Conceyos

La cabeza del conceyu d’El Franco, A Caridá, va acoyer estos díes les Terceiras Sesióis d’Estudio del Occidente, un alcuentru pa falar de la llingua y lliteratura d’Entrambasaguas, dende estremaos campos d’estudiu: la música, les nueves tecnoloxíes, la etnografía, la filoloxía… L’entamu va ser güei, vienres 19, a les cinco y media la tarde, cuntando con José A. Fernández Vior pa falar d’“A composición como mecanismo expresivo”, Ángel Fernández pa falar de molinos y otros inxenios hidráulicos n’El Franco, Ricardo Saavedra pa falar de la lliteratura na música n’eonaviegu, Xosé Antón González Riaño pa comentar delles cuestiones alredor de la escolarización da fala nesta fastera d’Asturies, rematando con una mesa redonda dedicada a la “Normalización socieducativa da fala eonaviega” moderada por Iván Iglesias “Cazarón”.

El sábadu abre les sesiones Xosé Lluis García Arias, falando de testos medievales de la fastera eonaviega. María José Fraga dedicará la so conferencia a falar de poesía eonaviega, mientres que Benxamín Méndez va dedicar la so ponencia a “Sistema d’Información Xeográfica y continuum llingüístico: úa proposta metodolóxica”.

Ruth González falará d’“A identidá eonaviega a través da súa lliteratura” y Marisa López Diz zarrará la mañana moderando una mesa sobre “Lliteratura y llingua”. Darréu va celebrase una visitada guiada al taller d’Herminio Álvarez.

Yá pela tarde Ágata García Castro va falar d’“A fala na rede”, mientres que Pablo Texón echará una güeyada a la poesía contemporánea n’eonaviegu. Aurora Bermúdez va facer un repás a la infantil y xuvenil. Zárrense les Sesióis con una mesa redonda sobre “A música na fala”, na que van participar músicos como Ambás, Marisa López Diz, Andrés Rodríguez Moteavaro y Ángel Berdiales. Les Sesióis acabarán con un conciertu de Mestura.

Porgrama completu d’actividaes

La militancia de la organización audirá a la “Espicha FIG 2012” pa informar a los maliayos al rodiu de l’actividá del nuesu coleutivu y p’animalos a tomar la iniciativa pol asturianu. Amás taremos d’estrenu, ya que los asistentes tendrán la oportunidá de facese con un mapa de la división parroquial d’Asturies -col so nome tradicional- a un preciu de solo 5€.

La espicha celebraráse nel recintu de la bolera del Atenéu Obreru de Villaviciosa (C/Marqués de Villaviciosa, 2) a partir de les 20:00h y cuntará con delles actuaciones musicales” pol preciu de 15 euros.

Esti próximu xueves 18 d’ochobre, a les siete la tarde, la Casona del Bravial, en Samartín del Rei Aurelio, va cuntar cola presencia de Titu Manzano, presidente de l’asociación Amigos de Parres, que mos va falar sobre la cultura, el deporte y l’asociacionismu nuna actividá fecha con motivu del hermanamientu de los ríos Seya y Nalón. Amás, nel mesmu espaciu, tovía pue visitase hasta’l 19 d’ochobre la esposición fotográfica sobre’l Descensu del Seya.

La XIV Selmana Cultural qu’entama l’Asociación Amigos de Grau presentóse oficialmente’l llunes na Casa Cultura del conceyu moscón. L’actu incluyó una conferencia impartida pol director de fotografía de cine Antonio de Benito y la proyección de dos curtios del Moscón d’oru d’esti añu, Julio de la Fonte: «Crónica de una voluntad» y «Almas perdidas».

