Conceyos

Julio César García Menéndez, Teniente Alcalde de Llangréu; Ana Oliva Rodríguez García, Conceyala de Cultura, Turismu y Política Llingüística; Javier Fernández Díaz, Secretariu d’Hostelería d’Asturies; Manuel Rodríguez Rosete, Corrdinador de Cultura, Turismu y Política Llingüística y Eloy Antuña Zamarro, Responsable del Serviciu de Normalización Llingüística del Ayuntamientu de Llangréu, presentaron una nueva campaña de normalización social del asturianu dirixida al sector hosteleru que pretende normalizar l’usu del asturianu faciéndolu visible nos restoranes, sidreríes, chigres y centros sociales del nuestru conceyu.

La campaña busca fomentar el consumu nel sector hosteleru de Llangréu respaldando esta actividá al traviés del usu de a llingua asturiana como reclamu publicitariu que casa mui bien cola idea de cercanía y tratu personalizáu. Búscase afalar l’apreciu polo propio promoviendo l’usu de los términos tradicionales y el vocabulariu propiu dientro del campu semánticu de la sidra.

Entendemos que’l de la hostelería ye un sector estratéxicu que pue tener efectos multiplicadores pa la normalización social del asturianu. Cola puesta en marcha d’esta campaña quier dase continuidá a campañes anteriores desenvueltes nesti ámbitu y que tuvieron muncho éxitu. Buscamos que la hostelería del conceyu se convierta n’axente dinamizador de la Llingua Asturiana, reforzándola y espardiéndola. Entendemos que l’asturianu ye una muestra de la personalidá de los nuestros servicios amás d’una ventaya competitiva, un valir añadíu pal conxuntu’l nuestru sector hosteleru.

Los hosteleros y hosteleres de Llangréu que quieran participar de la campaña van beneficiase de materiales como pegatines pa los nunmechisques, cartelos sidra (con espresiones sobre la sidra y otros elementos), el llibrín de la sidra( guía de 18 fueyes con diferentes datos sobre la sidra y tolo que ta al so alredor), la guía de pexe y mariscu pa viaxar (guía colos nomes de pexe y mariscu en seis llingües) y toallines de llimón con publicidá sobre centros visitables de Llangréu (MUSI y Cine Felgueroso). D’otra manera, L’Ayuntamientu de Llangréu también pon a disposición del sector hosteleru y la ciudadanía en xeneral el so Serviciu de Normalización Llingüística p’ayudalos na traducción personalizada de platos y menús en llingua asturiana.

Esta campaña ponla en marcha l’Ayuntamientu de Llangréu en collaboración cola Conseyería de Cultura y Turismu del Principáu d’Asturies, la Xunta pola defensa de la llingua asturiana y la Rede de Normalización Llingüística nos Conceyos. Amás d’en Llangréu, la campaña tamién va ponese en marcha nos conceyos y mancomunidaes de L.lena, Siero, Mieres, Mancomunidá del Cabu Peñes y Mancomunidá de la Sidra.

Énte la recién instalación de les plaques qu’integren el conxuntu escultóricu nos Xardinos de la Reina de Xixón que namás lleven la pallabra “Gijón”, N’Ast desixe’l respetu a la llingua asturiana y que s’incluya tamién “Xixón”, talamente comu llegalmente correspuende al men¬cionáu topónimu, denuncien.

N’Ast atalanta que siendo’l topónimu oficial de la ciudá “Gijón/Xixón”, nun ye de re¬cibu qu’esta obra incluya namás el términu españolizáu despreciando al términu asturianu, inda más cuando al paecer, “esti conxuntu escultóricu va ser el fondu de la mayoría de les imaxes que los turistes lleven del so pasu per Xixón”.

Pa N’Ast la falta de compromisu del Ayuntamientu Xixón pa cola llingua asturiana ye evidente, de tala miente que na imensa mayoría de los sos documentos, la llingua asturiana nun apaez per dengún llau, mesmamente, el topónimu Xixón ye evitáu cola mayor desver¬goña, comu ye’l casu equí denunciáu, y la únicu usu y “defensa” que se fai de la nuesa llin¬gua ye’l caltenimientu d’una “oficina de la llingua” decorativa dafechu que talamente paez dedicase a entretener “a los del bable” en cuentes d’iguar polítiques clares y concretes de normalización llingüística na ciudá.

L’Asociación Cultural Infonoreña, lleva un añu furrulando y quieren dar cuenta d’ello nun actu públicu que se va celebrar el próximu vienres, 18 de marzu, nel Salón d’Actos de la Casa Cultura de Noreña, de magar les ocho la tarde. Nel actu espondrán los sos oxetivos y qué actividaes tienen plantegaes y en procesu anguaño, asina como desplicar les formes en que pueden ser d’utilidá pal restu d’asociaciones, organizaciones y vecinos del conceyu más pequeñu d’Asturies.

