Conceyos

El día 1 de xunetu de 2015 entraba a valir la Llei de Seguridá Ciudadana, popularmente conocida como Llei Mordaza, y la reforma del Códigu Penal, impulsaes y aprobaes pol Gobiernu del Partíu Popular. y dambes normes dibuxen un panorama xurídicu que fai sumir, na práctica, tolos nuesos drechos y llibertaes públiques, pudiendo considerase’l mayor retayu de drechos y llibertaes realizáu mientres la democracia, hasta’l puntu que la ONU yá realizó declaraciones nes que s’apura al Estáu español a retirar la Llei Mordaza porque amenacia con violar los drechos y llibertaes fundamentales de les persones y fraya la mesma esencia del drechu de manifestación”. Por mor d’ello Conceyu Abiertu por Noreña vieno acabante de presentar una moción al respeutive al plenu pal alderique de la mesma.

Coles mesmes, el Conseyu d’Europa tamién solicitó la so retirada por “atentar escontra’l drechu d’aconceyamientu y de manifestación y frayar los drechos fundamentales”. Cuestiones como la llegalización de les llamaes devoluciones en caliente d’inmigrantes al traviés d’una disposición adicional que modifica la Llei d’Extranxería, xunto cola conculcación de drechos como la tutela xudicial ente determinaes denuncies, de forma que discrecionalmente a criteriu de los cuerpos y fuercies de seguridá del estáu podrán imponese sanciones d’hasta 600.001 euros por cuestiones como la negativa a identificase, la negativa a disolver aconceyamientos na cai o manifestaciones, anque sían pacífiques (sentaes), evitar un desahuciu, la ocupación de cualquier espaciu común, públicu o priváu, la venta ambulante non autorizada, alteriar l’orde n’actos públicos, deportivos, culturales, espectáculos, oficios relixosos o otres xuntances numberoses cuando nun sían constitutives de delitu…

Pela so parte, diverses asociaciones de la xudicatura, la fiscalía y l’abogacía yá s’amosaron en contra de la entrada a valir d’esta llei y de la reforma del códigu penal, asina por casu, la Unión Progresista de Fiscales (UPF) emitió un comunicáu nel qu’amuesa “el so enérxicu refugu a la reforma que, amás d’incluyir la nomada prisión permanente revisable, esto ye, la cadena perpetua o l’internamientu pa tola vida –incompatible y contraria al artículu 25.2 de la Constitución Española (CE)-, trai un aumentu xeneralizáu de les penes, frutu de derivar llexislativa políticu-criminal marcadamente reaccionaria”.

Na moción dizse tamién que d’otramiente, tolos grupos parlamentarios, sacante CiU y PNV, roblaron un recursu d’inconstitucionalidá contra la Llei Mordaza, que foi almitíu a trámite pol Tribunal Constitucional y nel que s’esplica que la reforma del códigu penal “contravien la prohibición de penes inhumanes (art. 15.1 de la CE), fraya los principios de proporcionalidá y de culpabilidá y arriendes d’ello, el drechu a la llibertá (art 17 CE), ye contraria al principiu de llegalidá penal (art. 25.1 CE), porque nun ye una pena determinada y contraria al mandatu de resocialización (art 25.2 CE), por cuanto prácticamente acuta toa posibilidá de reinserción yá que la primer revisión va producise a los 25 años, y anque se produza dicha revisión en forma de suspensión de la conderga, el penáu va siguir sometíu a esa conderga tornando a prisión si camuden les circunstancies que motivaron la suspensión, anque sían ayenes al reu y non controlaes por él, inclusive si trescurriera bona parte del periodu de suspensión condicional”.

Con too y con ello, teniendo en cuenta que’l Conceyu resulta ser l’alministración pública más averada a la ciudadanía, qu’amás tien de velar polos intereses, drechos y llibertaes de los sos vecinos y vecines y siendo conocedores de les graves consecuencies que tienen pa colos drechos y llibertaes de la ciudadanía l’aplicación de la Llei Mordaza y de la reforma del códigu penal plantegada, que atenta escontra dellos artículos de la Constitución Española, Conceyu Abiertu por Noreña propón ente’l plenu del Conceyu de Noreña’l siguiente alcuerdu:

1. Manifestar la oposición a la entrada a valir de la Llei de Seguridá Ciudadana (Llei Mordaza) y a la Reforma del Códigu Penal plantegada.

2. Manifestar la voluntá d’esti Conceyu de torgar, por tolos medios llegales nel so alcance, qu’esti Conceyu collabore na aplicación de la Llei Mordaza y la Reforma del Códigu Penal.

3. Solicitar al Gobiernu del Estáu Español la retirada d’esta Llei y l’anulación de la Reforma del Códigu Penal, ya la dimisión de les persones responsables d’aprobar tal atentáu escontra los drechos y llibertaes de les persones.

