Conceyos

La Casa de la Llingua (Serviciu de normalización llingüística del Ayuntamientu de Corvera) entama la campaña pal comerciu de Corvera “Cartelos de Rebaxes”. La campaña consta de 3 cartelos: Rebaxes; Segundes y Últimes pal fomentu, visualización y normalización de la llingua asturiana, que ye l’ oxetivu de la Casa de la Llingua, amás d’ufiertar a los comerciantes un serviciu gratuitu pa collaborar col comerciu de prosimidá.

Tolos comerciantes interesaos en facese colos cartelos, siempre de baldre, han averase al Centru Sociocultural de Les Vegues, a esti serviciu de normalización llingüística asitiáu nel primer pisu. La campaña cunta cola collaboración de l’Axencia de Desenrrollu Llocal (A.D.L.) y l’ ayuda de la Conseyería de Cultura y Turismu.

Hasta’l 30 de xunu va tar abierta la esposición de semeyes del autor, yá fináu, Francisco Ruiz Tilve (Uviéu, 1909–1988), que como nos desvelen Francisco Crabiffosse y la so fía Carmen Ruiz-Tilve nel catálogu de la esposición, “foi un importante aficionáu a la fotografía que desenvolvió’l so trabayu dende 1940 hasta’l so fallecimientu”. Como fotógrafu tuvo unos gustos bien definíos: el monte, la vida rural, l’arquitectura moderna, los puertos de mar, los ríos o los bodegones, que compartió con otros munchos fotógrafos del so tiempu.

Foi unu de los más significativos representantes de la fotografía asturiana de posguerra, d’una xeneración de fotógrafos qu’a partir de la vocación individual arrexuntar n’asociaciones pa recuperar, dende les cenices, el papel de la fotografía, faciendo memoria de l’Asturies de la so dómina cola voluntá de tresmitir un legáu inmaterial. Con esta esposición los organizadores quieren qu’esi legáu emocional, calteníu na so obra, “seya conocíu, pa entender esa encruciada que determinó nuevos aldos pa la fotografía, ente la mirada retrospectiva y l’enganía de abrir a otros horizontes”.

Les fotografíes de Ruiz Tilve caracterícense pol so valor documental, fotografiando asuntos pocu trataos pola fotografía asturiana, y tamién pola so calidá estética, que ye la resultancia de la so sensibilidá y de la so conocencia de la fotografía contemporanea.

L’archivu fotográficu de Francisco Ruiz Tilve foi donáu en 2005 polos sos fíos, Carmen Ruiz-Tilve Arias y Francisco Ruiz Arias, a la Fototeca d’Asturies del Muséu del Pueblu d’Asturies. Ta integráu por unes quince mil semeyes, que se parten de la manera siguiente: 5.668 negativos en blancu y negru, de 60 x 60 mm., realizaos ente 1940 y 1980; siete álbumes que contienen los contactos de la mayor parte d’esos negativos, y alredor de 5.500 dispositives en color de 35 mm, tomaes ente 1964 y 1987. A too esto hai que sumar una colección de llibros y revistes de fotografía que pertenecieron a Ruiz Tilve, dellos trofeos llograos en concursos fotográficos y dalgún material del so llaboratoriu.

La donación de materiales ye unu de los mayores trunfos d’un muséu, porque l’oxetivu últimu d’esta institución, afirmen dende’l Muséu ye’l d’amontar, caltener y enseñar a valorar el patrimoniu cultural”. Con esi actu, recuerden “el donante dexa un patrimoniu particular a la comunidá, y esos bienes, qu’enantes yeren d’esfrute priváu, pasen a ser un bien públicu”.

La esposición de Francisco Ruiz Tilve. Obra fotográfica, 1940 – 1970 pudo vese l’añu pasáu n’Uviéu, na Sala d’Esposiciones del Edificiu Hestóricu de la Universidá d’Uviéu, y nel mes d’agostu va tar nel Muséu de la Sidra, en Nava. La esposición cunta col patrocino de Caxastur.

El Serviciu de Normalización L.lingüística de Cangas tien en marcha la fase segunda de la so campaña de normalización social del asturianu ¡Erre qu’erre! Reduz, recicla, reutiliza. Esta campaña ta destinada al sector terciariu, al comerciu, y con ella’l serviciu pretende apurrir a los comercios material reutilizable pa, d’una parte, contribuyir nestos tiempos de crisis económica a reducir los costes derivaos de bolses, etc., y, d’otra, concienciar a la sociedá en materia de reducción de residuos, al tiempu que se mira pola sostenibilidá mediuambiental; pa ello, ufiértanse de baldre unes bolses de material reutilizable colos trés colores del reciclaxe y unos cuaderninos de papel reciclao con dalgunos conseyos mediuambientales y espaciu p’apuntar lo que se quiera.

