimientos comerciales van recibir de baldre bolses reutilizables, que tienen por diez quilos de pesu y que lleven el testu: “¿Y tu que faes pa cuidar el mundu? Reduz, reutiliza, recicla”.

Amás, l’Ayuntamientu va distribuyir “El mio primer vocabulariu” ente los neños, una campaña que quier acercar el vocabulariu asturianu a los neños de primaria del conceyu.

Según informó’l conceyal de cultura de la ciudá, Román Antonio Álvarez, la toponimia d’Avilés ta na comisión del Gobiernu d’Asturies, qu’estudia la propuesta del conceyu. Según el mesmu responsables, “nun plazu d’un mes o mes y mediu ye posible l’aprobación de la mesma por parte del Principáu”.

Con esta toponimia nun procesu bien avanzáu, namás Uviéu queda, ente les grandes ciudaes, por rematar el so procesu d’oficialización de la toponimia. Sicasí, entá queden dellos pasos pa llegar hasta esti puntu, según la información qu’apaez na web de Política Llingüística.

Esti miércoles día 17 de marzu a les 20 hores, la sala polivalente de la Casa de Cultura de Grau va ser l’escenariu de la presentación del primer númberu d’esta publicación que va distribuyise gratuitamente ente los asistentes a la presentación. “Villa y Alfoz” cunta con 80 páxines más portaes, b/n y un cuadernín central a color.

Nsti primer númberu pueden atopase trés artículos sobre’l Bron de San Xuan, d’Álvaro Valdés, les pintures de la Ilesia de Restiellu, de Beatriz Canitrot y un artículu sobre William Parker Carroll n’Asturies y Peñaflor, d’Alicia Laspra.

L’actu enmárcase dientro de les III Xornaes d’Estudios Llocales, entamaes pol Círculu d’Estudios Pramarenses, la Conceyalía de Cultura y el Muséu Etnográficu de Grau, cuntando cola collaboración d’Ediciones La Cruz y la Conseyería de Cultura del Principáu.

Dempués del conflictu vivíu en Xixón pola marxinación d’un ciudadanu que tentó usar l’asturianu nuna oficina municipal, l’Ayuntamientu entama a cumplir les midíes previstes nel Plan de Normalización aprobáu en 2009, no que cinca a la posibilidá de facer les xestiones alministratives n’asturianu. Una posibilidá pa la que ye imprescindible que la insititución ufra modelos normalizaos na so versión n’asturianu y qu’agora entama a facese realidá colos primeros once trámites disponibles na rede.

La páxina web del Ayuntamientu de Xixón ufre yá los formularios pa solicitar casorios nel Ayuntamientu, entamu xeneral, instancia, recursu, inscripción nel rexistru de pareyes de fechu, presentación de quexes y suxerencies, solicitú d’empléu, ficheru d’acreedores, ficheru de deldores y solicitú de la tarxeta ciudadana. Los formularios lletrónico nun pueden, sicasí, rellenase colos meses n’asturianu, un fallu técnicu que de xuru podrá solucionase

La Oficina Municipal de la Llingua foi la encargada de facer les traducciones de los documentos, que se sumen a otres iniciatives entamaes pa la normalización del asturianu, como l’apaición del topónimu Xixón nes equipaciones ya instalaciones d’equipos deportivos del conceyu o les actividaes entamaes pa la mocedá dende la citada oficina.

Páxina onde pueden descargase los formularios n’asturianu