El programa d’actos va prosiguir el xueves 4 d’ochobre, tamién a les 20 h., cola conferencia «Desafíos tecnolóxicos de nuesa era», impartida pol científicu uvieín Amador Menéndez, que dende 2009 ye investigador del Institutu Tecnolóxicu de Materiales d’Asturies (Fundación ITMA) y del Centru d’Investigación de Nanomateriales y Nanotecnoloxía (CINN), y va rematar el sábadu 6 d’ochobre cola ceremonia de los Moscones d’oru», que va entamar a la una de la tarde na Capiella los Dolores. Los gallardonaos d’esta edición son, na categoría nacional-internacional, La Nueva España y, nel apartáu llocal, el director de cine Julio de la Fuente.

Amás, del 1 al 15 d’ochobre va poder trate la Esposición La Nueva España «75 años como’l periódicu de los asturianos» que percuerre la hestoria d’esti periódicu al traviés de delles de les sos portaes más emblemátiques con momentos hestóricos como l’empiezu de la II Guerra Mundial en 1939, l’intentu de golpe d’Estáu en 1981, los atentaos terroristes n’Estaos Xuníos en 2001 y en Madrid en 2004, la boda de los Príncipes d’Asturies celebrada esi mesmu añu, el primer campeonatu de Fórmula 1 llográu pol pilotu asturianu Fernando Alonso en 2005, l’ascensu a Primer División del Real Uviéu en 1998 y del Sporting en 2008 o’l títulu de campeona del mundu col que s’alzó la selección española de fútbol en 2010. L’amuesa va poder visitase de llunes a vienres, de nueve de la mañana a nueve de la nueche ininterrumpidamente. Amás, los visitantes van tener a la so disposición el suplementu gratuitu de 108 páxines que’l periódicu publicó’l pasáu 19 d’avientu, coincidiendo col día del so aniversariu.

L’amuesa complétase con 19 paneles con reproducciones de les páxines de La Nueva España dedicaes a los 19 años d’esistencia de los Moscones d’Oru.

La organización Iniciativa pol Asturianu anunció que foi convidada pol Conceyu de Xixón a participar nel Conseyu Asesor de la Llingua Asturiana con dos miembros, que nun reciben remuneración nenguna. L’órganu cunta con asociaciones, sindicatos, partíos y otres organizaciones presentes en Xixón p’asesorar al Conceyu na fechura de la política llingüística y va aconceyar esta tarde a les siete nel despachu del Conceyal de Cultura de Xixón, Carlos Rubiera.

Nesta primer xunta na que participa Iniciativa pol Asturianu, la organización anunció que va poner sobre la mesa delles cuestiones de recién, como la falta d’usu de la toponimia nos autobuses del conceyu, “un claru pasu atrás na normalización de los usos toponímicos”, espliquen, asina como nel festival “Gijón de sidra”, nel qu’esti añu tamién observen “pasos atrás nel usu de la toponimia oficial”. Amás, fadrán una valoración del primer añu y mediu de mandatu del nuevu gobiernu del Conceyu de Xixón no que cinca a la política llingüística.

Iniciativa pol Asturianu quier convertise nesti Conseyu Asesor de la Llingua Asturiana “en voceru de la sociedá de la sociedá xixonesa, polo que recueye toles propuestes de cuestiones a tratar nel so corréu contautu@iniciativapolasturianu.org”

El Conseyu Asesor de la Llingua desendolcará, según los sos estatutos, funciones d’informe y propuesta, faciendo efectivu l’exerciciu de los derechos llingüísticos de la ciudadanía de Xixón. Amás, podrá afalar l’alcuerdu de planes específicos col Principáu d’Asturies pa facer efeutivu l’usu del asturianu nel Conceyu. El Conseyu pue tamién facer propuestes pa esparder los derechos llingüísticos y campañes de sofitu a los mesmos, y proponer actuaciones que promueven la cultura asturiana. Afitar criterios ya informar les solicitúes de sovención relatives a la promoción del asturianu, y sobre la distribución de les partíes del conceyu dedicaes pa eso, amás de proponer la organización d’alcuentros, cursos, xornaes, conferencies y esposiciones venceyaes cola promoción del asturianu con participación multidisciplinaria, autonómica, estatal o internacional. Dende’l Conseyu propondráse amás la edición de llibros, revistes o documentos y la creación d’un fondu documental al rodiu de los asuntos de competencia del Conseyu Asesor de la Llingua qu’integrarán l’Archivu del Conceyu.