Los establecimientos cangueses que quieran facese con estos materiales nun tienen más que ponese en contactu col Serviciu de Normalización L.lingüística y sumase a la campaña. Dende’l Serviciu animen a la participación “Yá ía hora d’eicha-y una mano al mundu”, afirmen.

El Grupu de Dinamizadores La Cla, xuntu cola collaboración d’otres entidaes como l’Asociación Xuvenil Esnala, el Grupu de Facebook Trueque y Mar de Borrina realicen l’III Mercadín de Trueque de Xixón el próximu domingu día 29 de mayu dende les 16:30 hores hasta les 20:30 hores nel Centru Municipal Integráu Atenéu de la Calzada.

Ta previstu, tamién, mercáu de trueque pal domingu 19 de xunu, nel CMI d’El Llano.

Anque esti espaciu ta destináu pa mozos ente 13 y 35 años, el Mercadín nun tien llende d’edá, polo que pueden averase tantes persones como deseyen. Lo único necesariu p’allegar a esti alcuentru ye llevar cualquier cosa, habilidá o conocencia que queramos intercambiar por otra y…un cobertor pa montar el puestu. Puedes informate meyor nel teléfonu 637 955 737.

L’Ayuntamientu de Llangréu y l’Agrupación d’Etnografía y Folclor Reija, en collaboración cola Conseyería de Cultura y Turismu d’Asturies organicen esta quinta muestra cultural Tolo d’Asturies que va tener llugar los díes 7 y 8 de mayu. Tolo d’Asturies 2011 presenta una montonera actos que, dende primer hora de la mañana’l sábadu, van poner folixa y cultura tradicional nel recintu ferial de la estación central d’autobuses de Llangréu. Demientres los dos díes va desenvolvese’l yá clásicu mercáu tradicional d’artesanía y gastronomía y los talleres pa neños (animación, xuegos y deportes tradicionales, artesanía…) xunto cola Feria del discu y el llibru n’asturianu y de l’actuación de bandines tradicionales y grupos de baille.

A les 12:00h del sábadu 7 de mayu va tener llugar la inauguración oficial de Tolo d’Asturies cola intervención d’autoridaes y l’actuación de la Banda Gaites Conceyu Llangréu. Darréu d’esti actu inaugural va empezar la venta nel mercáu y l’actuación del gran Jerónimo Granda. A les 22:00 hores va tener llugar el gran conciertu de la feria cultural d’esti añu, l’escenariu de la carpa del recintu ferial va acoyer la música d’Héctor Braga y banda, N’Arba y Los Berrones. Un gran conciertu pa la noche d’esti sábadu con xente de la cuenca, del valle y la vuelta a los escenarios d’un grupu yá míticu de la música asturiana.

El domingu va siguir l’animación de bandines y grupos de bailles y l’actividá del mercáu dende les 11:00 hores hasta la clausura la feria. A les 13:00 va actuar la Banda Música de Llangréu. N’acabando esta guapa actuación va tener llugar la sesión vermú d’Asturianada con escenariu llibre y la participación de Marisa Valle Roso, . Yá de tarde, a les 18:00 va facese l’homenaxe a la tradición de la pandereta con un conciertu a cargu de Pandereteres de Fitoria y Les Filanderes. Como remate, el gran Xuacu Amieva va dar un conciertu pa pone-y el ramu a esta quinta edición de Tolo d’Asturies que va clausurase a les 21:00 hores del domingu 8 de mayu.

Güei, vienres 6 de mayu, a les 11 hores, nel Barriu de La Llera, en Sama (Llangréu) va facese’l descubrimientu d’una placa dedicada al escritor, na cai Mánfer de la Llera. A les 12:00 hores, nel IES Cuenca del Nalón (La Felguera, Llangréu) habrá’l tradicional actu escolar de celebración de la Selmana de les Lletres Asturianes cola entrega de premios del «XVI Concursu de Poesía y Dibuxu» y del «VIII Concursu de Cartelismu», amás de l’actuación del grupu Duerna.

