Conceyos

El centru cultural Valey de Castrillón abrió’l 15 de setiembre’l plazu de matrícula de les escueles culturales y de la Escuela de Música, con cursos de llinguaxe musical, artesanía decorativa, creación lliteraria, patchwork, encuadernación, etc. Ente los cursos, unu d’asturianu, que va ser l’únicu que seya de baldre. Les inscripciones podrán facese hasta’l 26 de setiembre, de cuatro y media a ocho y media la tarde nel Centru cultural Valey, en Piedrasblancas.

La nueche del 20 al 21 de setiembre de 1921 ye una fecha entá recordada en Grau. Nun paró de llover dende los diez de la nueche hasta los cinco de la madrugada, lo que provocó que s’anubriera la vega y se desbordare’l Ríu Martín dende la media. Esti pequeñu regatu, que malapenes baxa agua demientres el branu, convirtióse nuna gran riega qu’abasnaba tolo que tenía per delantre. La fuercia de les agües foi tal que provocó’l fundimientu de delles cases próximes, una d’elles el xalé de Valentín Sarasola “Tumballobos” y el fallecimientu d’una vecina.

La prensa nacional y estatal fízose ecu de los sucesos de Grau, créase una Xunta de Socorru pa recaldar fondos pro-damnificaos. En payares d’esi mesmu añu 1921, el Ministeriu de la Gobernación y robláu pol rei Alfonso XIII, y como atención a la desgracia sufierta polos habitantes de Grau concédese-y a la villa’l títulu de siempres benéfica, y al so Conceyu’l tratamientu d’Ilustrísimu.

Coincidiendo col 90 aniversariu d’esta efeméride, la Conceyalía de Cultura del Conceyu de Grau y el Círculu d’Estudios Pramarenses convoquen pal martes día 20 de setiembre a les 14 hores y na Sala Polivalente de la Casa de Cultura de Grau una rueda de prensa abierta tamién al públicu polo xeneral pa presentar un proyectu de monumentu n’alcordanza d’esta enllenada y bien rellacionáu tamién col xalé de “Tumballobos”.

Nel actu intevendrán la Conceyala de Cultura Mª Victoria Fernández, José Luís Arguelles García como autor d’un estudiu sobre la enllenada y el mentáu xalé, y Emilio Argüelles en representación del Círculu d’Estudios Pramarenses.

Dientro de los actos de l’Arribada 2011 va celebrase un alderique nel que se va facer analís del estáu del idioma asturianu nel ámbitu de los conceyos, dende les midíes empobinaes dende les alministraciones al movimientu reivindicativu, pasando peles acciones xurdíes na sociedá civil.

Esta tertulia, que se fadrá nel patiu del CCAI el sábadu 10 de setiembre, a partir de les 17:00 hores, cuntará cola participación de representantes de los servicios de normalización llingüística que s’afayen nel País, de miembros de delles entidaes asturianistes de defensa de derechos civiles y de responsables d’iniciatives culturales en pro de la oficialidá del asturianu.

Pola mor de la so temática, esti D’Alderique ábrese especialmente a la participación del públicu asistente.

La Casa de los Alberti de Ciañu, en Llangréu, acueye la esposición Lesbianes fotografiaes por lesbianes. Esta amuesa de semeyes qu’organiza l’asociación Asina–Llangréu en collaboración con XEGA, COGAN y el Conceyu de Llangréu, pudiendo visitase hasta’l próximu día 20 de setiembre, tolos díes de 8:00 a 15:00 hores y los xueves tamién de 17:00 a 21:00 hores.

Esta ye la segunda edición de la esposición colectiva itinerante PHOTOLES Lesbianes fotografiando lesbianes que l’asociación COGAN vien poniendo en marcha dende l’añu 2005 y que tien como principal envís el de consiguir la visibilidá lésbica. L’oxetivu de la esposición ye’l de dar amuesa de la riqueza y diversidá de la realidá lésbica, los sos matices y contrastes, amás d’ufiertar a les autores de les fotografíes un espaciu pa dar a conocer la so obra. La esposición PHOTOLES ye un certame que dende l’añu 2005 pon en marcha l’asociación COGAN y que percorriendo chigres, cafés, pubs, centros culturales, llibreríes y demás espacios fai visible la realidá lésbica.

La Conceyalía de Cultura de Grau, col sofitu de la Conseyería d’Asturies, entama una edición nueva de los sos Cursos de Llingua Asturiana p’Adultos, en nivel I y II. La inscripción ye gratuita y puede facese hasta’l martes 13 de setiembre na Biblioteca Municipal de Grau. Los cursos van durar trés meses, dos díes a la selmana, con Xosé Lluís Rodríguez Alberdi como profesor.

El voceru del partíu Foru Asturies en Siero, Eduardo Martínez Llosa, pidió al Conceyu un mayor prespuestu pa la rotulación topónimica, pa la que se cunta esti añu con una sovención del Gobiernu d’Asturies de 1.892 euros.

Pa FAC ye necesaria una bona rotulación billingüe que termina cola mala señalización de munchos llugares del conceyu.