El Conceyu de Corvera organiza esti cursu que va desenvolvese del 18 d’abril al 30 de mayu, los llunes y miércoles de 17:00 19:00 hores, nel Centru Sociocultural de Les Vegues. Son 30 hores en total. Ye un cursu de baldre pa tolos interesaos.

Les inscripciones puen facese nel centru sociocultural de Les Vegues o llamando al númberu 985 514 001 de la la centralita o al 610 748 604.

Esti llunes 14 de marzu entama la décima edición de la Selmana Cultural de Cangas, cola proyección y presentación de “Cenizas del cielo”, cuntando cola presencia del Director de la película, José Antonio Quirós. Sedrá nel Auditoriu Casa la Cultura “Palaciu d’Oumaña” dende les 19:30 hores. Mañana miércoles los actos siguen col conciertu del “Coru Mineru de Turón”, nel Teatru Toreno de margar les siete y media la tarde. Les actividaes van siguir hasta’l sábadu 19.

El Conceyu de Xixón convoca sovenciones p’actividaes culturales al traviés de la Fundación Municipal de Cultura, Educación y Universidá Popular. L’Asociacionismu cultural cunta con 229.700 euros, pa producciones artístiques hai un presupuestu de 28.000, pa teatru y danza. 33.000, los centros d’enseñanza y entidaes educatives van recibir 74.800 euros, mientres que la cultura tradicional va cuntar con 21.300 euros, los xuegos y deportes tradicionales asturianos, con 5.000 y les asociaciones de vecinos de la zona rural, 14.500 euros. Les bases completes tán nel BOPA del 4 de marzu, rematando’l plazu’l 9 d’abril.

El Conceyu Universitariu pol Asturianu (CUPA) va pesllar el plazu p’apuntase al so I Cursu Básicu d’Asturianu del CUPA’l 28 de febreru, una esperiencia formativa qu’entama en collaboración cola Academia de la Llingua Asturiana y Caxa Rural y que va celebrase nel conceyu de Xixón ente marzu y mayu.

El cursu, que se va facer na sede del Conseyu de la Mocedá de Xixón (Avda. Manuel Llaneza 68), va entamar en marzu y va cuntar con 35 hores llectives. L’horariu que se plantega, a falta de apautalo colos alumnos, ye los llunes y miércoles de 19 a 21 hores. El preciu de la inscripción ye de 30 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, hasta’l 27 de febreru de 2011.

Dende’l CUPA animen a participar nesti cursu “que va sirvir pa dar una conocencia básica y adaptada al nivel del alumnáu de la llingua asturiana”, deprendiendo les normes ortográfiques, vocabulariu y otres cuestiones, con unes clases “amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura asturianes”.

L’Ayuntamientu de Llangréu, en collaboración cola Conseyería de Cultura, y Turismu, pon en marcha dos cursos de Llingua Asturiana, ún d’ellos de nivel aniciu y l’otru d’afondamientu. Los cursos van ponese na Casa la Cultura de Sama y van tener llugar los llunes, martes, miércoles y xueves n’horariu de 19:00 a 21:00 hores.

Trátase de dos cursos de 30 hores caún y son de baldre, les persones qu’asistan y superen los cursos recibirán el so correspondiente certificáu acreditativu. El plazu de matrícula yá ta abiertu y acaba mesmu día que darán empiezu los cursos, esto ye’l llunes 28 de febreru a les 19:00 hores. Si quies apuntate pues facelo mandando los tos datos personales (nome, N.IF., señes y nu teléfonu) al Centru de Referencia de la Cultura y la Llingua Asturiana Casa de los Alberti ( C/ San Fernando, 33900, Ciañu), llamando al teléfonu 984282925, al Fax 985698629 o mandando un corréu a llingua@ayto-langreo.es

La formación política MAS Corvera, va presentar al so candidatu nel marcu d’un congresu públicu que va celebrase esti martes 22 de febreru a les 16:30 hores na Aula Polivalente del Centru Social de Les Vegues. Amás, va facese una curtia esposición del nuevu proyectu políticu de Corvera a cargu del secretariu xeneral, Xicu Mata.

Con motivu del Día de la Llingua Materna güei, llunes 21 de febreru, el Conceyu de Piloña va facer una presentación pública del Serviciu de Normalización Llingüística y de la primer de les campañes sociales que va ver la lluz nesti conceyu, el “Llibru del naciatu”, un álbum que se va regalar a tolos y toles recién ñacíes al traviés del Serviciu de Pediatría del ambulatoriu de L’Infiestu.

Nel llibru, presentáu nun formatu guapu y vistosu, pue dise siguiendo y apuntando la evolución de los rapacinos dende les ecografíes, les primeres semeyes, la güelga, les vacunes, les ñavidaes, les primeres vacaciones hasta los 3 años quedando como un guapu recuerdu d’esta época.

La presentación va ser el llunes 21 a les 11 nel salón d’actos de la Casa Cultura de L’Infiestu, y va contar cola presencia de Camilo Montes Díaz, Alcalde de Piloña, y Paula Cristóbal Caso, responsable del Serviciu de Normalización Llingüística.