El Serviciu de Normalización Llingüística de la Mancomunidá de la Comarca la Sidra, en xunto cola asociación “La Compaña del Ronchel”, de Villaviciosa, va entamar otra vuelta’l repartu de 5000 lletres de pan pa conmemorar el Día de les Lletres Asturianes. Esta iniciativa entamóla nel añu 2004 l’asociación maliaya “La Compaña del Ronchel”, pal ámbitu del conceyu de Villaviciosa, y desde l’añu pasáu faise cargu d’ella la Mancomunidá, que la estiende a tol ámbitu de la Comarca la Sidra.

Ye, según los sos organizadores, una actuación que “cuntó con gran aceptación n’anteriores ediciones” y a la que se pretende da-y continuidá, “como forma de promoción del Día de les Lletres Asturianes a nivel comarcal, y de revalorización de la nuestra hestoria lliteraria”, afirmen.

Esti añu, el poema escoyíu p’acompañar a les lletres de pan ye “Como palombes lloques”, del poeta maliayu Xose Manuel Valdés Costales, siguiendo la llinia d’aprovechar un día tan señaláu pa esparder la obra d’autores llocales.

Les lletres de pan, acompañaes pol poema, repartiránse per escueles, institutos, cases de cultura, ayuntamientos y chigres de los seis conceyos qu’integren la comarca, col envís de llegar al mayor y más variáu númberu de xente posible.

La Oficina de Normalización Llingüística de Samartín del Rei Aurelio va celebrar la 32 Selmana de les Lletres Asturianes con dellos actos. El martes 3 va inaugurase la esposición “Escritores n’asturianu de Samartín del Rei Aurelio” na Casona del Bravial de Blimea. Amás, el 5 de mayu, a les diez de la mañana, va presentase’l llibru “Pelegrinos del abismu”, de Lluis Portal, un actu nel que van participar alumnos del IES Juan José Calvo Miguel entrevistando al autor.

El 6 de mayu, coincidiendo col Día de les Lletres, el Conceyu va repartir bolses conmemoratives peles tiendes de Samartín del Rei Aurelio.

La Selmana en Facebook

L’actividá más llamativa de toles entamaes por esta Oficina de Normalización Llingüística va ser la entamada na rede social Facebook, pola que les persones que xuban testos n’asturianu a la so muria van entrar nun sortéu de llibros n’asturianu. Les bases pueden consultase nel perfil de la Oficina en Facebook.

El Conceyu d’Unidá Popular de Xixón, formáu por Conceyu Abiertu, Izquierda Anticapitalista y Frente de la Izquierda presentó yá’l so programa electoral. Dende la coalición planteguen que toles publicaciones del conceyu vaigan en castellán y asturianu, “conxugando artículos nes dos llingües n’igualdá de condiciones”, amás quieren “emplazar” a los representantes municipales a facelo tamién nes sos intervenciones públiques.

La so formación va afalar tamién que tolos “elementos d’imaxe y les rotulaciones de toles dependencies, llocales, empreses, centros municipales culturales o deportivos, etc.,” se faigan n’asturianu, desendolcando una política de fomentu y usu de la llingua asturiana na Enseñanza, Centros Municipales, Museos, Biblioteques, instalaciones deportives, etc. y aplicando “de manera real” la toponimia asturiana nel Conceyu.

Les CUPX proponen alfabetizar al personal municipal, en primer llugar nos puestos d’atención al públicu, desendolcar campañes per sector -hostelería, comerciu, alimentación, pescaderíes, talleres…-, con nomes de les coses y productos n’Asturianu, al traviés de cartelos, cartes, llistes d’alimentos, etc.

Tamién los ciudadanos van cuntar con campañes d’alfabetización, poniendo a disposición de quien lo riquieran los educadores precisos.

El programa completu puede consultase n’asturianu nel enllaz qu’ufre Asturnews.

Programa completu del CUPX

L’Asociación fotográfica “Asturias a contraluz” de Llaviana celebra la so Primer Maratón Fotográficu “Un día en Llaviana”. La participación ta abierta a cualesquier persona provista de cámara dixital. La tema va tratar de reflexar cualesquier momentu, llugar, actividá cotidiana, etc., del Conceyu de Llaviana.

L’actividá va facese los díes 30 d’abril y 1 de mayu, pudiendo facese les inscripciones hasta’l 25 d’abril de 2011. Les bases completes tán na webwww.asturiasacontraluz.com