4. Solicitar al Parlamentu Asturianu que se solidaricen colo espuesto nesta moción y en consecuencia manifiesten la so oposición a esta Llei y traten de torgar la so aplicación, por tolos medios llegales nel so alcance.

5. Unviar copia del presente alcuerdu a la Presidencia del Gobiernu del Estáu Español y a la Xunta del Principáu.

El que fuera Alcalde de Bimenes ente 1979 y 1999, Joaquín García Gutiérrez, va ser el pregoneru de la XIX Fiesta de la Oficialidá de la Llingua Asturiana de Bimenes, que se va cellebrar el sábadu 4 de xunetu na capital del conceyu, Martimporra. Precisamente ente los méritos de “Xuacu”, como popularmente ye conocíu, ta el de ser la persona que más puxó pola Declaración d’Oficialidá del Asturianu en Bimenes, aprobada demientres el so mandatu, concretamente’l 5 de xunetu de 1997.

Pa esta edición de la folixa’l Conceyu Bimenes presenta un programa d’actividaes bien completu qu’inclúi, amás del pregón y de la intervención institucional del Alcalde, baille y música tradicional, xinta popular, el II Concursu d’Escanciadores de Bimenes (puntuable pal Campeonatu d’Asturies 2015) y delles actuaciones musicales nocherniegues, ente les que rescamplen les de la cantante de tonada Alicia Villanueva Megido y del grupu de folk progresivu N’Ochebre.

La novedá d’esti añu ye la cellebración del I Campeonatu de Bolos pola Oficialidá, nel que participen les peñes bolístiques El Biche, Villa de la Sidra Titi, El Chalupu y Rozaes. Les semifinales del campeonatu van tener llugar el vienres día 3 y la final el sábadu 4, nel trescursu de la fiesta. Y pal domingu día 5 queda la final del XVI Concursu de Gaita de Bimenes.

Programa completu na páxina web del Conceyu

Castropol va acoyer el sábadu 6 de xunu’l VI Alcuentru de Pueblos Exemplares, entamáu pola Fundación Princesa d’Asturies en collaboración col Conceyu de Castropol, que la so comunidá vecinal recibió en 1997 el Premiu al Pueblu Exemplar d’Asturies, que concede añalmente la Fundación.

L’actu, al que tán convidaos los representantes de los galardonaos a lo llargo de les primeres venticinco ediciones y tolos alcaldes asturianos, va empezar a les 11 hores na Casa de la Cultura de Castropol.

Programa La xornada va empezar con unes palabres de bienvenida de la directora de la Fundación Princesa d’Asturies, Teresa Sanjurjo, y cola intervención del alcalde de Castropol, José Ángel Pérez García, y darréu van pronunciase delles siguientes conferencies.

L’Asociación de Trabayadores de la Normalización Llingüística vieno acabante denunciar con un comunicáu’l “recorte escomanáu y malintencionáu de les hores de llingua asturiana nel nivel de bachilleratu propuestu nel borrador del currículu mandáu a los centros educativos asturianos”. Pala Asociación qu’acueye a los trabayadores de les oficines de normalización espardíes pelos conceyos asturianos esti retayu ye inaceptable porque “fai pasar de cuatro a una hora d’asturianu en bachiller, etapa educativa yá condenada a númberos mínimos pola imposibilidá d’apaecer como materia evaluable na PAU y que yá contaba, pa más, con una ratio esixida pa impartila”.

A los trabayadores de les oficines abúlta-yos “bien llamativo – y agora, énte les noticies conocíes, bien ofensivo – el fechu de que va bien poco la Conseyería afalagaba los nuestros oyíos falando de la necesidá de crear la especialidá docente de llingua asturiana y pidía esplicaciones al Ministeriu por negánoslo, afirmando que si les competencies yeren de calter autonómicu, Asturies diba exercer la so competencia y diba regular la especialidá del profesoráu d’asturianu”.

Como los nuesos llectores recordarán achacabase la situación de la llingua asturiana na Educación reglada al mesmu Ministru, amosando lo que pala ATNL ye “un victimismu que nun ye propiu d’un cargu qu’ha asumir les sos propies responsabilidaes ensin volcar les propies miseries pa fuera y asina desfacese del pesu del fardel”. Na so opinión agora tenía la oportunidá de demostrar lo que daveres quería y podía facer pa col asturianu; ” y ta demostrándolo bien: nun hai otru enfotu per parte de la Conseyería d’Educación que desprestixar, arrasar y sentenciar de muerte una intervención educativa necesaria dafechu nel procesu de recuperación y sobrevivencia d’una llingua; arrastrando con ello al desamparu total a tou un colectivu d’enseñantes que, d’equí a bien poco, ta condergáu a desapaecer”.