Énte l’anuncia de que’lConceyu de Xixón sacó a llicitación el suministru y personalización de les tarxetes ciudadanes pa los dos años vinientes, por un preciu global de 221.000 euros, dende l’asociación N’Ast esixen que la edición de tales tarxetes se faiga de manera billingüe, combinando y asitiando’l mesmu nivel les llingües asturiana y castellana.

La realización de tarxetes ciudadanes de calter billingüe, recuerden, “ye perfechamente posible dientro del actual marcu xurídicu”, polo que dende la so perspeutiva, afirmen, “nun hai denguna escusa pa nun recoyer la llingua propia del País, de la nuesa cultura y de gran parte de la ciudadanía”.

Dientro de les fiestess de Santiago y Santa Ana, esti domingu 17 va tener llugar la Feria d’Artesanía de Santiago nos Parques de Grau. La organización cuerre a cargu de la Conceyalía de Feries y Mercaos.

Amás a les nueve la nueche va celebrase un pase de la obra “El caballero de Olmedo” a cargu de l’Aula de Teatru de la Universidá de Murcia. L’actuación va facese nel Frontón del Parque de Riba.

La Casa de la Llingua (Serviciu de normalización llingüística del Ayuntamientu de Corvera) entama la campaña pal comerciu de Corvera “Cartelos de Rebaxes”. La campaña consta de 3 cartelos: Rebaxes; Segundes y Últimes pal fomentu, visualización y normalización de la llingua asturiana, que ye l’ oxetivu de la Casa de la Llingua, amás d’ufiertar a los comerciantes un serviciu gratuitu pa collaborar col comerciu de prosimidá.

Tolos comerciantes interesaos en facese colos cartelos, siempre de baldre, han averase al Centru Sociocultural de Les Vegues, a esti serviciu de normalización llingüística asitiáu nel primer pisu. La campaña cunta cola collaboración de l’Axencia de Desenrrollu Llocal (A.D.L.) y l’ ayuda de la Conseyería de Cultura y Turismu.

Hasta’l 30 de xunu va tar abierta la esposición de semeyes del autor, yá fináu, Francisco Ruiz Tilve (Uviéu, 1909–1988), que como nos desvelen Francisco Crabiffosse y la so fía Carmen Ruiz-Tilve nel catálogu de la esposición, “foi un importante aficionáu a la fotografía que desenvolvió’l so trabayu dende 1940 hasta’l so fallecimientu”. Como fotógrafu tuvo unos gustos bien definíos: el monte, la vida rural, l’arquitectura moderna, los puertos de mar, los ríos o los bodegones, que compartió con otros munchos fotógrafos del so tiempu.

Foi unu de los más significativos representantes de la fotografía asturiana de posguerra, d’una xeneración de fotógrafos qu’a partir de la vocación individual arrexuntar n’asociaciones pa recuperar, dende les cenices, el papel de la fotografía, faciendo memoria de l’Asturies de la so dómina cola voluntá de tresmitir un legáu inmaterial. Con esta esposición los organizadores quieren qu’esi legáu emocional, calteníu na so obra, “seya conocíu, pa entender esa encruciada que determinó nuevos aldos pa la fotografía, ente la mirada retrospectiva y l’enganía de abrir a otros horizontes”.

Les fotografíes de Ruiz Tilve caracterícense pol so valor documental, fotografiando asuntos pocu trataos pola fotografía asturiana, y tamién pola so calidá estética, que ye la resultancia de la so sensibilidá y de la so conocencia de la fotografía contemporanea.

L’archivu fotográficu de Francisco Ruiz Tilve foi donáu en 2005 polos sos fíos, Carmen Ruiz-Tilve Arias y Francisco Ruiz Arias, a la Fototeca d’Asturies del Muséu del Pueblu d’Asturies. Ta integráu por unes quince mil semeyes, que se parten de la manera siguiente: 5.668 negativos en blancu y negru, de 60 x 60 mm., realizaos ente 1940 y 1980; siete álbumes que contienen los contactos de la mayor parte d’esos negativos, y alredor de 5.500 dispositives en color de 35 mm, tomaes ente 1964 y 1987. A too esto hai que sumar una colección de llibros y revistes de fotografía que pertenecieron a Ruiz Tilve, dellos trofeos llograos en concursos fotográficos y dalgún material del so llaboratoriu.

La donación de materiales ye unu de los mayores trunfos d’un muséu, porque l’oxetivu últimu d’esta institución, afirmen dende’l Muséu ye’l d’amontar, caltener y enseñar a valorar el patrimoniu cultural”. Con esi actu, recuerden “el donante dexa un patrimoniu particular a la comunidá, y esos bienes, qu’enantes yeren d’esfrute priváu, pasen a ser un bien públicu”.

La esposición de Francisco Ruiz Tilve. Obra fotográfica, 1940 – 1970 pudo vese l’añu pasáu n’Uviéu, na Sala d’Esposiciones del Edificiu Hestóricu de la Universidá d’Uviéu, y nel mes d’agostu va tar nel Muséu de la Sidra, en Nava. La esposición cunta col patrocino de Caxastur.