La prensa escrita asoleyaba esta mañana la posibilidá estudiada por Foru y PP na Mancomunidá de Carreño y Gozón de pesllar dellos servicios, ente los que tán el Serviciu de Normalización Llingüística, que funciona dende 2004. La Xunta pola Defensa de la Llingua Asturiana ya Iniciativa pol Asturianu respondieron a esta amenaza con delles notes de prensa nes que coinciden na so defensa de la continuidá d’esti serviciu.

Pa la Xunta “esta situación toma carácter surrealista porque, no que se refier a la Oficina de Política Llingüística, ta financiada con cargu a la Dirección Xeneral de Política Llingüística de la Conseyería d’Educación, Cultura y Deporte; colo que nun supón carga económicapa los citaos conceyos”. La XDLA camienta que detrás d’esta propuesta nun hai otro que “intereses rancios y contrarios al exerciciu de polítiques de valoración y normalización del patrimoniu llingüísticu de los sos conceyos”, solicitando la rectificación.

Iniciativa pol Asturianu camienta que s’usa l’aforru económic “como sida”, pues recuerden a les formaciones d’estos conceyos que’l Serviciu “fináncialu’l Gobiernu d’Asturies al traviés d’unes sovenciones añales”. Amás, la organización va más allá, “los servicios ufríos por esti Serviciu suponen un valor añadíu pa los conceyos mancomunaos, pues l’usu del asturianu xenera un valir estra a productos y servicios d’empreses y otres entidaes, amás de sofitar el caltenimientu del idioma, un bien cultural y económicu, pa les futures xeneraciones”.

La organización pide a la Mancomunidá del Cabu Peñes que refuercien esti SNL y busquen una solución estable col Gobiernu d’Asturies, al traviés d’un conveniu que dea estabilidá al organismu, y nel que los conceyos de la Mancomunidá “se comprometan daveres col procesu de normalización llingüística nos sos territorios”.

El Conseyu de Gobiernu del Principáu aprobó la determinación de les formes toponímiques correspondientes al conceyu d’Illas. Con esti son cincuenta los conceyos asturianos que yá tienen oficializada la so toponimia tradicional, que darréu de la so espublización nel BOPA ye d’usu obligáu. Esto conceyu con cabeza en La Caizuela llenda al norte con Castrillón y Corvera, al sur con Les Regueres y Llanera, al este con Corvera y Llanera y al oeste con Candamu.

La Xunta de Toponimia d’Asturies tien como oxetivu de trabayu acabar la revisión de los topónimos correspondientes a parroquies y noyos de población de los 78 conceyos asturianos. Frutu del llabor desenrrolláu dende 2004, 50 conceyos asturianos yá tienen oficializada la so toponimia tradicional, otros 13 tan en fase de tramitación y queden 15 por iniciar l’espediente, según informoran apocayá dende la propia Conseyería de Cultura.

Dende va dellos años l’Asociación de Trabayadores de la Normalización Llingüística vien denunciando la inestabilidá y temporalidá de los Servicios de Normalización de los conceyos d‘Asturies. Agora denuncien qu’esti añu “de los dieciséis SNL que deberíen tar funcionando solo tienen actividá trece y eso que dende primeros de marzo los Conceyos recibieron notificación de la Conseyería de Cultura y Deporte de que teníen aprobaes les ayudes pal mantenimientu de los SNL”. A siete meses andaos del 2012 y depués de tener ingresada la sovención, pa esta organización “nun s’entiende qué ye lo que pasa colos SNL de Llaviana, Illas-Castrillón y Mancomunidá Ozcos-Eo”.