El comunicáu que la ATNL espardiera esti vienres fai alcordanza de que “la educación – dende les estayes más pequeñes d’infantil y de 0 a 3 añinos hasta’l bachiller, pasando pel restu – ye un pegollu fundamental pa desarrollar y afitar los conocimientos llingüísticos y un ataque como esti, nun va facer más qu’argayar y esmoronar lo poco fecho hasta agora nel nuestru sistema educativu y d’enseñanza del asturianu”. Y fina diciendo que “nun ye tiempu de mázcares, ye momentu de destapase y de dicir a la sociedá asturiana qué quier el Gobiernu d’Asturies pa cola llingua asturiana. Y asina, pidimos que se retire esti borrador de currículu y se trabaye por desarrollar una educación pal asturianu digna y propia del valir de cualesquier llingua”.

Una nueva propuesta de “compromisu de billingüismu” presentada nel Conseyu Asesor de la Llingua que nun suponía nin un euru d’inversión y ayudaría na normalización del asturianu nun foi sofitada pol conceyal de cultura del Ayuntamientu de Xixón, Carlos Rubiera, históricu militante asturianista, ,emtamtes que l’apoyaben delles entidaes Na xunta del Conseyu Asesor de la Llingua Asturiana del Conceyu de Xixón celebrada esti martes pasáu afitose esta circunstancia que l’asociación critica fondamente.

El representante d’Iniciativa pol Asturianu nesti muérganu, Inaciu Galán, presentó una nueva propuesta cola que pidieron al conceyal Rubiera qu’adoptara un compromisu de billingüismu pol que tolos materiales asoleyaos pol so departamentu apaecieren nes dos llingües, castellán y asturianu. Rubiera volvió a dicir non a esta propuesta.

Dende Iniciativa pol Asturianu llamenten “la postura de Rubiera, que pese a tener una trayectoria destacada en defensa de la llingua asturiana nel pasáu, nestos cuatro años nun dio un solu pasu na normalización de la llingua asturiana, siguiendo namás coles más qu’insuficientes acciones de promoción yá establecíes n’anteriores mandatos”.

La propuesta d’Iniciativa pol Asturianu, a la que dieron el so sofitu cola so firma los representantes d’otres entidaes nel Conseyu Asesor, Berto Peña, presidente de l’asociación cultural L’Arribada, y Montse Blanco, represenante de Reciella, families pol asturianu, nun supondría nin un euru de gastu estraordinariu pa la Conceyalía d’Educación, Cultura, Festexos y Universidá Popular, yá que, como se recuerda nel documentu “los materiales asoleyaos, impresos nuna llingua o dos, salvo que mos indique lo contrario’l Sr. Rubiera, tienen el mesmu preciu” y la torna d’estos materiales puede asumila la Oficina de Normalización Llingüística cola que cunta la Conceyalía.

La propuesta refugada pol conceyal Rubiera ta dientro del marcu llegal y respuende al mandatu de les Ordenances Municipales de Normalización Llingüística de Xixón aprobaes pol plenu nel añu 2008 y ensin llevar alantre dende entós, “namás ye preciso tener la voluntá política de facelo y nun queremos pensar que nun la tien”, recordó’l representante d’Iniciativa pol Asturianu a lo llargo de la so intervención.

Iniciativa pol Asturianu dio tamién el so sofitu a la propuesta fecha nel Conseyu pa que se-y pida al plenu del Conceyu de Xixón qu’emita una declaración institucional que solicite a la Conseyería d’Educación d’Asturies y tamién al Ministeriu d’Educación qu’acaben por solucionar esta reclamación hestórica. Agora, sigún Iniciativa, “falta conocer si los grupos políticos presentes nel plenu (PSOE, FORO, PP ya IX) sofiten esta iniciativa, yá que ye necesariu’l consensu pa poder sacala alantre”.

Esti prósimu vienres 2 de xineru a les 7.30 de la tarde na Casa da Cultura de Veiga va presentase’l llibru “Parzamique en Brañavara / Conversación en Brañavara” del autor Franquín Fredo de Carbexe.

Samartín del Rei Aurelio va poner en marcha una campaña pa la recoyida de pequenes Borrafes d’Aparatos Eléctricos y Electrónicos (RAEEs) del 10 d’ochobre al 10 de payares, por aciu l’allugamientu de contenedores específicos na Casona del Bravial, en Blimea, el Telecentro de Sotrondio y la Casa de la Cultura d’El Apurro. Los beneficios d’esta acción, auspiciada por Cogersa y la fundación Ecotic, van destinarse al proyectu de sofitu a mozos en riesgu d’esclusión social de la Bioescuela de Cáritas n’Asturies.

Dende’l Consistoriu encamiéntase a la población a participar nesta campaña promovida por Cogersa depositando nos contenedores habilitaos pequenos aparatos eléctricos o electrónicos en desusu, tales como ordenadores, batedores, teléfonos móviles, microondes…etc. Per cada kilogramu de borrafa recoyida nel marcu d’esta campaña, Cogersa y Ecotic van donar un euru a la Bioescuela de Cáritas n’Asturies.