La organización denuncia “la dificultá de la situación pa la normalización llingüística y del agraviu comparativu qu’esto supón pa colos usuarios d’estos servicios de normalización y pal personal llaboral”, y nun entienden por qué “unos conceyos tienen el so SNL abiertu tol añu, otros como Mieres, Siero o Corvera funcionen 6 meses o’l casu de Llaviana, y Ozcos-Eo, y Castrillón y Illas que nin siquiera abrieron”. Pa l’Asociación Trabayadores de la Normalización Llingüística “la única respuesta ye que cadecen de la desconsideración, dexadez y falta de compromisu de los responsables de los Conceyos”.

Recuerden que l’únicu procesu que ta abiertu ye na Mancomunidá Ozcos-Eo dende’l mes d’abril, polo que-yos abulta que “yá ye hora de que se dea una resolución a esa plaza”.

Nesti momentu, ta abiertu’l periodu nes que les entidaes llocales soliciten sovención pa la normalización social del asturianu polo que, afirmen, “ye tovía más irresponsable nun tener al personal técnicu preparando proyectos, col agravante de que la mayoría de los SNL nun cuenten con financiación del Conceyu”. El plazu acaba’l 30 de xunetu, colo que-yos paez “cásique imposible qu’esos SNL tean funcionando pa cumplir cola convocatoria de la sovención”.

Va pa casi diez años qu’abrieron los primeros servicios de normalización nos conceyos d’Asturies y nesti tiempu, rematen na nota de prensa univada estos díes a lso medios “dende l’Asociación de Trabayadores de la Normalización Llingüística trabayamos por atopar soluciones a la inestabilidá llaboral y a la temporalidá de los SNL, presentando propuestes a la Dirección Xeneral de Política Llingüística pa camudar esta situación. La respuesta nestos años últimos foi inorales y nun apurrir soluciones a los problemes que se vienen denunciando, polo que solicitamos a la Dirección Xeneral nueva, diálogu y esfuerzu pa solucionar estos problemes”.

Pa los miembros d’esta organización “ta parándose, con una falta clara de compromisu, el trabayu pola normalización y dignificación del asturianu y del gallego-asturianu, situación a la que ha pone-y fin l’acción decidida de la Dirección Xeneral de Política Llingüística, esixendo a los Conceyos compromisu seriu y efectivu y planificación nel procesu de normalización”.

La Dirección Xeneral de Política Llingüística, reiteren “tien que garantizar que los SNL puedan desenvolver el so trabayu nunes condiciones estables y dignes. El métodu pol que se financien estos servicios nun ye l’afayadizu y nengún añu garantizó la continuidá de tolos SNL. Esto ye una situación demostrable, basta con echar un güeyu pa lo que vien pasando munches veces nos conceyos o mancomunidaes que tienen estos servicios”.

Dende el ATNLL piden a los Conceyos de Llaviana, Illas-Castrillón y a la Mancomunidá Ozcos-Eo, que convoquen les places pa los Servicios de Normalización Llingüística col oxetivu de que la normalización social del asturianu y del gallego-asturianu seya un procesu activu y estable.

L’investigador Daniel Cueli va dar una charra titulada “Los llavaderos de la Comarca de la Sidra”, na Fundación José Cardín Fernández. Sedrá’l vienres viniente, 13 de xunetu, a partir de les ocho la tarde. L’actividá forma parte de la programación “Branu Cultural 2012” y celebraráse na Aula de la Fundación, allugada nel númberu 2 de la cai Eloisa Fernández, en Villaviciosa.

La Oficina de Normalización Llingüística de Samartín del Rei Aurelio en collaboración cola asociación d’Empresarios y Comerciantes de Samartín del Rei Aurelio ECOSAM entama’l repartu de la cartelería pa la campaña de REBAXES d’esti branu. Los comerciantes que nun pertenezan a esta asociación pueden solicitar estos materiales ensin nengún costu nel teléfonu 985656110 o al traviés del corréu lletrónicu llingua@smra.org